Rutwo nĩ Kiugo kĩa Ngai

Hihi Kũrĩ na Kĩĩrĩgĩrĩro Harĩ Arĩa Makuĩte?

Gĩcunjĩ gĩkĩ kĩrĩ na ciũria hihi waneyũria na nĩ kĩronania harĩa ũngĩthoma macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Kĩĩrĩgĩrĩro kĩa arĩa makuĩte nĩ kĩrĩkũ?

Jesu agĩkinya Bethania hakuhĩ na Jerusalemu, mũratawe Lazaro aaninĩte matukũ mana kuuma akua. Jesu agĩthiĩ harĩa mbĩrĩra yarĩ marĩ na aarĩ a nyina na Lazaro, Maritha na Mariamu. Thutha wa kahinda kanini, hakĩgĩa mũrũrũngano wa andũ. Ũgwĩciria Maritha na Mariamu maakenire atĩa rĩrĩa Jesu aariũkirie Lazaro?—Thoma Johana 11:20-24, 38-44.

Maritha nĩ eetĩkĩtie atĩ akuũ nĩ makaariũka. Ndungata njĩhokeku cia Jehova kuuma o tene ikoretwo ciĩtĩkĩtie atĩ ihinda rĩũkĩte, Ngai nĩ akaariũkia arĩa akuũ matũũre thĩinĩ wa thĩ rĩngĩ.—Thoma Ayubu 14:14, 15.

2. Hihi akuũ matariĩ atĩa?

Mũndũ ndakoragwo na muoyo ũthiaga na mbere gũtũũra thutha wa mwĩrĩ gũkua. (Ezekieli 18:4) Ithuĩ tũrĩ ciũmbe ithondeketwo na tĩri. (Kĩambĩrĩria 2:7; 3:19) Rĩrĩa tombo witũ wakua, mathugunda maitũ nĩ gũthira mathiraga. Nĩkĩo thutha wa kũriũkio, Lazaro gũtirĩ ũndũ oigire wĩgiĩ maũndũ eyoneire hĩndĩ ĩyo aakuĩte, tondũ arĩa makuĩte gũtirĩ ũndũ moĩ.—Thoma Thaburi 146:4; Kohelethu 9:5, 10.

Ma nĩ atĩ, arĩa makuĩte matingĩigua ruo. Kwoguo ũrutani wa atĩ Ngai nĩ aherithagia andũ thutha wa gĩkuũ ti wa ma. Ũrutani ũcio nĩ ũcambithagia Ngai. Rĩciria rĩa kũherithia andũ na mwaki nĩ arĩthũire mũno.—Thoma Jeremia 7:31.

3. Hihi no twaranĩrie na arĩa makuĩte?

Arĩa makuĩte matingĩhota kwaria. (Thaburi 115:17) Ĩndĩ araika oru no metue roho wa mũndũ wakuire, hĩndĩ ĩrĩa mararanĩria na andũ. (2 Petero 2:4) Jehova nĩ akananĩtie kwaranĩria na arĩa makuĩte.—Thoma Gũcokerithia Maathani 18:10, 11.

4. Hihi nĩa magaacokio muoyo?

Thĩinĩ wa thĩ njerũ ĩrĩa ĩroka, andũ milioni nyingĩ arĩa marĩ mbĩrĩra-inĩ nĩ magaacokio muoyo. O na andũ amwe arĩa meekaga maũndũ mooru nĩ ũndũ wa kwaga kũmenya Jehova nĩ makaariũkio.—Thoma Luka 23:43; Atũmwo 24:15.

Arĩa makaariũkio nĩ makaagĩa na mweke wa kwĩruta ũhoro wa ma ũkoniĩ Ngai na kuonania wĩtĩkio wao harĩ Jesu na njĩra ya kũmwathĩkĩra. (Kũguũrĩrio 20:11-13) Arĩa magaacokio muoyo na meke maũndũ mega nĩ magaakenera muoyo wa tene na tene thĩinĩ wa thĩ. O na gũkĩrĩ ũguo-rĩ, amwe arĩa makaariũkio nĩ magaathiĩ na mbere gwĩka maũndũ mooru. Rĩao rĩgaakorũo rĩrĩ “iriũkĩro rĩa gũcirithio.”—Thoma Johana 5:28, 29.

5. Kũriũka gũtũrutaga atĩa igũrũ rĩgiĩ Jehova?

Nĩ gũkaahoteka andũ mariũkio tondũ Ngai nĩ aatũmire Mũriũ wake arute muoyo wake nĩ ũndũ witũ. Kwoguo iriũkĩro rĩonanagia ũrĩa Jehova akoragwo na wendo na wega mũingĩ.—Thoma Johana 3:16; Aroma 6:23.

Nĩgetha wone ũhoro makĩria, rora gĩcunjĩ gĩa 6 na kĩa 7 kĩa ibuku rĩrĩ, rĩrĩa rĩcabĩtwo nĩ Aira a Jehova Bibilia Ĩrutanaga Atĩa Kũna?

[Mbica]

Adamu ombirũo kuuma rũkũngũ-inĩ