KUUMA NGOTHI-INĨ | HIHI MAHOYA NĨ MATŨGUNAGA?
Andũ Mahoyaga Nĩkĩ?
“Nĩ ndaathakaga kamarĩ mũno. Ndaahoyaga ndĩe mbeca nyingĩ. No ũndũ ũcio ndwakinyanagĩra.”—Samuel,a Kenya.
“Tũrĩ cukuru twacokagĩra ta rwĩmbo mahoya marĩa twarutĩtwo.”—Teresa, Philippines.
“Nĩ hoyaga rĩrĩa ndacemania na mathĩna. Ngahoya njoherũo mehia na nduĩke Mũkristiano mwega.”—Magdalene, Ghana.
Ciugo icio cia Samuel, Teresa, na Magdalene, ironania atĩ andũ nĩ mahoyaga nĩ ũndũ wa itũmi nyingĩ, imwe irĩ njega gũkĩra iria ingĩ. Andũ amwe mahoyaga kuuma ngoro; angĩ nao matihoyaga kuuma ngoro. No rĩrĩ, o na angĩkorũo marahoya nĩguo mahĩtũke igeranio cia cukuru, kana makahoera timu ĩrĩa mendete ĩhootane, matongorio nĩ Ngai ũtũũro-inĩ wao wa famĩlĩ, kana gĩtũmi kĩngĩ o gĩothe, andũ milioni nyingĩ nĩ monaga harĩ bata wa kũhoya. Ũthuthuria ningĩ nĩ wonanĩtie atĩ o na andũ amwe arĩa matarĩ a ndini nĩ mahoyaga kaingĩ.
Hihi wee nĩ ũhoyaga? Angĩkorũo nĩguo-rĩ, ũhoyaga nĩ ũndũ wa itũmi irĩkũ? Kana nĩ ũhoyaga kana ndũhoyaga, wahota kwĩyũria ũũ: ‘Hihi nĩ harĩ bata wa kũhoya? Hihi mahoya nĩ mathikagĩrĩrio?’ Mwandĩki ũmwe oigire atĩ mahoya no “njĩra ya kwĩhooreria . . . no ta mũndũ kwarĩria nyamũ ĩrĩa endete ya mũciĩ.” O na arigitani amwe nĩ makoragwo na mawoni ta macio, makoiga atĩ mahoya no “mũthemba ũngĩ wa ndawa.” Hihi andũ arĩa mahoyaga makoragwo magĩka ũndũ ũtarĩ na bata, kana hihi mageka ũguo ĩrĩ ta njĩra ya kwĩhooreria?
Ngũrani na ũguo, Bibilia yonanagia atĩ mahoya nĩ makĩria ma njĩra ya kwĩhooreria tu. Ĩtwĩraga atĩ nĩ harĩ ũrĩa ũthikagĩrĩria mahoya maitũ, angĩkorũo nĩ tũkũhoya kĩrĩa kĩagĩrĩire na njĩra ĩrĩa yagĩrĩire. Hihi ũguo nĩguo kũrĩ? Reke tũthuthurie ũira wa ũndũ ũcio.
a Marĩĩtwa mamwe nĩ macenjetio.