MACOKIO MA CIŨRIA CIA BIBILIA

Muoroto wa Jesu gũcoka nĩ ũrĩkũ?

Jesu Kristo atanambata kũrĩa igũrũ mwaka wa 33 mahinda maitũ, nĩ oigire atĩ nĩ angĩgaacoka. Jesu eeringithanirie na mũndũ ũmwe warĩ mũnene wathire bũrũri wĩ kũraya mũno, na agĩcoka arĩ mũthamaki. Muoroto wa Jesu gũcoka warĩ oke athamakĩre andũ, kũgerera wathani wake mwega.—Thoma Luka 19:11, 12.

Jesu angĩgaacoka atariĩ atĩa? Aariũkirio arĩ kĩũmbe kĩa roho. (1 Petero 3:18) Agĩcoka akĩambata igũrũ na agĩikara guoko-inĩ kwa ũrĩo kwa Ngai. (Thaburi 110:1) Ihinda iraya thutha ũcio, Jesu nĩ aarehirũo mbere ya Jehova Ngai, “Ũrĩa-ũtũire-ho-kuuma-o-tene,” nake akĩhe Jesu wathani wa gũthamakagĩra andũ. Kwoguo, Jesu angĩgaacoka arĩ Mũthamaki wa kĩĩroho, no ti arĩ na mwĩrĩ wa nyama na thakame.—Thoma Danieli 7:13, 14.

Jesu angĩgeeka atĩa acoka?

Jesu aacoka na araika ake, nĩ agaacirithia andũ. Ningĩ aniine andũ arĩa aganu, no arĩa mamwathĩkagĩra arĩ Mũthamaki wao, amahe muoyo wa tene na tene.—Thoma Mathayo 25:31-33, 46.

Ũthamaki wa Jesu nĩ ũkaagarũra thĩ ĩtuĩke paradiso. Nĩ akaariũkia arĩa makuĩte nĩguo makenere ũtũũro thĩinĩ wa Paradiso.—Thoma Luka 23:42, 43, rora kohoro ka magũrũ-inĩ thĩinĩ wa Bibilia yaku.