Wĩhoke Jehova, “Ngai Mwene Ũhoro Wothe wa Kũũmanĩrĩria”
“We ũrĩa ũrĩ Ngai na Ithe wa Mwathani Jesu Kristo arogathwo, o we Ithe witũ mwene tha, na Ngai mwene ũhoro wothe wa kũũmanĩrĩria.”—2 KOR. 1:3.
1. Nĩ ũndũ ũrĩkũ andũ othe mabataraga?
KUUMA o twaciarũo, nĩ tũbataraga kũũmĩrĩrio. Rĩrĩa kaana karabatara kũhoorerio nĩ kũrĩra karĩraga. Kahota gũkorũo gakĩenda kuoywo kana karĩ kahũtu. O na twatuĩka andũ agima, no tũbataraga kũũmĩrĩrio kaingĩ. Makĩria ũndũ ũcio nĩ wa bata rĩrĩa tũrahiũrania na ũndũ mũritũ.
2. Jehova onanagia atĩa atĩ nĩ arĩũmagĩrĩria arĩa mamwĩhokaga?
2 Andũ a famĩlĩ na arata kaingĩ no matũũmĩrĩrie. O na kũrĩ ũguo, maũndũ mamwe marĩa matũrehagĩra mĩtangĩko, matingĩniinwo nĩ andũ. Ngai nowe wiki ũngĩhota gũtũũmĩrĩria o na mĩtangĩko iitũ ĩngĩkorũo ĩrĩ mĩnene atĩa. Kiugo gĩake gĩtwĩraga na ma ũũ: “Jehova-rĩ, arĩa othe mamũkayagĩra, akoragwo hakuhĩ nao, . . . na nĩaiguaga kĩrĩro kĩao.” (Thab. 145:18, 19) Ma nĩ atĩ, “Maitho ma Jehova merekeire na kũrĩ arĩa athingu, na matũ make magategerũo kĩrĩro kĩao.” (Thab. 34:15) Ĩndĩ angĩkorũo Ngai nĩ egũtũteithia na atũmĩrĩrie, no mũhaka tũmwĩhoke. Mũtungi wa Thaburi Daudi nĩ onanirie ũndũ ũcio wega rĩrĩa aainire ũũ: ‘Jehova-rĩ, harĩ mũndũ mũhinyĩrĩrie, arĩtuĩkaga rĩangĩro rĩakĩtwo iraya na igũrũ, rĩangĩro rĩake o igũrũ, rĩa kũũrĩra hingo ya mĩnyamaro. Nao arĩa moĩ rĩĩtwa rĩaku nĩwe marĩĩhokaga, tondũ wee Jehova-rĩ, ndũrĩ watiganĩria arĩa makũrongoretie.’—Thab. 9:9, 10.
3. Jesu aahũthĩrire ngerekano ĩrĩkũ kuonania ũrĩa Jehova endete andũ Ake?
3 Ndungata cia Jehova nĩ cia bata mũno maitho-inĩ make. Jesu nĩ onanirie ũndũ ũcio wega rĩrĩa oigire ũũ: “Githĩ tũnyoni tũtano tũtiendagio tũthendi twĩrĩ? Na rĩrĩ, gũtirĩ o na kamwe gatuo kangĩriganĩra Ngai. No rĩrĩ, o na njuĩrĩ cianyu cia mũtwe nĩ ndare ciothe. Tigagai gwĩtigĩra: inyuĩ mwĩ bata gũkĩra tũnyoni tũingĩ.” (Luk. 12:6, 7) Kũgerera mũnabii Jeremia Jehova eerire andũ Ake a tene ũũ: “Ngwendete wendo ũrĩa ũtũũraga tene na tene; tondũ ũcio no ngĩrĩrĩirie gũgwĩka maũndũ ma ũtugi.”—Jer. 31:3.
4. Nĩ kĩĩ kĩngĩtũma twĩhoke ciĩranĩro cia Jehova?
4 Kwĩhoka Jehova o hamwe na ciĩranĩro ciake no gũtũũmĩrĩrie hĩndĩ ya mĩtangĩko. Kwoguo twagĩrĩirũo gũkorũo na mwĩhoko ta ũrĩa Joshua aarĩ naguo harĩ Ngai rĩrĩa oigire: “Mũtirĩ mwaaga ũndũ o na ũmwe wa maũndũ mothe mega marĩa Jehova Ngai wanyu aaririe ũhoro wamo mamũkoniĩ; maũndũ macio mothe nĩmaahingirio o wega, na hatirĩ ũndũ o na ũmwe wamo wanaaga kũhingio.” (Josh. 23:14) Makĩria ma ũguo, tũrĩ na ma atĩ o na tũngĩhatĩrĩrio nĩ magerio kwa ihinda, “Ngai nĩ mwĩhokeku,” na ndarĩ hingo agatiganĩria ndungata ciake njĩhokeku.—Thoma 1 Akorintho 10:13.
5. Tũngĩhota atĩa kũũmĩrĩria andũ arĩa angĩ?
5 Mũtũmwo Paulo oigire atĩ Jehova nĩ “Ngai mwene ũhoro wothe wa kũũmanĩrĩria.” “Kũũmĩrĩria” nĩ kũhooreria mũndũ ũrĩ na mĩtangĩko kana ũrĩ na kĩeha. Ũndũ ũcio wĩkagwo na njĩra ya kũhũthahũthĩria mũndũ kĩeha na kũmwĩkĩra ngoro. Ũguo nĩguo Jehova ekaga. (Thoma 2 Akorintho 1:3, 4.) Gũtirĩ mũndũ kana kĩndũ kĩngĩgiria Ithe witũ wa igũrũ eke ũrĩa ekwenda na kwoguo akoragwo na ũhoti ũrĩa wothe ũngĩbatarania kũũmĩrĩria arĩa mamwendete. Tondũ wa kũũmĩrĩrio nĩwe na ithuĩ nĩ tũhotaga kũũmĩrĩria Akristiano arĩa angĩ rĩrĩa “marĩ na thĩna o na ũrĩkũ.” No tũhote gwĩka ũguo, ‘nĩ ũndũ wa kũũmĩrĩrio kũrĩa ithuĩ ene tũũmagĩrĩrio nakuo nĩ Ngai.’ Na githĩ ũndũ ũcio ndũkĩonanagia wega ũrĩa ũhoti wa Jehova wa kũũmĩrĩria arĩa makuĩte ngoro ũrĩ mũnene!
Kũhiũrania na Maũndũ Marĩa Marehaga Mĩtangĩko
6. Gweta maũndũ marĩa mangĩrehe mĩtangĩko.
6 Nĩ tũbataraga kũũmĩrĩrio maũndũ-inĩ maingĩ. Ũndũ ũrĩa mũnene ũrehaga kĩeha nĩ gũkuĩrũo nĩ mũndũ twendete, na makĩria angĩkorũo nĩ mũndũ ũrĩa tũhikanĩtie nake kana mwana. Ningĩ mũndũ no abatare kũũmĩrĩrio angĩkorũo nĩ arathutũkanio. Mĩrimũ, ũkũrũ, ũthĩni, mathĩna ma kĩhiko, kana mĩtangĩko ĩrĩa ĩrĩ thĩinĩ wa thĩ nĩ maũndũ mangĩtũma mũndũ abatare mũno kũũmĩrĩrio.
7. (a) Hĩndĩ ĩrĩa mũndũ arĩ na kĩeha nĩ rĩũmĩrĩria rĩa mũthemba ũrĩkũ abataraga? (b) Jehova ekaga atĩa nĩguo ahonie ngoro ‘ĩrĩa ĩthuthĩkĩte’?
7 Hĩndĩ ĩrĩa tũrĩ na mĩtangĩko no tũbatare kũhoorerio ngoro, meciria, o na kĩĩmwĩrĩ na kĩĩroho. Kwa ngerekano-rĩ, wĩcirie ũhoro wa ngoro. Kiugo kĩa Ngai nĩ kiugaga atĩ ngoro ciitũ no ‘ithuthĩke.’ (Thab. 51:17) Hatirĩ nganja Jehova no atũteithie ũndũ-inĩ ũcio tondũ “arĩa athuthĩku ngoro, nĩ kũhonia amahonagia, akamoha nguraro ciao.” (Thab. 147:3) O na rĩrĩa maũndũ marĩ maritũ mũno, Ngai no ahoorerie ngoro thuthĩku tũngĩmũhoya tũrĩ na wĩtĩkio biũ, na tũrũmĩrĩre maathani make.—Thoma 1 Johana 3:19-22; 5:14, 15.
8. Jehova angĩtũteithia atĩa rĩrĩa tũrĩ na mĩtangĩko ya meciria?
8 Kaingĩ meciria maitũ nĩ mabataraga kũũmĩrĩrio nĩ amu magerio matiganĩte no matũrehere mĩtangĩko mĩnene ya meciria. Ma nĩ atĩ tũtingĩhota kũhiũrania na magerio macio ma wĩtĩkio tũkĩhũthĩra hinya witũ. Nĩkĩo mũtungi wa Thaburi aainire ũũ: “Rĩrĩa nyingĩhĩirũo thĩinĩ wakwa nĩ mĩtangĩko ũhoreria waku nĩguo ũngenagia ngoro.” (Thab. 94:19) Makĩria ma ũguo-rĩ, Paulo aandĩkire ũũ: “Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu nakuo thĩinĩ wa Kristo Jesu.” (Afil. 4:6, 7) Gũthoma Maandĩko na gwĩcũrania nĩ ũteithio mũnene harĩ kũhiũrania na mĩtangĩko ya meciria.—2 Tim. 3:15-17.
9. Tũngĩhiũrania atĩa na mĩtangĩko ya meciria?
9 Rĩmwe twahota gũkua ngoro mũno, nginya ũkorũo ũrĩ ũndũ mũhũthũ kũgĩa na meciria moru. Rĩngĩ twahota kwĩigua ta tũtangĩhota kũhingia wĩra mũna ũkonainie na ũtungata wa kĩũngano. Hĩndĩ ta ĩyo, o nayo, Jehova no atũmĩrĩrie na atũteithie. Kwa ngerekano: Rĩrĩa Joshua aaheirũo wĩra atongorie Aisiraeli magerere gatagatĩ ka ndũrĩrĩ irĩ hinya iria ciarĩ thũ ciao, Musa eerire kĩrĩndĩ ũũ: “Gĩai na hinya, na mũũmĩrĩrie menyai mwĩtigĩre, kana mũmakio nĩcio; nĩ gũkorũo Jehova Ngai waku nĩwe ũgũtwarana nawe; ndagagũtigĩrĩra, kana atigane nawe.” (Gũcok. 31:6) Nĩ ũndũ wa ũteithio wa Jehova, Joshua nĩ aahotire gũtongoria andũ a Ngai magĩkinya Bũrũri wa Kĩĩranĩro na magĩtooria thũ ciao ciothe. Mbere ĩyo, Musa nĩ eeyoneire ũteithio o ta ũcio wa Ngai Iria-inĩ Itune.—Tham. 14:13, 14, 29-31.
10. Angĩkorũo ũgima witũ wa mwĩrĩ nĩ ũrathũkio nĩ mĩtangĩko-rĩ, nĩ kĩĩ kĩngĩtũteithia?
10 Ningĩ mĩtangĩko no ĩthũkie ũgima witũ wa mwĩrĩ. Ma nĩ atĩ kũrĩa irio iria ciagĩrĩire, kũhurũka wega, na gũikara tũrĩ atheru no gũtũteithie mũno. Ningĩ gwĩciria ũhoro wa kĩĩrĩgĩrĩro kĩa ihinda rĩũkĩte kĩrĩa kĩrĩ thĩinĩ wa Bibilia no kwagĩrie ũgima witũ wa mwĩrĩ. Kwoguo nĩ wega rĩrĩa tũrahiũrania na mĩtangĩko ya mũthemba mũna, tũkaririkana ciugo ici cia Paulo cia gũtwĩkĩra ngoro, “Nĩ kũhatĩkwo tũhatĩkagwo na mbarĩ ciothe, no tũtihingĩrĩirio; tũrigagwo nĩ ũrĩa tũgũĩka, no ti nginya tũũme tha; tũthingatagwo, no tũtitiganĩirio; kũrũndwo nĩtũrũndagwo na tũtininwo biũ.”—2 Kor. 4:8, 9.
11. Mũndũ angĩhota atĩa gũtooria mũrimũ wa kĩĩroho?
11 Magerio mamwe no matũthũkie kĩĩroho. Ũndũ-inĩ ũcio o naguo, Jehova no atũteithie. Kiugo gĩake gĩtwĩraga ũũ: “Jehova atiiragĩrĩra arĩa othe mekwenda kũgũa, na akainamũra arĩa othe mekonotete.” (Thab. 145:14) Nĩguo tũtoorie mũrimũ wa kĩĩroho, twagĩrĩirũo nĩ gũcaria ũteithio wa athuri a kĩũngano. (Jak. 5:14, 15) Ningĩ gũikaraga tũkĩririkanaga kĩĩrĩgĩrĩro kĩrĩa kĩrĩ thĩinĩ wa Maandĩko kĩa muoyo wa tene na tene, no gũtũteithie kũũmĩrĩria hĩndĩ ĩrĩa wĩtĩkio witũ ũragerio.—Joh. 17:3.
Cionereria cia Andũ Moomĩrĩirio nĩ Ngai
12. Taarĩria ũrĩa Jehova omĩrĩirie Iburahimu.
12 Mũtungi ũmwe wa Thaburi atongoretio nĩ roho oigire ũũ: “Ririkanaga ũhoro ũrĩa werire ndungata ĩno yaku, nĩ gũtuĩka wee nĩũtũmĩte ngĩe na wĩrĩgĩrĩro. Ũndũ ũcio nĩũ’horeragia ndĩ mĩtandiũko-inĩ, nĩ amu uuge waku nĩguo ũrurumũkagia muoyo wakwa.” (Thab. 119:49, 50) Mahinda-inĩ maya tũrĩ na Kiugo kĩa Jehova, kĩrĩa gĩkoragwo na cionereria nyingĩ cia andũ moomĩrĩirio nĩ Ngai. Kwa ngerekano-rĩ, no kũhoteke Iburahimu nĩ aatangĩkire mũno rĩrĩa aamenyire atĩ Jehova nĩ angĩaninire matũũra ma Sodomu na Gomora. Mũthuri ũcio mwĩhokeku wa tene oririe Ngai ũũ: “Anga ũgũkĩninanĩria andũ arĩa athingu o na arĩa aaganu hamwe?” Jehova omĩrĩirie Iburahimu atĩ, Ndangĩaninire Sodomu kũngĩakorirũo na andũ 50 tu athingu. O na kũrĩ ũguo, Iburahimu nĩ oririe Jehova maita mangĩ matano atĩ kana nĩ angĩaniinire matũũra macio korũo nĩ gwakorirũo na andũ 45 athingu? 40? 30? 20? 10? Maita macio mothe, Jehova arĩ na ũkirĩrĩria na ũtugi eerire Iburahimu atĩ matũũra macio nĩ mangĩahonokirio. O na gũtuĩka andũ arĩa maarĩ athingu o na matiakinyire ikũmi-rĩ, Jehova nĩ aahonokirie Loti na airĩtu ake.—Kĩam. 18:22-32; 19:15, 16, 26.
13. Hana onanirie atĩa atĩ nĩ eehokete Jehova?
13 Hana mũtumia wa Elikana nĩ eeriragĩria mũno kũgĩa mwana. Ĩndĩ aarĩ thata, na ũndũ ũcio nĩ wamũtangaga mũno. Akĩhoya Jehova igũrũ rĩa ũndũ ũcio, nake Eli ũrĩa warĩ Mũthĩnjĩri Ngai Mũnene akĩmwĩra ũũ: “Ngai wa Isiraeli aroetĩkĩra ihoya rĩaku.” Ũndũ ũcio nĩ woomĩrĩirie Hana mũno, “na ndaigana gũcoka gũtuka gĩthiithi.” (1 Sam. 1:8, 17, 18) Hana eehokire Jehova biũ, akĩiga maũndũ moko-inĩ make. O na gũtuĩka ndamenyaga moimĩrĩro mangĩarĩ marĩkũ, Hana nĩ aagĩire na thayũ wa ngoro. Thutha wa ihinda Jehova agĩcokia mahoya make. Akĩoha nda na agĩciara kahĩĩ, agĩgatua Samueli.—1 Sam. 1:20.
14. Daudi aabataraga kũũmĩrĩrio nĩkĩ, na aakaĩire ũ?
14 Daudi mũthamaki wa Isiraeli ya tene nake nĩ kĩonereria kĩngĩ kĩa mũndũ womĩrĩirio nĩ Ngai. Tondũ Jehova “abaraga ngoro thĩinĩ,” rĩrĩa aathuuraga Daudi nĩguo agaatuĩka mũthamaki wa Isiraeli, nĩ aamenyaga atĩ Daudi aarĩ mũndũ ũtaarĩ na ũhinga na weyamũrĩire biũ ũthathaiya-inĩ ũrĩa wa ma. (1 Sam. 16:7; 2 Sam. 5:10) O na kũrĩ ũguo-rĩ, thutha-inĩ Daudi nĩ aatharirie na Bathi-sheba na agĩcoka akĩgeria kũhitha mehia macio na njĩra ya kũũragithia mũthuriwe. Rĩrĩa Daudi aateithirio kuona ũritũ wa mehia make, akĩhoya Jehova ũũ: “Kũringana na ũrĩa . . . matha maku marĩ maingĩ-rĩ, tharia mehia makwa o gũtharia. ’Thambia mũno, waganu wakwa ũ’thire, ’theria, mahĩtia makwa maninũke. Amu nĩnjũĩ mehia makwa, o niĩ mwene, mahĩtia makwa ngakĩmonaga o ro hingo ciothe.” (Thab. 51:1-3) Daudi nĩ eeririre biũ na Jehova akĩmuohera. O na gũkĩrĩ ũguo, no mũhaka Daudi angĩanyamarĩkire nĩ ũndũ wa moimĩrĩro ma mehia make. (2 Sam. 12:9-12) Ĩndĩ, tha cia Jehova nĩ ciatũmire omĩrĩrie ndungata ĩyo yake yarĩ na wĩnyihia.
15. Nĩ ũteithio ũrĩkũ Jehova aaheire Jesu kahinda kanini mbere ya gĩkuũ gĩake?
15 Rĩrĩa Jesu aarĩ gũkũ thĩ nĩ aacemanirie na magerio maingĩ. Ngai nĩ eetĩkĩririe wĩtĩkio wa Jesu ũgerio, no nake Jesu akĩrũmia wĩkindĩru wake arĩ mũndũ mũkinyanĩru wehokaga Jehova, na akanyitaga mbaru ũnene Wake hingo ciothe. Arĩ hakuhĩ gũkunyanĩrũo na kũragwo, Jesu nĩ aahoire Jehova ũũ: “Ti ũrĩa ngwenda niĩ, no gwĩkwo o ũrĩa ũkwenda wee.” O hĩndĩ ĩyo mũraika akiumĩrĩra Jesu na akĩmũũmĩrĩria. (Luk. 22:42, 43) Ngai nĩ omĩrĩirie Jesu, akĩmũhe hinya, na ũteithio ũrĩa aabataraga ihinda-inĩ rĩu.
16. Ngai angĩtũteithia atĩa muoyo witũ ũngĩkorũo ũgwati-inĩ, nĩ ũndũ wa wĩkindĩru witũ?
16 O na kũngĩtuĩka nĩ tũkũragwo nĩ ũndũ wa kũrũmia wĩtĩkio witũ tũrĩ Akristiano-rĩ, Jehova nĩ arĩtũteithagia tũrũmie wĩkindĩru witũ harĩ we. Ningĩ kĩĩrĩgĩrĩro gĩa kũriũkia arĩa akuũ nĩ gĩtũũmagĩrĩria. Nĩ twĩriragĩria mũno mũthenya wa ‘kũniinwo gwa gĩkuũ, thũ ĩrĩa ya kũrigĩrĩria.’ (1 Kor. 15:26) Ndungata njĩhokeku cia Ngai iria ikuĩte o hamwe na andũ angĩ arĩa marĩ thĩinĩ wa kĩririkano kĩa Ngai gĩa kwĩhokeka nĩ makaariũkio. (Joh. 5:28, 29; Atũm. 24:15) Kwĩhoka kĩĩranĩro kĩa Jehova gĩa kũriũkia arĩa akuũ nĩ gũtũũmagĩrĩria mũno na gũgatũhe kĩĩrĩgĩrĩro kĩa ma hĩndĩ ĩrĩa tũranyarirũo.
17. Jehova angĩtũũmĩrĩria atĩa rĩrĩa twakuĩrũo nĩ mũndũ twendete?
17 Na githĩ ti ũhoro ũtũũmagĩrĩria kũmenya atĩ endwa aitũ arĩa makomete mbĩrĩra-inĩ, marĩ na kĩĩrĩgĩrĩro gĩa gũcokio muoyo thĩinĩ wa thĩ njerũ ĩtarĩ na maũndũ marĩa mothe marehaga mĩtangĩko! “Kĩrĩndĩ kĩingĩ” kĩa ndungata cia Jehova iria ikaahonoka mũico wa mũtabarĩre ũyũ mũũru nĩ igaakorũo na mweke wa mwanya mũno wa kũnyita ũgeni na gũthomithia arĩa magaacokio muoyo gũkũ thĩ.—Kũg. 7:9, 10.
Moko ma Ngai Megũtũũra Makũnyitĩrĩire
18, 19. Ndungata cia Ngai ikoretwo ikĩũmĩrĩrio na njĩra ĩrĩkũ rĩrĩa iranyarirũo?
18 Thĩinĩ wa rwĩmbo rwega rwa kũhooreria ngoro, Musa omĩrĩirie andũ a Isiraeli ũũ: “Ngai ũrĩa ũtũũraga mĩndĩ na mĩndĩ, nĩwe ũtũũro waku, Namo moko make marĩa matũũraga tene na tene nĩmo me mũhuro waku.” (Gũcok. 33:27) Thutha ũcio mũnabii Samueli eerire Aisiraeli: “Menyai mũcoke kũgarũrũka mũtige kũrũmĩrĩra Jehova, no tungatĩrai Jehova na ngoro yanyu yothe. . . . Nĩ gũkorũo Jehova ndangĩtiga andũ ake, nĩ ũndũ wa ũrĩa rĩĩtwa rĩake rĩnenehete.” (1 Sam. 12:20-22) Tũngĩthiĩ na mbere kwĩnyitithania na Jehova ũthathaiya-inĩ wa ma, ndarĩ hingo agatũtiga. Hingo ciothe nĩ arĩtũheaga ũteithio ũrĩa tũbataraga.
19 Ngai ndagaga kũhe andũ ake ũteithio na rĩũmĩrĩria rĩrĩa mabataraga matukũ-inĩ maya ma kũrigĩrĩria ma ũgwati. Makĩria ma mĩaka igana rĩmwe mĩhĩtũku Akristiano a ma thĩinĩ wa thĩ yothe nĩ makoretwo makĩnyarirũo na magaikio njera nĩ ũndũ wa gũtungatĩra Jehova. Maũndũ marĩa meyoneire nĩ monanagia wega atĩ, kũna Jehova nĩ omagĩrĩria ndungata ciake hĩndĩ ya magerio. Kwa ngerekano, hĩndĩ ya Ũrũmwe wa Sovieti (Soviet Union), mũrũ wa Ithe witũ ũmwe ohirũo mĩaka 23 nĩ ũndũ wa wĩtĩkio wake. O na kũrĩ ũguo, nĩ kwagĩire na mũbango wa kũmũtwaragĩra irio cia kĩĩroho nĩguo agĩe na hinya na omĩrĩrio. Oigire ũũ: “Mĩaka-inĩ ĩyo yothe, nĩ nderutire kwĩhoka Jehova na nĩ aaheaga hinya.”—Thoma 1 Petero 5:6, 7.
20. Nĩ kĩĩ kĩngĩtũma tũkorũo na ma atĩ Jehova ndarĩ hingo agaatũtiga?
20 O na tũngĩcemania na maũndũ mahaana atĩa, nĩ wega kũririkana ciugo ici cia gũtũũmĩrĩria cia mũtungi wa Thaburi: “Jehova ndarĩ hĩndĩ agate kĩrĩndĩ gĩake.” (Thab. 94:14) O na gũtuĩka nĩ tũbataraga kũũmĩrĩrio ithuĩ ene-rĩ, o na ithuĩ tũrĩ na mweke wa kũũmagĩrĩria arĩa angĩ. O ta ũrĩa tũkoona thĩinĩ wa gĩcunjĩ kĩrĩa kĩrũmĩrĩire, tũrĩ na itemi rĩa kũũmĩrĩria arĩa maracakaya thĩinĩ wa thĩ ĩno ĩiyũrĩtwo nĩ mathĩna.
ŨNGĨCOKIA ATĨA?
• Maũndũ mamwe marĩa mangĩtũrehera mĩtangĩko nĩ marĩkũ?
• Jehova omagĩrĩria ndungata ciake na njĩra irĩkũ?
• Muoyo witũ ũngĩkorũo ũgwati-inĩ, nĩ kĩĩ kĩngĩtũmĩrĩria?
[Ithandũkũ/Mbica karatathi-inĩ ga 23]
ŨRĨA TŨNGĨTOORIA MAŨNDŨ MARĨA MANGĨTHŨKIA . . .
▪ ngoro ciitũ Thab. 147:3; 1 Joh. 3:19-22; 5:14, 15
▪ meciria maitũ Thab. 94:19; Afil. 4:6, 7
▪ ũmĩrĩru witũ Tham. 14:13, 14; Gũcok. 31:6
▪ ũgima witũ wa mwĩrĩ 2 Kor. 4:8, 9
▪ ũgima witũ wa kĩĩroho Thab. 145:14; Jak. 5:14, 15