MACOKIO MA CIŨRIA CIA BIBILIA
Hihi araika no matũteithie?
O ta ũrĩa araika maateithirie Danieli, ndungata njĩhokeku ya Ngai, noguo mateithagia andũ kũgunĩka na ũhoro wa ma ũmũthĩ
Jehova Ngai ombĩte araika milioni nyingĩ mbere ya kũũmba andũ. (Ayubu 38:4, 7) Araika aya nĩ ciũmbe cia roho irĩ hinya itungatagĩra Ngai, na acihũthagĩra rĩmwe gũtongoria na kũgitĩra ndungata ciake gũkũ thĩ. (Thaburi 91:10, 11) Mahinda-inĩ maya, araika nĩ mateithagĩrĩria andũ kũgunĩka nĩ ũhoro mwega ũrĩa ũhunjagio nĩ arũmĩrĩri a Jesu.—Thoma Kũguũrĩrio 14:6, 7.
Hihi nĩ twagĩrĩirũo kũhoya araika nĩguo matũteithie? Aca. Mahoya nĩ gĩĩko kĩa ũthathaiya, na no Ngai wiki tu wagĩrĩire gũthathaiyo. (Kũguũrĩrio 19:10) Araika marũmagĩrĩra ũrĩa meerũo nĩ Ngai no ti ũrĩa andũ marameera, tondũ o nĩ ndungata cia Ngai. Nĩ ũndũ ũcio, twagĩrĩirũo kũhoya o Ngai wiki tu kũgerera Jesu.—Thoma Thaburi 103:20, 21; Mathayo 26:53.
Hihi nĩ kũrĩ araika oru?
O ta andũ, araika moombirũo marĩ na wĩyathi wa gwĩthuurĩra na kwoguo no mathuure gwĩka wega kana ũũru. Ũndũ wa kĩeha nĩ atĩ, nĩ kũrĩ araika aingĩ maaremeire Ngai. (2 Petero 2:4) Wa mbere aarĩ Shaitani, angĩ magĩcoka makĩmũrũmĩrĩra, magĩtuĩka ndaimono. Ihinda-inĩ rĩtarĩ kũraihu mũno ihĩtũku, Shaitani na ndaimono ciake nĩ maingatirũo kũũrĩa igũrũ magĩikũrũkio gũkũ thĩ.—Thoma Kũguũrĩrio 12:7-9.
Kuongerereka kwa waganu na ũhinya na gĩkĩro kĩnene kuuma mwaka-inĩ wa 1914, kuonanagia atĩ kahinda gatarĩ haraihu Ngai nĩ ekweheria Shaitani na ndaimono ciake. Thutha ũcio Ngai nĩ agaacokia thĩ ũrĩa yatariĩ.—Thoma Kũguũrĩrio 12:12; 21:3, 4.