KUUMA NGOTHI-INĨ | HIHI NO WENDE KWĨRUTA BIBILIA?

Mũbango Wa Kwĩruta Bibilia Wa Andũ Othe

Aira a Jehova nĩ moĩkaine wega nĩ ũndũ wa wĩra wao wa kũhunjia. No hihi nĩ ũrĩ wamenya atĩ nĩ tũkoragwo na mũbango wa kwĩruta Bibilia thĩinĩ wa thĩ yothe?

Mũndũ ũrerutĩra Bibilia arĩ harĩa arutagĩra wĩra

Mwaka-inĩ wa 2014, Aira a Jehova makĩria ma 8,000,000 thĩinĩ wa mabũrũri 240 nĩ meerutaga Bibilia na andũ hakuhĩ 9,500,000 o mweri.a O na mabũrũri mamwe ta 140 thĩinĩ wa thĩ, matikinyĩtie mũigana wa andũ arĩa merutaga Bibilia hamwe na ithuĩ!

Nĩguo marute wĩra ũyũ, Aira a Jehova macabaga indo cia kwĩruta Bibilia hakuhĩ bilioni ĩmwe na nuthu o mwaka. Indo icio nĩ: Bibilia, mabuku, ngathĩti, na indo ingĩ—makĩhũthĩra thiomi ta 700! Wĩra ũcio nĩ ũteithagia andũ kwĩruta Bibilia na rũthiomi rũrĩa mekwenda.

“Ndĩ cukuru ndiendete gũthoma, no nĩ ndakeneire wĩruti ũyũ mũno. Na maũndũ marĩa ndeerutaga maarĩ ma gwĩkĩra ngoro mũno!”—Katlego, Afrika ya Mũhuro.

“Kũgerera wĩruti ũcio nĩ ndaahotire kuona macokio ma ciũria ciakwa ciothe, na ingĩ nyingĩ.”—Bertha , Mexico.

“Ndaarutagwo Bibilia ndĩ gwakwa mũciĩ, mahinda marĩa ndoonaga maanjagĩrĩire. Ũcio warĩ ũndũ mwega biũ harĩ niĩ!”—Eziquiel, Brazil.

“Rĩmwe na rĩmwe twathomaga ndagĩka 15 nginya 30, na mahinda mangĩ tũgathoma ihinda inenanene, kũringana na ũrĩa maũndũ makwa maakoragwo maikaire.”—Viniana, Australia.

“Wĩruti ũcio ndwarĩhagio, na warĩ wa gũcanjamũra mũno!”—Aimé, Benin.

“Mwarimũ wakwa wa Bibilia aandutaga arĩ na ũkirĩrĩria na wendo mũingĩ. Nĩ twagĩire na ũrata wa hakuhĩ mũno.”—Karen, Northern Ireland.

“Andũ aingĩ nĩ merutaga Bibilia na matituĩke Aira a Jehova.” —Denton, Ngeretha.

MACOKIO MA CIŨRIA IRIA CIŨRAGIO KAINGĨ CIĨGIĨ MŨBANGO WITŨ WA KŨRUTANA BIBILIA

Mũrũmagĩrĩra mũtaratara ũrĩkũ kũrutana Bibilia?

Tuoyaga morutani mwanya mwanya ma Bibilia, tũgathuthuria mĩhari ya Bibilia ĩrĩa ĩhutanĩtie namo. Kwa ngerekano, Bibilia nĩ ĩcokagia ciũria ta ici: Ngai nũũ? Ahaana atĩa? Hihi nĩ arĩ rĩĩtwa? Aikaraga kũ? Hihi no tũmũkuhĩrĩrie? Ũndũ ũrĩa mũritũ nĩ kũmenya harĩa tũngĩona macokio thĩinĩ wa Bibilia.

Nĩgetha tũteithie andũ mone macokio, tũhũthagĩra ibuku rĩĩtagwo Bibilia Ĩrutanaga Atĩa Kũna?b rĩrĩa rĩkoragwo na tũratathi 224. Ibuku rĩrĩ rĩharĩrĩirio nĩguo rĩteithie andũ mataũkĩrũo nĩ morutani ma mũthingi ma Bibilia. Rĩkoragwo na mathomo megiĩ Ngai, Jesu Kristo, mĩnyamaro, kũriũka kwa andũ, mahoya, na mangĩ maingĩ.

Mũrutanagĩra kũ na mũrutanaga rĩ?

Wĩruti ũyũ no wĩkĩrũo handũ harĩa hakwagĩrĩire, na mahinda marĩa mega nawe.

Gĩikaro kĩmwe kĩa wĩruti kĩoyaga ihinda rĩigana atĩa?

Andũ aingĩ mabangaga ta ithaa rĩmwe o kiumia nĩguo merute Bibilia. Hatikoragwo na mũigana mũna wa mathaa marĩa mũndũ agĩrĩirũo kwĩruta. No tũcenjie mũbango ũcio nĩguo ũingĩrane na maũndũ maku. Andũ amwe merutaga ndagĩka 10 kana 15 o kiumia.

Mũrĩhagia atĩa?

Wĩruti ũcio, na indo iria ihũthagĩrũo kwĩruta itirĩhagio. Ũndũ ũyũ ũringaine na ciugo iria Jesu eerire arutwo ake: “Mũheetwo o ro tũhũ, heanagai o ro tũhũ.”—Mathayo 10:8.

Wĩruti ũcio ũthiaga na mbere nginya rĩ?

No ũthiĩ na mbere na kwĩruta nginya o rĩrĩa ũngĩenda. Ibuku rĩa Bibilia Ĩrutanaga Atĩa Kũna? rĩkoragwo na mathomo 19. Ihinda rĩrĩa ũngĩoya kwĩruta ithomo rĩrĩa ũngĩenda kana macio mothe, rĩkũringana na maũndũ maku ũrĩa mahaana.

No mũhaka nduĩke Mũira wa Jehova?

Aca. Nĩ tũĩ na tũgatĩa atĩ o mũndũ nĩ arĩ kĩhooto gĩa gũthuura ũrĩa ekwenda gwĩtĩkia. O na kũrĩ ũguo, andũ arĩa magĩaga na ũmenyo wa mũthingi wa Bibilia no mahote gũtua itua rĩa ũũgĩ.

Ingĩruta kũ ũhoro makĩria?

Web site ya jw.org/ki nĩ ĩheanaga ũhoro mũrũngĩrĩru wĩgiĩ wĩtĩkio na mawĩra marĩa Aira a Jehova marutaga.

Ingĩhoya wĩruti wa Bibilia atĩa?

Kũgerera www.jw.org/ki. thĩinĩ wa intaneti.
Kwandĩka marũa ũkĩhũthĩra andirethi ĩmwe ya iria cionanĩtio karatathi-inĩ ga kerĩ ka ngathĩti ĩno.
Kwaranĩria na Aira a Jehova arĩa marĩ hakuhĩ nawe.

a Kaingĩ andũ marutagwo Bibilia marĩ mũndũ ũmwe ũmwe, kana marĩ tũkundi tũnini.

b Rĩcabĩtwo nĩ Aira a Jehova. Makĩria ma kobĩ milioni 230 cia ibuku rĩrĩ nĩ icabĩtwo na thiomi makĩria ma 260.

ŨTEITHIO KŨRĨ FAMĨLĨ

“Rĩrĩa mũtumia wakwa ambĩrĩirie kwĩruta Bibilia, nĩ ndonire eka mogarũrũku manene. Mũtũũrĩre wa famĩlĩ iitũ nĩ wagĩrire. Tondũ nĩ ndeendaga kũmenya kĩrĩa areruta, o na niĩ ngĩambĩrĩria kwĩruta. Maũndũ marĩa ndeerutire nĩ maatũmire nduĩke mũndũ mwega. Kwĩruta Bibilia nĩ gwateithirie famĩlĩ iitũ ĩkorũo na ũiguano.”—Eziquiel.

“Ndambĩrĩria kwĩruta Bibilia, nĩ ndaatigire kũhũthĩra ndawa cia kũrebia, kũhũthĩra njohi ũru, na ngĩhota kwĩgirĩrĩria marakara. Nyũmba yakwa ĩkoragwo ĩrĩ theru na ĩbangĩtwo wega. Nĩ ngenagĩra famĩlĩ yakwa mũno, na ngakenera kũmekĩra maũndũ marĩa mangĩtũma makorũo na gĩkeno. Rĩu ngoragwo na gĩkeno mũno.”—Karen.

“Andũ amwe nĩ maanyingĩrĩire ndambĩrĩria kwĩruta Bibilia. No mũthuri wakwa nĩ aanyitire itua rĩakwa mbaru, akĩnjĩra ũũ: ‘Ndiramakio nĩ ũrĩa andũ mekuuga. Ũndũ ũrĩa wa bata harĩ niĩ, nĩ kuona nĩ ũracenjia na ũkaagĩra. Thiĩ na mbere gwĩka o ũguo ũreka.’ Tũtirĩ twakorũo na mũtũũrĩre mwega wa famĩlĩ ta ũrĩa twĩ naguo!”—Viniana.