Mahoya—Ũrĩa Mangĩgũteithia

Ũtanambĩrĩria ũndũ o wothe-rĩ, kwahoteka nĩ wĩyũragia ũũ, ‘Ũndũ ũyũ ũkũndeithia atĩa?’ No rĩrĩ, hihi nĩ ũndũ wa mwĩyendo kwĩyũria ũguo igũrũ rĩgiĩ mahoya? Aca. Nĩ twendaga kũmenya kana mahoya nĩ makoragwo na ũguni.

Icunjĩ-inĩ iria hĩtũku, nĩ tuona atĩ mahoya ti ũndũ wa ndini tu wĩkagwo ta mũtugo kana ũndũ wa kwĩhooreria. Ngai ũrĩa wa ma nĩ athikagĩrĩria mahoya. Tũngĩhoya na njĩra ĩrĩa yagĩrĩire na tũhoe maũndũ marĩa magĩrĩire no atũthikĩrĩrie. Ma nĩ atĩ, atwĩkĩraga ngoro tũmũkuhĩrĩrie. (Jakubu 4:8) Kwoguo-rĩ, nĩ ũguni ũrĩkũ tũngĩgĩa tũngĩhoyaga kaingĩ? Reke tuone maũndũ maigana ũna.

Thayũ wa meciria.

Rĩrĩa mathĩna na moritũ moimĩra mũtũũrĩre-inĩ waku-rĩ, nĩ ũiguaga ũgĩtangĩka mũno? Mahinda-inĩ ta macio, Bibilia nĩ ĩtwĩkagĩra ngoro ‘tũhoyage tũtegũtigithĩria’ na ‘tũmenyithagie Ngai maũndũ marĩa mothe twendaga.’ (1 Athesalonike 5:17; Afilipi 4:6) Bibilia nĩ ĩtũheaga ũũma atĩ tũngĩhoya Ngai, “thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro [citũ] o na gwĩciria [gwitũ].” (Afilipi 4:7) No tũgĩe na thayũ tũngĩitũrũrĩra Ithe witũ wa igũrũ maũndũ marĩa maratũthĩnia. Nĩ atwĩkagĩra ngoro twĩke ũguo. Thaburi 55:22 yugaga ũũ: “Rekereria mũrigo waku na harĩ Jehova; nĩwe ũrĩgũtiiragĩrĩra.”

Andũ aingĩ thĩinĩ wa thĩ nĩ magĩte na thayũ ta ũcio. Hee Ran, kuuma Korea ya Mũhuro oigire ũũ: “O na gũtuĩka nĩ ngoragwo na mathĩna maritũ mũno, rĩrĩa ndaahoya igũrũ rĩamo, njiguaga ta arĩ kwaũrũo ndaũrũo mũrigo na ngaigua ndĩ na hinya wa gũkirĩrĩria.” Cecilia kuuma Philippines, oigire ũũ: “Ndĩ mũciari, nĩ makaga mũno nĩ ũndũ wa airĩtu akwa na mami, ũrĩa ũtahotaga kũngũũrana nĩ ũndũ wa kũrwara. No nĩ ũndũ wa kũhoya, nĩ hotaga gũtũũra itegũtangĩka mũno. Nĩ njũĩ atĩ Jehova nĩ ekũndeithia hote kũmarũmbũiya.”

Kũũmĩrĩrio na kũheo hinya rĩrĩa tũragerio.

Hihi ũrĩ na mĩtangĩko mĩnene, o na hihi ũndũ ũratũma ũkorũo ũrĩ ũgwati-inĩ? Kũhoya “Ngai mwene ũhoro wothe wa kũũmanĩrĩria” no gũkũũmĩrĩrie mũno. Bibilia yugaga nĩwe “ũtũũmagĩrĩria mathĩna-inĩ maitũ mothe.” (2 Akorintho 1:​3, 4) Kwa ngerekano, hĩndĩ ĩmwe rĩrĩa Jesu aarĩ na mĩtangĩko mĩnene, nĩ ‘aaturirie ndu akĩhoya.’ Moimĩrĩro maarĩ marĩkũ? “Mũraika akĩmuumĩrĩra oimĩte Igũrũ, akĩmuongerera hinya.” (Luka 22:​41, 43) Nehemia, mũthuri ũngĩ warĩ mwĩhokeku, nĩ aatangĩkaga mũno rĩrĩa okagĩrĩrũo nĩ andũ aganu arĩa maageragia kũmũgirĩrĩria kũruta wĩra wa Ngai. Aahoire ũũ: “No rĩrĩ, wee Ngai, ndagũthaitha wĩkĩre moko makwa hinya.” Maũndũ marĩa maarũmĩrĩire nĩ monanagia atĩ Ngai nĩ aamũteithirie gũtooria guoya na athiĩ na mbere kũruta wĩra ũcio wake. (Nehemia 6:​9-16) Reginald, kuuma Ghana, ataarĩirie ũũ igũrũ rĩgiĩ mahoya: “Rĩrĩa ndahoya, makĩria rĩrĩa ndĩ na moritũ manene, nĩ njiguaga atĩ nĩ ndera mũndũ ũrĩ na ũhoti wa kũndeithia na akanyũmĩrĩria ndigetigĩre ũndũ o na ũrĩkũ.” Ngai no atũũmĩrĩrie hĩndĩ ĩrĩa twamũhoya.

Ũũgĩ kuuma kũrĩ Ngai.

Matua mamwe tũtuaga no makorũo na moimĩrĩro ma gũtũũra harĩ ithuĩ na harĩ andũ arĩa twendete. Tũngĩtua matua mega atĩa? Bibilia yugaga ũũ: “Mũndũ o na ũrĩkũ wanyu angĩkorũo atarĩ na ũũgĩ [makĩria wa kũhiũrania na magerio], nĩ athiĩ na mbere kũhoya Ngai na nĩ ekũheo, nĩ gũkorũo Ngai aheaga andũ othe arĩ na ũtana.” (Jakubu 1:5) Tũngĩhoya tũheo ũũgĩ, Ngai no ahũthĩre roho wake mũtheru ũtũtongorie tũtue matua mega. O na no tũhoe tũheo roho mũtheru tondũ Jesu aatũheire ũũma atĩ ‘Ithe witũ wa igũrũ nĩ arĩheaga arĩa mamũhoyaga roho mũtheru!’​—Luka 11:13.

O na Jesu nĩ oonaga bata wa kũhoya Ithe ũteithio rĩrĩa aatuaga matua ma bata. Bibilia ĩtwĩraga atĩ rĩrĩa eendaga gũthuura andũ 12 arĩa mangĩatuĩkire atũmwo ake, araarire “ũtukũ mũgima akĩhoya Ngai.”​—Luka 6:12.

O ta Jesu, andũ aingĩ ũmũthĩ nĩ monete ũũma wa ũndũ ũcio thutha wa kuona ũrĩa Ngai acoketie mahoya mao hĩndĩ ĩrĩa mahoya ũteithio wa gũtua matua ma ũũgĩ. Regina kuuma Philippines, nĩ aacemanirie na mathĩna maingĩ, ta gũcaria mabataro make na ma famĩlĩ yake thutha wa mũthuri wake gũkua, kũbutwo wĩra, na moritũ ma kũrera ciana ciake. Nĩ kĩĩ kĩmũteithĩtie gũtua matua mega? Oigĩte ũũ: “Hoyaga Jehova ahe ũteithio.” Kwabena kuuma Ghana, nĩ oigire gĩtũmi gĩa kũhoya ũteithio wa Ngai: “Nĩ ndabutirũo wĩra wa mĩako ũrĩa ndaarĩhagwo wega.” Agĩciria ũrĩa egwĩka, oigire ũũ: “Ndaahoyaga Jehova hĩndĩ ciothe nĩguo andongorie ndue itua rĩega.” Ongereire ũũ, “Nĩ nyonaga biũ atĩ Jehova nĩ aandeithirie thuure wĩra ũhotithagia kũrũmbũiya mabataro makwa ma kĩĩroho na ma kĩĩmwĩrĩ.” O nawe no ũgunĩke nĩ ũtongoria wa Ngai ũngĩhoya igũrũ rĩgiĩ maũndũ marĩa mangĩhutia ũkuruhanu waku nake.

Twagweta o maũndũ manini ũrĩa mahoya mangĩgũteithia. (Nĩguo wone maũndũ mangĩ, rora gathandũkũ “Ũguni wa Mahoya.”) No nĩguo ũgunĩke na maũndũ macio, nĩ ũkũbatara wambe ũmenye Ngai na wendi wake. Angĩkorũo no wende gwĩka ũguo, tũragwĩkĩra ngoro ũrie Aira a Jehova magũteithie wĩrute Bibilia.a Rĩu no rĩkorũo rĩrĩ ikinya rĩa mbere rĩa gũkuhĩrĩria “Mũigua wa mahoya.”​—Thaburi 65:2.