Ũrĩa Tũngĩteithia Arĩa Marĩ na Mabataro

MŨTHURI wa kĩũngano wĩtagwo François, kuuma bũrũri-inĩ ũmwe oigire ũũ: “Thutha wa gĩthuurano kĩrĩa mwena ũmwe wareganire na moimĩrĩro, nĩ kwoimĩrire mbaara ĩrĩa yatũmire Aira a Jehova ngiri nyingĩ methare kuuma mĩciĩ-inĩ yao. Irio na ndawa ikĩnyiha mũno na iria nyinyi ciarĩ kuo ciarĩ na goro mũno. Bengi ikĩhingwo, macini cia ATM igĩthira mbeca na iria ingĩ igĩtiga kũruta wĩra.”

O na ihenya, ariũ a Ithe witũ kuuma wabici-inĩ ya Aira a Jehova bũrũri-inĩ ũcio, makĩambĩrĩria gũtwarĩra aarĩ na ariũ a Ithe witũ acio mbeca na indo ingĩ. Maatwaragĩrũo kũrĩa moorĩire Nyũmba-inĩ cia Ũthamaki bũrũri-inĩ ũcio wothe. Ikundi iria cierĩ ciarũaga nĩ ciaigĩte nyambo barabara-inĩ, ĩndĩ tondũ nĩ mooĩ Aira a Jehova matinyitaga mbaru o na hanini mwena o na ũrĩkũ wa gĩũteti, kaingĩ nĩ meetĩkagĩria ngaari cia wabici ihĩtũke.

François ooigire ũũ: “Hĩndĩ ĩmwe tũgĩthiĩ Nyũmba-inĩ ĩmwe ya Ũthamaki, andũ meehithĩte nĩ maarathũkĩirie ngaari itũ rithathi. Ĩndĩ rithathi ikĩhĩtũkĩra gatagatĩ gaitũ. Rĩrĩa tuonire mũthigari warĩ na mũcinga atengʼerete na kũrĩ ithuĩ, tũkĩhũra ribathi na ihenya, tũkĩgarũrũka tũkĩũmbũrithia ngaari tũrorete wabici-inĩ citũ. Nĩ twacokeirie Jehova ngatho mũno nĩ ũndũ wa gũtũhonokia. Mũthenya ũyũ ũngĩ, ariũ a Ithe witũ 130 arĩa maarĩ Nyũmba-inĩ ĩyo ya Ũthamaki magĩthaamĩra kũndũ kũngĩ gũtaarĩ na ũgwati. Amwe mookire wabici-inĩ ya rũhonge kũrĩa twarũmbũyirie mabataro mao ma kĩĩroho na ma kĩĩmwĩrĩ nginya rĩrĩa mbaara ĩyo yathirire.”

François ooigire ũũ: “Ariũ a Ithe witũ aingĩ kuuma icigo itiganĩte cia bũrũri nĩ maandĩkĩire wabici ya rũhonge marũa maingĩ ma gũcokia ngatho cia kuuma ngoro. Wĩtĩkio wao harĩ Jehova nĩ wekĩrirũo hinya nĩ ũndũ wa kuona ũrĩa aarĩ na ariũ a Ithe witũ kuuma kũndũ kũngĩ maamateithirie.”

Rĩrĩa aarĩ na ariũ a Ithe witũ magũmĩrũo nĩ icanjama cia ndũire kana iria irehetwo nĩ andũ, na nĩ marabatara ũteithio, tũtimeeraga tu mathiĩ ‘magote mwaki na makarĩe, mahũne.’ (Jak. 2:15, 16) Ithenya rĩa ũguo, twagĩrĩirũo kũmateithia na indo iria marabatara. Ũguo noguo kwarĩ harĩ Akristiano a karine ya mbere. Rĩrĩa meerirũo nĩ gũkũgĩa ngʼaragu, “arutwo magĩtua atĩ matwarithĩrie ariũ a Ithe witũ arĩa maatũire Judea kĩndũ gĩa kũmateithia, o ta ũrĩa mũndũ o mũndũ angĩkorũo aingĩhĩtie indo.”—Atũm. 11:28-30.

Tũrĩ ndungata cia Jehova nĩ twendete mũno gũteithia arĩa makoragwo na mabataro ma kĩĩmwĩrĩ. O na kũrĩ ũguo, andũ ningĩ nĩ makoragwo na mabataro ma kĩĩroho. (Mat. 5:6) Nĩguo andũ mateithio kuona atĩ marĩ na mabataro macio, Jesu eerire arũmĩrĩri ake mamatuage arutwo. (Mat. 28:19, 20) Tũrĩ mũndũ ũmwe ũmwe nĩ tũhũthagĩra mahinda maitũ maingĩ, hinya na indo citũ tũkĩruta wĩra ũcio. Ithondeka riitũ nĩ rĩhũthagĩra mĩhothi ĩmwe gũteithia andũ arĩa marĩ na mabataro ma kĩĩmwĩrĩ, ĩndĩ muoroto mũnene wa mĩhothi itũ nĩ gũtwarithia na mbere wĩra wa kũhunjia. Rĩrĩa tweka ũguo, tũkoragwo tũkĩonania wendo witũ harĩ Ngai na andũ arĩa angĩ.—Mat. 22:37-39.

Arĩa marutaga mĩhothi kũnyita mbaru wĩra wa Aira a Jehova wa kũhunjia thĩinĩ wa thĩ yothe, magĩrĩirũo gũkorũo na ma atĩ mĩhothi yao nĩ ĩhũthagĩrũo ũrĩa kwagĩrĩire. Hihi no ũhote gũteithia aarĩ na ariũ a Ithe witũ arĩa marĩ na mabataro? No wende gũteithĩrĩria harĩ gũtwarithia na mbere wĩra wa kũhunjia? Angĩkorũo nĩguo, “menya gũkaima andũ ũndũ mwega, arĩa maagĩrĩirũo nĩ gwĩkwo, guoko gwaku gwakorũo gũtaagĩte hinya wa kũwĩka.”—Thim. 3:27.

NJĨRA IRIA AMWE MAHŨTHAGĨRA KŨRUTA MĨHOTHĨ YA WĨRA WA THĨ YOTHE

O ta hĩndĩ ya Paulo-rĩ, andũ aingĩ ũmũthĩ nĩ ‘maigaga mũthithũ’ kana makabangĩra mbeca mũigana mũna na magacikia thĩinĩ wa mathandũkũ ma mĩhothi ma kĩũngano marĩa mandĩkĩtwo “Wĩra wa Thĩ Yothe.” (1 Kor. 16:2) O mweri, ciũngano nĩ itũmaga mĩhothi ĩyo kũrĩ wabici ya Aira a Jehova ĩrĩa ĩrũgamĩrĩire bũrũri wao. Ningĩ no ũhote gũtũma mĩhothi ĩmwe kwa ĩmwe kũrĩ rũhonge rwĩtĩkĩrĩku kĩĩwatho rũrĩa rũhũthagĩrũo nĩ Aira a Jehova bũrũri-inĩ wanyu. Nĩguo ũmenye rĩĩtwa rĩa rũhonge rũrĩa rũhũthagĩrũo nĩ Aira a Jehova bũrũri-inĩ wanyu, no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu. Andirethi cia wabici ĩyo ya Aira a Jehova no cioneke thĩinĩ wa www.jw.org. Mĩthemba ya mĩhothi ĩrĩa ũngĩtũma ĩmwe kwa ĩmwe nĩ ĩno:

MĨHOTHI YA ĨMWE KWA ĨMWE
- Mbeca, mathaga ma goro, kana indo ingĩ cia bata.
- Nĩ wega gũtũma marũa maronania atĩ mbeca kana indo icio nĩ mĩhothi ya ĩmwe kwa ĩmwe.
MĨHOTHI ĨRĨ NA MĨHAKA
- Mĩhothi ĩno nĩ mbeca irĩkanĩirũo atĩ no icokio mũheani angĩcibatara.
- Nĩ wega gũtũma marũa maronania atĩ mĩhothi ĩyo ĩrĩ na mĩhaka.
MĨHOTHI ĨNGĨ

Makĩria ma iheo cia mbeca na indo cia bata, nĩ harĩ njĩra ingĩ cia kũhotha nĩguo mũndũ ateithĩrĩrie wĩra wa Ũthamaki wa thĩ yothe. Njĩra icio nĩ cionanĩtio haha mũhuro. O na angĩkorũo ũngĩenda kũhũthĩra njĩra irĩkũ, amba warie na wabici ya Aira a Jehova ĩrĩa ĩrũgamĩrĩire bũrũri wanyu nĩguo ũmenye nĩ njĩra irikũ ingĩhũthĩka bũrũri-inĩ wanyu. Na tondũ mawatho ma mabũrũri na ma kũruta igooti nĩ matiganĩte, harĩ bata kwaranĩria na mũndũ ũĩ wega ũhoro wa watho na wa ũruti wa magooti ũtanathuura njĩra ĩrĩa njega ya kũhotha.

Marĩhi ma Kũrũgamĩrĩra Ũndũ Ũterĩgĩrĩirũo (Insurance): Ĩno nĩ mĩhothi ĩrutĩtwo na njĩra ya kũgweta atĩ rũhonge rũna rũhũthagĩrũo nĩ Aira a Jehova nĩruo rũkaagunĩka nĩ marĩhi macio kana mbeca iria mũndũ arĩhagwo ũkũrũ-inĩ kana aatiga wĩra.

Akaunti cia Bengi: Ici nĩ akaunti cia bengi, marũa ma marĩhi, kana akaunti cia mũndũ ũmwe ũmwe arĩa matigĩte wĩra iria ingĩĩhokerũo kana irĩhwo kũrĩ rũhonge rũna rũhũthagĩrũo nĩ Aira a Jehova mũndũ angĩkua, kũringana na mĩtaratara ya bengi cia kwanyu.

Cĩya na Bondi: Cĩya na bondi (stocks and bonds) no iheanwo kũrĩ rũhonge rũna rũhũthagĩrũo nĩ Aira a Jehova irĩ kĩheo kĩa ĩmwe kwa ĩmwe kana kũgerera ngirimiti atĩ nĩ igaatuĩka cia rũhonge rũu mũndũ akua.

Nyũmba na Mĩgũnda: Ici nĩ nyũmba na mĩgũnda ĩrĩa ĩheanagwo kũrĩ rũhonge rũna rũhũthagĩrũo nĩ Aira a Jehova, hihi irĩ iheo cia ĩmwe kwa ĩmwe kana angĩkorũo nĩ nyũmba ya gũikara, no marĩkanĩre atĩ mũheani egũthiĩ na mbere gũikara thĩinĩ wayo hĩndĩ yothe ĩrĩa egũkorũo muoyo.

Bacici cia o Mwaka: Ici nĩ mbeca kana indo iria iheanagwo kũrĩ rũhonge rũna rũhũthagĩrũo nĩ Aira a Jehova harĩ na mũbango atĩ mũheani, kana mũndũ ũngĩ ũrĩa ũthuurĩtwo nĩwe, aamũkagĩre mũigana mũna wa bacici o mwaka hĩndĩ ĩrĩa yothe e muoyo. Mũheani nĩ anyihanyihagĩrio igooti mwaka ũrĩa mũbango ũcio wambĩrĩria.

Marũa ma Kwĩgaya na Ũramati (Wills and Trusts): Indo kana mbeca no ciĩhokerũo rũhonge rũhũthagĩrũo nĩ Aira a Jehova kũgerera marũa ma kĩĩwatho ma kwĩgaya kana kũgweta atĩ rũhonge rũu nĩruo rũkaagunĩka nĩ ngirimiti ya ũramati. Mũbango ũcio no ũkorũo na ũguni mũna ũhoro-inĩ wĩgiĩ igooti.

Mĩhothi ya mĩthemba ta ĩyo nĩ ĩbataraga mũbango harĩ mũheani. Nĩ ũndũ wa gũteithĩrĩria andũ arĩa mangĩenda gũteithia wĩra wa thĩ yothe wa Aira a Jehova kũgerera njĩra imwe cia icio, broshua ĩĩtagwo Charitable Planning to Benefit Kingdom Service Worldwide nĩ ĩhaarĩirio na Gĩthũngũ na Kĩhispania. Broshua ĩyo yaandĩkirũo nĩguo ĩtaarĩrie njĩra imwe cia kũheana iheo rĩu kana thutha-inĩ, ta kũgerera igai mũndũ akua. Ũhoro ũmwe ũrĩa ũrĩ broshua-inĩ ĩyo no wage kũhũthĩka harĩ we nĩ ũndũ wa igooti kana mawatho mangĩ ma bũrũri wanyu. Kwoguo thutha wa gũthoma broshua ĩyo, wagĩrĩirũo kwaranĩria na wakiri waku kana mũndũ ũrĩa ũgũtaaraga ũhoro-inĩ wĩgiĩ watho kana igooti. Kũgerera njĩra icio cia kũruta mĩhothi, andũ aingĩ nĩ mahotete kũnyita mbaru wĩra witũ wa kĩĩndini na wa gũteithia andũ thĩ yothe na makanyihanyihia marĩhi mao ma igooti. Angĩkorũo broshua ĩyo nĩ yonekaga bũrũri-inĩ wanyu, no ũmĩone ũngĩĩtia kobĩ kuuma kũrĩ mwandĩki wa kĩũngano kĩanyu.

Ũngĩenda ũhoro makĩria no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu kũgerera thimũ kana marũa.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707