Nĩ Ndonire Kĩndũ Kĩega Gũkĩra Ũthaka

Mwaka ũrĩa warũmĩrĩire, ngĩambĩrĩria gũthaaka thenema, rĩmwe na rĩmwe ndĩ mũthaaki ũrĩa mũnene. Amemerekia a mohoro nĩ meendaga rũgano rwakwa, ahũũri mbica makenda mbica yakwa, andũ makanjĩta makĩrugũria thenema njerũ, nyũmba njerũ, na makanjĩta tũrĩanĩre irio cia mĩaraho na cia hwaĩ-inĩ. Nĩ ndatahĩte meciria ma andũ aingĩ mũno.

No o ũrĩa mahinda maathiaga, ngĩambĩrĩria kuona atĩ maũndũ macio mothe matirehage gĩkeno ta ũrĩa ndeeciragia. Kaingĩ nĩ ndathaakaga thenema ciarĩ na mogwati maingĩ. Maita maingĩ athaaki a Hong Kong matiahũthagĩra andũ arĩa marĩ na ũmenyeru wa gwĩka maũndũ marĩ na ũgwati thĩinĩ wa thenema ta ũrĩa kwarĩ Hollywood, kwoguo no niĩ ndekaga maũndũ macio, ta gũtwarithĩria kibikibi igũrũ rĩa ngaari. Thenema nyingĩ iria ndathaakaga ciarĩ na maũndũ ma waganu na ma ũhinya na imwe ciarĩ na maũndũ ma ndaimono.

Mwaka wa 1995, nĩ twahikanirie na mũndũ wathondekaga thenema. O na gũtuĩka nĩ ndonekaga ta ndĩ na indo ciothe iria ingĩatũmire ngorũo na gĩkeno, ta ũthaka, ũtonga, na mũthuri wanyendete, ndakoragwo nguĩte ngoro na itarĩ mũkenu. Ngĩtua itua rĩa gũtiga gũthaaka thenema.

WĨTĨKĨO ŨRĨA NDAARĨ NAGUO NDĨ MŨNINI

Nĩ ndambĩrĩirie kũririkana na kwĩrirĩria wĩtĩkio ũrĩa ndaarĩ naguo ndĩ kairĩtu kanini. Hĩndĩ ĩyo, o Njuuma nĩ twathiaga gũceerera famĩlĩ yarĩ ya Aira a Jehova tũrĩ na mwarĩ wa maitũ. Ithe wao, ũrĩa wetagwo Joe McGrath, nĩ aatũrutaga Bibilia tũrĩ hamwe na airĩtu ake atatũ. Yarĩ famĩlĩ njega yonanagia wendo, na Joe McGrath nĩ aaheete mũtumia wake na ciana gĩtĩo. Ningĩ nĩ ndakenagĩra gũthiĩ nao gĩthomo kĩa Aira a Jehova. Na rĩmwe na rĩmwe ngathiĩ igomano nene iria mathiaga. Nĩ ndakenagĩra mũno. Ndaiguaga ndĩ na ũgitĩri tũrĩ na Aira a Jehova.

Ngũrani na ũguo, nĩ ndacemanagia na moritũ mũciĩ gwitũ. Baba nĩ aatũmaga mami akorũo na kĩeha kĩingĩ mũno, na agĩkua ngoro mũno. Ndĩ na mĩaka ta ikũmi, Mami agĩtiga kũnyitanĩra na Aira a Jehova. Nĩ ndathiire na mbere o na gũtuĩka ũndũ ũcio nduoimaga ngoro na ngĩbatithio ndĩ na mĩaka 17. No thutha wa kahinda kanini, ngĩĩingĩria mũtugo-inĩ ũtarĩ wa Gĩkristiano na ngĩtiga gũtuĩka Mũira wa Jehova.

NGĨTUA ITUA RĨA GŨCOKA

Kahinda kanini thutha wa ũhiki wakwa, athuri erĩ a kĩũngano kĩa Aira a Jehova nĩ maanjeereire. Makĩndaarĩria ũrĩa ingĩacokereire Jehova Ngai, na makĩbanga mũmishonarĩ ũmwe wetagwo Cindy andeithie. Ihinda-inĩ rĩu wĩtĩkio wakwa nĩ wanyihĩte mũno, kwoguo ngĩra Cindy ahe itũmi cia gwĩtĩkia atĩ Bibilia nĩ Kiugo kĩa Ngai. Nĩ aanyonirie morathi mamwe ma Bibilia marĩa mahingĩte. O kahora kahora tũgĩtuĩka arata a hakuhĩ, na akĩnjũria kana no twĩrutage nake morutani ma mũthingi ma Bibilia. Nĩ ndetĩkĩrire. Ihinda-inĩ rĩu, nĩ ndaakenire kuona ũrĩa Jehova arĩ Ngai ũrĩ wendo, na ngĩona nĩ endaga ngorũo na gĩkeno.

Rĩrĩa ndambĩrĩirie gũthiĩ gĩthomo kĩa Aira a Jehova rĩngĩ, nĩ ndonire atĩ nĩ ndakenagĩra mũno gũkorũo nao gũkĩra rĩrĩa ndakoragwo na andũ arĩa twathaakaga thenema nao. No maũndũ marĩa ndacemanirie namo ndĩ mũnini maatũmaga njage kwĩhoka mũndũ o na ũrĩkũ na ngaigua ndĩmenete. Mũira ũmwe wa Jehova nĩ aandeithirie kũgerera Bibilia ũrĩa ingĩahiũranirie na mathĩna macio, na ngĩĩruta ũrĩa ingĩgĩa na arata a ma.

KĨNDŨ KĨEGA GŨKĨRA ŨTHAKA

Mwaka-inĩ wa 1997, tũrĩ na mũthuri wakwa nĩ twathamĩire Hollywood, California, Amerika (U.S.A.). Ndĩ kũu nĩ ndahũthagĩra mahinda maingĩ gũteithia andũ magunĩke na ũũgĩ wa Kiugo kĩa Ngai. Kũruta andũ Bibilia nĩ gũtũmĩte njigue njiganĩire biũ gũkĩra ũrĩa ndaiguaga rĩrĩa ndathaakaga thenema. Kwa ngerekano, mwaka wa 2002 nĩ ndacemanirie na Cheri, ũrĩa twarutithanagia wĩra nake tũrĩ Hong Kong. Ũtũũro witũ nĩ wahaanaine maũndũ-inĩ maingĩ. Nĩwe wahootanĩte gũkorũo arĩ mũirĩtu ũrĩa mũthaka thĩinĩ wa Hong Kong mwaka ũmwe mbere yakwa. O na nĩwe wanjĩkĩrire thũmbĩ rĩrĩa ndahootanire. Ningĩ nĩ aathaakaga na agathondeka thenema, na aarutithanagia wĩra na atongoria mooĩkaine mũno. O nake nĩ aathamĩire Hollywood.

Nĩ ndaiguĩrĩire Cheri tha mũno rĩrĩa ndamenyire atĩ mũndũ ũrĩa maabangaga kũhikania nake nĩ aakuĩte thutha wa kũrwara mũrimũ wa ngoro. Kanitha ũrĩa aathiaga wa Mbutha ndwamũmagĩrĩria. O nake nĩ aahotete kũgĩa na ũtũũro ũrĩa wĩriragĩrio nĩ andũ, ĩndĩ ndaarĩ na gĩkeno na ndeehokete mũndũ o na ũrĩkũ. Nĩ ndambĩrĩirie kwĩruta nake maũndũ marĩa ndeerutĩte kuuma Bibilia-inĩ, no tondũ wa ndini yake ya Mbutha, warĩ ũndũ mũritũ harĩ we gwĩtĩkĩra.

Mũthenya ũmwe mwaka-inĩ wa 2003, Cheri akĩhũũrĩra thimũ arĩ Vancouver, Canada, kũrĩa aathondekagĩra thenema. Akĩnjĩra akenete atĩ egũtwarithagia ngaari akĩĩyonagĩra bũrũri, na o rĩmwe aambĩrĩria kũhoya ũũ anĩrĩire: “Ta njĩra atĩrĩ, Ngai wa ma nĩ ũrĩkũ? Wĩtagwo atĩa? O hĩndĩ ĩyo akĩhĩtũkĩra hakuhĩ na Nyũmba ya Ũthamaki na akĩona rĩĩtwa Jehova. Akĩona atĩ nĩ Ngai wacokia mahoya make, na akĩigua akĩenda mũno gũcemania na Aira a Jehova na ihenya o ũrĩa kũngĩahotekire. Nĩ ndabaangire, na thutha wa thikũ cigana ũna, agĩthiĩ gĩthomo kĩa Aira a Jehova kĩa rũthiomi rwa Gĩchina kũu Vancouver.

Cheri aacokire kũnjĩra ũũ, “Andũ acio manyonagia wendo mũnene mũno. No hote kũmeera ũrĩa ndĩraigua.” Nĩ ndaakenire mũno kũigua ũguo tondũ hĩndĩ ĩrĩa Cheri aathakaga thenema, ndaakoragwo na arata. Agĩthiĩ na mbere kũnyitanagĩra na Aira a Jehova. No mwaka-inĩ wa 2005, akĩoya kandarathi ya gũthondeka thenema igĩrĩ ndaihu bũrũri-inĩ wa China, na kwoguo agĩcoka Hong Kong. Ũndũ wa gĩkeno nĩ atĩ, mwaka wa 2006, Cheri akĩĩyamũrĩra Jehova na akĩbatithio thĩinĩ wa kĩgomano kĩmwe kĩa Aira a Jehova kũu Hong Kong. O na gũtuĩka nĩ eendaga gũtungatĩra Jehova makĩria, wĩra wake wa gũthondeka thenema nĩ watũmaga ũndũ ũcio ũritũhe, na kwoguo ndaarĩ na gĩkeno o na hanini.

GĨKENO GĨA GŨTEITHIA ANDŨ ANGĨ

Mwaka wa 2009, ũtũũro wa Cheri nĩ wagarũrũkire. Nĩ aatuire itua rĩa gũtigana na maũndũ ma thenema nĩguo atungatĩre Jehova makĩria. Akĩgĩa na arata aingĩ erũ thĩinĩ wa kĩũngano kĩa Aira a Jehova. Agĩtuĩka mũhunjia wa mahinda mothe wa ũhoro ũrĩa mwega wa Ũthamaki na agĩkenera mũno gũteithia andũ nĩguo magĩe na ũtũũro mwega.—Mathayo 24:14.

Thutha ũcio Cheri akĩambĩrĩria kwĩruta rũthiomi rwa Nepali nĩguo ateithĩrĩrie gĩkundi kĩa Aira a Jehova arĩa maragia rũthiomi rwa Nepali kũu Hong Kong. Andũ aingĩ a Nepali thĩinĩ wa Hong Kong nĩ manyararĩtwo mũno tondũ matiũĩ kwaria Gĩthũngũ kana Gĩchina wega na ningĩ tondũ ũndũire wao nĩ ngũrani. Cheri nĩ aanjĩrire ũrĩa akenagĩra gũteithia andũ acio merute Bibilia. Kwa ngerekano, akĩhunjia nyũmba kwa nyũmba, nĩ aakorire mũtumia ũmwe Mũnepali ũrĩa woĩ o maũndũ manini megiĩ Jesu na gũtirĩ ũndũ aamenyaga wĩgiĩ Jehova, Ngai ũrĩa wa ma. Cheri nĩ aahũthĩrire Bibilia kũmuonia atĩ Jesu nĩ aahoyaga kũrĩ Ithe wa igũrũ. Rĩrĩa mũtumia ũcio aamenyire atĩ no ahoe kũrĩ Ngai ũrĩa wa ma, wĩtagwo Jehova, agĩtĩkĩra ũhoro ũrĩa mwega na ngoro yothe. Thutha wa kahinda kanini, mũthuri wake na mũirĩtu wao makĩambĩrĩria kwĩruta Bibilia.—Thaburi 83:18; Luka 22:41, 42.

Hĩndĩ ĩrĩa ndonire ũrĩa Cheri arakenera kũhunjia mathaa maingĩ-rĩ, ngĩyũria atĩrĩ, ‘Nĩ kĩĩ kĩrangirĩrĩria gwĩka take?’ Ihinda-inĩ rĩu o na niĩ nĩ ndaacokete Hong Kong. Ngĩtua itua rĩa kũbanga maũndũ makwa wega nĩguo hote kwĩrutĩra biũ wĩra-inĩ wa kũruta andũ ma ya Bibilia. Nĩ nyonete atĩ gũthikĩrĩria andũ na kũmateithia mataũkĩrũo nĩ Kiugo kĩa Ngai nĩ gũtũmaga ngĩe na gĩkeno kĩa ma.

Kwa ngerekano, nĩ hotete kwĩruta Bibilia na mũtumia ũmwe wa kuuma Vietnam ũrĩa watũũrĩte na kĩeha na maithori. Rĩu nĩ akenagĩra ũtũũro, na agakenera mũno gũkorũo arĩ kĩũngano-inĩ kĩa Aira a Jehova.

Tũrĩ na Cheri nĩ twonire kĩndũ kĩega gũkĩra ũthaka. O na gũtuĩka nĩ twakenagĩra gũkorũo maũndũ-inĩ ma thenema na magatũma tũgĩe na igweta, kũruta andũ ũhoro wa Jehova nĩ gũtũmaga tũiganĩre makĩria tondũ nĩ kũmũgoocithagia. Nĩ twĩyoneire biũ ũũma wa ciugo ici cia Jesu: “Kũheana nĩkuo kũrehage gĩkeno kũrĩ kũheo.”—Atũmwo 20:35.