Maahũthĩrire Bibilia gũcokia ciũria ciakwa ciothe!

MŨTŨŨRĨRE WAKWA WA HAU KABERE: Ndaciarĩirũo gĩcagi-inĩ kĩmwe taũni-inĩ ya Galicia, bũrũri-inĩ wa Sipania. Twaciarĩtwo tũrĩ anana, na ndaarĩ wa kana. Twakoragwo na gĩkeno kĩingĩ famĩlĩ-inĩ itũ. Hĩndĩ ĩyo, famĩlĩ nyingĩ bũrũri-inĩ wa Sipania, nĩ ciatwaraga mwana na arĩ ũmwe wa famĩlĩ yao, agathomithio nĩguo atuĩke mathĩa. Thĩinĩ wa famĩlĩ itũ, twathire tũrĩ atatũ.

Ndĩ wa mĩaka 13, nĩrĩo ndatwarirũo taũni-inĩ ya Madrid kũrĩa mathĩa maikaraga, na no kuo mwarĩ wa maitũ ũrĩa mũkũrũ aarĩ. Mũikarĩre wa kũu ndwangenagia. Maũndũ marĩa meekĩrĩirũo mũno no mawatho, kwĩima na mahoya, na ũndũ ũcio watũmaga ithuothe twage gũkorũo na ũrata. Twarokaga rũcinĩ tene tũgathiĩ kanitha kũhoya na gwĩcũũrania, no meciria makwa maakoragwo kũraihu mũno. Thutha ũcio, twacokaga tũkaina nyĩmbo cia ndini na tũgakũngũĩra Mitha, na ciothe twahũthagĩra Kĩlatini. Ndianyitaga kĩndũ o na kĩ, na ũndũ ũcio watũmaga nyone Ngai arĩ haraya mũno na niĩ. Mũthenya nĩ ũngĩathirire itaarĩtie na mũndũ o na ũ. O na tũngĩacemanirie na mwarĩ wa maitũ, ũndũ ũrĩa tũngĩeranire no, “Mũtheru Mariamu.” Twetĩkĩrĩtio kwaria ndagĩka 30 tu, thutha wa kũrĩa irio. Ũndũ ũcio warĩ ngũrani mũno na ũrĩa twamenyerete gwitũ mũciĩ! Ndaakoragwo na ihooru mũno na ngarĩra maita maingĩ.

O na gũtuĩka ũhoro wa Ngai ndwarĩ ngoro-inĩ yakwa, nĩ ndatuĩkire mathĩa ndĩ wa mĩaka 17. Ndetĩkĩrire gũtuĩka mathĩa tondũ ũguo nĩguo nderĩgĩrĩirũo njĩke, no nĩ ndaarigagwo kana hihi ũcio warĩ wendi wa Ngai. Mathĩa arĩa angĩ matũũraga moigaga atĩ mũndũ ũrĩa ũkoragwo na nganja ta icio, nĩ gũikio agaikio icua-inĩ rĩa mwaki. O na kũrĩ ũguo, no ndaarĩ na nganja. Nĩ ndoĩ atĩ, Jesu ndeyamũranagia na andũ; ĩndĩ, aarĩ na kĩyo kĩnene mũno gĩa kũruta andũ arĩa angĩ na kũmateithia. (Mathayo 4:23-25) Ndĩ na mĩaka 20, nĩ ndaiguire itekwenda gũkorũo ndĩ mathĩa rĩngĩ. Nĩ ndamakire mũno, rĩrĩa ndeerirũo nĩ ũrĩa watũrũgamagĩrĩra atĩ, angĩkorũo nĩ ndaiguaga ndĩ o na nganja, haarĩ bata nyinũke. Ndĩciragĩria onire ta ingĩathũkirie mathĩa arĩa angĩ. Na nĩ ũndũ ũcio ngĩinũka.

Ndainũka, nĩ ndeerire aciari akwa ũrĩa gwathiĩte, no matianegenire. Gĩcagi-inĩ kĩrĩa twaikaraga gũtiakoragwo na mawĩra, nĩ ũndũ ũcio ngĩthaamĩra Njĩrĩmani, kũrĩa mũrũ wa maitũ aakoragwo. Aarĩ wa gĩkundi kĩa andũ a kuuma Sipania arĩa maarũagĩrĩra ihooto cia andũ. Nĩ ndaiguaga njiganĩire mũno ndĩ gĩkundi-inĩ kĩu kĩrĩa kĩarutaga wĩra wa kũrũĩrĩra ihooto cia atumia na cia aruti a wĩra. Nĩ ũndũ ũcio ngĩingĩra gĩkundi kĩu, na thutha wa ihinda tũkĩhikania na mwanake ũmwe wa gĩkundi kĩu. Ndonaga ngĩruta wĩra wa bata mũno ngĩheana mabuku ma gĩkundi kĩu na kũnyitanĩra nao mĩgomo-inĩ ya kũrũĩrĩra ihooto cia andũ.

O na kũrĩ ũguo, thutha wa ihinda nĩ ndacokire ngĩkua ngoro, tondũ maũndũ marĩa gĩkundi kĩu kĩarũagĩrĩra kaingĩ ti mo gĩekaga. Ũndũ ũrĩa wanjũragire ngoro o na makĩria, nĩ rĩrĩa andũ amwe ethĩ a gĩkundi kĩu maacinire Ũbarũthi wa Sipania taũni-inĩ ya Frankfurt, mwaka-inĩ wa 1971. Meekire ũguo makĩmenereria wagi wa kĩhooto ũrĩa warĩ Sipania, kũrĩa gwathanagwo na gĩthũri. No niĩ ndionire ĩyo ĩrĩ njĩra njega ya gũikia mateta.

Ndagĩa mwana wakwa wa mbere, ngĩra mũthuri wakwa atĩ ndigũcoka gũthiĩ mĩcemanio ya gĩkundi kĩu rĩngĩ. Nĩ ndaiguaga ihooru mũno tondũ arata akwa arĩa twakoragwo nao gĩkundi-inĩ kĩu matiokaga kũndora. Ngĩambĩrĩria kũrigwo muoroto wa ũtũũro warĩ ũrĩkũ. Ngĩaga bata wa kũgeria kwagagĩria ũtũũro wa andũ.

ŨRĨA BIBILIA YAGARŨRIRE MŨTŨŨRĨRE WAKWA: Kũrĩ mwaka wa 1976, nĩ ndaacereirũo nĩ Aira eerĩ a Jehova a kuuma Sipania, na makĩndigĩra mabuku ma gũthoma. Maacoka, nĩ ndaamoririe ciũria nyingĩ ciĩgiĩ mĩnyamaro, mũthutũkanio na wagi wa kĩhooto. Nĩ ndaamakire mũno rĩrĩa maacokirie ciũria ciakwa ciothe makĩhũthĩra Bibilia. Nĩ ũndũ ũcio, ngĩtĩkĩra kwĩruta Bibilia nao.

Mbere-inĩ, ndeerutaga no getha ngĩe na ũũgĩ wa Bibilia tu. No maũndũ nĩ maacenjirie rĩrĩa twambĩrĩirie gũthiaga mĩcemanio ya Aira a Jehova tũrĩ na mũthuri wakwa. Gũkinyĩria hĩndĩ ĩyo, twarĩ na ciana igĩrĩ. Aira a Jehova mokaga magĩtuoyaga na nĩ maatũteithagia kũrora ciana ciitũ tũrĩ mĩcemanio-inĩ. Ũndũ ũcio nĩ watũmire ndĩmende mũno.

O na kũrĩ ũguo, no ndaiguaga ndĩ na nganja ciĩgiĩ maũndũ mamwe ma ndini. O hĩndĩ ĩyo, nĩ ndainũkire gwitũ Sipania. Mama aarĩ mũhunjia na kwoguo nĩ aageririe kũndindĩkĩrĩria ndige kwĩruta Bibilia. No Aira a Jehova a kũu, nĩ maanyũmagĩrĩria mũno. O nao maanjokeirie ciũria iria ndaamoririe makĩhũthĩra Bibilia, o ta ũrĩa arĩa maarĩ Njĩrĩmani meekĩte. Rĩrĩa ndaacokire Njĩrĩmani, nĩ ndatuire itua rĩa gũthiĩ na mbere kwĩruta Bibilia. O na gũtuĩka mũthuri wakwa nĩ aatigire kwĩruta Bibilia, niĩ ndaathire o na mbere kwĩruta. Kũrĩ mwaka wa 1978 ngĩbatithio na ngĩtuĩka Mũira wa Jehova.

ŨRĨA NGʼUNĨKĨTE: Rĩu ũtũũro wakwa ũrĩ na muoroto, thutha wa kũgĩa na ũmenyo ũrĩa wa ma kuuma Bibilia-inĩ. Kwa mũhiano, rĩandĩko rĩa 1 Petero 3:1-4 rĩĩkagĩra atumia ngoro ‘maathĩkagĩre’ athuri ao, ‘marĩ na gĩtĩo, mahoreire na makindĩirie ngoro, ũndũ ũrĩa ũrĩ bata mũno harĩ Ngai.’ Motaaro ta macio nĩmo mandeithĩtie kũhingia wĩra wakwa ndĩ mũtumia na ndĩ mũciari.

Ngoretwo ndĩ Mũira wa Jehova kwa ihinda rĩa mĩaka 35. Nĩ ngenaga mũno gũtungatĩra Ngai ndĩ ũmwe wa Aira a Jehova. Ningĩ nĩ ngenaga kuona atĩ, harĩ ciana ciakwa ithano, inya ciacio nĩ itungatagĩra Ngai.