MACOKIO MA CIŨRIA CIA BIBILIA

Kĩhiko kĩngĩgĩa na gĩkeno atĩa?

Ũtaaro ũrĩa Bibilia ĩheanaga nĩ ũtũmaga kĩhiko kĩgĩe na gĩkeno tondũ uumĩte kũrĩ Mwambĩrĩria wa kĩhiko, Jehova Ngai. Nĩ ũtũteithagia gũkũria ngumo iria ingĩtũma kĩhiko kĩgaacĩre na ũgatũteithia gwĩthema mĩerekera ĩrĩa ĩngĩthũkia kĩhiko. Ningĩ, nĩ ũtũrutaga njĩra njega cia kwaranĩria nĩguo tũgĩe na kĩhiko kĩrĩ na gĩkeno.—Thoma Akolosai 3:8-10, 12-14.

Mũthuri na mũtumia nĩ magĩrĩire kũheanaga gĩtĩo. Rĩrĩa o ũmwe wao eka ũrĩa Ngai oigĩte eke, kĩhiko kĩao no kĩgĩe na gĩkeno.—Thoma Akolosai 3:18, 19.

Nĩ kĩĩ gĩtũmaga kĩhiko gĩtũũre?

Arĩa mahikanĩtie mangĩkorũo mendaine no matũũranie. Ngai nĩ atũrutaga kwendana. We na Mũrũ wake Jesu, nĩ matũigĩre kĩonereria kĩega mũno gĩa kuonania wendo wa kwĩima.—Thoma 1 Johana 4:7, 8, 19.

Athuri na atumia mangĩona kĩhiko kĩrĩ mũbango kuuma kũrĩ Ngai, nĩ megũtũũrania. Ngai aambĩrĩirie kĩhiko kĩrĩ mũbango wa gũtũũra harĩ mũthuri na mũtumia nĩguo famĩlĩ ĩgĩe na ũgitĩri. Kĩhiko no gĩtũũre tondũ Ngai ombire mũthuri na mũtumia mateithanagie kĩĩmwĩrĩ na kĩĩmeciria. Ningĩ aamombire na mũhianĩre wake, marĩ na ũhoti wa gũkũria ngumo ta yake ya wendo.—Thoma Kĩambĩrĩria 1:27; 2:18, 24.