Kwambĩrĩrio kwa Mũrangĩri wa Gĩthũngũ Kĩhũthie
TŨRĨ na gĩkeno kũmũmenyithia atĩ o mweri kwa ihinda rĩa mwaka ũmwe, kwambĩrĩria na riuma rĩa mweri ũyũ rĩa Mũrangĩri wa wĩruti, nĩ tũgũkorũo tũgĩcaba Mũrangĩri wa Gĩthũngũ kĩhũthie. Mũrangĩri ũcio ũrĩkoragwo na icunjĩ cia wĩruti na kwahoteka, nĩ ũrĩkoragwo na icunjĩ ingĩ. Tũkwĩhoka atĩ mũbango ũcio nĩ ũkũhingia mabataro ma kĩĩroho ma Aira a Jehova aingĩ. Nĩkĩ?
Gĩthũngũ nĩ rũthiomi rũhũthagĩrũo kaingĩ nĩ ariũ a Ithe witũ mabũrũri-inĩ ta Fiji, Ghana, Kenya, Liberia, Nigeria, Papua New Guinea, na Solomon Islands. O na gũtuĩka ariũ a Ithe witũ mabũrũri-inĩ macio no maarie thiomi ciao, kana ingĩ cia kwao-rĩ, nĩ mahũthagĩra Gĩthũngũ kaingĩ mĩario-inĩ ya o mũthenya, mĩcemanio-inĩ ya kĩũngano na ũtungata-inĩ. O na kũrĩ ũguo, Gĩthũngũ kĩrĩa mahũthagĩra nĩ kĩhũthũ gũkĩra kĩrĩa tũhũthĩraga mabuku-inĩ maitũ. Ningĩ, nĩ kũrĩ Aira angĩ a Jehova mathamĩire mabũrũri-inĩ arĩ o mũhaka mahũthĩre Gĩthũngũ makĩaranĩria na andũ o na gũtuĩka matiũĩ rũthiomi rũu wega. Makĩria ma ũguo-rĩ, gũgakorũo gũtarĩ mĩcemanio ya kĩũngano ya rũthiomi rwao.
Icunjĩ iria tũthomaga o kiumia hĩndĩ ya Wĩruti wa Mũrangĩri nĩyo njĩra ĩrĩa nene ĩhũthagĩrũo gũtũhe irio cia kĩĩroho ihinda rĩrĩa rĩagĩrĩire. Nĩ ũndũ ũcio, nĩguo arĩa othe marĩkoragwo mĩcemanio-inĩ magunĩke biũ kuumana na ũthomi ũcio, Mũrangĩri wa Gĩthũngũ kĩhũthie ũrĩhũthagĩra ciugo itarĩ nditũ na irĩ na mũbangĩre mũhũthũ. Ngathĩti ĩyo njerũ ĩrĩkoragwo na ngothi ngũrani. Thĩinĩ wa icunjĩ cia wĩruti cia Mũrangĩri ũcio, ciongo nini, ibungo, na ciũria cia gũcokera, o hamwe na mbica irĩkoragwo ihaanaine na cia Mũrangĩri wa gĩthũngũ gĩtarĩ kĩhũthie. Kwoguo, andũ othe nĩ marĩhotaga gũtwarana na gũcokia hĩndĩ ya Wĩruti wa Mũrangĩri. Nĩguo wone ngũrani ya ngathĩti icio igĩrĩ-rĩ, rora kĩonereria kĩrĩa kĩrĩ haha mũhuro kĩrĩa kĩrutĩtwo kĩbungo-inĩ gĩa 2 gĩa gĩcunjĩ kĩa mbere kĩa wĩruti thĩinĩ wa ngathĩti ĩno ya Mũrangĩri.
Nĩ mwĩhoko witũ atĩ mũbango ũcio mwerũ nĩ ũgũcokia mahoya ma andũ aingĩ arĩa maanahoya Jehova ũũ: “Kĩnjĩkĩre mbuguĩro, ndĩkĩĩrute maathani maku.” (Thab. 119:73) Tũrĩ na ma atĩ arĩa matoĩ Gĩthũngũ wega, o hamwe na ciana nyinyi iria ciaragia Gĩthũngũ, nĩ marĩhotaga kũhaarĩria Wĩruti wa Mũrangĩri o kiumia na njĩra njega makĩria. Tũgũcokeria Jehova ngatho nyingĩ nĩ ũndũ ‘wendo wake harĩ ariũ a Ithe witũ,’ nĩ ũtũmaga ahũthĩre “ngombo ĩrĩa ĩĩhokekete na njũgĩ” gũtũhe irio cia kĩĩroho kwa ũingĩ.—1 Pet. 2:17; Mat. 24:45.
Kĩama Kĩrĩa Gĩtongoragia kĩa Aira a Jehova