Nĩkĩ gĩtũmaga Ngai etĩkĩrie arĩa marĩ hinya mahinyĩrĩrie arĩa matarĩ?

Bibilia nĩ ĩheanĩte ũhoro wa kĩeha wĩgiĩ andũ amwe maahinyagĩrĩria arĩa matarĩ hinya. No gũkorũo nĩ ũraririkana ũhoro wa Nabothu.a Mũthamaki wa Isiraeli wetagwo Ahabu, kũrĩ karine ya 10 Mbere ya Mahinda Maitũ, nĩ aarekereirie mũtumia wake, Jezebeli oragithie Nabothu hamwe na ariũ ake, nĩgetha mũthuriwe egwatĩre mũgũnda wake wa mĩthabibu. (1 Athamaki 21:1-16; 2 Athamaki 9:26) Nĩkĩ gĩatũmire Ngai etĩkĩrie ũndũ ũcio?

Reke twarĩrĩrie ũndũ ũmwe wa bata: Ngai ndangĩhota kũheenania. (Tito 1:2) Ũndũ ũcio ũkonainie atĩa na ũhoro wa kũhinyanĩrĩria? O harĩa kĩambĩrĩria, Ngai nĩ eerĩte andũ atĩ, mangĩagire kũmwathĩkĩra, no gũkua mangĩakuire. O ta ũrĩa Ngai oigĩte, kuuma rĩrĩa Adamu na Hawa maaregire kũmwathĩkĩra mũgũnda-inĩ wa Edeni, andũ matũũrĩte makuĩte. Ma nĩ atĩ, gĩkuũ kĩa mbere kĩoimanire na gĩĩko kĩa ũhinyanĩrĩria, rĩrĩa Kaini oragire mũrũ wa nyina Habili.—Kĩambĩrĩria 2:16, 17; 4:8.

Kiugo kĩa Ngai gĩkĩaria ũhoro wĩgiĩ historĩ ya andũ kuuma hĩndĩ ĩyo, kiugaga ũũ: “Mũndũ agĩaga na ũhoti wa gwatha ũrĩa ũngĩ, agagĩĩthũkia we mwene.” (Kohelethu 8:9) Hihi ũhoro ũcio nĩ wa ma? Jehova nĩ eerĩte rũrĩrĩ rwake rwa Isiraeli atĩ, athamaki arĩa mangĩamaathire nĩ mangĩamahinyĩrĩrie o nginya makaĩre Ngai wao. (1 Samueli 8:11-18) O na Mũthamaki Suleimani ũrĩa warĩ na ũũgĩ mũingĩ, nĩ aahinyĩrĩirie andũ mũno na njĩra kũmeetia mbia nyingĩ cia igooti. (1 Athamaki 11:43; 12:3, 4) Ĩndĩ, athamaki ta Ahabu maarĩ oru o na makĩria. Ta wĩcirie ũndũ ũyũ: Korũo Ngai nĩ aagirĩrĩirie ciĩko ta icio cia ũhinyanĩrĩria-rĩ, na githĩ ndangĩonanirie atĩ ciugo icio ciake itiarĩ cia ma?

Ningĩ ririkana atĩ, Shaitani oigaga andũ matungatagĩra Ngai nĩguo megune o ene. (Ayubu 1:9, 10; 2:4) Korũo Ngai agitagĩra ndungata ciake ciothe itikahinyĩrĩrio na njĩra o yothe-rĩ, na githĩ ũndũ ũcio to wonanie atĩ thitango ĩyo ya Shaitani nĩ ya ma? Ningĩ Ngai angĩgitĩra andũ othe matikahinyĩrĩrio o na hanini-rĩ, na githĩ ũndũ ũcio to wonanie atĩ thitango ĩngĩ nene ĩgiĩ Ngai nĩ ya ma? Ngai angĩgitagĩra andũ-rĩ, githĩ to mecirie atĩ no metongorie hatarĩ Ngai na magaacĩre? Ĩndĩ, Bibilia yugaga atĩ, andũ matingĩhota gwĩtongoria o ene. (Jeremia 10:23) Ũthamaki wa Ngai woka, no rĩo wagi wothe wa kĩhooto ũgaathira.

No ũguo nĩ kuuga atĩ, Ngai ndatindanagĩra rĩrĩa andũ marahinyĩrĩrio? Aca. Wĩcirie ũhoro wa maũndũ maya merĩ ekaga: Wa mbere, nĩ oimbũranagia ciĩko iria andũ mekaga cia kũhinyanĩrĩria. Kwa mũhiano, nĩ oimbũranirie ciĩko ciothe iria Jezebeli eekire Nabothu. Makĩria ma ũguo, Bibilia nĩ ĩguũragia atĩ ciĩko ta icio njũru cia kũhinyanĩrĩria, ciĩkithagio nĩ mũnene wa gũkũ thĩ, ũrĩa ũtendaga amenywo. (Johana 14:30; 2 Akorintho 11:14) Yugaga atĩ mũnene ũcio, nĩwe Shaitani ũrĩa Mũcukani. Nĩ tũgunĩkaga rĩrĩa Ngai oimbũrania ciĩko ta icio cia kũhinyanĩrĩria, o hamwe na kĩhumo gĩa cio, tondũ nĩ twĩthemaga kũhinyĩrĩria arĩa angĩ. Nĩ ũndũ ũcio, tũkagĩa na kĩĩrĩgĩrĩro kĩa muoyo wa tene na tene.

Wa kerĩ, Ngai nĩ eranĩire gũkaaniina ũhoro wothe wa kũhinyanĩrĩria. Kuumbũranio, gũcirithio, na kũniinwo kwa Ahabu na Jezebeli, o hamwe na andũ angĩ ta acio, nĩ gũtũheaga mwĩhoko wa atĩ, waganu wothe nĩ ũrĩthira. (Thaburi 52:1-5) Ningĩ tũrĩ na mwĩhoko atĩ, ica ikuhĩ Ngai nĩ arĩehereria arĩa othe mamwendete maũndũ mothe moru, marĩa moimanaga na wagi wa kĩhooto.b Nabothu na ariũ ake nĩ makaariũkio, na matũũre tene na tene thĩinĩ wa paradiso gũkũ thĩ, kũndũ gũtagaakorũo na wagi o wothe wa kĩhooto.—Thaburi 37:34.