Maheeni ma Atĩ Ngai nĩ Kĩriga

ŨRĨA ANDŨ AINGĨ METĨKĨTIE

Ibuku rĩa, The New Encyclopædia Britannica riugaga atĩ, “arũmĩrĩri a ndini ithatũ cia Gĩkristiano, Gatoreki, Othodoksi, na Protestanti metĩkĩtie Ngai nĩ Ũtatũ: Ngai Ithe, Ngai Mũriũ, na Ngai Roho Mũtheru. Matirutanaga atĩ, acio atatũ nĩ Ngai ithatũ, ĩndĩ, othe atatũ nĩ kĩndũ kĩmwe.”

ŨRĨA BIBILIA ĨRUTANAGA

Jesu, Mũrũ wa Ngai, ndaigana kuuga nĩ maiganaine na Ithe kana atĩ erĩ nĩ kĩndũ kĩmwe. Ithenya rĩa ũguo, oigire ũũ: “Ngũthiĩ gwĩ Ithe witũ; amu Ithe witũ nĩ mũnene kũrĩ niĩ.” (Johana 14:28) Ningĩ nĩ eerire mũrũmĩrĩri wake ũmwe ũũ: “Ndĩ wa kwambata ’thiĩ kũrĩ Awa, na nowe Ithe wanyu; na kũrĩ Ngai wakwa, na nowe Ngai wanyu.”—Johana 20:17.

Roho mũtheru ti mũndũ. Akristiano a karine ya mbere nĩ ‘maiyũririo Roho Mũtheru,’ ningĩ Jehova nĩ oigire ũũ: ‘Nĩngaitĩrĩria andũ othe Roho wakwa.’ (Atũmwo 2:1-4, 17) Roho mũtheru ti gĩcunjĩ kĩa Ũtatũ. Nĩ hinya wa Ngai wa gwĩka maũndũ.

BATA WA KŨMENYA MA

Athomi a ndini ya Gatoreki, Karl Rahner na Herbert Vorgrimler, magĩtaarĩria Ũtatũ moigire atĩ, “ti ũndũ ũngĩmenyeka nĩ mũndũ ataguũrĩrio, na o na angĩguũrĩrio ndangĩtaũkĩrũo nĩguo biũ.” Na githĩ ti ũndũ mũritũ mũno kwenda mũndũ ũtangĩmenyeka? Kwoguo ũrutani wa Ũtatũ nĩ ũgiragĩrĩria andũ mamenye Ngai ũrĩa wa ma na wĩ wendo.

Marco, ũrĩa ũkũgwetetwo gĩcunjĩ-inĩ kĩa mbere nĩ onaga atĩ Ũtatũ nĩ wamũgiragĩrĩria amenye Ngai. Oigire ũũ: “Ndonaga ta Ngai ehithaga ndikamũmenye, ngona andaihĩrĩirie mũno, arĩ kĩriga na ũtangĩkinyĩrĩka.” Ũrĩa kũrĩ nĩ atĩ, “Ngai ti Ngai wa ihĩngĩca.” (1 Akorintho 14:33, American Standard Version) Ndatwĩhithaga. Endaga tũmũmenye. Jesu oigire ũũ: “Ithuĩ tũhoyaga ũrĩa tũũĩ.”—Johana 4:22.

Marco, aacokire akiuga ũũ: “Rĩrĩa ndamenyire atĩ Ngai ti Ũtatũ, nĩ ndahotire kũgĩa na ũrata wa hakuhĩ nake.” Tũngĩaga kuona Jehova arĩ kĩriga, tũmuonage arĩ Ngai ũrĩ ngumo nyingĩ njega, ũrĩkoragwo ũrĩ ũndũ mũhũthũ kũmwenda. Bibilia yugaga ũũ: “Ũrĩa ũtendanaga ndoĩ Ngai; amu Ngai nĩwe wendani.”—1 Johana 4:8.