KUUMA NGOTHI-INĨ
Ngai Onaga Mbaara Atĩa?
Ũngĩcokia kĩũria kĩu atĩa? Andũ aingĩ meciragia atĩ Ngai nĩ akoragwo etĩkĩrĩtie mbaara. Meciragia ũguo tondũ mahinda-inĩ ma tene nĩ aathaga ndungata imwe ciake irũe mbaara; Bibilia nĩ yonanagia ũndũ ũcio nĩ wa ma. O na kũrĩ ũguo, andũ angĩ nĩ monaga atĩ Jesu, Mũrũ wa Ngai, aarutire arũmĩrĩri ake mendage thũ ciao. (Mathayo 5:43, 44) Kwoguo meciragia atĩ mawoni ma Ngai megiĩ mbaara nĩ maacenjirie na ũmũthĩ ndakoragwo etĩkĩrĩtie mbaara.
Mawoni maku nĩ marĩkũ? Hihi Ngai nĩ akoragwo etĩkĩrĩtie mbaara? Angĩkorũo nĩguo-rĩ, anyitaga mbaru mwena ũrĩkũ harĩ mbaara iria irũagwo ũmũthĩ? Kuona macokio ma ciũria icio no gũgũteithie gũthuthuria mawoni maku megiĩ mbaara. Kwa ngerekano, ũngĩmenya atĩ Ngai nĩ etĩkĩrĩtie mbaara na nĩ aranyita mbaru mwena ũrĩa wee wendete-rĩ, no ũigue wega mũno tondũ nĩ ũkũgĩa na ma atĩ mwena ũcio nĩ ũkũhootana. No rĩrĩ, ũngĩigua atĩa ũngĩmenya atĩ Ngai aranyita mbaru mwena ũcio ũngĩ? Kwahoteka no ũgarũrĩre mawoni maku.
Harĩ ũndũ ũngĩ wa bata makĩria. Kũmenya ũrĩa Ngai onaga mbaara no kũhutie ũrĩa wonaga Ngai. Angĩkorũo ũrĩ ũmwe wa andũ milioni nyingĩ arĩa marakaragio mũno nĩ mbaara-rĩ, kwahoteka no wende kũmenya macokio ma kĩũria gĩkĩ: Hihi Ngai, ta ũrĩa andũ amwe metĩkĩtie, nĩ akenagĩra mbaara na agetĩkĩria mĩnyamaro ĩrĩa yumanaga na mbaara icio, kana agakorũo ategũtindanĩra na andũ arĩa maranyamario?
No ũgegio nĩ kũmenya atĩ macokio ma Bibilia nĩ ngũrani mũno na mawoni macio. Makĩria ma ũguo, kuuma o tene nginya ũmũthĩ, mawoni ma Ngai megiĩ mbaara matirĩ macenjia. Reke tũthuthurie ũrĩa Bibilia yugaga igũrũ rĩgiĩ ũrĩa Ngai oonaga mbaara mahinda-inĩ ma tene na hĩndĩ ya karine ya mbere, rĩrĩa Jesu aarĩ gũkũ thĩ. Ũndũ ũcio nĩ ũgũtũteithia kũmenya ũrĩa Ngai onaga mbaara ũmũthĩ na kana nĩ kũrĩ hĩndĩ mbaara igaathira.