Ũthamaki wa Ngai nĩ Kĩĩ?

“Ũhoro-ũyũ-Mwega wa ũthamaki . . . ”—MATHAYO 24:14.

HĨNDĨ ya Mahunjio make ma Kĩrĩma-inĩ marĩa moĩkaine mũno, Jesu nĩ aarutanire ihoya rĩa kĩonereria, ihoya-inĩ rĩu hakoragwo na ithaithana rĩrĩ: “Ũthamaki waku ũũke.” Andũ milioni nyingĩ nĩ maigĩte ihoya rĩu meciria-inĩ mao na nĩ marĩcokagĩra maita maingĩ. Kũringana na encyclopedia ĩmwe, rĩu nĩrĩo “ihoya rĩrĩa rĩhũthagĩrũo kaingĩ nĩ Akristiano othe thĩinĩ wa ũthathaiya wao.” O na kũrĩ ũguo, aingĩ arĩa macokagĩra ihoya rĩu matiũĩ Ũthamaki nĩ kĩĩ kana ũrĩa ũgeeka rĩrĩa ũgooka.—Mathayo 6:9, 10.

Ũcio ti ũndũ wa magegania. Atongoria a ndini iria ciĩĩtaga cia Gĩkristiano mataaragĩria Ũthamaki na njĩra andũ matangĩhota gũtaũkĩrũo. Ũmwe wao aandĩkire atĩ Ũthamaki wa Ngai “nĩ kĩndũ kĩrĩ na hinya ũkĩrĩte wa mũndũ, . . . ũkuruhanu wa hakuhĩ hamwe na Ngai ũrĩa wĩ muoyo . . . , ũndũ ũrĩa ũrehagĩra athuri na atumia ũhonokio.” Ũngĩ nake oigire atĩ ũhoro ũrĩa mwega wa Ũthamaki nĩ “ũrutani wĩgiĩ kanitha.” Nayo Gategithimo ya Kanitha wa Gatoreki yugaga ũũ: “Ũthamaki wa Ngai nĩ ũthingu na thayũ na gĩkeno thĩinĩ wa Roho Mũtheru.”

No ũthererũo wega makĩria ũngĩthoma karatathi-inĩ ga 2 ka ngathĩti ĩno. Koigaga ũũ: “Ũthamaki wa Ngai, ũrĩa arĩ guo thirikari ya ma ĩhandĩtwo igũrũ, ica ikuhĩ nĩ ũrĩnina waganu wothe na ũgarũre thĩ ĩtuĩke paradiso.” Rekei tuone ũrĩa Bibilia ĩnyitaga ũndũ ũcio mbaru.

Arĩa Magathamaka Thĩ Yothe Ihinda Rĩũkĩte

Ũthamaki nĩ thirikari ĩrathamakwo nĩ mũthamaki. Mũthamaki wa Ũthamaki wa Ngai nĩ Jesu Kristo ũrĩa wariũkirio. Mũnabii Danieli nĩ onirio kĩoneki, Jesu agĩtuwo mũthamaki kũu igũrũ, aandĩkire ũũ: “Ningĩ ngĩcoka ngĩkĩona maũndũ mangĩ na cioneki cia ũtukũ, na atĩrĩrĩ, He mũndũ wahaanaga ta mũrũ wa mũndũ [Jesu] wokire na matu ma igũrũ, Nake agĩkinya harĩ Ũrĩa-ũtũire-ho-kuuma-o-tene [Jehova Ngai], na agĩtwaratwarwo hakuhĩ nake. Nake agĩkĩheo wathani, na riri, o na ũthamaki, Nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre. Naguo wathani ũcio wake nĩ wa mĩndĩ na mĩndĩ, na ndũgathira o rĩ, o rĩ. Naguo ũthamaki ũcio wake ndũkonũhĩka o na atĩa.”—Danieli 7:13, 14.

Ningĩ ibuku rĩa Bibilia rĩa Danieli nĩ rĩonanagia atĩ Ũthamaki ũcio ũngĩkahandwo nĩ Ngai, atĩ nĩ ũkaniina biũ thirikari ciothe cia andũ, na atĩ ndũrĩ hingo ũkeherio o rĩ o rĩ. Gĩcunjĩ gĩa 2 gĩtaaragĩria kĩroto kĩa mũthamaki wa Babuloni, ũrĩa onire mũhianano mũnene mũno, ũrĩa woonanagia kũrũmanĩrĩra kwa mothamaki manene ma thĩ. Mũnabii Danieli nĩ aataũrire kĩroto kĩu. Aandĩkire ũũ “Na rĩrĩ, hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”—Danieli 2:28, 44.

Mũthamaki wa Ũthamaki wa Ngai ndarathamaka arĩ wiki. Hĩndĩ ya ũtungata wake gũkũ thĩ, Jesu nĩ eerire atũmwo ake ehokeku atĩ o, hamwe na andũ angĩ nĩ mangĩkaariũkio mathiĩ igũrũ magaikarĩre itĩ cia Ũthamaki. (Luka 22:28-30) Ndoigire atĩ mangĩgaikarĩra itĩ cia ũnene ta iria cia gũkũ thĩ, tondũ o ta ũrĩa Jesu oigĩte Ũthamaki ũcio ũngĩgakorũo igũrũ. Bibilia yugaga atĩ acio magaathamaka hamwe nake moimĩte ‘mĩhĩrĩga-inĩ yothe na mĩario yothe na nduka ciothe na ndũrĩrĩ ciothe.’ Magaakorũo marĩ ‘athĩnjĩri Ngai nao nĩo a gũgathamakaga thĩ.’—Kũguũrĩrio 5:9, 10.

Ũhoro wa Ũthamaki nĩ Mwega Nĩkĩ?

Ta rora wone atĩ Jesu Kristo aheetwo wathani igũrũ rĩa ‘ndũrĩrĩ ciothe na mĩario yothe na nduka ciothe na arĩa magaakorũo hamwe nake ‘magaathamakaga thĩ.’ Kwoguo-rĩ, nĩa magakorũo marĩ raiya a Ũthamaki ũcio? Nĩ arĩa marathĩkĩra ũhoro ũrĩa mwega ũrĩa ũrahunjio mahinda-inĩ maya. Raiya angĩ nao nĩ arĩa makaariũkio marĩ na kĩĩrĩgĩrĩro gĩa gũtũũra gũkũ thĩ tene na tene.

Bibilia yaragia cara rũkũ ũhoro wa irathimo iria andũ magaakenera rungu rwa Ũthamaki ũcio. Ici nĩ imwe cia irathimo icio:

“Nĩ mũnini mbaara nginya o gĩturi gĩa thĩ: ũta akauunanga, na itimũ agatinania, namo makari ma ita akamacina na mwaki.”—Thaburi 46:9.

“Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. Matigaaka nyũmba, na icokage gũtũũrũo nĩ andũ angĩ, o na kana mahande irio, icokage kũrĩo nĩ andũ angĩ; nĩ gũkorũo o ta ũrĩa matukũ ma mũtĩ maigana, ũguo noguo matukũ ma andũ akwa makaigana, nao andũ akwa arĩa athure nĩmarĩkenagĩra wĩra wa moko mao ihinda iraya.”—Isaia 65:21, 22.

“[Ngai]nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:3, 4.

“Hĩndĩ ĩo maitho ma atumumu nĩmakahingũrũo, o namo matũ ma arĩa mataiguaga nĩmagakunũrũo. Hĩndĩ ĩo mũndũ ũrĩa ũthuaga agacimbicaga o ta thwariga, o naruo rũrĩmĩ rũa ũrĩa ũtahotaga kwaria nĩ kũina rũkaina.”—Isaia 35:5, 6.

“Kwĩ hingo ĩroka arĩa othe me thĩinĩ wa mbĩrĩra makaigua mũgambo wake, [Jesu] na moime kuo, arĩa mekaga wega moimĩre iriũkĩro rĩa muoyo.”—Johana 5:28, 29.

“Arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”—Thaburi 37:11.

Na githĩ ũcio ndũkĩrĩ ũhoro mwega! Ningĩ, ũrathi wa Bibilia ũrĩa ũrĩkĩtie kũhinga wonanagia atĩ, ihinda nĩ rĩkuhĩrĩirie Ũthamaki ũcio wambĩrĩrie gwathana na ũthingu gũkũ thĩ.