Ikaraga o Wetereire!

1, 2. Nĩ mwerekera ũrĩkũ ndungata cia Jehova ikoretwo naguo kuuma o tene?

KUUMA o matukũ-inĩ ma tene ndungata cia Jehova nĩ ikoretwo igĩeterera kũhinga kwa morathi. Kwa ngerekano, Jeremia nĩ aarathĩte atĩ Juda nĩ ĩngĩkaanangwo nĩ Babuloni, na ũguo nĩguo gwathire mwaka-inĩ wa 607 Mbere ya Kristo. (Jer. 25:8-11) Nake Isaia akĩratha atĩ Jehova nĩ angĩacokirie Ayahudi kuuma ithamĩrio-inĩ. Oigire ũũ: “Gũkena-rĩ, nĩ arĩa othe maikaraga mamũcũthĩrĩirie.” (Isa. 30:18) O nake Mika nĩ aaikaraga etereire kuona ciĩranĩro cia Jehova ikĩhinga, oigire ũũ: “Niĩ hakwa-rĩ, ndĩrĩcũthagĩrĩria o Jehova.” (Mik. 7:7) Ningĩ, kwa ihinda rĩa mĩaka magana maingĩ ndungata cia Jehova nĩ ciaikaraga cietereire kũhinga kwa morathi megiĩ Mesia, kana Kristo.—Luk. 3:15; 1 Pet. 1:10-12.a

² O na ndungata cia Ngai cia mahinda maya no irathiĩ na mbere gweterera tondũ nĩ kũrĩ morathi megiĩ Mesia marathiĩ na mbere kũhinga. Ica ikuhĩ, kũgerera Ũthamaki wa Kĩĩmesia, Jehova nĩ ekwehereria andũ mĩnyamaro na njĩra ya kũnina andũ arĩa aganu na ahonokie andũ ake kuuma kũrĩ thĩ ĩno njũru ya Shaitani. (1 Joh. 5:19) Kwoguo rekei tũikarage twĩiguĩte tũkĩmenyaga atĩ mũthenya wa Jehova ũrĩ hakuhĩ mũno.

3. Angĩkorũo nĩ twetereire mũthenya wa Jehova ihinda iraya-rĩ, no kũhoteke twĩyũrie kĩũria kĩrĩkũ?

³ Ithuĩ ndungata cia Jehova nĩ twĩriragĩria mũno gũkoona wendi wa Ngai ‘ũgĩkwo gũkũ thĩ, o ta ũrĩa wĩkagwo igũrũ.’ (Mat. 6:10) Nĩ ũndũ wa gũkorũo metereire mũthenya wa Jehova ihinda iraya, andũ amwe mahota kwĩyũria ũũ: ‘Hihi tũrĩ na itũmi cia gũthiĩ na mbere gweterera mũthenya wa Jehova?’ Rekei tuone.

TWAGĨRĨIRŨO GŨIKARA TWETEREIRE NĨKĨ?

4. Gĩtũmi kĩrĩa kĩnene kĩngĩtũma tũthiĩ na mbere gũikara twĩiguĩte nĩ kĩrĩkũ?

⁴ Bibilia nĩ ĩtwĩraga mwerekera ũrĩa twagĩrĩirũo gũkorũo naguo ũhoro-inĩ wĩgiĩ gũka kwa mũthenya wa Jehova. Jesu eerire arũmĩrĩri ake ‘mehũgage’ na ‘maikarage meiguĩte.’ (Mat. 24:42; Luk. 21:34-36) Tondũ Jesu nĩwe watwĩrire twĩke ũguo, kĩu nĩ gĩtũmi kĩega gĩa gũtũma tũthiĩ na mbere na gweterera. Ithondeka rĩa Jehova nĩ rĩtũigĩire kĩonereria kĩega ũndũ-inĩ ũcio. Mabuku marĩa rĩcabaga, makoretwo magĩtwĩkĩra ngoro tũikarage ‘tũgĩtanyaga na tũkĩĩriragĩria mũno gũkinya kwa mũthenya wa Jehova’ na tũigage meciria maitũ biũ harĩ thĩ njerũ ĩrĩa atwĩrĩire.—Thoma 2 Petero 3:11-13.

5. Nĩkĩ nĩ ũndũ wa bata mũno gũikara twĩiguĩte mahinda-inĩ maya?

⁵ O na gũtuĩka warĩ ũndũ wa bata harĩ Akristiano a tene gũikara meiguĩte, ũndũ ũcio nĩ wa bata makĩria harĩ ithuĩ. Nĩkĩ? Tondũ tũratũũra ihinda-inĩ rĩa gũkorũo kuo gwa Kristo. Kĩmenyithia gĩa kuonania atĩ Kristo arĩ kuo nĩ gĩkoretwo gĩkĩoneka kuuma mwaka wa 1914. Ningĩ kĩmenyithia kĩu kĩonanagia atĩ tũratũũra matukũ-inĩ ma kũrigĩrĩria kana “ithirĩro rĩa mahinda maya.” Kwa ngerekano, o ta ũrĩa Jesu aarathĩte, maũndũ thĩinĩ wa thĩ marathiĩ o magĩthũkaga na ũhoro ũrĩa mwega wa Ũthamaki nĩ ũrahunjio thĩinĩ wa thĩ yothe. (Mat. 24:3, 7-14) Jesu ndoigire rĩrĩa matukũ macio ma kũrigĩrĩria mangĩgaathira, nĩ ũndũ ũcio tũkũbatara mũno gũikara twĩiguĩte kana twĩhũgĩte.

6. Nĩkĩ no twĩrĩgĩrĩre maũndũ thĩinĩ wa thĩ mathiĩ mathũkĩte o ũrĩa tũrakuhĩrĩria mũico?

⁶ Mũndũ ahota kuuga ũũ: “Ithirĩro rĩa mahinda maya” nĩ rĩa kahinda karoka rĩrĩa maũndũ thĩinĩ wa thĩ magakorũo mathũkĩte mũno gũkĩra ũrĩa marĩ rĩu. Ma nĩ atĩ, Bibilia nĩ yonanagia atĩ ‘matukũ-inĩ ma kũrigĩrĩria’ waganu nĩ ũkaingĩha mũno. (2 Tim. 3:1, 13; Mat. 24:21; Kũg. 12:12) Nĩ ũndũ ũcio, o na gũtuĩka maũndũ thĩinĩ wa thĩ nĩ mathũkĩte mũno, tũratanya atĩ megũthiĩ o na mbere gũthũka.

7. Rĩandĩko rĩa Mathayo 24:37-39 rĩonanagia maũndũ magakorũo matariĩ atĩa thĩinĩ wa thĩ matukũ-inĩ ma kũrigĩrĩria?

⁷ No ũgwĩciria maũndũ megũthũka na gĩkĩro kĩrĩkũ mbere ya ‘mĩnyamaro ĩrĩa mĩnene’ kwambĩrĩria? (Kũg. 7:14) Kwa ngerekano-rĩ, ũgwĩciria no mũhaka gũgaakorũo na mbaara mabũrũri-inĩ mothe, na hakuhĩ andũ othe makorũo na ngʼaragu na marĩ arũaru? Kũngĩthiĩ ũguo, ũngĩkorũo ũrĩ ũndũ mũhũthũ mũno nginya harĩ arĩa mekagĩrĩra ũrathi wa Bibilia nganja gwĩtĩkia atĩ nĩ ũrahinga. Ĩndĩ, Jesu oigĩte atĩ andũ arĩa aingĩ magakorũo marikĩire mũno mĩhangʼo-inĩ yao ya o mũthenya na nĩ ũndũ ũcio ‘matikamenya’ mũthenya wa Jehova ũgĩkinya. (Thoma Mathayo 24:37-39.) Maandĩko mationanagia atĩ maũndũ magaatororokia mũno thĩinĩ wa thĩ matukũ-inĩ ma kũrigĩrĩria nginya andũ othe metĩkie atĩ mũico ũrĩ hakuhĩ.—Luk. 17:20; 2 Pet. 3:3, 4.

8. Nĩ kĩĩ kĩyumĩrĩtie wega kũrĩ arĩa mathĩkagĩra ũtaaro wa Jesu wa gũikara ‘mehũũgĩte’?

⁸ O na kũrĩ ũguo, nĩguo maũndũ marĩa marĩ thĩinĩ wa kĩmenyithia kĩrĩa Jesu aaheanire mahingie muoroto wamo, no mũhaka makorũo meyumĩrĩtie wega ũndũ mekuoneka nĩ arĩa makoretwo magĩathĩkĩra ũtaaro wa Jesu wa gũikaraga ‘mehũũgĩte.’ (Mat. 24:27, 42) Na ũguo nĩguo gũkoretwo kuuma 1914. Kuuma hĩndĩ ĩyo maũndũ marĩa marĩ thĩinĩ wa kĩmenyithia kĩu makoretwo makĩhinga. Kwoguo, rĩu tũratũũra ‘ithirĩro-inĩ rĩa mahinda maya’ na no kahinda kanini mũno gatigaire nĩguo mũthenya wa Jehova ũkinye.

9. Twagĩrĩirũo gũikara twetereire kũninwo gwa thĩ ĩno njũru nĩkĩ?

⁹ Gũkĩrĩ ũguo-rĩ, tũrabatara gũthiĩ na mbere gũikara twetereire mũthenya wa Jehova nĩkĩ? Tondũ nĩ twendaga gwathĩkĩra ũtaaro wa Jesu. Ningĩ nĩ tuonaga atĩ maũndũ marĩa marĩ thĩinĩ wa kĩmenyithia gĩa gũkorũo kuo gwa Kristo nĩ marahinga. Kĩĩrĩgĩrĩro gitũ kĩhocetie biũ harĩ ũira ũrĩa ũrĩ Maandĩko-inĩ, na ũira ũcio nĩguo ũtũmaga tũikare twĩhũgĩte na twĩiguĩte twetereire kũninwo gwa thĩ ĩno njũru.

TŨGWETERERA NGINYA RĨ?

10, 11. (a) Jesu eerire arũmĩrĩri ake ‘maikarage mehũgĩte’ nĩkĩ? (b) Jesu eerĩte arũmĩrĩri ake meke atĩa mangĩkona ta metereire mũno gũkĩra ũrĩa maatanyĩte? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁰ Aingĩ aitũ nĩ tũikarĩte twĩiguĩte kĩĩroho mĩaka mĩingĩ. O na kũrĩ ũguo, tũtiagĩrĩirũo nĩ gũkua ngoro atĩ tondũ ihinda iraya nĩ rĩhĩtũkĩte na mũthenya wa Jehova ndũrĩ ũroka. Jesu agĩũka kũnina thĩ ĩno njũru ya Shaitani twagĩrĩirũo gũkorũo twĩharĩirie. Jesu eerire arũmĩrĩri ake ũũ: “Wĩmenyagĩrĩrei, mwĩhũgage na mũhoyage: amu mũtiũĩ ihinda rĩrĩa rĩgakinya. Nĩ ta mũndũ ũtũire ũgeni-inĩ, atigĩte nyũmba yake, na agatigĩra ngombo ciake ũramati, o ngombo wĩra wayo, na agĩtiga aatha mũikaria wa mũrango o nake aikarage ehũgĩte. Tondũ ũcio ikaragai mwĩhũgĩte: amu mũtiũĩ rĩrĩa mwene nyũmba arĩũka, kana nĩ hwaĩ-inĩ, kana ũtukũ gatagatĩ, kana ngũkũ ĩkĩgamba, kana rũcinĩ; Ndakae gũũka na kĩguũ amũkore mũkomete. Na ũguo ndamwĩra inyuĩ, noguo ndera andũ othe, atĩrĩ Ikaragai mwĩhũgĩte.”—Mar. 13:33-37.

¹¹ Rĩrĩa arũmĩrĩri a Jesu maataũkĩirũo atĩ gũkorũo kuo gwake kwaambĩrĩirie 1914, nĩ meerĩgagĩrĩra atĩ mũthenya wa Jehova ũngĩokire narua mũno. Nĩ ũndũ ũcio makĩambĩrĩria kwĩharĩria nĩ ũndũ wa mũthenya ũcio na njĩra ya kuongerera kĩyo wĩra-inĩ wa kũhunjia. Ĩndĩ Jesu oigĩte atĩ ahota gũikaranga, oke “ngũkũ ĩkĩgamba, kana rũcinĩ” tene. Kũngĩathire ũguo-rĩ, arũmĩrĩri ake mangĩabatarire gwĩka atĩa? Jesu aamerĩte ũũ: ‘Ikaragai mwĩhũgĩte.’ Kwoguo, o na angĩkorũo nĩ tũrona ta twetereire ihinda iraya, ti kuuga atĩ mũthenya wa Jehova ndũrĩ hakuhĩ, kana atĩ gũtirĩ hingo ũgoka.

12. Habakuku oririe Jehova atĩa, nake aamũcokeirie atĩa?

¹² Ta wĩcirie ũhoro wa mũnabii Habakuku ũrĩa watũmĩtwo akarathe ũhoro wa kwanangwo kwa Jerusalemu. Mĩaka mĩingĩ mbere ĩyo nĩ kũrĩ anabii angĩ maarathĩte atĩ itũũra rĩu nĩ rĩkanaangwo. Gũkinyĩria hĩndĩ ĩyo maũndũ maathũkĩte mũno ũũ atĩ ‘andũ arĩa aaganu maathiũrũrũkĩirie arĩa athingu, na matuĩro ma cira makahotomio.’ Habakuku aahoire ũũ: “Ĩ Jehova, nĩ nginya hĩndĩ ĩ ngũtũũra ngũkayagĩra na ndũnjigue?” Handũ ha kũmũcokeria kĩũria kĩu ĩmwe kwa ĩmwe, Jehova eerire mũnabii ũcio wake atĩ hatarĩ nganja kwanangwo kwa Jerusalemu kũrĩa kwarathĩtwo ‘gũtigatĩrio.’ Jehova eerire Habakuku ũũ: ‘Gĩta o gũkirĩrĩria wetereire.’—Thoma Habakuku 1:1-4; 2:3.

13. Nĩ mwerekera ũrĩkũ Habakuku angĩabatarire gwĩthema, na nĩkĩ mwerekera ũcio ũngĩarĩ ũgwati harĩ we?

¹³ Ta wĩcirie korũo Habakuku nĩ aakuire ngoro oige ũũ: ‘Ngoretwo ngĩigua gũkĩrathwo ũhoro wa kwanangwo kwa Jerusalemu mĩaka mĩingĩ. Ĩ angĩkorũo mũthenya ũcio ndũrĩ hakuhĩ gũkinya? Ndirona bata wa gũthiĩ na mbere kũratha ũhoro ũcio. Wĩra ũcio no ũrutwo nĩ andũ angĩ.’ Kũngĩathire atĩa korũo Habakuku nĩ aagĩire na meciria ta macio? Angĩathũkirie ũrata wake na Jehova na hihi aninwo Jerusalemu ĩkĩanangwo nĩ Ababuloni.

14. Nĩkĩ no tũkorũo na ma atĩ nĩ tũgaakena mũno twaikara twetereire?

¹⁴ Thĩinĩ wa thĩ njerũ, nĩ tũgaakena mũno twecũrania ũrĩa maũndũ mothe marĩa maarathĩtwo megiĩ matukũ ma kũrigĩrĩria maahingire o ta ũrĩa Jehova oigĩte. Gwĩcũrania ũrĩa maũndũ maahanĩkire nĩ gũgatũma wĩtĩkio witũ ũgĩe na hinya makĩria harĩ Jehova na harĩ ciĩranĩro ciake iria itagaakorũo ihingĩtio. (Thoma Joshua 23:14.) Tondũ Jehova nĩwe ‘ũtuaga ciathĩ na mahinda,’ nĩ tũkamũcokeria ngatho mũno tondũ nĩ aatwĩkĩraga ngoro tũikarage tũkĩmenyaga atĩ ‘ithirĩro rĩa maũndũ mothe nĩrĩakuhĩrĩirie.’—Atũm. 1:7; 1 Pet. 4:7.

KŨHUNJIA NA KĨYO O TŨGĨETAGĨRĨRA

15, 16. Kuongerera kĩyo wĩra-inĩ wa kũhunjia nĩ ũndũ wa bata nĩkĩ mahinda-inĩ maya?

¹⁵ No twĩrĩgĩrĩre atĩ ithondeka rĩa Jehova nĩ rĩgũthiĩ na mbere gũtũririkania atĩ nĩ twagĩrĩirũo gũtungatĩra Jehova tũrĩ na mĩtũkĩ. Tũtiheagwo iririkania icio nĩ getha tu tũkorũo na kĩyo ũtungata-inĩ, no nĩguo itũteithie gũikara tũkĩmenyaga atĩ kĩmenyithia gĩa gũkorũo kuo gwa Kristo nĩ kĩraahinga. Tũrĩ na ma atĩ kĩmenyithia kĩrĩa Jesu aaheanire nĩ kĩrahinga mahinda-inĩ maya na atĩ mũico ũrĩ hakuhĩ mũno gũkinya. Nĩ ũndũ ũcio, tũigaga Jehova mbere ũtũũro-inĩ witũ na tũgathiĩ na mbere kũhunjia ũhoro ũrĩa mwega wĩgiĩ Ũthamaki wake.—Mat. 6:33; Mar. 13:10.

¹⁶ Mwarĩ wa Ithe witũ ũmwe oigire ũũ: “Kũgerera kũhunjia ũhoro ũrĩa mwega wa Ũthamaki wa Ngai, no . . . tũteithie andũ nĩguo makaahonoka rĩrĩa mũthenya wa Jehova ũgaakinya.” Mwarĩ wa Ithe witũ ũcio nĩ oĩ ũhoro wĩgiĩ kũhonokio kuuma ũgwati-inĩ tondũ nĩ harĩ hĩndĩ marĩ na mũthuri wake maahonokirio hĩndĩ meri yetagwo Wilhelm Gustloff yarikĩire iria-inĩ mwaka wa 1945. Nĩ ũhũthũ mũndũ kwaga gũtaũkĩrũo nĩ kĩĩ kĩa bata makĩria o na arĩ ũgwati-inĩ ta ũcio. Mwarĩ wa Ithe witũ ũcio nĩ aririkanaga mũtumia ũmwe warĩ meri-inĩ ĩyo warĩrire akiugaga ũũ: “Mathandũkũ makwa! Mathandũkũ makwa! Mathaga makwa! Njigĩte mathaga makwa mothe na gũkũ rungu. Ndorũo nĩ indo ciakwa ciothe!” Ngũrani na mũtumia ũcio, andũ amwe meri-inĩ ĩyo nĩ meerutanĩirie gũteithia na makĩĩingĩria ũgwati-inĩ nĩguo mahonokie andũ angĩ arĩa maagwĩte iria-inĩ. O ta andũ acio meeimire, nĩ twĩrutanagĩria nĩguo tũteithie andũ. Nĩ tuoyaga na ũritũ wĩra wa kũhunjia tũrĩ na mĩtũkĩ na tũgateithia andũ makaahonoka rĩrĩa mũthenya wa Jehova ũgaakinya.

17. Tũrĩ na itũmi irĩkũ cia gwĩtĩkia atĩ mũico no ũũke hĩndĩ o yothe?

¹⁷ Maũndũ marĩa marĩ kuo thĩinĩ wa thĩ nĩ maronania wega atĩ ũrathi wa Bibilia nĩ ũrahinga na atĩ mũico wa thĩ ĩno njũru nĩ ũkuhĩrĩirie mũno. Nĩ ũndũ ũcio, tũtiagĩrĩirũo gwĩciria atĩ kũrabatarania ihinda inene nĩguo maũndũ thĩinĩ wa thĩ magarũrũke mũno nĩguo ‘hĩa iria ikũmi’ na “nyamũ” ĩrĩa ĩgwetetwo thĩinĩ wa Kũguũrĩrio 17:16 ciũkĩrĩre Babuloni Ũrĩa Mũnene—ndini ciothe cia maheeni gũkũ thĩ. Twagĩrĩirũo kũririkana atĩ Ngai nĩwe ‘ũkaamataara ngoro-inĩ ciao’ moe ikinya rĩu, na ũndũ ũcio no ũhaanĩke na ihenya mũno na hĩndĩ o yothe! (Kũg. 17:17) Mũico wa thĩ ĩno njũru nĩ ũkuhĩrĩirie mũno. Nĩkĩo nĩ twagĩrĩirũo kũrũmĩrĩra ũtaaro ũyũ wa Jesu: ‘Wĩmenyagĩrĩrei arĩ inyuĩ, nĩ getha ngoro cianyu itikanakorũo ititikithĩtio ũrĩi, na ũrĩu, na mĩhangʼo ya muoyo ũyũ, naguo mũthenya ũcio ũmũhobanĩrie narua ta arĩ mũtego.’ (Luk. 21:34, 35; Kũg. 16:15) Rekei tũtue itua rĩa gũtungatĩra Jehova na mĩtũkĩ tũrĩ na ma atĩ nĩ ‘agunaga andũ arĩa maikaraga mamũcũthĩrĩirie.’—Isa. 64:4.

18. Nĩ kĩũria kĩrĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?

¹⁸ O tũgĩetagĩrĩra mũico wa thĩ ĩno njũru ũkinye, rekei tũrũmĩrĩre ũtaaro wa ciugo ici cia Juda iria ciatongoririo nĩ roho wa Ngai: “No inyuĩ, endwa akwa, ikaragai mũkĩongererekaga hinya ũhoro-inĩ wanyu wa gwĩtĩkia wĩtĩkio ũrĩa mũtheru mũno, na mũhoyage mwĩ na Roho Mũtheru, nĩ getha mwĩmenyagĩrĩre mũikarage o mwendetwo nĩ Ngai, na mũgĩtanyaga hĩndĩ ĩrĩa mũkaiguĩrũo tha nĩ Mwathani witũ Jesu Kristo, nĩguo mũkone muoyo ũrĩa ũtagathira.” (Jud. 20, 21) O na kũrĩ ũguo-rĩ, tũngĩonania na njĩra ĩrĩkũ ũtũũro-inĩ witũ atĩ nĩ twetereire kĩĩranĩro kĩa Ngai gĩa thĩ njerũ na atĩ nĩ twĩriragĩria mũno gũgatũũra thĩinĩ wayo? Ũndũ ũcio nĩguo ũkwarĩrĩrio gĩcunjĩ-inĩ kĩrĩa kĩrũmĩrĩire.