Ma No Ĩgarũre Mũtũũrĩre Waku
NO GŨKORŨO wanaheenio kana ũkaigua maheeni megiĩ Ngai marĩa maguũrĩtio thĩinĩ wa icunjĩ ici. O na kũrĩ ũguo, wahota gwĩtigĩra gũcenjia wĩtĩkio waku, makĩria angĩkorũo nĩ maũndũ ũkoretwo wĩtĩkĩtie ihinda iraya.
Mũndũ no akorũo na gĩtũmi gĩa gũkorũo na guoya ta ũcio. Ndini imwe itiĩkagĩra andũ ngoro mathuthurie Bibilia mone kana morutani ma cio nĩ maringaine na ũrĩa yugaga. Ndini ingĩ nacio nĩ igeragia gũtetera morutani ma maheeni, cikoiga atĩ Bibilia itariĩ ta mũtitũ, na kwoguo ti andũ othe mangĩtaũkĩrũo nĩyo. Ĩndĩ, arutwo aingĩ a Jesu matiarĩ igweta na matiarĩ athomu, no nĩ maataũkagĩrũo wega nĩ ũrutani wake.—Atũmwo 4:13.
Ningĩ no wage gũthuthuria wĩtĩkio waku nĩ ũndũ wa kuona ta gwĩka ũguo arĩ kwaga wĩtĩkio. Hihi nĩ ũkuona ta Ngai angĩrakario nĩ kuona ũgĩthuthuria ndũmĩrĩri ĩrĩa ĩrĩ thĩinĩ wa Bibilia, ũkĩenda gũtaũkĩrũo nĩ ũrĩa endaga wĩke? Aca, Kiugo gĩake gĩtwĩkĩraga ngoro twĩthuthurĩrie Maandĩko, gĩtwĩraga ũũ: ‘Mwĩmenyeriei kũna maũndũ marĩa Ngai endaga mekwo, namo no marĩa mega, marĩa mangĩtĩkĩrĩka, o marĩa makinyanĩru kũna.’—Aroma 12:2.
Kwĩruta ma ĩgiĩ Ngai to gũcaria ũũgĩ tu—ũcio nĩ ũndũ ũngĩgarũra mũtũũrĩre waku wagĩre. (Johana 8:32) Deanne, ũrĩa ũgwetetwo thĩinĩ wa gĩcunjĩ kĩa mbere, rĩu nĩ akũrĩtie wĩtĩkio harĩ Kiugo kĩa Ngai. Oigire ũũ: “Ndieciragia atĩ no ndaũkĩrũo nĩ Maandĩko wega ũguo nginya hĩndĩ ĩrĩa ndaambĩrĩirie kwĩruta Bibilia. Rĩu nĩ ndĩkĩtie kũmenya atĩ Jehova, ti hinya tu, ĩndĩ nĩ Ithe witũ wa igũrũ ũrĩ wendo. Nĩ ngĩte na muoroto wa ma ũtũũro-inĩ.”
No gũkorũo wanathoma Bibilia na ũkĩaga gũtaũkĩrũo. Angĩkorũo nĩguo-rĩ, ndũgakue ngoro. Kũgeria gũtaũkĩrũo nĩ Bibilia thutha wa gũkorũo ũrutĩtwo maheeni megiĩ Ngai nĩ ta kũgeria gũcokania macini ũkĩrũmĩrĩra kabuku gatarĩ kayo. Wahota gũcokania tũcunjĩ tũmwe wega, ũcoke ũkue ngoro nĩ ũndũ wa kũremwo gũcokania tũcunjĩ tũu tũngĩ. Ĩndĩ ũngĩhũthĩra kabuku ka macini ĩyo, no ũmĩcokanie wega.
Hihi no wende kwĩruta ma ĩrĩa ĩkoniĩ Ngai? Tũgũkũũria waranĩrie na Aira a Jehova a kwanyu kana wandĩke marũa ũkĩhũthĩra andĩrĩthi ĩrĩa yagĩrĩire karatathi-inĩ ga 4 ka ngathĩti ĩno ũkĩũria ũrutwo Bibilia hatarĩ marĩhi.
‘Mwĩmenyeriei kũna maũndũ marĩa Ngai endaga mekwo, namo no marĩa mega, marĩa mangĩtĩkĩrĩka, o marĩa makinyanĩru kũna.’ —AROMA 12:2