Rĩu nĩ njiguaga no hote gũteithia andũ angĩ

MŨTŨŨRĨRE WAKWA WA HAU KABERE:

Ndaciarĩirũo Acul, taũni ĩrĩ mwena wa ithũĩro wa Guatemala. Famĩlĩ itũ nĩ ya Ixil, gĩkundi kĩmwe kĩa andũ a Maya. Makĩria ma kũmenya rũthiomi rwa Spanish, ndakũrire ngĩaragia rũthiomi rwitũ rwa Ixil. Mĩaka-inĩ yakwa ndĩ mũnini nĩrĩo kwarĩ na mbaara ya gĩĩkabira ĩrĩa yarũirũo Guatemala kwa ihinda rĩa mĩaka 36. Ihinda-inĩ rĩu, andũ aingĩ a Ixil nĩ maakuire.

Rĩrĩa ndarĩ na mĩaka ĩna, mũrũ wa maitũ warĩ na mĩaka mũgwanja aathakaga na nguruneti na ĩgĩtuthũka atekũmenya. Nguruneti ĩyo nĩ yatũmire maitho makwa more na ũndũ wa kĩeha nĩ atĩ mũrũ wa maitũ nĩ aakuire. Thutha ũcio, nĩ ndatwarirũo cukuru ya andũ arĩa matonaga kũu Guatemala, kũrĩa ndarutirũo kũhũthĩra Braille. Ndĩ kũu, arĩa maatũrũmbũyagia nĩ maangiririe kwaragia na ciana iria ingĩ na arutwo acio magitiga kũnjaragĩria, no ndiamenyaga gĩtũmi. Hĩndĩ ciothe ndakoragwo na ihooru na nĩ nderiragĩria mũno mĩeri ĩĩrĩ o mwaka ĩrĩa ndainũkaga tũgakorũo na mami, ũrĩa hingo ciothe wanyonagia wendo na tha. Ũndũ wa kĩeha nĩ atĩ mami aakuire ndĩ na mĩaka ikũmi. Ndaiguire nguĩte ngoro mũno nĩ ũndũ wa kũũrũo nĩ mũndũ ũrĩa tu wanyendete thĩinĩ wa thĩ.

Ndĩ na mĩaka 11, nĩ ndacokire taũni ya gwitũ na ngĩambĩrĩria gũikara na mũrũ wa awa na famĩlĩ yake. Nĩ maahingagĩria mabataro makwa, no gũtirĩ mũndũ wahotaga kũnũmbũiya ũrĩa ndaiguaga ngoro. Kũrĩ hĩndĩ ndarĩragĩra Ngai ngamũũria ũũ: “Mami aakuire nĩkĩ? Ndatuĩkire mũtumumu nĩkĩ?” Andũ maanjĩraga atĩ ũcio warĩ wendi wa Ngai. Kwoguo ngĩtua atĩ Ngai ndarĩ tha na kĩhooto. Gĩtũmi kĩrĩa gĩatũmĩte ndikeyũrage nĩ tondũ ndiarĩ njĩra ya gwĩka ũguo.

Gũkorũo ndĩ mũtumumu gwatũmĩte ngorũo ndĩ ũgwati-inĩ na njĩra nyingĩ. Ndĩ kahĩĩ, nĩ ndanyitirũo kĩa hinya maita maigana ũna. No gũtirĩ mũndũ nderire ũhoro ũcio tondũ ndeciragia gũtirĩ mũndũ wanũmbũyagia. Andũ matianjaragĩria kaingĩ, na niĩ ndiaragĩria mũndũ o na ũrĩkũ. Nĩ ndeyamũranagia na andũ na ngakorũo nguĩte ngoro, na ndiehokete mũndũ o na ũrĩkũ.

ŨRĨA BIBILIA YAGARŨRIRE MŨTŨŨRĨRE WAKWA:

Ndĩ tinĩnja, Aira a Jehova erĩ (mũthuri na mũtumia wake) nĩ mookire harĩa ndaikarĩte hĩndĩ ya kũhurũka ndĩ cukuru. Mwarimũ ũmwe wa cukuru, ũrĩa wanjiguagĩra tha nĩ maũndũ marĩa ndageragĩra, nĩwe wameerĩte moke manjeerere. Nĩ maanjĩrire ũhoro wa ciĩranĩro cia Bibilia atĩ arĩa makuĩte nĩ makariũkio na atumumu nĩ makona rĩngĩ. (Isaia 35:5; Johana 5:​28, 29) Nĩ ndakenirio nĩ maũndũ marĩa maandutaga, no warĩ ũndũ mũritũ kwaranĩria nao tondũ ndiamenyerete kwaria. O na kũrĩ ũguo, marĩ na wendo na ũkirĩrĩria nĩ maathiire na mbere kũnjeerera nĩguo mandute ũhoro wa Bibilia. Nĩguo makinye kũrĩa ndaikaraga, mookaga handũ ha makĩria ma kilomita 10 na nĩ kwambata kĩrĩma.

Mũrũ wa awa aanjĩraga atĩ mũthuri ũcio marĩ na mũtumia wake meehumbaga wega o na akorũo matiarĩ atongu. O na kũrĩ ũguo, hingo ciothe nĩ maanũmbũyagia na makandehera iheo nini. Nĩ ndonaga atĩ no Akristiano a ma mangĩonania wendo ta ũcio wa kwĩima.

Nĩ nderutire Bibilia ngĩhũthĩra mabuku ma Braille. O na gũtuĩka nĩ ndataũkagĩrũo nĩ maũndũ marĩa nderutaga, ngoro-inĩ yakwa harĩ maũndũ ndaremagwo nĩ gwĩtĩkia. Kwa ngerekano, nĩ ndaritũhagĩrũo gwĩtĩkia atĩ Ngai no anũmbũiye o na andũ. Nĩ ndataũkĩirũo kĩrĩa gĩtũmaga Ngai etĩkĩrie maũndũ moru kwa ihinda, no warĩ ũndũ mũritũ kũmuona arĩ Ithe witũ ũrĩ wendo.a

O kahora kahora, maũndũ marĩa nderutaga kuuma Maandĩko-inĩ nĩ maandeithirie gũcenjia mwĩcirĩrie wakwa. Kwa ngerekano, nĩ nderutire atĩ Ngai nĩ aiguagĩra tha mũno arĩa maranyamarĩka. Akĩaria ũhoro wa ndungata ciake iria ciekagwo maũndũ moru, Ngai oigire ũũ: “Ti-itherũ nĩnyonete mĩnyarirĩko ya andũ akwa . . . nĩnjũĩ maruo marĩa marĩ namo.” (Thama 3:7) Rĩrĩa ndonire ũrĩa Jehova arĩ ngumo njega, ũndũ ũcio nĩ wanjĩkĩrire ngoro kũmwĩyamũrĩra ũtũũro-inĩ wakwa. Nĩ ndabatithirio mwaka-inĩ wa 1998 na ngĩtuĩka Mũira wa Jehova.

Mwaka ũmwe thutha wa kũbatithio, nĩ ndathiire gĩthomo kĩa andũ atumumu hakuhĩ na taũni ya Escuintla. Mũthuri ũmwe wa kĩũngano gĩa gwitũ nĩ aamenyire moritũ marĩa ndageragĩra ngĩthiĩ gĩthomo kĩa Aira a Jehova rĩrĩa ndaikaraga gwitũ. Kũrĩa gũkuhĩ ingĩathire, ndaageragĩra o kĩrĩma-inĩ kĩrĩa arĩa maandutaga Bibilia mookagĩra, na ũndũ ũcio nĩ wanditũhagĩra mũno. Mũthuri ũcio nĩ aandeithirie na njĩra ya gũcaria famĩlĩ ya Aira a Jehova kũu Escuintla ĩrĩa yerutĩire njikarage kwao na ĩkandeithia gũthiĩ gĩthomo. Nginya rĩu manũmbũyagia ta ndĩ wa famĩlĩ yao.

Ndĩ na maũndũ maingĩ ingĩtaarĩria ũrĩa Aira a Jehova manyonetie wendo mũnene. Maũndũ macio mothe nĩ matũmĩte ngorũo na ũũma atĩ, gũkorũo ndĩ Mũira wa Jehova, ngoragwo gatagatĩ-inĩ ka Akristiano a ma.​—Johana 13:​34, 35.

ŨRĨA NGʼUNĨKĨTE:

Rĩu ndiguaga ta itarĩ kĩene kana itarĩ na kĩĩrĩgĩrĩro. Ngoragwo na ũtũũro ũrĩ na muoroto. Ndĩ mũhunjia wa mahinda mothe, ndĩciragia mũno ũrĩa ingĩteithia andũ kũmenya ma cia bata cia Bibilia handũ ha gwĩciria ũhoro wa thĩna wakwa. Ningĩ nĩ ngoragwo na mweke wa gũtungata ndĩ mũthuri wa kĩũngano kĩa Aira a Jehova na nĩ heanaga mĩario ya Bibilia ya andũ othe ciũngano-inĩ cia gwitũ. O na nĩ ngoragwo na mweke wa kũruta mĩario ya Bibilia igomano-inĩ citũ cia thikũ ithatũ kũrĩa andũ ngiri nyingĩ macemanagia.

Mwaka wa 2010, nĩ ndaathiire Cukuru ya Kũmenyeria Maũndũ ma Ũtungata (ĩrĩa rĩu ĩtagwo Cukuru ya Ahunjia a Ũthamaki) ĩrĩa yekĩirũo El Salvador. Cukuru ĩyo nĩ yandeithirie kũhingagia wĩra ũrĩa ndĩhokeirũo kĩũngano-inĩ na njĩra njega makĩria. Gũthiĩ cukuru ĩyo gwatũmire nyone atĩ Jehova Ngai nĩ anyonaga ndĩ wa bata na nĩ anyendete, na no ateithie mũndũ o wothe kũhingia wĩra wake.

Jesu oigire ũũ: “Kũheana nĩkuo kũrehage gĩkeno kũrĩ kũheo.” (Atũmwo 20:35) Ũmũthĩ no njuge ndĩ na ũũma atĩ nĩ ngoragwo na gĩkeno. O na gũtuĩka mbere ĩyo ndieciragia no kũhoteke, rĩu nĩ njiguaga no hote gũteithia andũ angĩ.