Hihi Wee nĩ Ũmenyetwo nĩ Jehova?
“[Jehova] nĩamenyaga andũ arĩa marĩ ake.”—2 TIM. 2:19.
1, 2. (a) Nĩ ũndũ ũrĩkũ Jesu aarũmbũyagia? (b) Nĩ ciũria irĩkũ twagĩrĩirũo nĩ gwĩcũrania ũhoro wacio?
MŨTHENYA ũmwe Mũfarisai ũmwe aathire kũrĩ Jesu akĩmũũria atĩrĩ: “Rĩathani rĩrĩa inene watho-inĩ nĩ rĩrĩkũ?” Jesu akĩmũcokeria atĩrĩ: “Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe.” (Mat. 22:35-37) Jesu nĩ eendete Ithe wake wa igũrũ mũno na kwoguo hatarĩ nganja aatũũraga kũringana na ciugo icio. Ningĩ Jesu nĩ aarũmbũyagia mũno ũkuruhanu wake na Jehova, na nĩ onanagia ũguo na njĩra ya mũtũũrĩre wake wa wĩhokeku. Nĩkĩo kahinda kanini mbere ya gĩkuũ gĩake, oigire atĩ Ngai nĩ aamenyete atĩ we nĩ aathĩkagĩra maathani ma Ngai arĩ na wĩhokeku. Na njĩra ĩyo Jesu agĩikara wendo-inĩ wa Jehova.—Joh. 15:10.
2 Andũ aingĩ ũmũthĩ nĩ moigaga atĩ nĩ mendete Ngai. Hatarĩ nganja o na ithuĩ nĩ tugaga ũguo. O na kũrĩ ũguo, nĩ harĩ maũndũ ma bata twagĩrĩirũo nĩ gwĩcũrania ũhoro wamo: ‘Hihi niĩ nĩ menyetwo nĩ Ngai? Hihi Jehova anyonaga atĩa? Hihi nĩ njũĩkaine atĩ ndĩ wake?’ (2 Tim. 2:19) Na githĩ ndũkĩrĩ mweke wa mwanya gwĩcũrania ũhoro wa ũkuruhanu ta ũcio wa hakuhĩ hamwe na Mũnene wa igũrũ na thĩ!
3. Nĩ kĩĩ gĩtũmaga andũ amwe mone ta matangĩendwo nĩ Jehova, na nĩ kĩĩ kĩngĩteithia mũndũ kũrũa na mwĩcirĩrie ta ũcio?
3 O na kũrĩ ũguo, amwe arĩa mendete Jehova mũno nĩ monaga ũrĩ ũndũ mũritũ gwĩtĩkia atĩ Ngai nĩ amonaga marĩ andũ ega. Angĩ nĩ meyagagĩra kĩene, na kwoguo magakorũo na nganja kana hihi o nĩ a Jehova. Nĩ tũkenaga mũno nĩ kũmenya atĩ ũguo tiguo Ngai atuonaga. (1 Sam. 16:7) Mũtũmwo Paulo eerire Akristiano ũũ: “Mũndũ angĩkorũo endete Ngai, ũcio nĩwe ũũĩo nĩ Ngai.” (1 Kor. 8:3) Wendo waku harĩ Ngai nĩ wa bata mũno nĩguo akũmenye. Ta wĩcirie ũũ: Nĩ kĩĩ kĩratũma ũthome ngathĩti ĩno? Nĩ kĩĩ gĩtũmaga wĩrutanĩrie gũtungatĩra Jehova na ngoro yaku yothe, muoyo waku wothe, gwĩciria gwaku guothe na hinya waku wothe? Angĩkorũo nĩ wĩyamũrĩire Ngai na ũkabatithio-rĩ, nĩ kĩĩ gĩatũmire woe makinya macio? Bibilia ĩtaaragĩria atĩ Jehova, o we ũthuthuragia ngoro nĩwe ũgucagĩrĩria andũ harĩ we. (Thoma Hagai 2:7; Johana 6:44.) Kwoguo ũtungatagĩra Jehova tondũ nĩ aakũgucĩrĩirie. Gũtirĩ hingo agatiganĩria andũ arĩa etĩte mangĩtũũra marĩ ehokeku. Ngai onaga marĩ a goro mũno, na nĩ amendete mũno.—Thab. 94:14.
4. Nĩkĩ nĩ twagĩrĩirũo nĩ gwĩcũranagia ũhoro wĩgiĩ gũkorũo tũmenyetwo nĩ Ngai?
4 Thutha wa kũgucĩrĩrio nĩ Jehova, twagĩrĩirũo nĩ kũhangʼĩra ũrĩa tũngĩtũũra wendo-inĩ wake. (Thoma Judasi 20, 21.) Ririkana, Bibilia yonanagia atĩ no kũhoteke mũndũ eyeherie kahora kahora kana atigane na Ngai. (Ahib. 2:1; 3:12, 13) Kwa ngerekano-rĩ, mbere ya kũgweta ciugo iria irĩ thĩinĩ wa 2 Timotheo 2:19, mũtũmwo Paulo nĩ aaririe ũhoro wa Humenayo na Fireto. Hatarĩ nganja athuri acio erĩ kũrĩ hĩndĩ maarĩ a Jehova, no magĩcoka magĩtigana na ũhoro ũrĩa wa ma. (2 Tim. 2:16-18) Ningĩ ririkana atĩ, thĩinĩ wa ciũngano cia Galatia, amwe arĩa maamenyetwo nĩ Ngai matiatũũrire ũtheri-inĩ wa kĩĩroho ũrĩa maakoretwo magĩkenera. (Gal. 4:9) Rekei tũtikanahũthie ũkuruhanu witũ wa goro mũno hamwe na Ngai.
5. (a) Ngumo imwe iria Ngai onaga irĩ cia bata nĩ irĩkũ? (b) Nĩ cionereria irĩkũ tũkwarĩrĩria?
5 Nĩ kũrĩ ngumo ĩmwe Jehova onaga ĩrĩ ya bata mũno. (Thab. 15:1-5; 1 Pet. 3:4) Wĩtĩkio na wĩnyihia nĩguo waamenyithanagia andũ arĩa maamenyetwo nĩ Ngai. Rekei tũthuthurie cionereria cia athuri erĩ tuone ũrĩa ngumo icio ciatũmire mendwo nĩ Jehova. Nĩ tũgũcoka twarĩrĩrie ũhoro wa mũndũ ũmwe weĩraga atĩ nĩ oĩyo nĩ Ngai, akĩgĩa na mũthiĩre wa mwĩtĩo ĩndĩ agĩcoka kũmenya atĩ nĩ aaregetwo nĩ Jehova. Nĩ tũkwĩruta maũndũ ma bata mũno kuumana na cionereria icio igĩrĩ.
Ithe wa Arĩa Othe Metĩkĩtie
6. (a) Iburahimu onanirie wĩtĩkio atĩa harĩ ciĩranĩro cia Jehova? (b) Iburahimu aamenyetwo na njĩra ĩrĩkũ nĩ Jehova?
6 Iburahimu aarĩ mũndũ ‘wehokete Jehova.’ O na nĩ etagwo “ithe wa andũ arĩa othe metĩkĩtie.” (Kĩam. 15:6; Rom. 4:11) Nĩ ũndũ wa wĩtĩkio Iburahimu aatigire mũciĩ wake, arata ake, na indo ciake agĩthiĩ bũrũri wa kũraya. (Kĩam. 12:1-4; Ahib. 11:8-10) O na mĩaka mĩingĩ thutha ũcio wĩtĩkio wa Iburahimu no warĩ na hinya. Ũndũ ũcio wonekire wega rĩrĩa eeharĩirie kũruta mũrũ wake “Isaaka atuĩke wa igongona” agĩathĩkĩra uuge wa Jehova. (Ahib. 11:17-19) Iburahimu onanirie wĩtĩkio harĩ ciĩranĩro cia Jehova, kwoguo Ngai aamuonaga arĩ wa mwanya; nĩ aamenyete Iburahimu kũna. (Thoma Kĩambĩrĩria 18:19.) To kũmenya Jehova aamenyete atĩ Iburahimu aarĩ kuo, nĩ aamwendete arĩ ta mũrata wake.—Jak. 2:22, 23.
7. Nĩ ũndũ ũrĩkũ ũĩkaine wega wĩgiĩ kũhinga gwa ciĩranĩro cia Jehova, na ũndũ ũcio wahutirie Iburahimu atĩa?
7 Ma nĩ atĩ ũtũũro-inĩ wake, Iburahimu ndaigana kwĩgwatĩra igai rĩa bũrũri ũrĩa eerĩirũo. Ningĩ ndaigana kuona mbeũ yake ĩingĩhĩte “ta mũthanga ũrĩa ũrĩ hũgũrũrũ-inĩ cia iria.” (Kĩam. 22:17, 18) O na gũtuĩka ciĩranĩro icio itiahingirio hĩndĩ ĩrĩa Iburahimu aarĩ muoyo-rĩ, nĩ aatũũririe wĩtĩkio mũrũmu harĩ Jehova. Nĩ aamenyaga atĩ kiugo kĩarĩtio nĩ Ngai, no mũhaka kĩhinge. Ĩĩni, Iburahimu aatũũraga kũringana na wĩtĩkio ũcio. (Thoma Ahibirania 11:13.) Hihi ithuĩ Jehova nĩ atũmenyete tũrĩ andũ marĩ na wĩtĩkio ta wa Iburahimu?
Gweterera Jehova Kuonanagia Wĩtĩkio
8. Nĩ merirĩria marĩkũ magĩrĩire amwe meriragĩria mũno kuona makĩhinga?
8 No tũkorũo na maũndũ twĩriragĩria mũno kuona makĩhingio. Kĩhiko, kũgĩa ciana, na ũgima mwega wa mwĩrĩ, macio mothe nĩ merirĩria ma ndũire na nĩ magĩrĩire. O na kũrĩ ũguo-rĩ, harĩ andũ aingĩ, ũmwe kana mamwe ma merirĩria macio no maage kũhinga. Angĩkorũo ũguo nĩguo gũtariĩ harĩ ithuĩ-rĩ, ũrĩa tũhiũranagia na ũndũ ũcio no wonanie ũrĩa wĩtĩkio witũ ũtariĩ.
9, 10. (a) Andũ amwe mageretie kũhingia merirĩria mao na njĩra irĩkũ? (b) Ũiguaga atĩa ũhoro-inĩ wĩgiĩ kũhinga gwa ciĩranĩro cia Ngai?
9 Nĩ ũrimũ mũndũ gũcaria ũrĩa angĩĩhingĩria merirĩria macio na njĩra ĩtaringaine na ũũgĩ ũrĩa ũheanagwo nĩ Ngai. Ũndũ ũcio no ũthũkie mũndũ kĩĩroho. Kwa ngerekano, andũ amwe maanahũthĩra njĩra cia ũrigitani iria itatwaranaga na ũtaaro wa Jehova. Angĩ nao nĩ metĩkĩrĩte kũruta mawĩra megũtũma maikare haraihu na famĩlĩ ciao na makaga gũthiaga mĩcemanio ya kĩũngano. Ĩ nakuo gũtuma ndũgũ na mũndũ ũtarĩ Mũkristiano? Mũkristiano angĩka ũguo-rĩ, hihi kũna nĩ arathingata kũmenywo nĩ Jehova? Jehova angĩaiguire atĩa korũo Iburahimu nĩ aagire wetereri harĩ kũhingio gwa ciĩranĩro iria Ngai aamwĩrĩire? Kũngĩathire atĩa korũo Iburahimu nĩ eecarĩirie indo ingĩ ta iria aarĩ nacio mbere, na ecarĩrie igweta handũ ha gweterera Jehova? (Ringithania Kĩambĩrĩria 11:4.) Hihi nĩ angĩathire na mbere kũmenywo na gwĩtĩkĩrũo nĩ Jehova?
10 Nĩ maũndũ marĩkũ wee wĩriragĩria kuona makĩhingio? Hihi wĩtĩkio waku ũrĩ na hinya ũndũ ũngĩkũhotithia gweterera Jehova, ũrĩa wĩranĩire kũhingia merirĩria maku marĩa magĩrĩire? (Thab. 145:16) O ta ũrĩa kwarĩ harĩ Iburahimu, ciĩranĩro imwe iria Ngai eranĩire no ciage kũhinga na ihenya ũrĩa tũngĩenda. O na kũrĩ ũguo, Jehova nĩ akenaga tũgĩkũria wĩtĩkio ta wa Iburahimu na tũgatũũra kũringana naguo. Tũngĩka ũguo no tũgunĩke mũno.—Ahib. 11:6.
Ngũrani ya Wĩnyihia na Mwĩtĩo
11. Kwahoteka Kora aarĩ na mĩeke ĩrĩkũ, na hatarĩ nganja ũndũ ũcio ũronania aarĩ na mwerekera ũrĩkũ harĩ Ngai?
11 Kwarĩ na ũtiganu mũnene mũno gatagatĩ ka Musa na Kora ũhoro-inĩ wa kuonania gĩtĩo harĩ mũbango wa Jehova na harĩ matua make. Ciĩko ciao nĩ ciahutirie mawoni ma Jehova kũmerekera. Kora aarĩ Mũlawii wa mbarĩ ya Kohathu, na nĩ aaheetwo mĩeke mĩingĩ. Kwahoteka mĩeke ĩyo nĩ kuona rũrĩrĩ rũu rũkĩhonokio Iria-inĩ Itune, kũnyita mbaru itua rĩa Jehova rĩa kũniina Aisiraeli arĩa maaremire hakuhĩ na Kĩrĩma gĩa Sinai, na gũthamia ithandũkũ rĩa kĩrĩkanĩro. (Tham. 32:26-29; Ndar. 3:30, 31) Hatarĩ nganja nĩ aakoretwo arĩ mwĩhokeku harĩ Jehova mĩaka mĩingĩ na andũ aingĩ thĩinĩ wa kĩũngano kĩa Isiraeli nĩ maamwĩhokaga.
12. Kũringana na ũrĩa honanĩtio karatathi-inĩ ka 31, mwĩtĩo wa Kora wathũkirie atĩa ũkuruhanu wake na Ngai?
12 O na kũrĩ ũguo-rĩ, hĩndĩ ĩrĩa rũrĩrĩ rwa Isiraeli rũerekeire Bũrũri wa Kĩĩranĩro, Kora nĩ aambĩrĩirie kuona ta mũbango wa Ngai warĩ na mahĩtia. Ningĩ andũ angĩ 250 thĩinĩ wa arĩa maatongoragia rũrĩrĩ rũu makĩnyitanĩra na Kora makĩgeria kũrehe ũgarũrũku. No mũhaka akorũo Kora na andũ acio meeĩraga atĩ maarĩ na ũkuruhanu mwega hamwe na Jehova. Meerire Musa ũũ: “Inyuĩ nĩmwĩĩkĩrĩire mũno, kuona atĩ kĩrĩndĩ gĩkĩ gĩothe nĩ kĩamũre, mũndũ o mũndũ, nake Jehova arĩ hamwe nakĩo.” (Ndar. 16:1-3) Kaĩ ũcio warĩ mwĩgerero na mwĩtĩo mũnene-ĩ! Musa aamerire ũũ: “Jehova [nĩ] ekũroka kuonania andũ ake kũna.” (Thoma Ndari 16:5.) Gũgĩkinya hwaĩ-inĩ mũthenya ũyũ ũngĩ, Kora na arĩa othe maamũnyitĩte mbaru ũremi-inĩ ũcio nĩ maakuĩte.—Ndar. 16:31-35.
13, 14. Musa onanirie wĩnyihia wake na njĩra irĩkũ?
13 Ngũrani nao, Musa aarĩ ‘mũhoreri mũno gũkĩra andũ othe arĩa maarĩ gũkũ thĩ guothe.’ (Ndar. 12:3) Onanirie ũhoreri na wĩnyihia wake na njĩra ya kũrũmĩrĩra ũtongoria wa Jehova. (Tham. 7:6; 40:16) Hatirĩ handũ honanagia atĩ kaingĩ Musa nĩ eekagĩrĩra nganja njĩra ya Jehova ya gwĩka maũndũ kana hihi akĩrakario nĩ kũrũmĩrĩra mĩbango ya Jehova. Kwa ngerekano-rĩ, Jehova nĩ aathanire ũrĩa hema ya gũtũnganwo yaagĩrĩire nĩ gwakwo nginya tũmaũndũ tũrĩa tũnyinyi twayo, ta rangi na mũigana wa ndigi iria cingĩahũthĩrirũo gũthondeka itambaya cia hema ĩyo. (Tham. 26:1-6) Thĩinĩ wa ithondeka rĩa Ngai kũngĩkorũo na mũrori akũhe ũtongoria nginya tũmaũndũ-inĩ tũrĩa tũnyinyi mũno-rĩ, rĩmwe na rĩmwe no ũigue ũritũhĩirũo. Ĩndĩ Jehova, nĩ mũrori mũkinyanĩru, ũheanaga mawĩra na ũtaana na nĩ ehokete ndungata ciake. Rĩrĩa ekũheana ũtongoria ũrĩ na maũndũ maingĩ, akoragwo na gĩtũmi kĩega. Ririkana atĩ Musa ndaigana kũrakarĩra Jehova nĩ ũndũ wa kũmwathĩrĩra nginya tũmaũndũ-inĩ ta tũu tũnyinyi, kana akĩona ta Jehova aamũhũthagia na akamũima wĩyathi. Ithenya rĩa ũguo-rĩ, Musa aatigĩrĩire atĩ arĩa maarutaga wĩra ũcio ‘noguo meekire’ makĩrũmĩrĩra watho wa Ngai. (Tham. 39:32) Ũcio warĩ wĩnyihia mũnene mũno! Musa nĩ aamenyaga atĩ wĩra ũcio warĩ wa Jehova na kwoguo we no kũhũthĩrũo aahũthagĩrũo nĩguo wĩra ũcio ũrutwo.
14 Ningĩ wĩnyihia wa Musa nĩ wonekire rĩrĩa aacemanirie na maũndũ maritũ marĩa maamũhutĩtie we mwene. Hĩndĩ ĩmwe rĩrĩa Musa aahiũranagia na andũ arĩa maanugunĩkaga nĩ aaremirũo nĩ kwĩgirĩrĩria na ndaigana kũgoocithia Ngai. Nĩ ũndũ ũcio Jehova nĩ eerire Musa atĩ ndangĩakinyirie andũ acio Bũrũri wa Kĩĩranĩro. (Ndar. 20:2-12) Marĩ na mũrũ wa nyina, Haruni, maakoretwo makirĩrĩirie kũnugunĩkĩrũo nĩ Aisiraeli mĩaka mĩingĩ. No tondũ wa Musa kwĩhia rita rĩu rĩmwe, ndaigana gũkinyĩra maũndũ marĩa aatanyĩte kwa ihinda iraya mũno! Musa eekire atĩa? O na gũtuĩka no mũhaka Musa akorũo nĩ aaiguire ũũru-rĩ, nĩ eetĩkĩrire itua rĩa Jehova arĩ na wĩnyihia. Nĩ aamenyaga atĩ Jehova nĩ Ngai mũthingu na wa kĩhooto. (Gũcok. 3:25-27; 32:4) Ũngĩĩciria ũhoro wa Musa-rĩ, na githĩ ndũkuona aarĩ mũndũ wamenyetwo nĩ Jehova?—Thoma Thama 33:12, 13.
Gwathĩkĩra Jehova nĩ Kũbataraga Wĩnyihia
15. Tũngĩĩruta atĩa kuumana na mũthiĩre wa Kora wa mwĩtĩo?
15 Ũrĩa tũiyũkagia mogarũrũku thĩinĩ wa kĩũngano gĩa Gĩkristiano gĩa thĩ yothe na matua ma arĩa matongoragia thĩinĩ wakĩo nĩ kwamũraga kana nĩ tũkũmenywo nĩ Jehova. Kora na aruna ake nĩ meeyeheranirie na Ngai nĩ ũndũ wa mwĩgerero, mwĩtĩo, na kwaga wĩtĩkio. O na gũtuĩka Kora onaga ta arĩ Musa watuaga matua ma o mũthenya-rĩ, ma nĩ atĩ Jehova nĩwe watongoragia rũrĩrĩ rũu. Kora ndaarĩ na muonere ũcio na kwoguo akĩaga kuonania wĩhokeku harĩ arĩa maahũthagĩrũo nĩ Ngai. Ũngĩarĩ ũndũ wa ũũgĩ mũno Kora gweterera Jehova onanie wega ũrĩa maũndũ maagĩrĩirũo nĩ gũikara, kana Jehova arehe ũgarũrũku angĩkorũo biũ nĩ wabataranagia. Marigĩrĩrio-inĩ, Kora agĩthũkia wĩhokeku wake wa ihinda iraya ũtungata-inĩ wa Jehova nĩ ũndũ wa ciĩko ciake cia mwĩtĩo!
16. Kũrũmĩrĩra kĩonereria kĩa Musa kĩa wĩnyihia kũngĩtũteithia atĩa tũmenywo nĩ Jehova?
16 Ũndũ ũcio wekĩkire nĩ mũkaana mũrũmu kũrĩ athuri na andũ othe kĩũngano-inĩ mahinda-inĩ maya. Gweterera Jehova na kũrũmĩrĩra ũtongoria wa arĩa maamũrĩtwo nĩ ũndũ ũbataraga wĩnyihia. Hihi ithuĩ nĩ tuonanagia atĩ tũrĩ enyihia na ahoreri o ta Musa? Nĩ twĩtĩkagĩra ũtongoria wa arĩa maamũrĩtwo thĩinĩ witũ na tũgaathĩkagĩra maũndũ marĩa matwĩraga? Hihi nĩ tũhotaga kwĩgirĩrĩria rĩrĩa twacemania na maũndũ maratũiguithia ũũru? Angĩkorũo nĩ twĩkaga ũguo-rĩ, o na ithuĩ nĩ tũrĩmenyagwo nĩ Jehova. Wĩnyihia na wathĩki witũ nĩ ũrĩtũmaga twendwo nĩwe.
Jehova nĩ Amenyaga Arĩa Ake
17, 18. Nĩ kĩĩ kĩngĩtũteithia gũthiĩ na mbere kũmenywo nĩ Jehova tũrĩ andũ ake?
17 No tũgunĩke tũngĩĩcũrania ũhoro wa arĩa Jehova aagucĩrĩirie na akĩmamenya wega. Iburahimu na Musa matiarĩ akinyanĩru na maarĩ na mahĩtia o ta ithuĩ. Ĩndĩ, Jehova nĩ aamamenyete marĩ andũ ake. O na kũrĩ ũguo, kĩonereria gĩa Kora kĩonanagia atĩ no kũhoteke twĩyeherie harĩ Jehova na kwoguo twage kũmenywo nĩwe na njĩra angĩtwĩtĩkĩra. Ũkĩrĩ ũndũ mwega o mũndũ o mũndũ eyũrie ũũ: ‘Niĩ-rĩ, Jehova anyonaga atĩa? Ingĩĩruta atĩa kuumana na cionereria iria irĩ thĩinĩ wa Bibilia?’
18 No wĩkĩrũo ngoro mũno kũmenya atĩ andũ ehokeku arĩa Jehova agucĩrĩirie amonaga marĩ indo ciake. Thiĩ na mbere gũkũria wĩtĩkio, wĩnyihia, na ngumo iria ingĩ ingĩtũma wendwo mũno nĩ Ngai witũ. Hatarĩ nganja kũmenywo nĩ Jehova nĩ mweke wa goro mũno ũrĩa ũtũrehagĩra kũiganĩra ũtũũro-inĩ witũ wa mahinda maya, na gũgatũma tũgĩe na kĩĩrĩgĩrĩro kĩa irathimo cia magegania ihinda rĩrĩa rĩroka.—Thab. 37:18.
Hihi nĩ Ũraririkana?
• Nĩ ũkuruhanu ũrĩkũ wa goro hamwe na Jehova ũngĩgĩa naguo?
• Ũngĩĩgerekania atĩa na wĩtĩkio wa Iburahimu?
• Nĩ maũndũ marĩkũ tũngĩĩruta kuumana na Kora na Musa?
[Mbica Karatathi-inĩ ka 29]
Hihi ithuĩ nĩ twĩtĩkĩtie o ta Iburahimu atĩ Jehova nĩ akaahingia ciĩranĩro ciake ciothe?
[Mbica Karatathi-inĩ ka 31]
Kora nĩ aaregire gwathĩkĩra ũtongoria arĩ na wĩnyihia
[Mbica Karatathi-inĩ ka 32]
Hihi wee nĩ ũĩkaine nĩ Jehova ta mũndũ wĩtĩkagĩra ũtongoria ũrĩ na wĩnyihia?