Ciũria Kuuma Kũrĩ Athomi

Hihi Aisiraeli nĩ mooragaga eki naĩ na njĩra ya kũmacuuria mĩtĩ-inĩ?

Mabũrũri maingĩ tene mooragaga eki naĩ amwe na njĩra ya kũmacuuria mũtĩ igũrũ kana gĩkĩngĩ-inĩ. Aroma moohagĩrĩra kana makahũrĩra mwĩki naĩ mĩcumarĩ mũtĩ igũrũ, harĩa angĩikarire thikũ cigana ũna nginya atoorio nĩ ruo, kũnyota, kũhũta, na maũndũ mangĩ. Aroma moonaga gũcuuria mũndũ mũtĩ igũrũ arĩ njĩra ya gũconorithia eki naĩ.

Ĩ naruo rũrĩrĩ rwa tene rwa Isiraeli? Hihi Aisiraeli nĩ mooragaga eki naĩ na njĩra ya kũmacuuria mĩtĩ igũrũ? Watho ũrĩa wahetwo Aisiraeli kũgerera Musa woigĩte ũũ: “Mũndũ angĩĩhia wĩhia ũrĩa ũngĩtũma oragwo, nawe ũmũũrage ũmũcuurie mũtĩ igũrũ-rĩ, no mũhaka mwĩrĩ wake ndũkanaraare mũtĩ-inĩ ũcio igũrũ ũtukũ ũcio wothe; no rĩrĩ, ndũrĩ hingo ũtakaũthika mũthenya o ro ũcio.” (Gũcok. 21:22, 23) Nĩ ũndũ ũcio, kũringana na Maandĩko ma Kĩhibirania, mũndũ angĩatuĩrĩirũo gĩkuũ, aambaga kũũragwo agacoka gũcuurio mũtĩ igũrũ.

Ũndũ-inĩ ũcio, rĩandĩko rĩa Maũndũ ma Alawii 20:2 riugaga ũũ: “Mũndũ o wothe wa ciana cia Isiraeli, kana mũndũ wa kũngĩ ũrĩa ũtũũrĩte thĩinĩ wa Isiraeli ũkanengera Moleku mũndũ wa rũciaro rũake, amwamũrĩre-rĩ, ndarĩ hingo atakoragwo; nĩ kũhũrũo akahũrũo na mahiga nyuguto nĩ andũ a bũrũri.” Mũndũ o wothe wakoragwo na ‘roho wa kũragũria, kana mũrogi’ o nake nĩ oragagwo. Na njĩra ĩrĩkũ? ‘Aahũragwo na mahiga nyuguto.’—Alaw. 20:27.

Thĩinĩ wa Gũcokerithia Maathani 22:23, 24 tũthomaga ũũ: “Mũirĩtu gathirange angĩkorũo agũrĩtwo nĩ mũndũ, nake mũndũ ũngĩ acoke amũkore arĩ o kũu itũũra-inĩ, akome nake; nĩmũkamaruta o erĩ mũmatware kĩhingo-inĩ gĩa itũũra rĩu, mũmahũre na mahiga nyuguto o nginya makue; nĩ ũndũ mũirĩtu ũcio ndaigana kuuga mbu, na aakĩrĩ o kũu itũũra-inĩ rĩu thĩinĩ, nake mũndũ mũrũme ũcio nĩaagithirie mũndũ-wa-nja wa mũndũ wa itũũra rĩao gĩtĩo; ũguo nĩguo ũkeheragia ũũru ũcio uume thĩinĩ waku.” Kwoguo, thĩinĩ wa Isiraeli ya tene, njĩra ĩrĩa nene yahũthagĩrũo kũũraga eki naĩ nĩ kũmahũũra na mahiga.a

Gũcokerithia Maathani 21:23 yugaga atĩ “mũndũ ũrĩa ũcuurĩtio mũtĩ igũrũ nĩ mũrume harĩ Ngai.” Hatarĩ nganja, wakoragwo ũrĩ mũkaana harĩ Aisiraeli rĩrĩa mona kĩimba kĩa mũndũ “mũrume harĩ Ngai” gĩcuurĩtio mũtĩ igũrũ.