Jehova Nĩwe Igai Rĩakwa

“Niĩ nĩ niĩ gĩcunjĩ gĩaku, o na igai rĩaku thĩinĩ wa ciana cia Isiraeli.”—NDAR. 18:20.

1, 2. (a) Gwathire atĩa harĩ Alawii hĩndĩ ya kũgaywo kwa bũrũri? (b)Jehova eerĩire Alawii ũndũ ũrĩkũ?

THUTHA wa Aisiraeli kwĩgwatĩra gĩcunjĩ kĩnene kĩa Bũrũri wa Kĩĩranĩro-rĩ, Joshua nĩ aambĩrĩirie kũgaĩra andũ bũrũri ũcio. Aarutaga wĩra ũcio marĩ hamwe na Eliazaru ũrĩa warĩ Mũthĩnjĩri Ngai Mũnene na atongoria a mĩhĩrĩga. (Ndar. 34:13-29) Mĩhĩrĩga yothe ya Isiraeli nĩ yaheirũo igai rĩa gĩthaka no mũhĩrĩga wa Alawii ndũigana kũheo. (Josh. 14:1-5) Hihi nĩ kĩĩ gĩatũmire mũhĩrĩga wa Alawii wage kũheo igai rĩa mĩgũnda Bũrũri-inĩ wa Kĩĩranĩro? Hihi nĩ gũtiganĩrio maatiganĩirio?

2 Macokio marĩ thĩinĩ wa ciugo iria Jehova eerire Alawii. Akĩonania atĩ Alawii matiatiganĩirio, Jehova aamerire ũũ: “Niĩ nĩ niĩ gĩcunjĩ gĩaku, o na igai rĩaku thĩinĩ wa ciana cia Isiraeli.” (Ndar. 18:20) Kũmeera, “Niĩ nĩ niĩ . . . igai rĩaku” kĩarĩ kĩĩranĩro kĩega mũno! Ũngĩigua atĩa Jehova angĩkwĩra ciugo ta icio? Kwahoteka ũngiuga, ‘Hihi niĩ ndĩ mwagĩrĩru wa kwĩrũo ciugo ta icio nĩ Mwene-Hinya-Wothe?’ Ningĩ wahota kwĩyũria, ‘Hihi kũna Jehova no atuĩke igai rĩa Mũkristiano ũtarĩ mũkinyanĩru ũmũthĩ?’ Ciũria icio nĩ igũkoniĩ wee o hamwe na endwa aku. Kwoguo rekei tuone ũrĩa ciugo icio cia Ngai ciugĩte. Ũndũ ũcio nĩ ũgũtũteithia gũtaũkĩrũo nĩ ũrĩa Jehova angĩtuĩka igai rĩa Akristiano ũmũthĩ. Ningĩ makĩria ma ũguo, no atuĩke igai rĩaku, o na kĩĩrĩgĩrĩro gĩaku kĩngĩkorũo nĩ gĩa gũthiĩ igũrũ kana gĩa gũtũũra thĩinĩ wa paradiso gũkũ thĩ.

Jehova nĩ Aahingagĩria Alawii Mabataro Mao

3. Nĩ kĩĩ gĩatũmire Ngai athuure Alawii mamũtungatagĩre?

3 Mbere ya Jehova kũhe Aisiraeli Watho, ciongo cia famĩlĩ nĩcio ciatungatagĩra irĩ ta athĩnjĩri Ngai thĩinĩ wa famĩlĩ ciao. Rĩrĩa Ngai aamaheire Watho, akĩbanga kũgĩe na athĩnjĩri Ngai a mahinda mothe na angĩ a kũmateithĩrĩria na othe maarĩ a mũhĩrĩga wa Lawii. Kwahotekire atĩa? Rĩrĩa Ngai oragire marigithathi ma Misiri, nĩ aatheririe marigithathi ma Isiraeli, akĩmamũra matuĩke ake. Ningĩ Ngai akĩrehe ũgarũrũku ũyũ wa mwanya: “Niĩ nĩ niĩ ‘thurĩte Alawii thĩinĩ wa ciana cia Isiraeli, ithenya rĩa marigithathi mothe.” Tondũ marigithathi ma ciana cia Isiraeli maarĩ maingĩ gũkĩra ma Alawii-rĩ, Aisiraeli nĩ maarutire irĩhi rĩa ũkũũri kũrĩhĩra ũtiganu ũcio. (Ndar. 3:11-13, 41, 46, 47) Kwoguo Alawii makĩambĩrĩria kũruta wĩra wao wa gũtungatĩra Ngai wa Isiraeli.

4, 5. (a) Ngai aarĩ igai rĩa Alawii na njĩra ĩrĩkũ? (b) Ngai aahingagĩria Alawii mabataro mao na njĩra ĩrĩkũ?

4 Kũngĩathire atĩa harĩ Alawii thutha wao kũheo wĩra ũcio? Jehova oigire atĩ nĩwe ũngĩatuĩkire igai rĩao. Handũ ha kũgaĩrũo mĩgũnda-rĩ, makĩĩhokerũo ũtungata wa goro mũno. Kũruta “wĩra wa Jehova wa ũthĩnjĩri-Ngai” nĩrĩo rĩarĩ igai rĩao. (Josh. 18:7) Mĩhari ĩrĩa ĩthiũrũrũkĩirie Ndari 18:20 nĩ yonanagia atĩ ũndũ ũcio ndwatũmire matuĩke athĩni. (Thoma Ndari 18: 19, 21, 24.) Alawii maagĩrĩirũo nĩ kũheo ‘gĩcunjĩ gĩa ikũmi kĩrĩa ciana cia Isiraeli ciarutaga gĩtuĩke igai rĩao nĩ ũndũ wa ũtungata wao.’ Maaheagwo nĩ Aisiraeli gĩcunjĩ gĩa 10 kĩa maciaro ma mũgũnda na ma mahiũ. Nĩ ũndũ wa kũnyita mbaru ũthĩnjĩri Ngai, nao Alawii, nĩ maagĩrĩirũo kũruta gĩcunjĩ gĩa ikũmi kĩa “[indo] iria njega mũno” maaheagwo.a (Ndar. 18:25-29) Ningĩ athĩnjĩri Ngai nĩ maaheagwo “Indo ciothe iria nyamũre cia magongona” iria ciana cia Isiraeli ciarehagĩra Ngai kĩgongona-inĩ gĩake. Kwoguo andũ a nyũmba ya athĩnjĩri Ngai maarĩ na gĩtũmi kĩiganu gĩa gwĩtĩkia atĩ Jehova nĩ angĩamaheire mabataro mao.

5 Watho wa Musa nĩ woigĩte andũ marutage gĩcunjĩ kĩngĩ gĩa ikũmi, gĩa kũhũthĩrũo nĩ famĩlĩ cia Isiraeli hĩndĩ ya igomano cia o mwaka. (Gũcok. 14:22-27) O na kũrĩ ũguo, hingo ciothe mũico-inĩ wa mwaka wa gatatũ na wa gatandatũ mbere ya mwaka wa mũgwanja wa thabatũ, gĩcunjĩ kĩu gĩatwaragwo kĩhingo-inĩ gĩa itũũra gũteithia athĩni na Alawii. Alawii maagunĩkaga na gĩcunjĩ kĩu nĩkĩ? Tondũ matiarĩ na “gĩcunjĩ gĩa gĩthaka kana igai” thĩinĩ wa Isiraeli.—Gũcok. 14:28, 29.

6. Tondũ mũhĩrĩga wa Alawii ndwagaĩirũo gĩthaka thĩinĩ wa Isiraeli-rĩ, maaikaraga kũ?

6 Mũndũ ahota kwĩyũria, ‘Angĩkorũo Alawii matiaheetwo ithaka-rĩ, maikaraga kũ?’ Ngai nĩwe wamaheete ũikaro. Aamaheete matũũra 48 o hamwe na icigo iria ciamarigicĩirie cia kũrĩithia. Macio nĩ hamwe na matũũra marĩa matandatũ maarĩ ma kũũrĩra. (Ndar. 35:6-8) Kwoguo, Alawii nĩ maarĩ na kũndũ gwa gũikara hĩndĩ ĩrĩa matarĩ ũtungata-inĩ thĩinĩ wa hekarũ ya Ngai. Jehova nĩ aarũmbũyagia biũ mabataro ma arĩa meerutagĩra ũtungata-inĩ wake. Ma nĩ atĩ, Alawii nĩ moonanagia atĩ Jehova nĩwe warĩ igai rĩao na njĩra ya kwĩhoka ũhoti na wendi wake wa kũmahingĩria mabataro mao.

7. Alawii maagĩrĩirũo nĩ gwĩka atĩa nĩguo Jehova atuĩke igai rĩao?

7 Mũisiraeli ndangĩatuĩrĩirũo angĩagire kũruta gĩcunjĩ gĩa ikũmi. Rĩrĩa andũ marega kũruta gĩcunjĩ gĩa ikũmi, athĩnjĩri Ngai na Alawii nĩ maagiĩkaga. Ũguo nĩguo meekire hĩndĩ ya Nehemia. Nĩ ũndũ ũcio Alawii magĩthiĩ kũruta wĩra mĩgũnda-inĩ yao, na kwoguo magĩtiganĩria ũtungata wao. (Thoma Nehemia 13:10.) Nĩguo Alawii mone mabataro mao ma kĩĩmwĩrĩ no mũhaka rũrĩrĩ rwa Isiraeli rũngĩakorirũo rũgĩathĩkĩra Watho. Makĩria ma ũguo, athĩnjĩri Ngai na Alawii nĩ maabataraga gũkorũo na wĩtĩkio harĩ Jehova na harĩ njĩra ciake iria aahũthagĩra kũmahingĩria mabataro mao.

Marĩ Mũndũ Ũmwe Ũmwe nĩ Maatuĩte Jehova Igai Rĩao

8. Taarĩria thĩna ũrĩa Asafu ũrĩa Mũlawii aarĩ naguo.

8 Jehova aarĩ igai rĩa Alawii marĩ rũrĩrĩ. O na kũrĩ ũguo marĩ mũndũ ũmwe ũmwe Alawii nĩ maahũthagĩra ciugo “Jehova nowe rũgai rũakwa” kuonania wĩyamũrĩri na mwĩhoko wao harĩ Jehova. (Maca. 3:24) Mũlawii ũmwe wekaga ũguo aarĩ mũtungi na mũini wa nyĩmbo. Tũkũmwĩta Asafu o na gũtuĩka no kũhoteke aarĩ wa nyũmba ya Asafu, Mũlawii ũrĩa watongoragia aini hingo ya Mũthamaki Daudi. (1 Maũ. 6:31-43) Thĩinĩ wa Thaburi ya 73 tũthomaga atĩ Asafu (kana ũmwe wa rũciaro rwake) nĩ aambĩrĩirie kũiguĩra andũ aganu ũiru na akĩrigwo nĩ kĩĩ gĩatũmaga magaacĩre. Aakinyire handũ akiuga: “Ti-itherũ, ‘theretie ngoro yakwa tũhũ, na no tũhũ ngĩthambia moko rĩĩthambĩro-inĩ rĩa kũnina ũũru.” No kũhoteke aambĩrĩirie kwaga bata wa ũtungata ũrĩa aahetwo; akĩriganĩrũo atĩ Jehova nĩwe warĩ igai rĩake. Aarĩ na thĩna wa kĩĩroho o ‘nginya rĩrĩa aatonyire handũ harĩa haamũre ha Mũrungu.’—Thab. 73:2, 3, 12, 13, 17.

9, 10. Nĩ kĩĩ gĩatũmire Asafu oige Ngai nĩwe ‘igai rĩake tene na tene’?

9 Arĩ thĩinĩ wa harĩa hatheru, Asafu nĩ aambĩrĩirie kũgĩa na muonere wa maũndũ ta wa Ngai. No gũkorũo wanacemania na ũndũ ta ũcio. Hihi ũkĩamba gũtiga kuona ũtungata waku wa kĩĩroho ũrĩ wa bata na ũkĩambĩrĩria gwĩciria ũrĩa ũngĩgĩa na indo iria ũtarĩ cia kĩĩmwĩrĩ. No nĩ ũndũ wa gũthoma Kiugo kĩa Ngai na gũthiĩ thĩinĩ wa mĩcemanio ya Gĩkristiano, ũkĩambĩrĩria kuona maũndũ na njĩra ya Jehova. Asafu nĩ aataũkĩirũo nĩ maũndũ marĩa makoraga andũ arĩa aganu marigĩrĩrio-inĩ. Agĩtarania ũhoro wa igai rĩake akĩririkana atĩ Jehova nĩ akaamũnyita guoko gwake kwa ũrĩo na amũtongorie. Kwoguo Asafu akĩra Jehova ũũ: “Twĩ nawe-rĩ, gũkũ thĩ . . . gũtirĩ kĩndũ ingĩĩrirĩria.” (Thab. 73:23, 25) Aacokire akiuga atĩ Ngai nĩwe igai rĩake. (Thoma Thaburi 73:26.) O na ‘ngoro na mwĩrĩ wake ũkĩhinyĩrĩrĩkaga-rĩ,’ Ngai nĩwe warĩ ‘igai rĩa tene na tene’ rĩa mũtungi ũcio wa Thaburi. Aarĩ na ma biũ atĩ Jehova nĩ angĩamũririkanire arĩ ta mũrata wake. Ũtungata wake wa wĩhokeku ndũngĩariganĩire. (Koh. 7:1) No mũhaka akorũo ũndũ ũcio nĩ womĩrĩirie Asafu mũno! Aainire ũũ: “No niĩ-rĩ, gũkuhĩhĩria Ngai, nĩkuo kũnjagĩrĩire; Mwathani Jehova nowe nduĩte irahĩro rĩakwa.”—Thab. 73:28.

10 Asafu onaga gũkorũo Ngai arĩ igai rĩake, ũrĩ ũndũ wa bata gũkĩra indo cia kĩĩmwĩrĩ iria aaheagwo nĩ ũndũ wa gũkorũo arĩ Mũlawii. Aaragia mũno ũhoro wa ũtungata wake na ũkuruhanu wake hamwe na Jehova, ũrata ũrĩa aakũrĩtie hamwe na Ũrĩa-Wĩ-Igũrũ-Mũno. (Jak. 2:21, 23) Nĩguo agitĩre ũkuruhanu ũcio, no mũhaka mũtungi wa Thaburi angĩatũũririe wĩtĩkio wake harĩ Jehova, akĩmwĩhokaga. Asafu nĩ aabataraga kũgĩa na ma atĩ angĩatũũrire kũringana na ithimi cia Ngai, nĩ angĩkarathimwo mahinda marĩa mokĩte. O nawe no ũkorũo na ũũma o ta ũcio harĩ Mwene-Hinya-Wothe.

11. Nĩ kĩũria kĩrĩkũ Jeremia eeyũragia, nakĩo gĩacokirio atĩa?

11 Mũlawii ũngĩ watuĩte Jehova igai rĩake nĩ mũnabii Jeremia. Rekei tuone ũrĩa eendaga kuuga akĩhũthĩra ciugo icio. Jeremia aatũũraga Anathothu, itũũra rĩa Alawii rĩrĩa rĩarĩ hakuhĩ na Jerusalemu. (Jer. 1:1) Kũrĩ hĩndĩ ĩmwe eeyũragia ũũ: Nĩ kĩĩ gĩtũmaga andũ aganu magaacĩre rĩrĩa andũ athingu marathĩnĩka? (Jer. 12:1) Thutha wa kuona maũndũ marĩa meekĩkaga Jerusalemu na Juda, nĩ aaiguire arĩ na kĩhooto gĩa ‘gũteta’ nĩ ũndũ wa maũndũ marĩa eeyonagĩra. Jeremia nĩ aamenyaga atĩ Jehova nĩ mũthingu. Maũndũ marĩa Jehova aacokire gũtongoria Jeremia arathe na ũrĩa Jehova aahingirie ciugo icio cia ũrathi nĩ gwacokirie wega kĩũria kĩa mũnabii ũcio. Kũringana na morathi ma Ngai, arĩa maathĩkĩire ũtongoria wa Jehova meegwatĩire ‘mĩoyo yao ta arĩ kĩndũ meetahĩire,’ nao andũ aganu makĩrega gwathĩkĩra ũrathi ũcio makĩniinwo.—Jer. 21:9.

12, 13. (a) Nĩ kĩĩ gĩatũmire Jeremia oige: “Jehova nowe rũgai rũakwa,” na aarĩ na mwerekera ũrĩkũ? (b) Mĩhĩrĩga yothe ya Isiraeli yabataraga gũkũria mwerekera wa gweterera nĩkĩ?

12 Thutha-inĩ Jeremia abaara ũrĩa bũrũri wao watuĩkĩte maganjo, aiguaga ta aarĩ nduma-inĩ. Aaiguaga ta Jehova aamũigĩte “ta arĩa maakuire tene.” (Maca. 1:1, 16; 3:6) Jeremia nĩ aakoretwo akĩra rũrĩrĩ rũu rũremi rũcokerere Ithe wao wa igũrũ, ĩndĩ maarĩ aganu mũno nginya Ngai akĩrekereria Jerusalemu na Juda iniinwo. Ũndũ ũcio nĩ waiguithirie Jeremia ũũru, o na gũtuĩka ndaarĩ na mahĩtia. O na arĩ na mĩtangĩko, Jeremia ndaariganĩirũo atĩ Ngai nĩ arĩ tha. Oigire ũũ: “Nĩkĩo tũtaninĩtwo biũ!” Ĩĩni, tha cia Jehova cierũhaga o rũcinĩ o rũcinĩ! Nĩkĩo Jeremia oigire ũũ: “Jehova nowe rũgai rũakwa.” Aatũũrire arĩ mũnabii wa Jehova.—Thoma Macakaya 3:22-24.

13 Kwa ihinda rĩa mĩaka 70, Aisiraeli mangĩaikarire matarĩ bũrũri-inĩ wao. Ũngĩatigirũo ũrĩ maganjo. (Jer. 25:11) Ĩndĩ ciugo cia Jeremia “Jehova nowe rũgai rũakwa” cioonanirie mwĩhoko wake mũrũmu harĩ tha cia Ngai, ũndũ ũcio ũgĩtũma agĩe na ‘mwerekera wa gweterera.’ Mĩhĩrĩga yothe ya Isiraeli nĩ ĩngĩorirũo nĩ igai rĩayo kwoguo yabataraga gũkũria mwerekera o ta wa mũnabii ũcio. Jehova nĩwe warĩ mwĩhoko wao. Thutha wa mĩaka 70, andũ a Ngai nĩ maacokirio bũrũri-inĩ wao na magĩkorũo na mweke wa kũmũtungatĩra marĩ kũu.—2 Maũ. 36:20-23.

Angĩ Nao nĩ Mangĩatuire Jehova Igai Rĩao

14, 15. Thengia Alawii-rĩ, nũũ ũngĩ warekire Jehova atuĩke igai rĩake, na nĩkĩ?

14 Asafu na Jeremia maarĩ a mũhĩrĩga wa Lawii, no hihi no Alawii oiki maahetwo mweke wa gũtungatĩra Jehova? Aca! Daudi ũrĩa wacokire gũtuĩka mũthamaki wa Isiraeli, arĩ mwanake nĩ eetire Ngai ‘rũgai rwake bũrũri-inĩ wa arĩa me muoyo.’ (Thoma Thaburi 142:1, 5.) Daudi agĩtunga Thaburi ĩyo, ndaarĩ gwake mũciĩ o na kana nyũmba-inĩ ya ũnene. Aarĩ ngurunga-inĩ, ehithĩte thũ ciake. Mahinda ta merĩ ũguo, Daudi nĩ eehithĩte ngurunga-inĩ—ĩmwe yarĩ hakuhĩ na Adulamu na ĩrĩa ĩngĩ werũ-inĩ wa Eni-gedi. Kwahoteka o na Thaburi ya 142 aamĩtungĩire thĩinĩ wa ĩmwe ya ngurunga icio.

15 Angĩkorũo Daudi aatungĩire Thaburi ĩyo ngurunga-inĩ, eekire ũguo tondũ Mũthamaki Saulu nĩ aamũcaragia amũũrage. Daudi akĩũrĩra ngurunga-inĩ kũndũ kwarĩ hinya gũkinyĩrĩka. (1 Sam. 22:1, 4) Arĩ kũndũ kũu gũtaarĩ na andũ, no kũhoteke Daudi onaga ta gũtaarĩ na mũrata ũngĩamũgitĩrire. (Thab. 142:4) Hĩndĩ ĩyo nĩrĩo Daudi aakaĩire Ngai.

16, 17. (a) Nĩ maũndũ marĩkũ mangĩatũmire Daudi aigue akuĩte ngoro? (b) Daudi angĩakaĩire ũ nĩguo aheo ũteithio?

16 Mbere ya kwandĩka Thaburi ya 142, no kũhoteke Daudi nĩ aaiguĩte maũndũ marĩa maakorete Ahimeleku ũrĩa warĩ Mũthĩnjĩri Ngai Mũnene, ũrĩa wamũteithĩtie hingo ĩrĩa oragĩra Saulu. Nĩ ũndũ wa ũiru Mũthamaki Saulu nĩ oragithĩtie Ahimeleku hamwe na andũ a nyũmba yake. (1 Sam. 22:11, 18, 19) Daudi onaga ta arĩ we watũmire moragwo. Nĩ ta arĩ we woragĩte mũthĩnjĩri Ngai ũcio wamũteithĩtie. Korũo nĩwe warĩ Daudi-rĩ, nĩ ũngĩaiguire ta arĩ we watũma andũ acio makue? Ũndũ ũrĩa watangaga Daudi makĩria nĩ atĩ ndaarĩ na ũhurũko tondũ Saulu no aamũthingataga.

17 Kahinda kanini thutha ũcio, mũnabii Samueli ũrĩa waitĩrĩirie Daudi maguta nĩguo agaatuĩka mũthamaki agĩkua. (1 Sam. 25:1) Ũndũ ũcio nĩ ũngĩongereire mĩtangĩko ya Daudi. Ĩndĩ, Daudi nĩ aamenyaga nũ angĩakaĩire nĩguo aheo ũteithio—angĩakaĩire Jehova. Ũtungata wa Daudi ndwatariĩ ta ũrĩa wahetwo Alawii, no nĩ aakoretwo aitĩrĩrio maguta nĩguo macũngĩrĩro-inĩ agaatuĩka mũthamaki wa andũ a Ngai. (1 Sam. 16:1, 13) Nĩ ũndũ ũcio, Daudi nĩ aaitũrũrĩire Jehova ngoro yake na agĩthiĩ na mbere kwĩhoka Ngai amũtongorie. O nawe no ũtue Ngai igai rĩaku na mwĩgitio waku o ũkĩĩrutanagĩria ũtungata-inĩ wake.

18. Andũ arĩa twarĩrĩria thĩinĩ wa gĩcunjĩ gĩkĩ moonanirie atĩa atĩ Jehova nĩwe warĩ igai rĩao?

18 Jehova nĩwe warĩ igai harĩ andũ acio othe twarĩrĩria na njĩra ya atĩ nĩ aamahete wĩra ũtungata-inĩ wake. Meehokaga Ngai amahingĩrie mabataro mao makĩmũtungatĩra. Alawii hamwe na andũ a mĩhĩrĩga ĩyo ĩngĩ ya Isiraeli, ta Daudi, nĩ maatuire Ngai igai rĩao. Hihi wee ũngĩhota atĩa gũtua Jehova igai rĩaku? Nĩ tũkaarĩrĩria ũndũ ũcio thĩinĩ wa gĩcunjĩ kĩrĩa kĩrũmĩrĩire.

[Kohoro ka magũrũ-inĩ]

Ũngĩcokia Atĩa?

• Jehova aarĩ igai rĩa Alawii na njĩra ĩrĩkũ?

• Asafu, Jeremia, na Daudi moonanirie atĩa atĩ Jehova nĩwe warĩ igai rĩao?

• Nĩ ngumo ĩrĩkũ ũkũbatara gũkorũo nayo angĩkorũo nĩ ũgũtua Ngai igai rĩaku?

[Mbica karatathi ka 10]

Jehova aarĩ igai rĩa athĩnjĩri Ngai na Alawii na njĩra ĩrĩkũ?

[Mbica karatathi ka 11]

Alawii matiaheirũo igai rĩa gĩthaka. Ithenya rĩa ũguo, Jehova nĩwe warĩ igai rĩao, tondũ maarĩ na mweke wa bata wa kũmũtungatĩra

[Mbica karatathi ka 12]

Nĩ kĩĩ gĩateithirie Asafu gũthiĩ na mbere gũtua Jehova igai rĩake?