Enda Ũthingu na Ngoro Yaku Yothe

“Ũthingu nĩguo wendete.”—Thab. 45:7.

1. Nĩ kĩĩ gĩgũtũteithia tũrũmĩrĩre “njĩra cia ũthingu”?

JEHOVA atongoragia andũ ake “na njĩra cia ũthingu,” kũgerera Kiugo gĩake na roho wake mũtheru. (Thab. 23:3) No tondũ tũtirĩ akinyanĩru-rĩ, nĩ tũhĩtagia njĩra ĩyo ya ũthingu. Nĩguo tũcokerere gwĩka maũndũ marĩa magĩrĩru, kĩyo nĩ kĩrabatarania. Nĩ kĩĩ gĩgũtũteithia kũgaacĩra? O ta Jesu, no mũhaka twende maũndũ marĩa maagĩrĩru.—Thoma Thaburi 45:7.

2. “Njĩra cia ũthingu” nĩ irĩkũ?

² “Njĩra cia ũthingu” nĩ irĩkũ? “Njĩra” icio ikoragwo iringaine na ithimi cia Jehova cia ũthingu. Thĩinĩ wa Kĩhibirania na Kĩgiriki, kiugo “ũthingu” kĩonanagia “ũrũngĩrĩru,” ũguo nĩ kuuga kũrũmia biũ mĩtugo mĩega. Tondũ ‘ũthingu wa Ngai ũkinyĩte o kũrĩa igũrũ-rĩ,’ arĩa mamũthathayagia nĩwe makoragwo mehokete amonie njĩra nũngĩrĩru iria magĩrĩirũo nĩ kũrũmĩrĩra.—Thab.71:19.

3. Tũngĩĩruta igũrũ rĩgiĩ ũthingu wa Ngai makĩria atĩa?

³ No mũhaka twĩrutanĩrie na ngoro iitũ yothe gũtũũra kũringana na ithimi cia Ngai cia ũthingu nĩguo tũmũkenie biũ. (Gũcok. 32:4) Ũndũ ũcio wambagĩrĩria na kwĩruta ũhoro wa Jehova Ngai kuuma Kiugo-inĩ gĩake, Bibilia. O ũrĩa tũrathiĩ na mbere kwĩruta ũhoro wa Jehova, tũkĩmũkuhagĩrĩria makĩria o mũthenya, noguo tũrĩendaga ũthingu wake. (Jak. 4:8) Ningĩ no nginya twĩtĩkĩre gũtongorio nĩ Kiugo kĩa Ngai kĩrĩa gĩtongoretio nĩ roho hĩndĩ ĩrĩa twabatara gũtua matua ma bata ũtũũro-inĩ.

Caria Ũthingu wa Ngai

4. Gũcaria ũthingu wa Ngai kũhutagia maũndũ marĩkũ?

⁴ Thoma Mathayo 6:33. Gũcaria ũthingu wa Ngai to kũhunjia ũhoro ũrĩa mwega wa Ũthamaki tu. Nĩguo ũthathaiya witũ mũtheru wĩtĩkĩrĩke nĩ Jehova, mĩthiĩre iitũ ya o mũthenya no nginya ĩtwarane na ithimi ciake. Arĩa othe macaragia ũthingu wa Jehova hihi marabatara gwĩka atĩa? No mũhaka ‘mehumbe mũndũ ũrĩa mwerũ, o ũrĩa wombirũo ahaanaine na Ngai, e na ũthingu, na ũtheru ũrĩa uumanĩte na ũhoro-wa-ma.’—Ef. 4:24.

5. Nĩ kĩĩ kĩngĩtũteithia gũtooria maũndũ marĩa matũũragaga ngoro?

⁵ O na tũkĩĩrutanagĩria gũtũũra kũringana na ithimi cia Ngai cia ũthingu, rĩmwe na rĩmwe no tũigue tũkuĩte ngoro nĩ ũndũ wa mahĩtia maitũ. Nĩ kĩĩ kĩngĩtũteithia gũtooria maũndũ marĩa matũũragaga ngoro nĩguo tũhote kwenda na gũthingata ũthingu? (Thim. 24:10) Twagĩrĩirũo nĩ gũthiaga harĩ Jehova kaingĩ na njĩra ya mahoya “twĩ na ũhoro-wa-ma ngoro-inĩ, o na twĩ na wĩtĩkio o ũrĩa mũiganĩru.” (Ahib.10:19-22) Tũkorũo tũrĩ Akristiano aitĩrĩrie maguta kana tũrĩ na kĩĩrĩgĩrĩro gĩa gũgaatũũra gũkũ thĩ-rĩ, tũigaga wĩtĩko witũ harĩ igongona rĩa ũkũũri rĩa Jesu Kristo na ũtungata wake arĩ Mũthĩnjĩri-Ngai ũrĩa Mũnene. (Rom. 5:8; Ahib. 4:14-16) Mũtũmwo Johana aandĩkire ũũ: “Thakame ya Jesu . . . nĩĩtũtheragia tũgathira wĩhia wothe.” (1 Joh. 1:6, 7) Bibilia yugaga ũũ: O na angĩkorũo mehia maitũ “matunĩhĩte ta gakarakũ-rĩ, nĩmagathera o ta ira.” Na githĩ ũcio ti ũndũ mwega mũno Jehova atwĩkĩire kũgerera ũkũũri wa igongona rĩa Mũrũwe ũrĩa endete!—Isa. 1:18.

Rora Indo Ciaku cia Ita

6. Nĩkĩ arĩ ũndũ wa bata kũrora matharaita maitũ ma kĩĩroho?

⁶ Hingo ciothe tũbataraga gũkorũo twĩhumbĩte ‘gako karĩa ka ũthingu,’ tondũ nĩ kamwe ka indo kana matharaita marĩa ma bata mũno ma kĩĩroho kuuma kwĩ Ngai. (Ef 6:11, 14) Kana nĩ hĩndĩ tũreyamũrĩire Jehova kana twekire ũguo mĩaka mĩingĩ mĩthiru-rĩ, nĩ ũndũ wa bata tũikarage tũkĩroraga matharaita maitũ ma kĩĩroho o mũthenya. Nĩkĩ? Tondũ Mũcukani na ndaimono ciake nĩ maharũrũkĩtio gũkũ thĩ. (Kũg.12:7-12) Shaitani e na marũrũ na nĩ oĩ atĩ kahinda gake nĩ kanini. Kwoguo nĩ aratharĩkĩra andũ a Ngai mũno. Hihi nĩ ũmenyete bata wa gũkorũo wĩhumbĩte ‘gako ka ũthingu’?

7. Tũrĩkoragwo na mĩthiĩre ĩhaana atĩa twamenya bata wa ‘gako ka ũthingu’?

⁷ Gako ga gĩthũri kagitagĩra ngoro. Nĩ ũndũ wa kwaga gũkinyanĩra-rĩ, ngoro iitũ ya mũhaano no ĩtũheenie kana ĩtũme tũthugunde maũndũ mooru. (Jer. 17:9) Tondũ ngoro iitũ nĩ ĩkoragwo na mwerekera wa kwĩhia-rĩ, nĩ ũndũ wa bata kũmĩmenyeria na kũmĩkaania. (Kĩam. 8:21) Tũngĩmenya bata wa ‘gako ka ũthingu,’ tũtirĩkarutaga na njĩra ya gũthuura gwĩkenia na maũndũ marĩa Ngai athũire; o na tũtirĩtĩkagĩria meciria maitũ mathugunde maũndũ mooru. Tũtirĩanangaga mahinda maingĩ ma bata tũkĩĩrorera TV. Ithenya rĩa ũguo, tũrĩĩrutanagĩria gwĩka maũndũ marĩa makenagia Jehova. O na tũngĩhĩngĩka kwa ihinda inini na njĩra ya gũthugunda ũndũ mũũru, no tũhote gũũkĩra nĩ ũndũ wa gũteithio nĩ Jehova.—Thoma Thimo 24:16.

8. Tũrabatara “ngo ya wĩtĩkio” nĩkĩ?

⁸ Kĩndũ kĩngĩ kĩa matharaita ma kĩĩroho nĩ “ngo ya wĩtĩkio.” Ĩtũhotithagia ‘kũhoria mĩguĩ ĩrĩa ĩĩ mwaki ya ũrĩa mũũru.’ (Ef. 6:16) Nakuo gũkorũo na wĩtĩkio na kwenda Jehova kuuma ngoro nĩ gũtũteithagia gũthingata ũthingu na gũtũũra njĩra-inĩ ya muoyo wa tene na tene. O ũrĩa tũreruta kwenda Jehova, noguo tũrĩonaga ũthingu wake wĩ wa bata makĩria. Ĩ nayo thamiri iitũ? Ĩtũteithagia atĩa rĩrĩa tũrerutanĩria kwenda ũthingu?

Tũũria Thamiri Njega

9. Tũgunĩkaga atĩa twatũũria thamiri njega?

⁹ Hĩndĩ ĩrĩa twabatithirio, twahoire Jehova atũhe “thamiri njega.” (1 Pet. 3:21) Tondũ nĩ tuonanagia wĩtĩkio harĩ ũkũũri, thakame ya Jesu nĩ ĩhumbĩraga mehia maitũ, na kwoguo tũgetĩkĩrĩka nĩ Ngai. No nĩgetha ũiguano ũcio mwega na Ngai ũtũũre-rĩ, no nginya tũtũũrie thamiri njega. Angĩkorũo rĩmwe na rĩmwe thamiri iitũ nĩ ĩtũcirithagia kana ĩgatũkaania, twagĩrĩirũo nĩ gũkena nĩ ũndũ nĩ ĩraruta wĩra wega. Mĩkaana ta ĩyo yonanagia atĩ thamiri iitũ ndĩtigĩte gũtwarana na njĩra cia Jehova cia ũthingu. (1 Tim. 4:2) No thamiri no ĩteithie na njĩra ĩngĩ arĩa mendete ũthingu.

10, 11. (a) Taarĩria ũndũ ũronania gĩtũmi gĩa gũthikĩrĩria thamiri iitũ ĩmenyenyeretio kũringana na Bibilia. (b) Kwenda ũthingu kũngĩtũrehera gĩkeno kĩnene nĩkĩ?

¹⁰ Rĩrĩa twehia, thamiri iitũ no ĩtũthĩnie kana ĩtũtuĩre. Mwanake ũmwe nĩ aatigire kũrũmĩrĩra “njĩra cia ũthingu.” Akĩgĩa na mũtugo wa kwĩrorera maũndũ ma ũũra-thoni na akĩambĩrĩria kũgucia bangi. Aaiguaga arĩ na ũcuke rĩrĩa athiĩ mĩcemanio ya kĩũngano na akeyona ahaana hinga rĩrĩa athiĩ kũhunjia, kwoguo agĩtiga gwĩkaga maũndũ macio ma Gĩkristiano. Oigire ũũ: “No ndiamenyaga atĩ thamiri yakwa nĩ ĩngĩanjirithirie nĩ ũndũ wa ciĩko ciakwa. Ngĩthiĩ na mbere na mĩthiĩre ĩyo ya ũrimũ kwa ihinda ta rĩa mĩaka ĩna.” Mwanake ũcio agĩcoka akĩambĩrĩria gwĩciria gũcokerera ma. O na gũtuĩka eeciragia atĩ Jehova ndangĩaiguire mahoya make-rĩ, akĩhoya na akĩũria oherũo mehia. Ndagĩka ikũmi citanathira-rĩ, nyina akĩmũceerera na akĩmwĩkĩra ngoro acokerere mĩcemanio. Agĩthiĩ thĩinĩ wa Nyumba ya Ũthamaki na akĩũria mũthuri ũmwe wa kĩũngano erutage nake. Thutha wa ihinda, akĩbatithio, na nĩ acokagĩria Jehova ngatho nĩ ũndũ wa kũmũhonokia.

¹¹ Na githĩ tũtiĩyoneire atĩ gwĩka maũndũ marĩa magĩrĩire nĩ kũrehaga gĩkeno kĩnene? O ũrĩa tũreruta kwenda ũthingu na kũwĩka, noguo tũrĩkoragwo na gĩkeno makĩria tũgĩka maũndũ marĩa makenagia Ithe witũ wa igũrũ. Ta wĩcirie ũndũ ũyũ: Mũthenya nĩ ũroka rĩrĩa andũ othe magaakenagĩra thamiri njega; magaakorũo na mũhianĩre wa Ngai na njĩra nginyanĩru. Kwoguo-rĩ, rekei twende ũthingu ngoro-inĩ ciitũ nĩguo tũkenagie Jehova.—Thim. 23:15, 16.

12, 13. Tũngĩmenyeria thamiri iitũ atĩa?

¹² Tũngĩka atĩa nĩgetha tũmenyerie thamiri iitũ? Rĩrĩa tũreruta Maandĩko na mabuku marĩa mataaragĩria Bibilia-rĩ, harĩ bata kũririkana atĩ “ngoro ya mũndũ mũthingu yambaga gwĩcũrania ũrĩa ĩgũcokia.” (Thim. 15:28) Ta wĩcirie ũrĩa ũndũ ũcio ũngĩtũguna rĩrĩa twacemania na itua rĩgiĩ wĩra. Wĩra mũna ũngĩkorũo nĩ ũraregana biũ na ũrĩa Bibilia yugĩte-rĩ, aingĩ aitũ nĩ tũhũthagĩra ũtongoria ũrĩa tũheetwo nĩ ngombo ĩrĩa ĩĩhokekete na njũgĩ. No hĩndĩ ĩrĩa twagĩa na nganja igũrũ rĩgiĩ wĩra mũna-rĩ, twagĩrĩirũo gũcaria ũrutani wa Bibilia ũrĩa warĩrĩirie ũndũ ũcio, tũwĩcirie wega, na tũhoe igũrũ rĩaguo.a Ũndũ ũmwe twagĩrĩirũo gwĩciria nĩ gwĩthema kũhĩnga thamiri cia andũ arĩa angĩ. (1 Kor. 10:31-33) Makĩria twagĩrĩirũo kũrũmbũiya maũndũ marĩa marahutia ũiguano witũ hamwe na Ngai. Angĩkorũo nĩ tuonaga Jehova arĩ wa ma harĩ ithuĩ-rĩ, nĩ tũrĩĩyũragia ũũ: ‘Hihi ndaruta wĩra ũyũ nĩ ngũtuuria Jehova, na ndĩmũiguithie kĩeha?’—Thab. 78:40, 41.

¹³ Rĩrĩa tũrahaarĩria Wĩruti wa Mũrangĩri kana wa Bibilia wa Kĩũngano nĩ twagĩrĩirũo kũririkana bata wa gwĩcũrania igũrũ rĩa maũndũ marĩa tũrathoma. Hihi hingo ciothe twĩkoraga tũgĩkururĩra macokio o ma kĩũria kĩrĩa kĩandĩke nĩguo tũthiĩ kĩbungo-inĩ kĩrĩa kĩrũmĩrĩire? Gũthoma na njĩra ta ĩyo gũtingĩtũteithia twende ũthingu kana tũgĩe na thamiri ĩraruta wĩra wega. Nĩguo twende ũthingu, twagĩrĩirũo kwĩruta na kĩyo na gwĩcũrania igũrũ rĩa maũndũ marĩa tũrathoma thĩinĩ wa Kiugo kĩa Ngai. Nĩ tũbataraga kĩyo kĩnene mũno nĩgetha twĩrute kwenda ũthingu na ngoro iitũ yothe.

Hũũtĩra na Ũnyotere Ũthingu

14. Jehova Ngai na Jesu Kristo mendaga tũigue atĩa igũrũ rĩgiĩ ũtungata wiitũ mũtheru?

¹⁴ Jehova Ngai na Jesu Kristo mendaga tũkorũo na gĩkeno rĩrĩa tũrĩ ũtungata-inĩ mũtheru. Nĩ ũndũ ũrĩkũ ũngĩtũma tũkoragwo na gĩkeno? Nĩ kwenda ũthingu! Mahunjio-inĩ marĩa ma Kĩrĩma-inĩ Jesu oigire ũũ: “Gũkena-rĩ, nĩ arĩa mahũtagĩra maũndũ marĩa ma ũthingu, na makamanyotera, nĩ gũkorũo nĩ makahũnio.” (Mat. 5:6) Ciugo icio irĩ na bata ũrĩkũ harĩ arĩa meriragĩria kwenda ũthingu?

15, 16. Ngʼaragu na nyota ya kĩĩroho cingĩniinwo na njĩra irĩkũ?

¹⁵ Thĩ ĩno tũratũũra ĩratongorio nĩ ũrĩa mũũru. (1 Joh. 5:19) Tũngĩthoma ngathĩti kuuma bũrũri o wothe, nĩ tuonaga maũndũ maingĩ megiĩ wagi wa tha na ma ũhinya. Andũ arĩa athingu nĩ matangĩkaga ngoro mũno nĩ ũndũ wa ũrĩa andũ maagĩte tha. (Koh. 8:9) Ithuĩ twendete Jehova-rĩ, nĩ tũũĩ atĩ no we ũngĩniina ngʼaragu na nyota ya kĩĩroho ya andũ arĩa meriragĩria kũmenya njĩra cia ũthingu. Ica ikuhĩ andũ arĩa matetigĩrĩte Ngai nĩ marĩeherio biũ, nao arĩa mendete ũthingu matigaacoka gũthĩnio nĩ ciĩko njũru cia arĩa moinaga watho. (2 Pet. 2:7, 8) Na githĩ ũcio ndũgaakorũo arĩ ũndũ mwega mũno!

¹⁶ Tũrĩ ndungata cia Jehova na arũmĩrĩri a Jesu Kristo, nĩ tũmenyaga atĩ arĩa othe mahũtagĩra na makanyotera ũthingu “nĩmakahũnio.” Nĩ makaahingĩrio mabataro mao mothe kũgerera mũbango wa Ngai wa igũrũ rĩerũ na thĩ njerũ “kũrĩa gũtũũraga ũthingu.” (2 Pet. 3:13) Kwoguo rekei tũtigakue ngoro kana tũgegio nĩ ũrĩa ũhinyanĩrĩria na ũhinya ũingĩhĩte na ũgatũma ũthingu ũnyihe thĩinĩ wa thĩ ĩno ya Shaitani. (Koh. 5:8) Jehova, Ũrĩa wĩ Igũrũ Mũno, nĩ oĩ maũndũ marĩa marathiĩ na mbere na ica ikuhĩ nĩ arĩhonokia arĩa othe mendete ũthingu.

Gunĩka nĩ Ũndũ wa Kwenda Ũthingu

17. Tũgunĩkaga atĩa nĩ ũndũ wa kwenda ũthingu?

¹⁷ Thaburi 146:8 nĩ ĩtĩtĩrithagia ũguni wa kũrũmĩrĩra njĩra cia ũthingu. Mũtungi wa Thaburi ĩyo aainire ũũ: “Jehova nĩenda arĩa athingu.” Ta wĩcirie ũndũ ũyũ! Mũnene wa thĩ na igũrũ nĩ atwendete tondũ nĩ twendete ũthingu! Tondũ wa wendo wa Jehova-rĩ, twĩ na ũũma atĩ nĩ arĩtũhingagĩria mabataro maitũ twacaria Ũthamaki mbere ũtũũro-inĩ witũ. (Thoma Thaburi 37:25; Thimo 10:3.) Mũthia-inĩ, thĩ ĩno yothe ĩgaatũũrũo nĩ arĩa mendete ũthingu. (Thim.13:22) Andũ aingĩ a Ngai, makaaheo ngerenwa ya gũtũũra tene na tene thĩinĩ wa paradiso thaka gũkũ thĩ marĩ na gĩkeno nĩ ũndũ wa gũtũũria ũthingu. O na rĩu, arĩa meendete ũthingu wa Ngai nĩ marathimagwo na thayũ wa ngoro ũrĩa ũmahotithagia gũkorũo na ũiguano thĩinĩ wa famĩlĩ ciao na ciũngano-inĩ.—Afil. 4:6, 7.

18. Nĩ maũndũ marĩkũ mega tũngĩka o tũgĩetagĩrĩra mũthenya wa Jehova?

¹⁸ O tũgĩetagĩrĩra mũthenya ũrĩa mũnene wa Jehova-rĩ, no nginya tũthiĩ na mbere gũcaria ũthingu wake. (Zef. 2:2, 3) Nĩ ũndũ ũcio rekei tũkũrie wendo wa ma harĩ njĩra iria nũngĩrĩru cia Jehova Ngai. Ũguo nĩ hamwe na kwĩhumba ‘gako ka ũthingu’ tũtegũkaruta nĩguo kagitĩre ngoro iitũ ya mũhaano. Ningĩ nĩ tũrabatara gũkoragwo na thamiri njega—ĩrĩa ĩrĩtũrehagĩra gĩkeno na ĩgakenia ngoro ya Ngai.—Thim. 27:11.

19. Twagĩrĩiruo gũthiĩ na mbere gũthingata maũndũ marĩkũ, na gĩcunjĩ kĩrĩa gĩkũrũmĩrĩra gĩkwarĩrĩria ũndũ ũrĩkũ?

¹⁹ Jehova “orũragia maitho kũndũ guothe thĩ yothe akĩonania atĩ e na hinya mũno wa gũteithia andũ arĩa mamũrũmagĩrĩra na ngoro yao yothe.” (2 Maũ. 16:9) Icio nĩ ciugo cia gũtũũmĩrĩria mũno rĩrĩa tũgwĩka maũndũ marĩa magĩrĩire thĩinĩ wa thĩ ĩiyũirũo nĩ ngũĩ, ũhinya na waganu! Nĩ ma, mĩthiĩre iitũ ya ũthingu no ĩgegie andũ aingĩ arĩa meyamũranĩtie na Ngai. No nĩ tũgunĩkaga mũno rĩrĩa twarũmia ũthingu wa Jehova. (Isa. 48:17; 1 Pet. 4:4) Kwoguo-rĩ, tũrĩ na ngoro ĩmwe, nĩ twĩrutanĩrie gũthiĩ na mbere kwenda na gũthingata ũthingu na ngoro iitũ yothe. Ĩndĩ, kwenda ũthingu na ngoro ĩmwe nĩ hamwe na gũthũũra ũremi. Gĩcunjĩ kĩrĩa gĩkũrũmĩrĩra nĩ gĩkwarĩrĩria ũguo nĩ kuuga atĩa.

[Kohoro ka magũrũ-inĩ]

Ũngĩcokia Atĩa?

• Kũmenya bata wa ũkũũri nĩ kwa bata nĩkĩ nĩguo twende ũthingu?

• Nĩkĩ arĩ ũndũ wa bata twĩhumbe ‘gako ka ũthingu?’

• Tũngĩmenyeria thamiri iitũ atĩa?

[Mbica karatathi ka 26]

Thamiri ĩmenyeretio wega nĩ ĩtũteithagia rĩrĩa tũgũthuura wĩra