Hihi nĩ Twagĩrĩirũo Kũhoya Jesu?

MŨTHUTHURIA ũmwe ica ikuhĩ erĩgĩte kũũria andũ ethĩ makĩria ma 800 a kuuma ndini itiganĩte, kana nĩ metĩkĩtie atĩ Jesu nĩ acokagia mahoya. Makĩria ma 60 harĩ igana moigire atĩ nĩ metĩkĩtie biũ atĩ nĩ acokagia. O na kũrĩ ũguo, mũirĩtu ũmwe aakanjire kiugo Jesu karatathi-inĩ kau ga ciũria na akĩandĩka kiugo “Ngai.”

Wee ũkuona atĩa? Hihi twagĩrĩirũo kwerekeria mahoya maitũ harĩ Jesu-ĩ, kana harĩ Ngai?a Nĩguo tuone macokio, reke twambe tuone ũrĩa Jesu aarutire arutwo ake kũhoya.

JESU AATŨRUTIRE TŨHOYAGE Ũ?

Jesu nĩ aarutanire na akĩonania nũũ wagĩrĩire kũhoywo.

ŨRUTANI WAKE: Rĩrĩa mũrutwo ũmwe wake aamũririe atĩrĩ, “Mwathani, tũrute o na ithuĩ kũhoya,” Jesu aamũcokeirie ũũ: “Rĩrĩa mũkũhoya Ngai, ugagai atĩrĩ, Ithe witũ.” (Luka 11:1, 2) Ningĩ, mahunjio-inĩ make marĩa moĩkaine mũno ma kĩrĩma-inĩ, Jesu nĩ eekĩrire athikĩrĩria ake ngoro mahoyage. Akiuga ũũ: “Ũhoe Thoguo.” Agĩcoka akĩmomĩrĩria akĩmeera ũũ: “Ithe wanyu nĩoĩ maũndũ marĩa mamũbatairie mũtanamũhoya.” (Mathayo 6:6, 8) Ũtukũ wake wa mũthia rĩrĩa aarĩ gũkũ thĩ, Jesu eerire arutwo ake atĩrĩ, “Mwahoya Ithe witũ ũndũ o na ũrĩkũ, nĩakamũhe na rĩĩtwa rĩakwa.” (Johana 16:23) Kwoguo Jesu aatũrutire tũhoyage Ithe, o ũrĩa arĩ we Ithe witũ, Jehova Ngai.—Johana 20:17.

KĨONERERIA GĨAKE: O ta ũrĩa Jesu aarutaga andũ arĩa angĩ kũhoya, we mwene aahoire ũũ: “Ndakũgatha, Awa, wee Mwathani wa Igũrũ o na wa thĩ.” (Luka 10:21) Hĩndĩ ĩngĩ nayo, “Jesu agĩtiira maitho, akiuga atĩrĩrĩ, Awa, nĩndakũgatha nĩ ũndũ nĩwanjigua.” (Johana 11:41) Na hĩndĩ ĩrĩa Jesu aakiriĩ gũkua, aahoire ũũ: “Awa, nĩndakũnengera roho wakwa o moko-inĩ maku.” (Luka 23:46) Rĩrĩa aahoire Ithe ũrĩa ũrĩ igũrũ, o we “Mwathani wa Igũrũ o na wa thĩ,” Jesu nĩ aatũigĩire ithuothe kĩonereria kĩega gĩa kũrũmagĩrĩra. (Mathayo 11:25; 26:41, 42; 1 Johana 2:6) Hihi arutwo a Jesu a tene nĩ maarũmĩrĩire motaaro macio?

AKRISTIANO A TENE MAAHOYAGA Ũ?

Ciumia cigana ũna thutha wa Jesu gũcoka igũrũ, arutwo ake nĩ maambĩrĩirie gũthĩnio na kũheo mĩkaana nĩ arĩa maamakararagia. (Atũmwo 4:18) Nĩ ũndũ ũcio, magĩitĩka kũhoya, no hihi maahoire ũ? “Makĩanĩrĩra Ngai na ngoro o ro ĩmwe,” makĩmũhoya atĩ athiĩ na mbere kũmateithia ‘kũgerera rĩĩtwa rĩa Jesu ndungata yake theru.’ (Atũmwo 4:24, 30) Kwoguo arutwo acio nĩ maarũmĩrĩire motaaro ma Jesu megiĩ kũhoya. Maahoyaga kũrĩ Ngai no ti Jesu.

Mĩaka mĩingĩ thutha ũcio, mũtũmwo Paulo nĩ aataarĩirie ũrĩa we, hamwe na arĩa maarutithanagia wĩra maahoyaga. Oigire ũũ akĩandĩkĩra Akristiano arĩa angĩ: “Nĩtũcokagĩria Ngai ngatho, o we Ithe wa Mwathani witũ Jesu Kristo, tũkĩmũhoyagĩra hĩndĩ ciothe.” (Akolosai 1:3) Paulo ningĩ nĩ aandĩkĩire Akristiano arĩa angĩ atĩ ‘macokagĩrie Ngai, o we Ithe witũ, ngatho mahinda mothe nĩ ũndũ wa maũndũ mothe, thĩinĩ wa rĩĩtwa rĩa Mwathani witũ Jesu Kristo.’ (Aefeso 5:20) Ciugo icio iratuonia atĩ Paulo hĩndĩ ciothe nĩ eekagĩra arĩa angĩ ngoro mahoyage “Ngai, o we Ithe witũ, . . . nĩ ũndũ wa maũndũ mothe,” kũgerera rĩĩtwa rĩa Jesu.—Akolosai 3:17.

O ta Akristiano a tene, no tuonanie wendo witũ harĩ Jesu na njĩra ya gwathĩkĩra ũtaaro wake wĩgiĩ mahoya. (Johana 14:15) Rĩrĩa twahoya kũrĩ Ithe witũ wa igũrũ o we wiki, nĩ tũrĩonaga ũũma wa ciugo cia Thaburi 116:1, 2 iria ciugaga ũũ: “Nĩnyenda Jehova, tondũ nĩaiguĩte mũgambo wakwa, . . . matukũ makwa mothe nĩwe ndĩrĩthathayagia.”b