Jesu Aatũũraga Atĩa?

“Irio ciakwa nĩ njĩkage ũrĩa ekwenda, ũrĩa wandekirie, ngarĩkie wĩra wake.”​—JOHANA 4:34.

GĨIKAROI-INĨ kĩrĩa Jesu aagweteire ciugo icio kĩguũragia ũndũ ũrĩa warĩ wa bata mũno ũtũũro-inĩ wake. Rũcinĩ ruothe Jesu na arutwo ake maakoretwo marĩ rũgendo-inĩ magereire bũrũri warĩ na irĩma wa Samaria. (Johana 4:6) Nĩ ũndũ wa gwĩciria atĩ gũkinyĩria hĩndĩ ĩyo Jesu no mũhaka angĩakorirũo arĩ mũhũũtu-rĩ, arutwo ake makĩmũringĩrĩria arĩe. (Johana 4:31-33) Macokio-inĩ make, Jesu nĩ aamatarĩirie muoroto wake ũtũũro-inĩ. Harĩ we, kũruta wĩra wa Ngai kwarĩ kwa bata mũno gũkĩra kũrĩa. Kũgerera ciugo na ciĩko ciake, Jesu aatũũraga ekaga wendi wa Ngai. Ũndũ ũcio wakoniĩ maũndũ marĩkũ?

▪ Kũhunjia na kũrutana ũhoro wa Ũthamaki wa Ngai Bibilia ĩgĩtaarĩria ũhoro wa wĩra wa Jesu ũtũũro-inĩ wake yugaga ũũ: “Nake Jesu agĩcanga Galili guothe, akĩrutanaga . . . akĩhunjagia Ũhoro-ũrĩa-Mwega wa ũthamaki wa Ngai.” (Mathayo 4:23) Jesu to kũhunjia aahunjagia, kana kũmemerekia Ũthamaki wa Ngai kũrĩ andũ. Ĩndĩ nĩ aarutaga andũ, akamoonia ũrĩa maagĩrĩirũo nĩ gwĩka, akamataarĩria, na akamahe ihooto njega. Ndũmĩrĩri ĩrĩa Jesu aahunjagia yakoniĩ Ũthamaki.

Hĩndĩ ya ũtungata wake, Jesu nĩ aarutire athikĩrĩria ake Ũthamaki wa Ngai nĩ kĩĩ, na maũndũ marĩa ũgeeka. Rora wone ma ici ikoniĩ Ũthamaki, hamwe na Maandĩko marĩa monanagia ciugo cia Jesu ciĩgiĩ ũndũ ũcio.

▪ Ũthamaki wa Ngai nĩ thirikari ya igũrũ, na Jesu nĩwe Mũthamaki ũrĩa Jehova athuurĩte.​—MATHAYO 4:17; JOHANA 18:36.

▪ Ũthamaki ũcio nĩ ũgaatheria rĩĩtwa rĩa Ngai na ũtũme wendi wake wĩkwo gũkũ thĩ o ta ũrĩa wĩkagwo kũu igũrũ.​—MATHAYO 6:9, 10.

▪ Rungu rwa Ũthamaki wa Ngai, thĩ yothe nĩ ĩkaagarũrũo ĩtuĩke Paradiso.​—LUKA 23:42, 43.

▪ Ũthamaki wa Ngai nĩ ũgũũka o ica ikuhĩ na ũhingie wendi wa Ngai harĩ thĩ.a​—MATHAYO 24:3, 7-12.

▪ Kũringa ciama Jesu oĩkaine mũno ta “Mũrutani.” (Johana 13:13) O na kũrĩ ũguo-rĩ, hĩndĩ ya ũtungata wake wa mĩaka-ĩtatũ-na-nuthu, nĩ aaringire ciama nyingĩ. Ciama icio ciahingirie mĩoroto ta ĩĩrĩ ũguo. Wa mbere, nĩ ciateithirie kuonania atĩ kũna aatũmĩtwo nĩ Ngai. (Mathayo 11:2-6) Wa kerĩ, nĩ cioonanirie ũrĩa angĩgeeka mahinda marĩa mokĩte thĩinĩ wa thĩ yothe arĩ Mũthamaki wa Ũthamaki wa Ngai. Ta rora wone imwe cia ciama iria aaringire.

▪ Nĩ aahoreririe iria rĩarĩ na makũmbĩ manene na agĩkiria huho ciarĩ na hinya.​—MARIKO 4:39-41.

▪ Nĩ aahonirie andũ arũaru, hamwe na itumumu, arĩa mataarĩ na ũhoti wa kũigua, na cionje.​—LUKA 7:21, 22.

▪ Agĩtũma irio ciongerereke, akĩhũnia andũ aingĩ arĩa maarĩ ahũtu.​—MATHAYO 14:17-21; 15:34-38.

▪ Mahinda ta matatũ ũguo, nĩ aariũkirie andũ maakuĩte.​—LUKA 7:11-15; 8:41-55; JOHANA 11:38-44.

Ta hũra mbica ũrĩa ũtũũro ũngĩkorũo ũtariĩ thĩinĩ wa thĩ rungu rwa wathani wa Mũthamaki ta ũcio ũrĩ hinya!

▪ Kũguũria ngumo cia Jehova Ngai Harĩ kũruta andũ ũhoro wĩgiĩ Jehova, gũtirĩ mũndũ ũngĩkĩra Jesu Kristo, Mũrũ wa Ngai. Tondũ “nĩwe waambire kũrigithathwo indo ciothe itaanombwo,” Jesu nĩwe watũũrĩte hakuhĩ na Jehova igũrũ—gũkĩra kĩũmbe kĩngĩ o gĩothe gĩa kĩĩroho. (Akolosai 1:15) Aarĩ na mĩeke mĩingĩ ya kũgĩa na mwĩcirĩrie ta wa Ithe na kwĩruta wendi, ithimi, na njĩra Ciake.

Jesu aarĩ na kĩhooto gĩa kuuga ũũ: “Gũtirĩ mũndũ ũũĩ Mũriũ tiga Ithe witũ; ningĩ gũtirĩ mũndũ ũũĩ Ithe witũ tiga o Mũriũ, o na ũrĩa o wothe Mũriũ endaga kũmũguũrĩria.” (Luka 10:22) Rĩrĩa aarĩ gũkũ thĩ arĩ mũndũ-rĩ, arĩ na wendi na kĩyo kĩnene, Jesu nĩ aaguũririe ũrĩa Ithe atariĩ. Jesu aaragia na akarutana na njĩra ya mwanya; nĩ aaririkanaga maũndũ marĩa eerutĩte rĩrĩa aatũraga gĩikaro-inĩ kĩa roho mbere ya Ngai Ũrĩa wĩ Igũrũ Mũno.​—Johana 8:28.

Maũndũ marĩa Jesu eerutĩte rĩrĩa aarĩ igũrũ megiĩ Ithe, aamarutanire gũkũ thĩ na njĩra hũthũ ũndũ andũ mangĩahotire gũtaũkĩrũo na matũũre kũringana namo.

Wĩcirie ũhoro wa njĩra igĩrĩ cia bata iria Jesu aahũthĩrire kũguũria ũrĩa Ithe atariĩ.

▪ Thĩinĩ wa ũrutani wake Jesu nĩ aamenyithanirie ma ĩgiĩ Jehova—rĩĩtwa Rĩake, muoroto wake, na njĩra ciake.​—JOHANA 3:16; 17:6, 26.

▪ Kũgerera ciĩko ciake Jesu nĩ aaguũririe maũndũ maingĩ mega makoniĩ ngumo cia Jehova. Jesu onanagia ngumo cia Ithe na njĩra nginyanĩru biũ ũũ atĩ, oigaga ũũ: ‘Mũngĩenda kũmenya ũrĩa Awa atariĩ, ndorai arĩ niĩ.’​—JOHANA 5:19; 14:9.

Nĩ tũgegagio mũno nĩ ũtũũro wa Jesu. Tũngĩthuthuria kĩrĩa gĩatũmire akue na tũcoke tũtũũre kũringana na ũrĩa tũkwĩruta, no tũgunĩke na njĩra nene.

[Kohoro ka magũrũ-inĩ]