Kuhĩrĩria Ngai

Hihi Jehova nĩ Ahutagio nĩ Ciĩko cia Andũ?

ANGĨKORŨO nĩguo-rĩ, kĩũria kĩngĩ nĩ gĩkĩ: Hihi mĩtugo iitũ nĩ ĩhutagia Ngai? Nĩ ta kũũria atĩrĩ, ciĩko ciitũ no ikenie kana hihi ciiguithie Ngai ũũru? Athomi amwe a tene mooigaga gũtingĩhoteka. Mooigaga atĩ gũtirĩ mũndũ ũngĩhota gũcenjia ũrĩa Ngai atariĩ na kwoguo no mũhaka Ngai akorũo ndaiguaga ũndũ. Ĩndĩ Bibilia ĩtũrutaga ũndũ ngũrani, atĩ, Jehova nĩ arĩ tha na nĩ ahutagio mũno nĩ maũndũ marĩa twĩkaga. Ta wĩcirie ũhoro wa ciugo iria irĩ thĩinĩ wa Thaburi 78:40, 41.

Thaburi 78 ĩtaaragĩria maũndũ megiĩ Ngai na rũrĩrĩ rwa Isiraeli ya tene. Thutha wa gũkũũra rũrĩrĩ rũu kuuma ũkombo-inĩ Misiri, Jehova eeharĩirie kũgĩa na ũkuruhanu wa mwanya hamwe nao. Aameerire atĩ mangĩatũũrire mathĩkagĩra maathani make, nĩ mangĩatuĩkire ‘kĩndũ gĩake kĩa bata mũno’ na amahũthĩre kũhingia muoroto wake na njĩra ya mwanya. Andũ acio magĩtĩkĩra na kwoguo makĩrĩkanĩra kĩrĩkanĩro kĩa Watho. Hihi nĩ maatũũrire kũringana na kĩrĩkanĩro kĩu?—Thama 19:3-8.

Mũtungi wa Thaburi oigire ũũ: “Nĩ kaingĩ atĩa maamũngʼathĩirie me kũu werũ-inĩ!” (Mũhari wa 40) Naguo mũhari ũrĩa ũrũmĩrĩire ugaga ũũ: “No gũcoka maacokaga o kũgeria Mũrungu.” (Mũhari wa 41) Ũngĩrora no wone atĩ mwandĩki wa mĩhari ĩyo aronania andũ acio nĩ mamenyerete kũrema. Roho ũcio mũũru wa ũremi waambĩrĩirie kũu werũ-inĩ, o kahinda kanini thutha wao gũkũũrũo kuuma Misiri. Andũ acio makĩambĩrĩria kũngʼongʼorera Ngai, magĩkagĩrĩra nganja ũhoti na wendi wake wa kũmateithia. (Ndari 14:1-4) Ibuku rĩmwe rĩhũthagĩrũo nĩ ataũri a Bibilia riugaga atĩ ciugo “nĩ maamũngʼathĩirie” no itaũrũo “na njĩra ya ngerekano ũũ: ‘nĩ moomĩirie Ngai ngoro ciao’ kana ‘makĩra Ngai “Aca.”’” O na kũrĩ ũguo, nĩ ũndũ wa tha ciake, Jehova nĩ aamohagĩra rĩrĩa monania atĩ nĩ merirĩte. No nĩ maacokagĩrĩra njĩra ciao njũru na makaremera Ngai maita maingĩ.—Thaburi 78:10- 19, 38.

Hihi Jehova aaiguaga atĩa rĩrĩa andũ acio ake mataarĩ ehokeku mamũremera? Mũhari wa 40 uugaga atĩ nĩ ‘maamũiguithagia kĩeha.’ Bibilia ĩngĩ nayo yugaga atĩ “meekaga maũndũ ma kũmũiguithia kĩeha.” Ibuku rĩmwe rĩa maũndũ megiĩ Bibilia riugaga ũũ: “Ũguo nĩ kuuga atĩ mĩthiĩre ya Ahibirania yaarĩ mĩũru na ya kũiguithia ũũru,—o ta mĩthiĩre ya mwana mũremi.” O ta ũrĩa mwana mũremi angĩtũma aciari ake maigue ũũru ngoro, noguo Aisiraeli acio aremi ‘maathirĩkirie Ũrĩa Mũtheru wa Isiraeli.’—Mũhari wa 41.

Tũngĩĩruta atĩa kuumana na Thaburi ĩyo? Nĩ ũndũ wa gũtwĩkĩra ngoro kũmenya atĩ Jehova nĩ akoragwo na wendo mũnene harĩ arĩa mamũthathayagia na ndahiũhaga kũmatiga. No ningĩ, nĩ wega kũririkana atĩ Jehova nĩ ahutagio nĩ mĩthiĩre iitũ na no ĩtũme akene kana aigue ũũru. Hihi kũmenya ũguo gwagũteithia atĩa? Hihi nĩ gwagũteithia kuona bata wa gwĩka ũrĩa kwagĩrĩire?

Handũ ha kũrũmĩrĩra mĩthiĩre ya mehia tũtuurie ngoro ya Jehova-rĩ, nĩ kaba kũrũmĩrĩra mĩthiĩre ĩrĩa yagĩrĩire, tũkenagie ngoro yake. Na ũguo nĩguo eraga athathaiya ake meke: “Mũrũ wakwa, tuĩka mũndũ mũũgĩ, ũgĩkenagie ngoro yakwa.” (Thimo 27:11) Gũtirĩ kĩndũ kĩngĩ kĩa bata tũngĩhe Jehova ta gũtũũra na njĩra ĩrakenia ngoro yake.

[Mbica karatathi ka 32]

Gũtirĩ kĩndũ kĩngĩ kĩa bata tũngĩhe Jehova ta gũtũũra na njĩra ĩrakenia ngoro yake