Nũũ Ũkoragwo Arĩ wa Bata Mũno Ũtũũro-inĩ Waku?

“Nowe wiki Ũrĩa-wĩ-Igũrũ-Mũno o igũrũ rĩa thĩ yothe.” —THAB. 83:18.

1, 2. Nĩkĩ kũmenya o rĩĩtwa rĩa Jehova ti kũiganu harĩ ũhonokio witũ?

NO KŨHOTEKE rita rĩa mbere kuona rĩĩtwa rĩa Jehova nĩ rĩrĩa woonirio rĩĩtwa rĩu thĩinĩ wa Thaburi 83:18. No gũkorũo nĩ waagegire wathoma ciugo ici: “Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” Hatarĩ nganja, kuuma hĩndĩ ĩyo nĩ ũkoretwo ũkĩhũthĩra rĩandĩko rĩu gũteithia andũ mamenye Jehova, Ngai witũ ũrĩa ũtwendete.—Rom. 10:12, 13.

2 O na gũtuĩka nĩ ũndũ wa bata andũ mamenye rĩĩtwa rĩa Jehova-rĩ, kũrĩmenya kuo gwiki ti kũiganu. Ta rora wone ũrĩa mũtungi wa Thaburi aatĩtĩrithirie ma ĩngĩ ya bata harĩ ũhonokio witũ rĩrĩa oigire ũũ: “Nowe wiki Ũrĩa-wĩ-Igũrũ-Mũno o igũrũ rĩa thĩ yothe.” Ĩĩni, Jehova Nĩwe wa bata mũno thĩinĩ wa thĩ yothe. Arĩ Mũũmbi wa indo ciothe-rĩ, arĩ na kĩhooto gĩa kwĩrĩgĩrĩra ciũmbe ciake ciothe cimwathĩkagĩre biũ. (Kũg. 4:11) Kwoguo, nĩ tũkĩagĩrĩirũo nĩ kwĩyũria ũũ: ‘Nũũ ũkoragwo arĩ wa bata mũno ũtũũro-inĩ wakwa?’ Nĩ harĩ bata o mũndũ athuthurie macokio make harĩ kĩũria kĩu!

Thitango Mũgũnda-inĩ wa Edeni

3, 4. Shaitani aahotire kũheenia Hawa atĩa, na moimĩrĩro maarĩ marĩkũ?

3 Ũritũ wa ũndũ ũcio ũngĩoneka wega maũndũ-inĩ marĩa moimĩrire mũgũnda-inĩ wa Edeni. Hĩndĩ ĩyo, mũraika mũremi ũrĩa watuĩkire Shaitani Mũcukani nĩ aaheenirie Hawa mũtumia ũrĩa wa mbere, atongorio nĩ merirĩria make handũ ha gwathĩkĩra watho ũrĩa Jehova aamahete wa gwĩthema kũrĩa itunda. (Kĩam. 2:17; 2 Kor. 11:3) Hawa agĩtĩkĩra kũheenio, na kwoguo akĩagĩra gĩtĩo ũnene wa Jehova. Ndaigana gwĩtĩkĩra Jehova akorũo arĩ We wa bata mũno ũtũũro-inĩ wake. No Shaitani aahotire kũheenia Hawa atĩa?

4 Akĩaria na Hawa, Shaitani aahũthĩrire njĩra cigana ũna cia ũrambu. (Thoma Kĩambĩrĩria 3:1-5.) Mbere, Shaitani ndaahũthĩrire rĩĩtwa rĩa Jehova. Aamwĩtire o “Ngai.” Ngũrani na ũguo-rĩ, mwandĩki wa ibuku rĩa Kĩambĩrĩria aahũthĩrire rĩĩtwa rĩa Jehova mũhari-inĩ wa mbere wa mũrango ũcio wa ithatũ. Kerĩ, handũ ha Shaitani kũgweta ‘watho’ wa Ngai, oririe Hawa ũrĩa Ngai ‘oigĩte.’ (Kĩam. 2:16) Akĩhũthĩra njĩra ĩyo ya ũrambu, kwahoteka Shaitani aageragia kũhũthia watho ũcio. Gatatũ, O na gũtuĩka aaragia na Hawa, Shaitani aahũthĩrire kiugo gĩa kuonania ũingĩ “mũtikanarĩe.” Agĩka ũguo, no gũkorũo aageragia gũtũma Hawa eigue arĩ wa bata mũno—ta arĩ we waagĩrĩirũo nĩ kwaria handũ-inĩ hake na mũthuriwe. Moimĩrĩro maarĩ marĩkũ? Hatarĩ nganja Hawa eetũgĩririe, akĩaria handũ-inĩ hake na ha mũthuriwe, akĩra nyamũ ya thĩ ũũ: “Maciaro ma mĩtĩ ya mũgũnda ũyũ, tũrĩ etĩkĩrie kũmarĩa.”

5. (a) Shaitani aatũmire Hawa ecirie mũno igũrũ rĩa ũndũ ũrĩkũ? (b) Hawa onanirie atĩa aarĩa itunda rĩrĩa rĩakananĩtio?

5 Ningĩ Shaitani nĩ aahongʼorire ma. Onanirie atĩ Ngai ndaahũthĩrire kĩhooto rĩrĩa aathire Adamu na Hawa “mũtikanarĩe mũtĩ o na ũmwe wa mũgũnda ũyũ.” Ningĩ, Shaitani agĩtũma Hawa eigue arĩ wa bata na ningĩ ecirie atĩ nĩ angĩahotire kwagĩria mũtũũrĩre wake. O na ningĩ nĩ aatũmire Hawa ecirie atĩ no atuĩke “ta Ngai.” Macũngĩrĩro-inĩ, Shaitani agĩtũma Hawa ecirie mũno ũhoro wĩgiĩ mũtĩ ũcio na maciaro maguo handũ ha ũkuruhanu wake na Ũrĩa wamũheete indo ciothe. (Thoma Kĩambĩrĩria 3:6.) Ũndũ ũrĩa wa kĩeha nĩ atĩ, aarĩa itunda, Hawa onanirie atĩ Jehova Tiwe waarĩ wa bata mũno ũtũũro-inĩ wake.

Thitango Hĩndĩ ya Ayubu

6, 7. Shaitani eekĩrĩire nganja atĩa wĩkindĩru wa Ayubu, na kwoguo nĩ mweke ũrĩkũ Ayubu aaheirũo?

6 Mĩaka magana maingĩ thutha ũcio, mũthuri mwĩhokeku Ayubu nĩ aagĩire na mweke wa kuonania nũũ waarĩ wa bata mũno ũtũũro-inĩ wake. Rĩrĩa Jehova eeraga Shaitani igũrũ rĩgiĩ wĩkindĩru wa Ayubu, Shaitani aacokirie ũũ: “He! Ayubu-rĩ, kaĩ etigĩrĩte Ngai o tũhũ?” (Thoma Ayubu 1:7-10.) Shaitani ndoigire atĩ ciĩko cia Ayubu ciarĩ njũru. Handũ-inĩ ha ũguo, eekĩrĩire nganja muoroto wa Ayubu. Na njĩra ya waara, oigire atĩ Ayubu aatungatagĩra Jehova nĩ ũndũ wa gwĩcarĩria maũndũ ma kwĩguna no ti tondũ wa wendo. Ayubu nowe wiki ũngĩahotire gũcokia thitango ĩyo, na nĩ aaheirũo mweke wa gwĩka ũguo.

7 Jehova agĩtĩkĩria Shaitani arehere Ayubu icanjama irũmanĩrĩire. (Ayub. 1:12-19) Ayubu eekire atĩa maũndũ magarũrũka? Tũthomaga atĩ Ayubu, “ndaigana kũhĩtia, kana akĩona ta Ngai ekĩte ũndũ ũtaagĩrĩire.” (Ayub. 1:22) Ona kũrĩ ũguo Shaitani ndaatigĩire hau. Agĩthiĩ na mbere kuuga ũũ: “Nĩ gĩkonde kĩa mwĩrĩ gĩkũũrĩte kĩngĩ, ĩĩ-ni, o na mũndũ aaruta indo ciothe iria e nacio nĩguo akũũre muoyo wake.”a (Ayub. 2:4) Shaitani oigire atĩ Ayubu angĩanyamarĩkire, nĩ angĩatuire itua atĩ Jehova Tiwe wa bata mũno ũtũũro-inĩ wake.

8. Nĩ magerio marĩkũ Ayubu aahiũranirie namo, na aatũũririe atĩa wĩhokeku wake?

8 Ayubu aathũkangĩtio nĩ mũrimũ ũrĩ magigi na ningĩ mũtumia wake akamũhinyĩrĩria arume Ngai nĩguo akue. Thutha ũcio, arata ake atatũ a maheeni makĩmũigĩrĩra atĩ nĩ eehĩtie. (Ayub. 2:11-13; 8:2-6; 22:2, 3) O na kũrĩ ũguo, hĩndĩ ya magerio macio mothe Ayubu ndaigana gũtigana na wĩkindĩru wake. (Thoma Ayubu 2:9, 10.) Nĩ ũndũ wa gũtũũria wĩhokeku wake akĩonania atĩ Jehova Nĩwe waarĩ wa bata mũno ũtũũro-inĩ wake. Ningĩ, Ayubu akĩonania atĩ mũndũ ũtarĩ mũkinyanĩru no acokie thitango cia maheeni cia Mũcukani o ũrĩa angĩhota.—Ringithania Thimo 27:11.

Macokio Makinyanĩru ma Jesu

9. (a) Shaitani aageririe Jesu atĩa akĩhũthĩra merirĩria ma mwĩrĩ? (b) Jesu eekire atĩa aagerio?

9 Ihinda inyinyi thuutha wa Jesu kũbatithio, Shaitani nĩ aamũgeririe athingate maũndũ ma kwĩguna handũ ha gũtua Jehova Wa bata mũno ũtũũro-inĩ wake. Mũcukani aageririe Jesu maita matatũ. Rĩa mbere, akĩhũthĩra merirĩria ma mwĩrĩ, akĩgeria Jesu agarũre mahiga matuĩke mĩgate. (Mat. 4:2, 3) Jesu aakoretwo ehingĩte kũrĩa matukũ 40 na kwoguo aarĩ mũhũũtu mũno. Kwoguo Mũcukani akĩmwĩra ahũthĩre ũũru hinya wake wa kũringa ciama nĩguo ahũne. Jesu eekire atĩa? Ngũrani na Hawa-rĩ, Jesu eekire kũringana na Kiugo kĩa Jehova na o hĩndĩ ĩyo akĩregana na igerio rĩu.—Thoma Mathayo 4:4.

10. Nĩ kĩĩ gĩatũmire Shaitani ere Jesu etungumanie kuuma gathũrũmũndũ-inĩ ka hekarũ?

10 Ningĩ Shaitani nĩ aageririe Jesu arũmĩrĩre merirĩria ma kwĩyenda. Akĩmwĩra etungumanie kuuma gathũrũmũndũ-inĩ ka hekarũ. (Mat. 4:5, 6) Shaitani aarĩ na muoroto ũrĩkũ? Shaitani oigire atĩ Jesu aangĩagire kũgurario thutha wa gwĩtungumania, ũndũ ũcio ũngĩonanirie atĩ aarĩ “mwana wa Ngai”. Hatarĩ nganja, Mũcukani eendaga Jesu ecarĩrie igweta, na nginya eyonanie mbere ya andũ. Shaitani nĩ aamenyaga atĩ mũndũ no eingĩrie ũgwati-inĩ nĩ ũndũ wa mwĩtĩo na gwĩtigĩra ndakanyararũo nĩ andũ. Shaitani aahũthĩrire rĩandĩko ũũru, ĩndĩ Jesu nĩ onanirie atĩ Aarĩ na ũtaũku wothe wa Kiugo kĩa Jehova. (Thoma Mathayo 4:7.) Nĩ ũndũ wa kũregana na igerio rĩu, o rĩngĩ Jesu akĩonania atĩ Ũrĩa wa bata mũno ũtũũro-inĩ wake nĩ Jehova.

11. Nĩ kĩĩ gĩatũmire Jesu arege mothamaki mothe ma thĩ marĩa aahetwo nĩ Mũcukani?

11 Thĩinĩ wa igerio rĩake rĩa gatatũ, Shaitani aageririe kwĩrĩra Jesu mothamaki mothe ma thĩ. (Mat. 4:8, 9) O hĩndĩ ĩyo Jesu akĩrega kĩheo kĩu. Nĩ aamenyaga atĩ gwĩtĩkĩra kĩheo kĩu kũngĩarĩ ũndũ ũmwe na kũrega ũnene wa Jehova—kĩhooto kĩa Ngai gĩa gũkorũo arĩ we ũrĩa wĩ Igũrũ Mũno. (Thoma Mathayo 4:10.) Hĩndĩ ya magerio macio mothe, Jesu aahũthĩrire maandĩko maarĩ na rĩĩtwa rĩa Jehova agĩcokeria Shaitani.

12. Nĩ itua rĩrĩkũ iritũ Jesu aacemanirie narĩo mũico-inĩ wa ũtũũro wake gũkũ thĩ, na tũreruta atĩa kuumana na ũrĩa eekire?

12 Mũico-inĩ wa ũtũũro wake gũkũ thĩ Jesu nĩ aacemanirie na itua rĩarĩ iritũ mũno. Hĩndĩ ya ũtungata wake wothe, aakoretwo onanĩtie wendi wa kũruta muoyo wake ũtuĩke igongona. (Mat. 20:17-19, 28; Luk. 12:50; Joh. 16:28) O na kũrĩ ũguo-rĩ, Jesu nĩ aamenyaga atĩ nĩ angĩathitangirũo na maheeni, atuĩrũo kũringana na watho wa Kĩyahudi, na acoke oragwo ta mũndũ ũrumĩte Ngai. Kũmenya atĩ angĩakuire gĩkuũ kĩa mũthemba ũcio nĩ kwamwĩkĩrĩte ihooru mũno. Aahoire ũũ: “Awa, akorũo kwahoteka, gĩkombe gĩkĩ nĩgĩ’thengere.” No agĩcoka akiuga: “Ĩndĩ ti ũrĩa ngwenda niĩ, no ũrĩa ũkwenda wee.” (Mat. 26:39) Ĩĩni, wĩhokeku wa Jesu gũkinyĩria harĩ gĩkuũ gĩake, woonanirie hatarĩ nganja Nũũ waarĩ wa bata mũno ũtũũro-inĩ wake!

Macokio Maitũ Harĩ Kĩũria Kĩu

13. Nginyagia hau nĩ maũndũ marĩkũ twĩrutĩte megiĩ kĩonereria kĩa Hawa, Ayubu, na Jesu Kristo?

13 Twĩrutĩte atĩa nginyagia hau? Ũhoro-inĩ wĩgiĩ Hawa, tũreruta atĩ arĩa marũmagĩrĩra merirĩria ma kwĩyenda kana kwĩyona marĩ a bata mũno monanagia atĩ Jehova Tiwe wa bata mũno ũtũũro-inĩ wao. Ngũrani na ũguo, kuumana na wĩkindĩru wa Ayubu, tũreruta atĩ o na andũ matarĩ akinyanĩru no monanie atĩ nĩ maigĩte Jehova mbere na njĩra ya kũũmĩrĩria mathĩna marĩ na wĩhokeku—o na rĩrĩa mataramenya wega gĩtũmi kĩa mathĩna macio. (Jak. 5:11) Mũico-inĩ, kĩonereria kĩa Jesu kĩratũruta atĩ tũkoragwo twĩhaarĩirie gũconorũo handũ ha kwĩyona tũrĩ a bata mũno. (Ahib. 12:2) No tũngĩhota atĩa kũhũthĩra maũndũ macio tweruta ũtũũro-inĩ witũ wa o mũthenya?

14, 15. Ũrĩa Jesu eekire acemania na magerio ũrĩ na ngũrani ĩrĩkũ na ũrĩa Hawa eekire, na tũngĩhota atĩa kwĩgerekania na Jesu?

14 Tũtikanareke magerio matũme tũriganĩrũo nĩ Jehova. Hawa aarekire meciria make merekerio harĩ igerio rĩrĩa rĩarĩ mbere yake. Akĩona atĩ mũtĩ ũcio warĩ ‘mwega wa kuuma irio, o na atĩ nĩ wa kwendeka ũkĩonwo na maitho, o na ningĩ atĩ nĩ wa kwĩrirĩrio.’ (Kĩam. 3:6) Kaĩ nĩ ngũrani na ũrĩa Jesu eekire hĩndĩ ya magerio marĩa matatũ-ĩ! Hingo ciothe, Jesu nĩ onaga moimĩrĩro ma igerio rĩrĩa rĩakoragwo mbere yake na agecũrania igũrũ rĩa moimĩrĩro ma ciĩko ciake. Aaigaga mwĩhoko wake harĩ Kiugo kĩa Ngai na akahũthĩra rĩĩtwa rĩa Jehova.

15 Rĩrĩa tũragerio twĩke maũndũ marĩa matakenagia Jehova-rĩ, hihi nĩ ũndũ ũrĩkũ twĩciragia ũhoro waguo? O ũrĩa tũgwĩciria mũno ũhoro wa igerio rĩu noguo merirĩria mooru magĩaga na hinya. (Jak. 1:14, 15) Twagĩrĩirũo nĩ kuoya ikinya rĩa na ihenya kweheria merirĩria macio, o na angĩkorũo ikinya rĩu rĩgũkorũo rĩrĩ iritũ ta arĩ kweheria kĩĩga kĩa mwĩrĩ witũ. (Mat. 5:29, 30) O ta Jesu, tũrabatara kuona wega moimĩrĩro ma ciĩko ciitũ—ũrĩa cingĩthũkia ũkuruhanu witũ na Jehova. No mũhaka tũririkane ũrĩa Kiugo gĩake, Bibilia, kiugaga. No na njĩra ĩyo tu tũngĩhota kuonania atĩ Jehova Nĩwe wa bata mũno ũtũũro-inĩ witũ.

16-18. (a) Nĩ kĩĩ kĩngĩtũma tũthuthĩke ngoro mũno? (b) Nĩ kĩĩ kĩngĩtũteithia kũhiũrania hĩndĩ ya mĩtangĩko?

16 Tũtikanareke mathĩna maitũ matũme tũrakarĩre Jehova. (Thim. 19:3) O ũrĩa tũrakuhĩrĩria mũico wa thĩ ĩno njũru-rĩ, andũ aingĩ a Jehova nĩ maracemania na icanjama na mĩnyamaro mĩingĩ. Mahinda-inĩ maya tũtiĩrĩgagĩrĩra kũgitĩrũo na njĩra ya ciama. O na kũrĩ ũguo-rĩ, ota Ayubu, no twĩigue tũthuthĩkĩte ngoro rĩrĩa twakuĩrũo nĩ endwa aitũ kana rĩrĩa ithuĩ ene tũrĩ na mathĩna.

17 Ayubu ndaamenyete kĩrĩa gĩatũmaga Jehova arekererie maũndũ mamwe mekĩke, na rĩmwe na rĩmwe o na ithuĩ no twage kũmenya wega gĩtũmi kĩa maũndũ mooru gwĩkĩka. Rĩngĩ na rĩngĩ twanaigua ũhoro wa aarĩ na ariũ a Ithe witũ ehokeku moragĩtwo nĩ gĩthingithia, ta arĩa a Haiti, o na kana makooragwo nĩ gĩcanjama kĩngĩ. Kana tũkorũo nĩ tũĩ ũhoro wa mũndũ warũmĩtie wĩkindĩru wake, agĩcoka akĩũragwo na njĩra ya ũhinya kana agĩkua nĩ ũndũ wa aksindenti njũru. O na kana ithuĩ ene tũkanyamarĩka nĩ ũndũ wa maũndũ mooru kana matarĩ ma kĩhooto. Ruo rwa ngoro rwahota gũtũma tũcakae ũũ: ‘Nĩkĩ, Jehova. Kaĩ arĩ kĩ no niĩ? Nĩ ũũru ũrĩkũ njĩkĩte?’ (Hab. 1:2, 3) Nĩ kĩĩ kĩngĩtũteithia gwĩtiria mahinda ta macio?

18 Hĩndĩ ta ĩyo twagĩrĩirũo kwĩmenyerera tũtigecirie atĩ maũndũ ta macio maratũkora atĩ tondũ Jehova nĩ atũtiganĩirie. Jesu nĩ aatĩtĩrithirie ũndũ ũcio akĩarĩrĩria ũhoro wa icanjama igĩrĩ iria ciekĩkire hĩndĩ yake. (Thoma Luka 13:1-5.) Mĩnyamaro mĩingĩ yumanaga na “ihinda na ũndũ ũterĩgĩrĩirũo.” (Koh. 9:11; NW) No o na angĩkorũo thĩna witũ ũrehetwo nĩ kĩĩ, no tũhote gwĩtiiria tũngĩiga meciria maitũ harĩ “Ngai mwene ũhoro wothe wa kũũmanĩrĩria.” Nĩ arĩtũheaga hinya ũrĩa tũbataraga nĩguo tũtũũre tũrĩ ehokeku.—2 Kor. 1:3-6.

19, 20. Nĩ kĩĩ gĩateithirie Jesu kũũmĩrĩria maũndũ ma gũconorũo, na nĩ kĩĩ kĩngĩtũteithia o na ithuĩ?

19 Tũtikanareke mwĩtĩo kana gwĩtigĩra gũconorũo gũtuĩke ũndũ mũnene harĩ ithuĩ. Wĩnyihia wa Jesu waamũhotithirie ‘gwĩcuuma agĩikara ahaanaine na ngombo.’ (Afil. 2:5-8) Nĩ aahotire kũũmĩrĩria maũndũ maingĩ ma gũconorũo nĩ ũndũ wa kwĩhoka Jehova. (1 Pet. 2:23, 24) Nĩ ũndũ wa gwĩka ũguo, Jesu akĩiga wendi wa Jehova mbere, na macũngĩrĩro-inĩ agĩtũũgĩrio. (Afil. 2:9) Jesu eekĩrire arutwo ake ngoro marũmĩrĩre kĩonereria gĩake.—Mat. 23:11, 12; Luk. 9:26.

20 Rĩmwe magerio mamwe ma wĩtĩkio witũ no makorũo marĩ ma gũtũconorithia. O na kũrĩ ũguo, twagĩrĩirũo nĩ gũkorũo na ũmĩrĩru ta wa mũtũmwo Paulo ũrĩa woigire ũũ: “Nĩkĩo ndũire nyamarĩkĩte ũguo: ĩndĩ ndingĩconoka; nĩ ũndũ-rĩ, Ũrĩa njĩtĩkĩtie nĩndĩmũũĩ, na ngamenya wega atĩ nĩwe ũngĩhota kũmenyerera wega ũndũ ũrĩa ndahithirie kũrĩ we, kinya o rĩrĩa Mũthenya ũcio ũgakinya.”—2 Tim. 1:12.

21. O na gũtuĩka andũ thĩinĩ wa thĩ marĩ na mwerekera wa kwĩyenda-rĩ, itua rĩaku nĩ rĩrĩkũ?

21 Bibilia nĩ yaarathĩte atĩ mahinda-inĩ maitũ “andũ nĩmagatuĩka eendi.” (2 Tim. 3:2) Ti ũndũ wa gũkĩmakania kuona atĩ tũthiũrũrũkĩirio nĩ andũ meyendete mũno. Rekei twĩmenyerere tũtikanathũkio nĩ mwerekera ta ũcio wa kwĩyenda! Handũ-inĩ ha ũguo, o na angĩkorũo tũracemania na magerio, kana icanjama, kana maũndũ ma gũtũconora, rekei o ũmwe witũ atue itua rĩa kuonania atĩ Jehova Nĩwe wa bata mũno ũtũũro-inĩ witũ!

[Kohoro ka magũrũ-inĩ]

Tũngĩĩruta Atĩa Kuumana na . . .

• ũrĩa Shaitani aaheenirie Hawa?

• ũrĩa Ayubu eekire acemania na icanjama?

• ũndũ ũrĩa waarĩ wa bata mũno harĩ Jesu?

[Mbica karatathi ka 21]

Jesu aareganire na magerio ma Shaitani na akĩiga meciria make harĩ gwĩka wendi wa Jehova

[Mbica karatathi ka 22]

Kũhunjia hema-inĩ thutha wa gĩthingithia, bũrũri-inĩ wa Haiti

[Mbica karatathi ka 22]

Hĩndĩ ya mĩnyamaro twagĩrĩirũo nĩ kwĩhoka “Ngai mwene ũhoro wothe wa kũũmanĩrĩria”