4 Twagĩrĩirũo Kũhoya Igũrũ Rĩgiĩ Maũndũ Marĩkũ?

KWĨRĨKANAGA atĩ Ihoya rĩa Mwathani nĩrĩo rĩcokagĩrũo mũno nĩ Akristiano rĩrĩa marahoya. Akorũo ũndũ ũcio nĩ wa ma kana ti wa ma, andũ aingĩ matitaũkagĩrũo nĩ muoroto wa ihoya rĩu, rĩrĩa na ciugo ingĩ rĩtagwo Ihoya rĩa Ithe Witũ. Andũ aingĩ nĩ macokagĩra ihoya rĩu kiugo gwa kiugo o mũthenya, na kaingĩ mathaa-inĩ ma mũthenya. No Jesu ndeendaga ihoya rĩu rĩhũthagĩrũo na njĩra ĩyo. Tũroiga ũguo nĩkĩ?

Jesu atanarutana ihoya rĩu ooigire ũũ: “Rĩrĩa ũkũhoya ndũgacokagĩre maũndũ o marĩa marĩa.” (Mathayo 6:7) Jesu angĩerire andũ ciugo iria marĩcokacokagĩra makĩhoya, angĩakorirũo agĩka mũgarũ na ũndũ ũcio aakoretwo arutana. Handũ ha ũguo, Jesu eendaga gũtũruta maũndũ marĩa twagĩrĩirũo kũhoya igũrũ rĩamo, na eendaga gũtuonia maũndũ marĩa twagĩrĩirũo kũiga mbere meciria-inĩ rĩrĩa tũrahoya. Rekei twarĩrĩrie maũndũ macio na njĩra ndikandikĩru hanini. Ihoya rĩu rĩrĩ thĩinĩ wa Mathayo 6:9-13.

“Ithe witũ ũrĩ igũrũ, rĩĩtwa rĩaku nĩ rĩtherio.”

Kũgerera ciugo icio, Jesu eendaga kũririkania arũmĩrĩri ake atĩ mahoya mothe magĩrĩirũo kwerekerio kũrĩ Ithe, Jehova. No hihi nĩ ũĩ kĩrĩa gĩtũmaga rĩĩtwa rĩa Ngai rĩkorũo rĩrĩ rĩa bata mũno na kĩrĩa gĩtũmaga rĩbatare gũtherio?

Kuuma o kĩambĩrĩria kĩa andũ, rĩĩtwa rĩa Ngai rĩkoretwo rĩkĩhakwo gĩko. Shaitani thũ ya Ngai, akoretwo akiuga atĩ Jehova nĩ mũheenania na nĩ Mwathani mũũru ũrĩ mwĩyendo, na ndarĩ na kĩhooto gĩa gũkorũo agĩatha ũũmbi wake. (Kĩambĩrĩria 3:1-6) Andũ aingĩ nĩ metĩkanagia na Shaitani na makarutana atĩ Ngai ndarĩ wendo, ndarĩ tha, nĩ wa marakara, kana makarutana atĩ tiwe Mũũmbi. Amwe o na nĩ mokagĩrĩra rĩĩtwa rĩake, makeeheria rĩĩtwa Jehova thĩinĩ wa Bibilia, na makarutana atĩ rĩtiagĩrĩirũo kũhũthĩrũo.

Bibilia ĩrutanaga atĩ Ngai nĩ agaathondeka maũndũ macio mothe. (Ezekieli 39:7) Rĩrĩa ageeka ũguo, o nawe nĩ agaakũhingĩria mabataro maku mothe na akwehererie mathĩna. Na njĩra ĩrĩkũ? Ciugo iria Jesu aacokire kuuga mahoya-inĩ make no itũteithie kuona macokio.

“Ũthamaki waku nĩ ũũke.”

Atongoria a ndini marutanaga maũndũ maingĩ ngũrani megiĩ Ũthamaki wa Ngai. No andũ arĩa maathikagĩrĩria Jesu nĩ maamenyete atĩ anabii a Ngai nĩ maarathĩte atĩ Mesia, o we Mũhonokia ũrĩa Ngai aathurĩte, nĩ angĩgaathamaka Ũthamaki ũrĩa ũngĩkaagarũra maũndũ thĩinĩ wa thĩ. (Isaia 9:6, 7; Danieli 2:44) Ũthamaki ũcio nĩ ũgaatheria rĩĩtwa rĩa Ngai na njĩra ya kũguũria maheeni ma Shaitani, ũcoke weherie Shaitani na mawĩra make mothe. Ũthamaki wa Ngai nĩ ũkaaniina mbaara, mĩrimũ, ngʼaragu, na gĩkuũ. (Thaburi 46:9; 72:12-16; Isaia 25:8; 33:24) Rĩrĩa ũrahoya ũkauga Ũthamaki wa Ngai ũũke, ũkoragwo ũkiuga atĩ ciĩranĩro icio ciothe ihinge.

“Wendi waku nĩ wĩkwo gũkũ thĩ o ta kũu igũrũ.”

Ciugo icio cia Jesu cionanagia wega atĩ wendi wa Ngai nĩ ũgeekwo gũkũ thĩ o ta kũrĩa igũrũ, kũrĩa Ngai aikaraga. Gũtirĩ ũndũ ũgiragia wendi wa Ngai wĩkĩke kũrĩa igũrũ. Mũrũ wa Ngai arĩ kũrĩa igũrũ nĩ aarũire na Shaitani na araika ake, akĩmahoota na akĩmaikia gũkũ thĩ. (Kũguũrĩrio 12:9-12) O ta maũndũ marĩa ma mbere merĩ magwetetwo Ihoya-inĩ rĩa Mwathani, o na ũndũ ũyũ wa gatatũ nĩ ũtũteithagia kũiga meciria-inĩ maũndũ marĩa ma bata makĩria, na nĩmo wendi wa Ngai no ti witũ. Hingo ciothe, wendi wa Ngai nĩguo ũrehagĩra ũũmbi wothe maũndũ mega. Na nĩkĩo Jesu, o ũcio warĩ mũndũ mũkinyanĩru eerire Ithe ũũ: “Reke wendi waku wĩkĩke, no ti wakwa.”—Luka 22:42.

“Tũhe mũgate witũ wa gũtũigana ũmũthĩ.”

Jesu aacokire akĩonania atĩ no tũhoe nginya igũrũ rĩgiĩ mabataro maitũ ithuĩ ene. Ti mahĩtia kũhoya Ngai atũhe mabataro maitũ ma o mũthenya. Gwĩka ũguo o na nĩ gũtũririkanagia atĩ Jehova nĩwe “ũheaga andũ othe muoyo na mĩhũmũ na indo ciothe.” (Atũmwo 17:25) Bibilia yonanagia atĩ atariĩ ta mũciari ũrĩ wendo ũrĩa wendete kũhe ciana ciake kĩrĩa irabatara. Ĩndĩ o ta mũciari ũrĩ wendo, Jehova ndangĩtũhe maũndũ marĩa arona atĩ matigũtũguna.

“Ũtũrekere mathiirĩ maitũ.”

Hihi nĩ ũkoragwo na thiirĩ wa Ngai? Nĩ ũbataraga kuoherũo nĩwe? Andũ aingĩ ũmũthĩ mationaga kwĩhia ta arĩ ũndũ mũnene. No Bibilia ĩrutanaga atĩ mehia nĩmo matũmĩte tũkorũo na mathĩna maingĩ, o na nĩmo matũmaga andũ makue. Nĩ twĩhagia kaingĩ tondũ tũciaragwo tũrĩ na mehia, na mwĩhoko witũ wa gũgaatũũra tene na tene wĩhocetie harĩ wohanĩri wa Ngai. (Aroma 3:23; 5:12; 6:23) Nĩ ũndũ wa kũũmĩrĩria kuona atĩ Bibilia yugaga ũũ: “Wee Jehova ũrĩ mwega na ũkoragwo wĩhaarĩirie kuohanĩra.”—Thaburi 86:5.

“Ũtũhonokagie kuuma harĩ ũrĩa mũũru.”

Hihi nĩ wonaga ta ũrabatara ũgitĩri wa Ngai? Andũ aingĩ nĩ maregaga gwĩtĩkia atĩ “ũrĩa mũũru,” nĩwe Shaitani arĩ kuo. No Jesu aarutanire atĩ Shaitani arĩ kuo, o na akĩmwĩta “mũnene wa thĩ ĩno.” (Johana 12:31; 16:11) Shaitani nĩ ahĩngĩcĩte andũ thĩinĩ wa thĩ ĩno ĩtongoragio nĩwe, na nĩ endaga o nawe gũkũhĩngĩca nĩguo ndũgakorũo na ũrata wa hakuhĩ hamwe na Ithe witũ Jehova. (1 Petero 5:8) O na kũrĩ ũguo, Jehova akoragwo na hinya mũingĩ gũkĩra Shaitani, na nĩ akoragwo ehaarĩirie kũgitĩra arĩa mamwendete.

Maũndũ macio twarĩrĩria na njĩra nguhĩ megiĩ ihoya rĩa mwathani tomo tu twagĩrĩirũo kũhoya igũrũ rĩamo. Ririkana 1 Johana 5:14 ĩtwaraga ũũ igũrũ rĩgiĩ Ngai: “Tũngĩhoya ũndũ o na ũrĩkũ kũringana na wendi wake, nĩ atũiguaga.” Kwoguo ndũkonage ta mathĩna maku marĩ manini mũno ũndũ ũtabatiĩ kũmatwara mbere ya Ngai.—1 Petero 5:7.

No rĩrĩ, hihi nĩ twagĩrĩirũo gwĩciria ũhoro wĩgiĩ ihinda rĩrĩa twagĩrĩirũo kũhoya, na harĩa twagĩrĩirũo kũhoera?