Wĩgerekanie na Jesu Gũikaraga Wĩiguĩte

“Wĩhũgagei na mũhoyage.”​—MAT. 26:41.

ŨNGĨCOKIA ATĨA?

Mahoya maitũ mangĩonania atĩa atĩ nĩ tũikaraga twĩiguĩte?

Nĩ na njĩra irĩkũ tũngĩonania atĩ tũikaraga twĩiguĩte ũtungata-inĩ witũ?

Nĩkĩ nĩ harĩ bata gũikaraga twĩiguĩte rĩrĩa tũrĩ rungu rwa magerio, na tũngĩka ũguo atĩa?

1, 2. (a) Nĩ ciũria irĩkũ mũndũ angĩĩyũria ciĩgiĩ kĩonereria kĩa Jesu gĩa gũikara eiguĩte? (b) Hihi andũ ehia no magunĩke nĩ kĩonereria gĩkinyanĩru kĩa Jesu? Heana ngerekano.

WAHOTA kwĩyũria ũũ: ‘Mũndũ no ahote kwĩgerekania na Jesu gũikaraga eiguĩte? Ningĩ-rĩ, Jesu aarĩ mũkinyanĩru! Makĩria ma ũguo, kũrĩ hĩndĩ Jesu angĩahotire kũmenya wega ũrĩa gũgatuĩka thutha-inĩ—nginya mĩaka ngiri nyingĩ thutha wa ũtũũro wake gũkũ thĩ! Hihi kũna Jesu nĩ aabataraga gũikara eiguĩte?’ (Mat. 24:37-39; Ahib. 4:15) Rekei twambe twarĩrĩrie ciũria icio nĩguo tuone ũrĩa ũhoro ũcio ũrĩ wa bata na wa mĩtũkĩ.

² Hihi andũ ehia no magunĩke nĩ kĩonereria kĩa mũndũ mũkinyanĩru? Ĩĩ, tondũ mũndũ no erute kuumana na mũrutani mwega na kĩonereria gĩake. Kwa ngerekano-rĩ, ta hũra mbica mũndũ akĩrutwo kũhũthĩra ũta riita rĩa mbere. Ndangĩikia mũguĩ wega ũndũ angĩhota kũratha kĩrĩa kĩrongoreirio, ĩndĩ athiaga na mbere kwĩruta na kwĩmenyeria maita maingĩ. Nĩguo agaagĩrie ũhoti wake-rĩ, akarora wega kĩonereria kĩa mũrutani wake, ũrĩa njorua ya gũikia mĩguĩ. Mũrutwo ũcio akarora wega ũrĩa mũrutani wake arũgamĩte, ũrĩa aigĩte moko make, na ũrĩa arahũthĩra ciara ciake kũnyita ũta na mũguĩ. Kahora gwa kahora, mũrutwo ũcio wĩhotorete kũmenya gũikia mĩguĩ, agathomithio hinya ũrĩa arabatara kũhũthĩra akĩgucia rũrigi rwa ũta, akamenya kũhiũrania na rũhuho, na agathiĩ na mbere kwĩrutanĩria. Nĩ ũndũ wa kwĩgerekania na mũrutani wake-rĩ, macũngĩrĩro-inĩ mĩguĩ yake ĩgathiĩ ĩgĩkuhagĩrĩria makĩria harĩa ĩrongoreirio. O ũndũ ũmwe na ũcio, tũthiaga na mbere kwĩrutanĩria kwagĩria Ũkristiano witũ makĩria na njĩra ya gwathĩkĩra ũrutani wa Jesu na kũrũmĩrĩra kĩonereria gĩake gĩkinyanĩru.

3. (a) Jesu onanirie atĩa atĩ nĩ aabataraga gũikara eiguĩte? (b) Nĩ maũndũ marĩkũ tũkwarĩrĩria thĩinĩ wa gĩcunjĩ gĩkĩ?

³ Hihi kũna Jesu nĩ aabataraga gũikara eiguĩte? Ma nĩ atĩ, nĩ aabataraga. Kwa ngerekano, ũtukũ wa mũico wa ũtũũro wake gũkũ thĩ-rĩ, Jesu eerire atũmwo ake ehokeku ũũ: ‘Mwĩhũgei hamwe na niĩ.’ Agĩcoka akĩmera ũũ: ‘Wĩhũgagei na mũhoyage, mũtigakinye magerio-inĩ.’ (Mat. 26:38, 41) O na gũtuĩka Jesu aaikaraga eiguĩte hingo ciothe-rĩ, ihinda-inĩ rĩu iritũ nĩ eendaga gũikara eiguĩte makĩria na arĩ hakuhĩ na Jehova o ũrĩa kũngĩahotekire. Nĩ aamenyaga atĩ o nao arũmĩrĩri ake nĩ maabataraga gũikaraga meiguĩte—to ihinda-inĩ rĩu, no nĩ nginya matukũ ma thutha. Nĩ ũndũ ũcio, rekei twarĩrĩrie kĩrĩa gĩtũmaga Jesu ende tũikarage twĩiguĩte. Nĩ tũgũcoka twarĩrĩrie njĩra ithatũ ciĩgiĩ ũrĩa Jesu aaikaraga eiguĩte iria tũngĩĩgerekania nacio ũtũũro-inĩ witũ wa o mũthenya.

JESU ENDAGA TŨIKARAGE TWĨIGUĨTE NĨKĨ?

4. Tũrabatara gũikaraga twĩiguĩte nĩkĩ?

⁴ Na njĩra nguhĩ, Jesu endaga tũikarage twĩiguĩte nĩ ũndũ wa maũndũ marĩa tũũĩ na marĩa tũtoĩ. Hingo ĩrĩa Jesu aarĩ gũkũ thĩ-rĩ, hihi nĩ oĩ maũndũ mothe marĩa mangĩkahaanĩka mahinda marĩa maroka? Aca, tondũ oigire ũũ arĩ na wĩnyihia: “Naguo ũhoro wa mũthenya ũcio, kana wa ihinda rĩu, gũtirĩ mũndũ ũũĩ, o na araika arĩa marĩ Igũrũ, o na kana Mũriũ, no Ithe witũ wiki.” (Mat. 24:36) Hingo ĩyo, Jesu, ũrĩa arĩ we “Mũriũ,” ndaamenyete kũna rĩrĩa mũico wa mũtabarĩre ũyũ mũũru ũngĩgaakinya. Ĩ ithuĩ ũmũthĩ? Hihi nĩ tũmenyete maũndũ mothe megiĩ mahinda marĩa maroka? Aca! Tũtiũĩ nĩ hĩndĩ ĩrĩkũ Jehova agaatũma Mũriũ wake aniine mũtabarĩre ũyũ mũũru wa maũndũ. Korũo nĩ tũmenyete-rĩ, hihi no tuone bata wa gũikaraga twĩiguĩte? O ta ũrĩa Jesu oigire, mũico ũgoka rĩrĩa ũterĩgĩrĩirũo; kwoguo tũrabatara gũikaraga twĩiguĩte hĩndĩ ciothe.—Thoma Mathayo 24:43.

5, 6. (a) Ũmenyo witũ wĩgiĩ mahinda marĩa maroka na wĩgiĩ mĩoroto ya Ngai ũngĩtũteithia atĩa gũikaraga twĩiguĩte? (b) Nĩkĩ ũmenyo ũrĩa tũrĩ naguo wĩgiĩ Shaitani nĩ wagĩrĩirũo gũtũma tũikarage twĩiguĩte makĩria?

⁵ O na kũrĩ ũguo, Jesu nĩ aamenyaga maũndũ maingĩ ma magegania megiĩ mahinda marĩa maroka—ũhoro wa ma ũrĩa andũ aingĩ mataamenyete o na hanini. Ũmenyo witũ ti ta wa Jesu, ĩndĩ tũrĩ na gĩkeno tondũ nĩ atũmenyithĩtie maũndũ maingĩ megiĩ Ũthamaki wa Ngai na maũndũ marĩa ũkũhingia ica ikuhĩ. Twarora andũ arĩa matũthiũrũrũkĩirie, cukuru-inĩ, wĩra-inĩ, kana matũũra-inĩ marĩa tũhunjagia, na githĩ tũtionaga atĩ andũ aingĩ matiũĩ ma icio cia magegania? Kĩu nĩ gĩtũmi kĩngĩ gĩa gũtũma tũikarage twĩiguĩte. O ta Jesu, tũrabatara gũikaraga hĩndĩ ciothe twĩiguĩte, tũgĩcaragia mĩeke ya kũhunjĩria andũ maũndũ marĩa tũũĩ megiĩ Ũthamaki wa Ngai. Mweke o wothe ta ũcio nĩ wa bata na tũtingĩenda kwaga kũũhũthĩra. Mĩoyo ya andũ ĩrĩ ũgwati-inĩ!—1 Tim. 4:16.

⁶ Harĩ ũndũ ũngĩ Jesu aamenyaga watũmaga aikarage eiguĩte. Nĩ aamenyete atĩ Shaitani nĩ eehotorete kũmũgeria, kũmũnyarira, na gũthũkia wĩkindĩru wake. Thũ ĩyo njũru yaikaraga ĩgĩcaragia “ihinda” rĩngĩ rĩagĩrĩru rĩa kũgeria Jesu. (Luk. 4:13) Jesu ndaigana kwĩrekereria. Aaikaraga ehaarĩirie nĩ ũndũ wa mathĩna o mothe, makorũo marĩ magerio, ũkararia, kana kĩnyariro. Na githĩ o na ithuĩ tũticemanagia na maũndũ o ta marĩa aacemanagia namo? Nĩ tũũĩ atĩ Shaitani “acangaga ta mũrũthi ũkũrarama, agĩcaragia mũndũ wa gũtambura.” Nĩkĩo Kiugo kĩa Ngai gĩkĩraga Akristiano othe ngoro ũũ: “Ikaragai mũterigĩtwo, na mwĩhũgage.” (1 Pet. 5:8) Tũngĩka ũguo atĩa?

ŨRĨA TŨNGĨIKARA TWĨIGUĨTE NA NJĨRA YA MAHOYA

7, 8. Jesu aarutire ũtaaro ũrĩkũ wĩgiĩ mahoya, na aatũigĩire kĩonereria kĩrĩkũ?

⁷ Bibilia nĩ yonanagia atĩ gũikara twĩiguĩte kĩĩroho nĩ gũkoragwo na ũkuruhanu na mahoya. (Kol. 4:2; 1 Pet. 4:7) Kahinda kanini thutha wa Jesu kwĩra arũmĩrĩri ake maikare meiguĩte hamwe nake, aacokire akĩmeera ũũ: ‘Wĩhũgagei na mũhoyage, mũtigakinye magerio-inĩ.’ (Mat. 26:41) Hihi eendaga kuonania atĩ ũtaaro ũcio warĩ wa o hĩndĩ ĩyo ya magerio? Aca, twagĩrĩirũo kũrũmĩrĩra ũtaaro ũcio wake o mũthenya.

⁸ Jesu nĩ aatũigĩire kĩonereria kĩega kĩgiĩ mahoya. Ririkana, hĩndĩ ĩmwe, Jesu aahũthĩrire ũtukũ mũgima akĩaria na Ithe mahoya-inĩ. Ta rekei tũgerie kũhũra mbica ũndũ ũcio. (Thoma Luka 6:12, 13.) Nĩ hĩndĩ ya themithũ, kwahoteka Jesu e hakuhĩ na taũni ya Kaperinaumu kũrĩa gwategagwo thamaki. Nĩ hwaĩ-inĩ, Jesu akambata kĩrĩma-inĩ kĩmwe kĩa iria ingʼetheire Iria rĩa Galili. Tondũ nĩ kũragĩa nduma, no kũhoteke Jesu nĩ arona ũtheri wa matawa mĩciĩ-inĩ ya Kaperinaumu na matũũra mangĩ marĩa marĩ hakuhĩ. O na kũrĩ ũguo, akĩaria na Jehova, meciria make mothe marĩ mahoya-inĩ. Mahinda no kũhĩtũka marahĩtũka. Jesu ndaigana kũmenya matawa makĩhorio matũũra-inĩ, mweri ũkĩhĩtũka, o na kana kũigua mĩgambo ya nyamũ iria iracangacanga kũu kĩrĩma-inĩ. Kwahoteka mahoya make mahutĩtie mũno itua iritũ rĩrĩa rĩrĩ mbere yake rĩa gũthuura atũmwo ake 12. Ta hũũra mbica ũrĩa Jesu arikĩire mahoya-inĩ akĩhoya na kĩyo aheo ũtongoria na ũũgĩ, agaitũrũrĩra Ithe meciria make mothe megiĩ o mũrutwo!

9. Tũngĩĩruta atĩa kuumana na kĩonereria kĩa Jesu gĩa kũhoya ũtukũ mũgima?

⁹ Tũngĩĩruta atĩa kuumana na kĩonereria kĩa Jesu? Hihi nĩ kuuga atĩ no mũhaka tũhũthĩre mahinda maraihu tũkĩhoya? Aca, tondũ akĩaria ũhoro wĩgiĩ arũmĩrĩri ake oigire ũũ: “Ti-itherũ ngoro nĩyenda, no mwĩrĩ ndũrĩ hinya.” (Mat. 26:41) O na kũrĩ ũguo, no twĩgerekanie nake. Kwa ngerekano-rĩ, hihi nĩ tũcaragia ũtongoria wa Jehova mbere ya gũtua itua o rĩothe rĩngĩtũhutia, rĩhutie famĩlĩ citũ, kana rĩhutie Akristiano arĩa angĩ kĩĩroho? Hihi nĩ tũririkanaga aarĩ na ariũ a Ithe witũ mahoya-inĩ? Hihi nĩ tũhoyaga kuuma ngoro-inĩ kana tũcokagĩra mahoya ta arĩ rwĩmbo? Ningĩ-rĩ, ta rora wone atĩ Jesu nĩ onaga ũrĩ ũndũ wa bata kwaria na Ithe arĩ wiki mahoya-inĩ. Thĩinĩ wa thĩ ĩrĩa ũmũthĩ ĩiyũrĩte mĩhangʼo, nĩ ũndũ mũhũthũ kuohwo nĩ mĩhangʼo ya mũtũũrĩre nginya tũriganĩrũo nĩ maũndũ marĩa ma bata makĩria. Tũngĩcaria mahinda ma kũigana ma mũndũ e wiki kwaria na Ngai mahoya-inĩ, no tũkoragwo twĩiguĩte kĩĩroho makĩria. (Mat. 6:6, 7) Nĩ tũrĩkuhagĩrĩria Jehova makĩria, tũrĩ na wendi mũnene wa gwĩkĩra hinya ũkuruhanu witũ nake na tũgethemaga ũndũ o wothe ũrĩa ũngĩthũkia ũkuruhanu ũcio.—Thab. 25:14.

ŨRĨA TŨNGĨIKARA TWĨIGUĨTE WĨRA-INĨ WA KŨHUNJIA

10. Nĩ ngerekano ĩrĩkũ ĩtuonagia ũrĩa Jesu aacaragia mĩeke ya kũhunjia?

¹⁰ Jesu aaikaraga eiguĩte wĩra-inĩ ũrĩa Jehova aamũhete. Nĩ kũrĩ mawĩra mũndũ angĩhota kũruta arĩ na maũndũ mangĩ meciria-inĩ na gũtikorũo na moimĩrĩro moru. Ĩndĩ, mawĩra maingĩ mabataraga mũndũ aige meciria make mothe ho, na hatarĩ nganja ũguo nĩguo ũtungata wa Gĩkristiano ũtariĩ. Hingo ciothe Jesu aaikaraga eiguĩte wĩra-inĩ wake, agĩcaragia mĩeke ya kũhunjia ũhoro ũrĩa mwega. Kwa ngerekano, thutha wa rũgendo rũraya rwa rũcinĩ, Jesu marĩ na arutwo ake maakinya itũũra-inĩ rĩa Sikari, arutwo ake magĩthiĩ kũgũra irio. Jesu agĩtigũo ahurũkĩte hakuhĩ na gĩthima gĩa itũũra. O na kũrĩ ũguo aaikarire eiguĩte, na akĩona mweke wa kũhunjia. Mũtumia ũmwe Mũsamaria agĩũka gũtaha maĩ. Jesu nĩ aangĩacũngire kana acarie itũmi cia gwĩthema kũhunjĩria mũtumia ũcio. Handũ ha ũguo, akĩambĩrĩria mĩario na mũtumia ũcio, na akĩruta ũira mũnene ũrĩa wateithirie andũ aingĩ thĩinĩ wa itũũra rĩu. (Joh. 4:4-26, 39-42) Na githĩ to twĩgerekanie makĩria na kĩonereria kĩa Jesu gĩa gũikara eiguĩte, hihi na njĩra ya kwĩrutanĩria gũikaraga tũgĩcaragia mĩeke ya kũhunjĩria arĩa tũcemanagia nao tũrĩ mĩhangʼo-inĩ iitũ ya o mũthenya?

11, 12. (a) Jesu eekire atĩa rĩrĩa andũ meendaga kũmweheria wĩra-inĩ wake? (b) Jesu onanirie atĩa atĩ aarĩ na ũigananĩru harĩ wĩra wake?

¹¹ Rĩmwe na rĩmwe kũrĩ andũ o na matarĩ na ũũru, maageragia kweheria Jesu wĩra-inĩ wake. Itũũra-inĩ rĩa Kaperinaumu, kĩrĩndĩ nĩ kĩagegirio mũno nĩ ciama cia Jesu cia kũhonania, ũũ atĩ kĩendaga aikare o kũu. Ũcio warĩ ũndũ mwega. No rĩrĩ, Jesu aatũmĩtwo akahunjĩrie ‘ngʼondu iria ciorĩte cia nyũmba ya Isiraeli’ ciothe, no to cia itũũra rĩmwe. (Mat. 15:24) Kwoguo, akĩra andũ acio ũũ: “Nĩnjagĩrĩirũo nĩ kũhunjanagĩria Ũhoro-ũrĩa-Mwega wa ũthamaki wa Ngai matũũra-inĩ marĩa mangĩ o namo; nĩgũkorũo nĩkĩo ndatũmirũo.” (Luk. 4:40-44) Ma nĩ atĩ, ũndũ ũrĩa warĩ wa bata mũno ũtũũro-inĩ wa Jesu warĩ ũtungata wake. Ndaarekire ũndũ o na ũmwe ũmũhĩngĩce.

¹² Hihi hingo ciothe Jesu aakoragwo o ũtungata-inĩ wake? Hihi Jesu nĩ aaingĩrĩte mũno ũtungata-inĩ wake ũũ atĩ ndangĩatindanĩrĩire na mabataro marĩa mangĩ ma andũ? Aca, aatũigĩire kĩonereria kĩega kĩa ũigananĩru. Nĩ aakoragwo na mahinda ma gũkena hamwe na arata ake. Nĩ onaga famĩlĩ irĩ cia bata, na nĩ aarũmbũyagia mabataro na mathĩna ma cio, na nĩ onagia ciana wendo mũnene.—Thoma Mariko 10:13-16.

13. Tũngĩĩgerekania atĩa na Jesu gũikaraga twĩiguĩte na gũkorũo na ũigananĩru wĩra-inĩ witũ wa kũhunjia ũhoro wa Ũthamaki?

¹³ O tũkĩĩgerekanagia na Jesu harĩ gũikaraga twĩiguĩte-rĩ, tũngĩĩrutanĩria atĩa kuonania atĩ tũrĩ na ũigananĩru? Tũtingĩreka mĩhangʼo ya thĩ ĩno ĩtweherie wĩra-inĩ witũ. O na arata matarĩ na ũũru, na andũ a famĩlĩ mahota gũtũma tũgonderere ũtungata-inĩ witũ kana tũthingate maũndũ marĩa o mathingataga ũtũũro-inĩ. Ĩndĩ, twegerekania na Jesu, tũrĩonaga ũtungata witũ ũtariĩ ta irio. (Joh. 4:34) Wĩra witũ nĩ ũtwĩkagĩra hinya kĩĩroho na ningĩ ũgatũrehera gĩkeno. O na kũrĩ ũguo-rĩ, tũtingĩenda gũkĩria njano, kana kwĩyonania atĩ tũrĩ athingu mũno. O ta Jesu, tũkwenda gũikaraga tũrĩ na gĩkeno, na ũigananĩru, tũrĩ ndungata cia “Ngai mũkeni.”—1 Tim. 1:11, New World Translation.

ŨRĨA TŨNGĨIKARA TWĨIGUĨTE HĨNDĨ YA MAGERIO

14. Nĩ mwerekera ũrĩkũ twagĩrĩirũo nĩ kũrũa naguo hĩndĩ ĩrĩa tũrĩ magerio-inĩ, na nĩkĩ?

¹⁴ O ta ũrĩa tuona, mootaro mamwe ma Jesu megiĩ mũndũ gũikaraga eiguĩte, aamaheanire arĩ rungu rwa magerio maritũ. (Thoma Mariko 14:37.) Rĩrĩa tũrĩ na moritũ, nĩrĩo tũrabatara kwĩgerekania nake gũkĩra hingo ĩngĩ o yothe. Andũ aingĩ nĩ mariganagĩrũo nĩ ũndũ ũmwe wa bata rĩrĩa marĩ magerio-inĩ, wa bata ũũ atĩ ibuku rĩa Thimo rĩũgwetete maita merĩ: “Kwĩ njĩra mũndũ onaga ta arĩ yo nũngarũ, no gĩturi kĩayo nĩ mĩirigo ya gũtonya gĩkuũ-inĩ.” (Thim. 14:12; 16:25) Tũngĩĩhoka mbuguĩro citũ ithuĩ ene, makĩria rĩrĩa twacemania na mathĩna maritũ, no twĩingĩrie kana tũingĩrie endwa aitũ ũgwati-inĩ.

15. Nĩ magerio marĩkũ mũtwe wa famĩlĩ angĩcemania namo rĩrĩa kũrĩ na mathĩna ma mbia?

¹⁵ Kwa ngerekano, mũtwe wa famĩlĩ no akorũo hatĩka-inĩ nene agĩcarĩria ‘andũ a mũciĩ wake’ mabataro ma kĩĩmwĩrĩ. (1 Tim. 5:8) Ahota kũgerio etĩkĩre wĩra ũrĩtũmaga atĩĩre mĩcemanio ya Gĩkristiano, akaaga gũtongoragia ũthathaiya wa famĩlĩ, kana gũthiĩ wĩra-inĩ wa kũhunjia. Angĩĩhoka mbuguĩro yake mwene, no one ũndũ ũcio ta ũrĩ mwagĩrĩru, o na kana ta ũrĩ mwega. Ĩndĩ, moimĩrĩro no makorũo marĩ mũrimũ kana gĩkuũ gĩa kĩĩroho. Na githĩ ti ũndũ mwega gwathĩkĩra ũtaaro wa Thimo 3:5, 6! Suleimani oigire ũũ: “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene; Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.”

16. (a) Jesu aatũigĩire kĩonereria kĩrĩkũ gĩa kwĩhoka ũũgĩ wa Jehova handũ ha witũ? (b) Aingĩ arĩa matongoragia famĩlĩ megerekanagia atĩa na Jesu harĩ kwĩhoka Jehova rĩrĩa maũndũ marĩ maritũ?

¹⁶ Rĩrĩa Jesu aarĩ magerio-inĩ, ndaigana gwĩtiirania na mbuguĩro yake o na hanini. Ta wĩcirie ũndũ ũcio! O na gũtuĩka nĩwe mũndũ ũrĩa mũũgĩ mũno wanatũũra thĩinĩ wa thĩ, ndaigana kwĩhoka ũũgĩ wake mwene. Kwa ngerekano-rĩ, rĩrĩa Jesu aageragio nĩ Shaitani, aamũcokeirie maita matatũ ũũ: “Ũhoro nĩwandĩkĩtwo.” (Mat. 4:4, 7, 10) Akĩhiũrania na magerio eehokaga ũũgĩ wa Ithe, akonania ngumo ya wĩnyihia ĩrĩa Shaitani athũire na atakoragwo nayo o na hanini. Hihi nĩ twĩgerekanagia na Jesu ũndũ-inĩ ta ũcio? Mũtwe wa famĩlĩ egerekanagia na kĩonereria kĩa Jesu gĩa gũikaraga eiguĩte, arũmagĩrĩra ũtongoria wa Bibilia mũno makĩria hĩndĩ ya magerio. Thĩinĩ wa thĩ yothe ũguo nĩguo aingĩ arĩa matongoragia famĩlĩ mekaga. Matekwenyenyeka, maigaga maũndũ ma Ũthamaki wa Ngai na ũthathaiya wa ma mbere mũtũũrĩre-inĩ wao, nginya mbere ya maũndũ ma kĩĩmwĩrĩ. Na njĩra ĩyo nĩ mahotaga kũrũmbũyia famĩlĩ ciao ũrĩa kwagĩrĩire. Nake Jehova nĩ arathimaga kĩyo kĩao gĩa gũcarĩria famĩlĩ ciao mabataro ma kĩĩmwĩrĩ, o ta ũrĩa Kiugo gĩake kĩĩranĩire.—Mat. 6:33.

17. Nĩ kĩĩ gĩkũgucagĩrĩria kwĩgerekania na ũrĩa Jesu aaikaraga eiguĩte?

¹⁷ Hatarĩ nganja, Jesu aatũigĩire kĩonereria kĩrĩa kĩega biũ gĩa gũikaraga twĩiguĩte. Kĩonereria gĩake nĩ gĩa gũtũguna, na kũhonokia muoyo. Ririkana, wendi wa Shaitani nĩ gũtũma ũgonderere kĩĩroho, wĩtĩkio waku ũnyihe, wage gũthathaiya Jehova na ngoro yaku yothe, na wage kũrũmia wĩkindĩru. (1 Thes. 5:6) Ndũkanetĩkĩre agũtoorie! Ikaraga wĩiguĩte ta Jesu—mahoya-inĩ maku, ũtungata-inĩ waku, na rĩrĩa ũrahiũrania na magerio. Weka ũguo, nĩ ũrĩkenagĩra mũtũũrĩre mwega na ũrĩ na umithio nginya thĩinĩ wa mũtabarĩre ũyũ werekeire gũthira. Ningĩ gũtũũra wĩiguĩte nĩ gũgaatũma Mwathi waku agũkore warahũkĩte ũgĩĩkaga wendi wa Ithe, rĩrĩa agoka kũniina mũtabarĩre ũyũ. Kaĩ Jehova nĩ agaakena gũkũrathima nĩ ũndũ wa gũtũũra ũrĩ mwĩhokeku-ĩ!—Kũg. 16:15.

[Mbica karatathi ka 16]

Jesu nĩ aahunjĩirie mũtumia gĩthima-inĩ. Nĩ mĩeke ĩrĩkũ ũcaragia ya kũhunjia o mũthenya?

[Mbica karatathi ka 17]

Kũrũmbũiya mabataro ma kĩĩroho ma famĩlĩ yaku kuonanagia atĩ nĩ ũikaraga wĩiguĩte