Hihi Wee Ũrĩ Waheenio?

KŨMENYA atĩ nĩ ũheenetio nĩ mũndũ wĩhokete nĩ ũmwe wa maũndũ marĩa matuuragia mũndũ ngoro mũno. No ũigue wagĩirũo gĩtĩo, ũrakare, kana o na ũigue ũhenekete. Maheeni mathũkagia ũrata na magathũkia ihiko, na nĩ matũmaga andũ aingĩ matunywo mbeca milioni nyingĩ.

Ta wĩcirie, ũrĩa ũngĩigua ũngĩmenya atĩ nĩ ũheenetio ũhoro-inĩ wĩgiĩ Ngai. Angĩkorũo nĩ ũkoragwo na kĩyo maũndũ-inĩ ma ndini, no ũigue ũũru mũno, o ta ũrĩa andũ aya a kanitha maaiguire:

● “Ndaiguire ngunyanĩirũo nĩ kanitha.”—DEANNE.

● “Nĩ ndaarakarire. Ndaiguire heenetio—ngĩona ta matanya na mĩoroto yakwa ĩĩ ya tũhũ mũtheri.”—LUIS.

Wahota kwamba kũrega gwĩtĩkia atĩ nĩ ũheenetio ũhoro-inĩ wĩgiĩ Ngai. Maũndũ marĩa ũĩ megiĩ Ngai no gũkorũo warutirũo nĩ mũndũ wĩhokete, ũtangĩenda gũkũiguithia ũũru—no akorũo nĩ aciari aku, mũtongoria wa ndini, mũhunjia, kana mũrata waku wa hakuhĩ. No ũkorũo wĩtĩkĩtie ũrutani mũna ũtũũro-inĩ waku wothe. Ĩndĩ-rĩ, na githĩ to wĩtĩkĩre atĩ o na ũndũ wĩtĩkĩtio nĩ andũ aingĩ no ũkorũo ũrĩ wa maheeni? Mũtongoria wa tene wa U.S. Franklin D. Roosevelt nĩ aamenyire ũndũ ũcio, tondũ oigire ũũ: “Gũcokera ũndũ wa maheeni maita maingĩ gũtingĩtũma ũtuĩke wa ma.”

Ũngĩhota kũmenya atĩa kana nĩ ũheenetio? Hĩndĩ ĩmwe Jesu eerire Ngai mahoya-inĩ ũũ: “Ũhoro waku nĩguo ũhoro-ũrĩa-wa-ma.” (Johana 17:17) Ĩĩni, Bibilia, Kiugo kĩa Ngai, gĩkoragwo na maũndũ marĩa tũbataraga nĩguo tũhote gũkũũrana ma na maheeni.

Reke Bibilia ĩgũteithie kũmenya maheeni matano marĩa andũ maragia megiĩ Ngai. Nĩ ũkuona ũrĩa ma ĩngĩgarũra ũtũũro waku wagĩre makĩria.