Kwĩhoka Jehova Biũ Gũtũmaga Twĩigue Tũrĩ na Ũgitirĩ
“Jehova no arĩiguaga ndamũkaĩra.”—THAB. 4:3.
1, 2. (a) Nĩ maũndũ marĩkũ maritũ Daudi aacemanirie namo? (b) Tũkwarĩrĩria icunjĩ irĩkũ cia Thaburi?
THUTHA wa Mũthamaki Daudi gũkorũo athamakĩte Israelikwa ihinda-rĩ, nĩ aacemanirie na ũndũ mũritũ mũno. Mũrũ wake Abisalomu nĩ aahũthĩrire wara gwĩtua mũthamaki na kwoguo Daudi akĩũra kuuma itũũra-inĩ rĩa Jerusalemu. Ningĩ agĩkunyanĩrũo nĩ mũndũ eehokete mũno, kwoguo hamwe na andũ amwe arĩa maatigarĩte marĩ ehokeku, aakĩgerera Kĩrĩma-inĩ kĩa Mĩtamaiyũ arĩ magũrũ matheri akĩrĩraga. Thutha ũcio, mũndũ ũmwe wa mbarĩ ya Saulu wetagwo Shimei akĩambĩrĩria, gũikĩria Daudi mahiga na tĩri akĩmũrumaga.—2 Sam. 15:30, 31; 16:5-14.
2 Hihi Daudi aatũũrire na kĩeha na gĩconoko kĩu nginya hĩndĩ ya gĩkuũ gĩake? Aca, tondũ we eehokete Jehova. Ũndũ ũcio wonanĩtio wega thĩinĩ wa Thaburi mũrango wa 3, ũrĩa Daudi aatungire wĩgiĩ kũũrĩra Abisalomu. Ningĩ nowe waandĩkire Thaburi mũrango wa 4. Icunjĩ icio cierĩ aatungire cionanagia wega atĩ Ngai nĩ aiguaga na nĩ acokagia mahoya. (Thab. 3:4; 4:3) Thaburi icio itũmagĩrĩria atĩ Jehova ndarĩ hingo atiganagĩria ndungata ciake njĩhokeku mũthenya kana ũtukũ, acirathimaga na thayũ, na agacihe ũteithio na cikaigua irĩ na ũgitĩri. (Thab. 3:5; 4:8) Nĩ ũndũ ũcio rekei twarĩrĩrie Thaburi icio nĩguo tuone ũrĩa cingĩtũteithia kwĩigua tũrĩ na ũgitĩri na gũkũria mwĩhoko witũ harĩ Ngai.
Hĩndĩ Ĩrĩa ‘Andũ Aingĩ Matũũkĩrĩra’
3. Kũringana na Thaburi 3:1, 2, nĩ maũndũ marĩkũ Daudi aacemanirie namo?
3 Mũndũ ũmwe agĩkinyia ndũmĩrĩri akiuga ũũ: “Ngoro cia andũ a Israeli ciendete kũrũmĩrĩra Abisalomu.” (2 Sam. 15:13) Nĩ ũndũ wa kwaga kũmenya gĩtũmi kĩa andũ aingĩ kũrũmĩrĩra Abisalomu-rĩ Daudi akĩũria ũũ: “Ĩ JEHOVA, kaĩ arĩa maraʼhatĩka nĩmaingĩhĩte-ĩ! andũ nĩ aingĩ mũno, acio maranjũkĩrĩra. Kũingĩha nĩ arĩa mekuuga ũhoro wa ngoro yakwa atĩrĩ, Ndarĩ ũhonokio angĩona harĩ Ngai.” (Thab. 3:1, 2) Aisiraeli aingĩ meeciragia atĩ Jehova ndangĩahonokirie Daudi kuuma kũrĩ Abisalomu na arũmĩrĩri ake.
4, 5. (a) Nĩ ũndũ ũrĩkũ Daudi aarĩ na ma naguo biũ? (b) Ciugo “mũtũũgĩria wa mũtwe wakwa” nĩ kuuga atĩa?
4 Ĩndĩ Daudi aarĩ na ũmĩrĩru tondũ nĩ eehokete Ngai biũ. Aainire ũũ: “No rĩrĩ, wee, Jehova, nĩwe ngo ya kũnjikara mĩena yothe; nowe riri wakwa, nowe mũtũũgĩria wa mũtwe wakwa.” (Thab. 3:3) Daudi aarĩ na ma atĩ Jehova nĩ angĩamũgitĩrire o ta ũrĩa ngo ĩgitagĩra mũthigari. Nĩ ma, mũthamaki ũcio mũkũrũ orire, eehũmbĩrĩte mũtwe nĩ ũndũ wa gĩconoko. Ĩndĩ ũrĩa Ũrĩ Igũrũ Mũno nĩ aagarũranirie maũndũ ma Daudi akĩmũhumba riri. Jehova nĩ aamũhotithirie kwĩhanda wega, akĩmũtũũgĩria rĩngĩ. Daudi aakaĩire Ngai atarĩ na nganja atĩ nĩ ekũmũigua. Hihi wee nĩ ũkoragwo na mwĩhoko ta ũcio harĩ Jehova?
5 Rĩrĩa aahũthĩrire ciugo “mũtũũgĩria wa mũtwe wakwa,” Daudi onanirie atĩ eerĩgagĩrĩra ũteithio kuuma kũrĩ Jehova. Bibilia yugaga ũũ: “No rĩrĩ, wee, Jehova, nĩwe ngo ya kũnjikara mĩena yothe; nowe riri wakwa, nowe mũtũũgĩria wa mũtwe wakwa.” Ibuku rĩmwe rĩkĩarĩrĩria ciugo “mũtũũgĩria wa mũtwe wakwa” riugaga ũũ: “Rĩrĩa Ngai okĩria . . . ‘mũtwe’ wa mũndũ, atũmaga mũndũ ũcio agĩe na mwĩhoko na ũmĩrĩru.” Tondũ wa kweherio gĩtĩ-inĩ kĩa ũthamaki na hinya-rĩ, Daudi aarĩ na kĩhooto gĩa gũkua ngoro. O na kũrĩ ũguo, ‘gũtũũgĩrio kwa mũtwe wake’ gwatũmire agĩe na ũcamba o rĩngĩ, ũmĩrĩru na mwĩhoko mũkinyanĩru harĩ Ngai.
‘Jehova nĩ Arĩtwamũkagĩria’!
6. Nĩ kĩĩ gĩatũmire Daudi oige atĩ mahoya make maacokagio kuuma kĩrĩma-inĩ gĩtheru kĩa Jehova?
6 Arĩ na mwĩhoko harĩ Jehova na arĩ na ũmĩrĩru-rĩ, Daudi aathire na mbere kuuga ũũ: “Ngayagĩra Jehova na mũgambo, nake akanyamũkĩria e kĩrĩma kĩrĩa gĩake kĩamũre.” (Thab. 3:4) Ithandũkũ rĩa kĩrĩkanĩro rĩrĩa rĩarũgamagĩrĩra Ngai, nĩ rĩatwarirũo Kĩrĩma-inĩ gĩa Sayuni o ta ũrĩa Daudi aathanĩte. (Thoma 2 Samueli 15:23-25.) Nĩkĩo Daudi oigaga atĩ mahoya make maacokagio kuuma kĩrĩma-inĩ gĩtheru kĩa Jehova.
7. Nĩ kĩĩ gĩatũmaga Daudi aage gwĩtigĩra?
7 Tondũ aarĩ na ma biũ atĩ mahoya make harĩ Ngai matiarĩ ma tũhũ-rĩ, Daudi ndaarĩ na guoya o na hanini. Ithenya rĩa ũguo, aainire ũũ: “Niĩ-rĩ, nĩndĩrekomeire na ndĩrona toro; ndakĩroka kũhindũka; thima nĩ Jehova ũndiiragĩrĩra.” (Thab. 3:5) Ona ũtukũ, rĩrĩa kũrĩ ũgwati mũnene wa gũtharĩkĩrũo andũ materĩgĩrĩire-rĩ, Daudi aakomaga atarĩ na guoya. Maũndũ marĩa eeyoneire nĩ maatũmĩte agĩe na ũmĩrĩru biũ atĩ no ehoke ũteithio wa Ngai kwoguo aarĩ na ma atĩ o na akoma no angĩokĩrire. O na ithuĩ no tũhote gwĩka ũguo tũngĩrũmĩrĩra “njĩra cia Jehova,” biũ na tũtikanamũtige.—Thoma 2 Samueli 22:21, 22.
8. Thaburi 27:1-4 yonanagia atĩa atĩ Daudi nĩ eehokete Ngai?
8 Thĩinĩ wa Thaburi ĩngĩ yake, Daudi nĩ onanirie ũmĩrĩru na mwĩhoko mũkinyanĩru harĩ Ngai kũgerera ciugo ici: “JEHOVA nĩwe ũtheri wakwa, o gwata ũhonokio wakwa; ingĩgĩĩtigĩra ũ? Jehova nĩwe hinya ũrĩa ũgitĩire muoyo wakwa; ũrĩa ũngĩ’makia nũ? . . . O na ita ingĩnjakĩrĩra iraaro, ngoro yakwa ndĩngĩguoyoha . . . Ndĩ o ũndũ ũmwe nyendete harĩ Jehova, na nĩguo ndĩĩthingataga; nĩ atĩ njikarage nyũmba ya Jehova, matukũ mothe ma muoyo wakwa, ndĩĩonagĩre wega wa Jehova, na ndĩĩtuĩragĩrie ũhoro kũu thĩinĩ wa hekarũ yake.” (Thab. 27:1-4) Ũngĩkorũo na mawoni ta macio make na maũndũ maku nĩ maragwĩtĩkĩria-rĩ, nĩ ũrĩthiaga mĩcemanio-inĩ ya Gĩkristiano hamwe na aarĩ na ariũ a Ithe witũ ũtegũtĩrĩria.—Ahib. 10:23-25.
9, 10. Nĩ kĩĩ kĩngĩtũma tuuge atĩ Daudi ndaarĩ na mwerekera wa kwĩrĩhĩria, o na gũtuĩka nĩwe mũtungi wa Thaburi 3: 6, 7?
9 O na gũtuĩka Daudi nĩ aahiũranirie na waara wa Abisalomu na andũ angĩ aingĩ mataarĩ ehokeku-rĩ, ainire ũũ: “Andũ, o na mangĩrĩ ngiri ikũmi, ndingĩmetigĩra, acio maikaire meĩ’hotoreire mĩena-inĩ yothe. Arahũka, Jehova; Ngai wakwa, ‘honokia: thũ ciakwa ciothe nĩũcigũthĩte thĩa, magego ma andũ arĩa aaganu ũkamathendũranga.” —Thab. 3:6, 7.
10 Daudi ndaarĩ na mwerekera wa kwĩrĩhĩria. Ngai nĩwe ‘ũngĩagũthire thĩa’ cia thũ cia Daudi. Mũthamaki Daudi nĩ aakoretwo eyandĩkĩire kobĩ ya Watho kwoguo nĩ oĩ watho-inĩ ũcio Jehova oigĩte ũũ: “Ũhoro wa kũrĩhanĩria, o na wa kũhũrĩra andũ ũũru wao nĩ wakwa.” (Gũcok. 17:14, 15, 18; 32:35) Ningĩ nĩ wĩra wa Ngai ‘gũthendũranga magego ma andũ arĩa aaganu.’ Gũthendũranga magego mao nĩ kũmaniina hinya wa gwĩka ũũru. Jehova nĩ amenyaga arĩa aganu nĩ arĩkũ tondũ “abaraga ngoro thĩinĩ.” (1 Sam. 16:7) Na githĩ gĩtikĩrĩ gĩkeno kĩnene kuona atĩ Ngai nĩ atũheaga wĩtĩkio na hinya wa gwĩtiria mũnene wa waganu Shaitani! Ica ikuhĩ nĩ arĩikio irima rĩtarĩ gĩturi ta mũrũthi ũkũrarama ũtarĩ magego, ũrĩa tu wagĩrĩirũo nĩ kũninwo.—1 Pet. 5:8, 9; Kũg. 20:1, 2, 7-10.
‘Ũhonokio nĩ wa Jehova’
11. Nĩkĩ nĩ twagĩrĩirũo nĩ kũhoera aarĩ na ariũ a Ithe witũ?
11 Daudi nĩ aamenyaga atĩ no Jehova wiki ũngĩamũreheire ũhonokio ũrĩa aabataraga mũno. O na kũrĩ ũguo-rĩ, mũtungi ũcio wa Thaburi ndaarũmbũyagia o maũndũ make wiki. Ĩ nao andũ arĩa othe Jehova endete? Ũhoro ũcio Daudi aatongoririo nĩ roho gũtunga aaũrĩkĩrĩirie ũũ: “Ũhonokio no wa Jehova: kĩrathimo gĩaku kĩrotũũra na kĩrĩndĩ gĩaku.” (Thab. 3:8) Ma nĩ atĩ, Daudi aarĩ na mathĩna maritũ, o na kũrĩ ũguo ndaariganagĩrũo nĩ andũ a Jehova na nĩ aakoragwo na ma atĩ Ngai nĩ angĩamarathimire. Na githĩ o na ithuĩ tũtikĩagĩrĩirũo kũririkanaga aarĩ na ariũ a Ithe witũ? Rekei tũmaririkanage mahoya-inĩ maitũ, tũkahoyaga Jehova amahe roho wake mũtheru nĩguo mahotage gũkoragwo na ũcamba na mahunjagie ũhoro ũrĩa mwega marĩ na ũmĩrĩru.—Ef. 6:17-20.
12, 13. Nĩ ũndũ ũrĩkũ wakorire Abisalomu, na Daudi eekire atĩa?
12 Abisalomu aakuire gĩkuũ gĩa gĩconoko—ũcio nĩ mũkaana harĩ arĩa othe manyariraga arĩa angĩ, na makĩria arĩa aitĩrĩrie maguta a Jehova, ta Daudi. (Thoma Thimo 3:31-35.) Gũkĩgĩa mbaara, na mbũtũ cia Abisalomu ikĩhootwo. Abisalomu ahaicĩte nyũmbũ, njuĩrĩ ciake ndaya ikĩhata rũhonge-inĩ rwa mũtĩ mũnene. Agĩikara hau acunjurĩte—arĩ muoyo no atarĩ ũndũ angĩĩteithia—o nginya Joabu akĩmũtheca ngoro na tũtimũ tũtatũ agĩkua.—2 Sam. 18:6-17.
13 Hihi Daudi nĩ aakenire rĩrĩa aamenyire ũndũ ũrĩa wakorete mũrũwe? Aca. Ithenya rĩa ũguo, ndaahotire gũkindĩria, aathire akĩrĩraga akiugaga ũũ: ‘Wũi, mũrũ wakwa Abisalomu, mũrũ wakwa, mũrũ wakwa Abisalomu-ĩ! Na arĩ korũo nĩ niĩ nguire ithenya rĩaku, wee Abisalomu, mũrũ wakwa, mũrũ wakwa!’ (2 Sam. 18:24-33) No ciugo cia Joabu tu ciatũmire kĩeha kĩu kĩnene kĩa Daudi gĩthirathire. Marigĩrĩrio ma Abisalomu maarĩ moru mũno, gwĩcarĩria igweta gwake gwatũmire okĩrĩre ithe—ũrĩa warĩ mũitĩrĩrie maguta wa Jehova—aakĩĩrehera thĩna we mwene.—2 Sam. 19:1-8; Thim. 12:21; 24:21, 22.
Daudi Kuonania Mwĩhoko Wake Harĩ Ngai o Rĩngĩ
14. Tũngiuga atĩa ũhoro-inĩ wĩgiĩ Thaburi ya 4?
14 O ta Thaburi ya 3, ya 4 o nayo nĩ ihoya rĩa Daudi rĩa kuuma ngoro rĩrĩa rĩonanagia mwĩhoko wake mũkinyanĩru harĩ Jehova. (Thab. 3:4; 4:3) No kũhoteke Daudi aatungire rwĩmbo rũu kuonania gĩkeno na ngatho ciake harĩ Ngai thutha wa Abisalomu kũremwo nĩ kũmũtunya wathani. Kana hihi aarũandĩkire nĩ ũndũ wa Alawii arĩa maarĩ aini. O ũrĩa kũngĩkorũo-rĩ, tũngĩcũrania ũhoro wa rũĩmbo rũu no rwĩkĩre hinya mwĩhoko witũ harĩ Jehova.
15. Nĩkĩ no tũhoe Jehova tũrĩ na ũmĩrĩru kũgerera harĩ Mũrũ wake?
15 Daudi nĩ onanirie o rĩngĩ mwĩhoko wake mũkinyanĩru harĩ Ngai na akĩonania na ma atĩ Ngai nĩ aiguaga mahoya. Aainire ũũ: “Nyamũkĩria ndakaya, wee Ngai wa ũthingu wakwa; nĩwe wanaʼhe mĩaramano ndagĩa hatĩka-inĩ: nginyĩria wega waku, ihoya rĩakwa ũkĩrĩigue.” (Thab. 4:1) No tũkorũo na ũmĩrĩru o ta ũcio tũngĩĩmenyeria ũthingu. Tũkĩmenyaga atĩ Jehova “Ngai wa ũthingu” nĩ arathimaga andũ ake arĩa arũngĩrĩru-rĩ, no tũmũhoe tũrĩ na ma kũgerera harĩ Mũrũ wake Jesu, tũrĩ na wĩtĩkio harĩ igongona rĩa ũkũũri rĩa Jesu. (Joh. 3:16, 36) Ũndũ ũcio nĩ ũtũheaga thayũ.
16. Hihi nĩ kĩĩ kĩngĩkorũo gĩatũmĩte Daudi akue ngoro?
16 Rĩngĩ na rĩngĩ no tũcemanie na ũndũ wa gũtũũraga ngoro ũtũme twage ũũmĩrĩru. No kũhoteke Daudi nĩ aacemanirie na ũndũ ta ũcio kwa ihinda tondũ aainire ũũ: “Inyuĩ ariũ a andũ-rĩ, nĩ hĩndĩ ĩigana atĩa riri wakwa ũgũtũũra ũnyararagwo, mũkendaga ũhoro wa tũhũ, na mũkarongoragia maheni?” (Thab. 4:2) Kiugo “ariũ a andũ” hatarĩ nganja nĩ kuuga andũ arĩa oru. Thũ cia Daudi nĩ ‘ciendete maũndũ ma tũhũ.’ Bibilia ya New International Version ĩtaũrĩte ciugo icio ũũ: “Mũgũtũũra mwendete maũndũ ma maheeni nginya-rĩ mũgĩcaragia ngai cia mathaara?” O na rĩrĩa twakua ngoro nĩ ũndũ wa ciĩko cia andũ angĩ-rĩ, rekei tũthiĩ na mbere kũhoya na kĩyo na tuonanagie mwĩhoko mũkinyanĩru harĩ Ngai ũrĩa ũmwe wa ma.
17. Taarĩria ũrĩa tũngĩka kũringana na Thaburi 4:3.
17 Mwĩhoko wa Daudi harĩ Ngai wonanagio wega nĩ ciugo ici: “No rĩ’, menyai atĩ ũrĩa mũigua-Ngai, we Jehova nĩamwĩamũrĩire: Jehova no arĩiguaga ndamũkaĩra.” (Thab. 4:3) Ũcamba na mwĩhoko mũkinyanĩru harĩ Jehova nĩ cia bata nĩguo tũtũũre tũrĩ ehokeku harĩ we. Kwa ngerekano, famĩlĩ ya Gĩkristiano nĩ ĩkũbatara ngumo icio rĩrĩa mũndũ wa famĩlĩ eherio thiritũ-inĩ ya Gĩkristiano nĩ ũndũ wa kwaga kwĩrira. Ngai nĩ arathimaga arĩa ehokeku harĩ we na harĩ njĩra ciake. Naguo, wĩhokeku na mwĩhoko mũkinyanĩru harĩ Jehova nĩ irehagĩra andũ ake gĩkeno.—Thab. 84:11, 12.
18. Kũringana na Thaburi 4:4, twagĩrĩirũo nĩ gwĩka atĩa mũndũ angĩtwĩra kana atwĩke ciĩko njũru?
18 Ĩ mũndũ angĩka kana oige ũndũ ũtũrakarie? No tũtũũre tũkenete tũngĩka kũringana na ciugo ici cia Daudi: “Gĩani na guoya, mũtigage kwĩhia; teretagai o mũndũ na ngoro yake arĩ ũrĩrĩ, mũgĩĩkiragĩre.” (Thab. 4:4) Angĩkorũo twanerũo kana tũgĩkwo ciĩko njũru, rekei tũtikehie na njĩra ya kwĩrĩhĩria. (Rom. 12:17-19) No tũmenyithie Jehova ũndũ ũcio tũrĩ gĩtanda-inĩ. Tũngĩhoya igũrũ rĩa ũndũ ũcio-rĩ, twahota kũwona na njĩra njega na tuohanĩre nĩ ũndũ wa wendo. (1 Pet. 4:8) Ũndũ ũcio wonekaga wega ciugo-inĩ cia Paulo, iria ciumanĩte na Thaburi 4:4: “Mwarakara-rĩ, wĩmenyagĩrĩrei mũtikanehie; na mũtikanathũithie riũa mũrakaire: o na mũtikanarekererie mũcukani one kamweke.”—Ef. 4:26, 27.
19. Thaburi 4:5 ĩngĩtũteithia atĩa magongona-inĩ maitũ ma kĩĩroho?
19 Agĩtĩtĩrithia bata wa kwĩhoka Ngai, Daudi aainire ũũ: ‘Rutagai magongona mũrutĩre ũrĩa wa ũthingu, mwĩhoke o Jehova arĩ we.’ (Thab. 4:5.) Magongona marĩa maarutagwo nĩ Aisiraeli meetĩkagĩrũo rĩrĩa andũ acio mamaruta marĩ na muoroto mwega. (Isa. 1:11-17) Nĩguo magongona maitũ ma kĩĩroho metĩkĩrĩke nĩ Ngai, o na ithuĩ no mũhaka tũkorũo na muoroto mwega na tũmwĩhoke biũ.—Thoma Thimo 3:5, 6; Ahibirania 13:15, 16.
20. ‘Ũtheri wa gĩthiithi kĩa Jehova’ wonanagia ũndũ ũrĩkũ?
20 Daudi aathire na mbere na kuuga ũũ: “Nĩ aingĩ maroria atĩrĩ, Nũ ũngĩtuonania na maũndũ mega? Jehova, wee-rĩ, gĩtũtiirĩre ũtheri wa gĩthiithi gĩaku.” (Thab. 4:6) ‘Ũtheri wa gĩthiithi kĩa Jehova’ wonanagia gwĩtĩkĩrĩka nĩ Ngai. (Thab. 89:15) Kwoguo rĩrĩa Daudi aahoire: “gĩtũtiirĩre ũtheri wa gĩthiithi gĩaku,” endaga kuuga ‘reke twĩtĩkĩrĩke nĩwe.’ Tondũ nĩ twĩhokete Jehova-rĩ, nĩ atwĩtĩkĩrĩte kwoguo nĩ tũkoragwo na gĩkeno kĩnene tũgĩka wendi wake tũrĩ na ũũmĩrĩru.
21. Nĩ ũndũ ũrĩkũ tũrĩ na ma naguo angĩkorũo nĩ tũkwĩrutĩra biũ wĩra-inĩ wa kũhunjia mahinda-inĩ maya?
21 Atanyĩte gĩkeno kĩrĩa Ngai aheanaga gĩkĩrĩte kĩa hĩndĩ ya magetha-rĩ, Daudi aainĩire Jehova ũũ: “Wee nĩũnjĩkĩrĩte gĩkeno ngoro-inĩ yakwa gĩkĩrĩte kĩao rĩrĩa ngano yao na ndibei ciamaingĩhĩra.” (Thab. 4:7) No tũkorũo na ma atĩ nĩ tũkũgĩa na gĩkeno kĩa ma tũngĩĩrutĩra biũ wĩra-inĩ wa kũhunjia mahinda-inĩ maya maitũ. (Luk. 10:2) Tũgĩtongorio nĩ ‘rũrĩrĩ rũingĩ’ rwa arĩa aitĩrĩrie maguta, rĩu tũrĩ na gĩkeno tondũ ‘arĩa mararuta wĩra wa magetha’ marathiĩ o na mbere makĩongererekaga. (Isa. 9:3) Hihi wee nĩ wĩrutagĩra biũ wĩra-inĩ ũcio wa gĩkeno wa magetha?
Thiĩ na Mbere Kwĩhoka Ngai Ũtarĩ na Nganja
22. Kũringana na Thaburi 4:8 Aisiraeli maikaraga atĩa rĩrĩa marũmĩrĩra Watho wa Ngai?
22 Daudi aarĩkĩrĩirie Thaburi ĩyo na ciugo ici: “Ngũgĩĩkomera ndĩ na thayũ, njũke o ngĩona toro, tondũ wee, Jehova, nĩwe ũndũũragia mwamũ, ngaikara o ndĩĩgangarĩte.” (Thab. 4:8) Aisiraeli maarũmĩrĩra Watho wa Jehova, maakoragwo na thayũ hamwe nake na makaigua marĩ na ũgitĩri. Kwa ngerekano-rĩ, ‘Juda na Isiraeli maikaraga matarĩ na ũgwati’ matukũ-inĩ ma mbere ma wathani wa Suleimani. (1 Ath. 4:25) Arĩa meehokete Ngai nĩ maakenagĩra thayũ o na rĩrĩa ndũrĩrĩ iria ciamathiũrũrũkĩirie ciamokĩrĩra. O ta Daudi, tũkomaga na thayũ tondũ Ngai nĩ atũmaga tũigue tũrĩ na ũgitĩri.
23. Gũkorũo na mwĩhoko mũkinyanĩru harĩ Ngai kũrĩtũrehagĩra kĩĩ?
23 Rekei tũthiĩ na mbere tũrĩ na ũmĩrĩru ũtungata-inĩ wa Jehova. Ningĩ tũhoyage tũrĩ na wĩtĩkio nĩguo tũgĩage na “thayũ wa Ngai, ũrĩa ũtangĩmenyeka ũrĩa ũtariĩ.” (Afil. 4:6, 7) Githĩ ũndũ ũcio ndũrĩtũrehagĩra gĩkeno kĩnene! Ningĩ no tũhote gũcũthĩrĩria mahinda marĩa mokĩte tũrĩ na ũmĩrĩru tũngĩtũũria mwĩhoko mũkinyanĩru harĩ Jehova.
Ũngiuga Atĩa?
• Nĩ mathĩna marĩkũ Daudi aacemanirie namo nĩ ũndũ wa Abisalomu?
• Thaburi mũrango wa 3 ĩtwĩkagĩra ũmĩrĩru na njĩra ĩrĩkũ?
• Nĩ na njĩra irĩkũ Thaburi mũrango wa 4 ĩngĩĩkĩra hinya mwĩhoko witũ harĩ Jehova?
• Tũngĩgunĩka atĩa nĩ ũndũ wa gũkorũo na mwĩhoko mũkinyanĩru harĩ Ngai?
[Mbica karatathi ka 32]
Hihi wee nĩ ũkoragwo wĩhokete Jehova biũ?