Nĩ Ndaakenirio Mũno nĩ Macokio Mega na ma Kwĩhokeka ma Bibilia

MŨTŨŨRĨRE WAKWA WA HAU KABERE:

Ndaaciarĩirũo bũrũri-inĩ wa Hungary, taũni ya Székesfehérvár, ĩrĩa ĩkoragwo na historĩ nene ya makĩria ma mĩaka 1,000. Ũndũ wa kĩeha nĩ atĩ, no ndirikanaga ngero njũru iria ciagerirũo hĩndĩ ya mbaara ya kerĩ ya thĩ.

Mĩaka-inĩ yakwa ya ũnyinyi, ndaarerirũo nĩ cũcũ na guuka. Nĩ ndĩmaririkanaga na wendo mũingĩ, makĩria cũcũ Elisabeth. Nĩ aandeithirie kũgĩa na wĩtĩkio mũrũmu harĩ Ngai. Kuuma ndĩna mĩaka ĩtatũ, o hwaĩ-inĩ twacokagĩra hamwe nake ihoya rĩrĩa rĩtagwo Ihoya rĩa Mwathani. O na kũrĩ ũguo, ndokire gũtaũkĩrũo nĩ ũrĩa ihoya rĩu riugĩte ndĩna hakuhĩ mĩaka 30.

Ndaareragwo nĩ cũcũ na guuka ndĩ mũnyinyi tondũ aciari akwa maarutaga wĩra ũtukũ na mũthenya nĩguo mahote kuona mbeca cia kũgũra mũciĩ mwega. No o thutha wa ciumia igĩrĩ mũthenya wa Njuuma, famĩlĩ yothe nĩ yaacemanagia nĩguo ĩrĩyanĩre hamwe. Nĩ ndaakenagĩra mũno mahinda macio twahũthagĩra hamwe.

Mwaka-inĩ wa 1958, muoroto wa aciari akwa nĩ waakinyanĩire, makĩhota kũgũra nyũmba irĩa tũngĩaikarire tũrĩ atatũ. Nĩ ndaakenire mũno, kuona atĩ rĩu ndĩikaraga na aciari akwa! No gĩkeno kĩu gĩacokire gĩgĩthira o rĩmwe thutha wa mĩeri ĩtandatũ, rĩrĩa baba aakuire nĩ ũndũ wa kansa.

Ũndũ ũcio nĩ wanjũragire ngoro mũno. Nĩ ngũririkana ngĩhoya ũũ: “Ngai, nĩ ndaagũthaithire ũreke baba atũũre. Nĩ ndĩramũbatara. Nĩ kĩĩ gĩatũmire wage gũcokia mahoya makwa?” Nĩ ndendaga mũno kũmenya kũrĩa baba aarĩ. Ndaarigagwo atĩrĩ: ‘Hihi aathire igũrũ? Kana ũhoro wake nĩ wathirire biũ?’ Nĩ ndeeriragĩria mũno gũkorũo haana ta ciana iria ciarĩ na maithe.

Kwa ihinda rĩa mĩaka mĩingĩ, ndaathiaga tũburi-inĩ hakuhĩ o mũthenya. Ndathiĩ ngaturia ndu mbĩrĩra-inĩ ya baba ngahoya ũũ: “Ngai, ndagũthaitha ũndeithie menye kũrĩa baba arĩ.” Ningĩ no ndaahoyaga Ngai andeithie kũmenya muoroto wa ũtũũro nĩ ũrĩkũ.

Ndĩna mĩaka 13, ngĩtua itua rĩa kwĩruta rũthiomi rwa Kĩnjĩrĩmani. Ndeciragia atĩ gatagatĩ-inĩ ka mabuku maingĩ na marĩ ũhoro mũingĩ ma Kĩnjĩrĩmani, hihi no nyone macokio ma ciũria ciakwa. Mwaka-inĩ wa 1967, nĩ ndaambĩrĩirie gũthomera taũni-inĩ ya Jena, ĩrĩa hĩndĩ ĩyo yarĩ gĩcunjĩ kĩa Njĩrĩmani ya Irathĩro. Ndaathomaga na kĩyo mabuku marĩa mandĩkĩtwo nĩ athomi a Njĩrĩmani, makĩria marĩa mararĩrĩria ũhoro wĩgiĩ muoroto wa ũtũũro. O na gũtuĩka nĩ ndaathomaga maũndũ mega, hatirĩ o na ũmwe wanjokeirie biũ ciũria ciakwa. Kwoguo ngĩthiĩ na mbere kũhoya nyone macokio.

ŨRĨA BIBILIA YAGARŨRIRE MŨTŨŨRĨRE WAKWA:

Mwaka-inĩ wa 1970, nĩ ndacokire bũrũri-inĩ wa Hungary, kũrĩa ndacemanirie na Rose, ũrĩa wacokire gũtuĩka mũtumia wakwa. Hĩndĩ ĩyo Hungary yarĩ rungu rwa wathani wa Gĩkomunisti. Ihinda inini thutha wa kũhikania, tũrĩ na Rose tũkĩũrĩra bũrũri wa Austria. Muoroto witũ warĩ thutha-inĩ tũgaathiĩ taũni ya Sydney, Australia, kũrĩa mama witũ aaikaraga.

Thutha wa kahinda ngĩona wĩra Austria. Mũthenya ũmwe, mũndũ twarutithanagia wĩra nake akĩnjĩra atĩ no nyone macokio ma ciũria ciakwa ciothe Bibilia-inĩ. Akĩhe mabuku maigana ũna marĩ na ũhoro wa Bibilia. Ngĩthoma mabuku macio na ihenya ndĩna wendi mũnene. Nĩ ũndũ ũcio ngĩandĩkĩra Aira a Jehova arĩa maacabĩte mabuku macio, na ngĩhoya mahe mangĩ.

Mũthenya ũrĩa twahingirie mwaka ũmwe kuuma twahikania, tũrĩ na Rose nĩ twacereirũo nĩ Mũira wa Jehova ũmwe mwĩthĩ wa Austria. Akĩndehera mabuku marĩa ndahoete na akĩnjũria kana no nyende kwĩruta Bibilia, na niĩ ngĩtĩkĩra. Tondũ nĩ ndeendaga mũno kwĩruta, twathomaga maita merĩ o kiumia, o riita tũgathoma ta mathaa mana!

Nĩ ndaakenirio mũno nĩ maũndũ marĩa Aira a Jehova maandutire kuuma Bibilia-inĩ. Nĩ ndagegire mũno rĩrĩa maanyonirie rĩĩtwa rĩa Ngai, Jehova, thĩinĩ wa Bibilia yakwa ya rũthiomi rwa Hungary. Mĩaka 27 ĩrĩa ndatũire thiaga kanitha, ndioimire njiguĩte rĩĩtwa rĩa Ngai rĩgwetetwo o na riita rĩmwe. Nĩ ndaakenirio mũno nĩ macokio mega na ma kwĩhokeka ma Bibilia. Kwa ngerekano, nĩ ndeerutire atĩ arĩa makuĩte matirĩ ũndũ moĩ, nĩ ta marĩ toro mũritũ. (Kohelethu 9:​5, 10; Johana 11:​11-15) Ningĩ nĩ ndeerutire ũhoro wĩgiĩ kĩĩranĩro kĩa Ngai gĩa thĩ njerũ, ĩrĩa ‘gĩkuũ gũtarĩ hingo gĩgacoka kũgĩa.’ (Kũguũrĩrio 21:​3, 4) Nĩ ndĩrĩgagĩrĩra gũkoona baba rĩngĩ tondũ thĩinĩ wa thĩ njerũ nĩ “gũkariũkio andũ.” (Atũmwo 24:15)

Rose aanyitanĩire na niĩ kwĩruta Bibilia na ngoro yake yothe. Twathire na mbere kĩĩroho o na ihenya, mĩeri ĩĩrĩ ĩgĩthira nĩ twarĩkĩtie ibuku rĩrĩa twahũthagĩra kwĩruta! Ningĩ twathiaga mĩcemanio yothe ĩrĩa Aira a Jehova meekaga Nyũmba-inĩ ya Ũthamaki. Nĩ twekĩrirũo ngoro mũno nĩ wendo, gũteithania, na ũrũmwe ũrĩa ũkoragwo gatagatĩ-inĩ ka Aira a Jehova.​—Johana 13:​34, 35.

Tũrĩ na Rose, nĩ twetĩkĩririo kũingĩra Australia mwaka-inĩ wa 1976. O na ihenya tũgĩcaria Aira a Jehova kũu. Aira acio a Jehova nĩ maatũmire twĩigue tũiganĩire. Mwaka-inĩ wa 1978, o na ithuĩ tũgĩtuĩka Aira a Jehova.

ŨRĨA NGʼUNĨKĨTE:

Rĩu nĩ nyonete macokio ma ciũria iria ndaatũraga ndĩyũragia kwa ihinda iraihu. Na njĩra ya gũkũhĩrĩria Jehova Ngai, nĩ nyonete Baba ũrĩa mwega biũ mũndũ angĩĩcirĩria. (Jakubu 4:8) Na mwĩhoko wakwa wa gũkoona baba mũnjiari thĩinĩ wa thĩ njerũ ĩrĩa ĩroka ũkoragwo ũrĩ ũndũ wa bata mũno harĩ niĩ.​—Johana 5:​28, 29.

Mwaka-inĩ wa 1989, tũrĩ na Rose nĩ twatuire itua rĩa gũcoka Hungary nĩguo tũkahunjie wĩtĩkio witũ kũrĩ arata na andũ aitũ a famĩlĩ, o hamwe na andũ arĩa angĩ. Tũkoretwo na mweke wa gũthomithia andũ aingĩ mũno Bibilia. Makĩria ma andũ 70 harĩ acio, nĩ manyitanĩire na ithuĩ harĩ gũtungatĩra Jehova, mami arĩ ũmwe wao.

Ndahoete kwa ihinda rĩa mĩaka 17 nyone macokio ma ciũria ciakwa. Rĩu mĩaka ĩngĩ 39 nĩ ĩhĩtũkĩte na no thiaga na mbere kũhoya, no rĩu ngoragwo ngiuga ũũ: “Nĩ ngatho, Baba witũ nyendete wa igũrũ nĩ ũndũ wa kũnjokeria mahoya ma ũnyinyi-inĩ wakwa.”