Hihi Nĩ Ũraririkana?

Nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Nĩ rĩhia rĩa mũthemba ũrĩkũ Jesu aaragia ũhoro warĩo akĩheana ũtaaro ũrĩa ũrĩ thĩinĩ wa Mathayo 18:15-17?

Aaragia ũhoro wa rĩhia rĩngĩarĩrĩirio nĩ acio mahĩtanĩtie na maiguane. No nĩ rĩhia iritũ rĩngĩatũmire mũndũ eherio kĩũngano-inĩ ngucanio ĩngĩagire gũthira. Mehia macio nĩ ta kũhũthĩra maheeni kana gũthũkĩria mũndũ rĩĩtwa na njĩra ya kũmũcambia.—w16.05, kar. 7.

Nĩ maũndũ marĩkũ ũngĩka nĩguo ũgunĩke biũ rĩrĩa ũrathoma Bibilia?

No wĩke maũndũ maya marũmĩrĩire: Thoma ũrĩ na mwerekera ũrĩa wagĩrĩire nĩguo wone maũndũ ũngĩhũthĩra, wĩyũrie kĩũria ta ‘Ingĩmahũthĩra atĩa gũteithia arĩa angĩ?’, na ũhũthĩre indo iria tũrĩ nacio gũthuthuria ũhoro ũrĩa ũrathoma.—w16.05, kar. 24-26.

Hihi nĩ ũũru Mũkristiano wĩtĩkĩtie atĩ andũ nĩ makariũkio gũkorũo na ihooru rĩrĩa akuĩrũo?

Gũkorũo na wĩtĩkio atĩ andũ nĩ makariũkio gũtingĩeheria ruo rũrĩa Mũkristiano angĩkorũo naruo rĩrĩa akuĩrũo. Iburahimu nĩ aacakaire rĩrĩa Sara aakuire. (Kĩam. 23:2) Thutha wa ihinda ihooru nĩ rĩnyihanyihaga.—wp16.3, kar. 4.

Mũndũ ũrĩa ũrĩ na rũhĩa rwa rangi rwa mwandĩki-marũa na andũ atandatũ arĩa marĩ na hiũ cia mbaara arĩa magwetetwo thĩinĩ wa Ezekieli 9 marũgamĩrĩire kĩĩ?

Marũgamagĩrĩra mbũtũ cia matu-inĩ iria ciahũthĩkire hĩndĩ ya kwanangwo kwa Jerusalemu na nocio ikahũthĩrũo hĩndĩ ya Hari–Magedoni. Mũndũ ũcio warĩ na rũhĩa rwa rangi rwa mwandĩki-marũa mahinda-inĩ maya arũgamagĩrĩra Jesu Kristo, ũrĩa ũgekĩra rũũri arĩa makaahonoka.—w16.06, kar. 16-17.

Bibilia yetiririe maũndũ marĩkũ?

Nĩ yetiririe (1) gũthũka kwa indo iria ciandĩkagĩrũo maandĩko macio ma Bibilia, nĩcio marura na njũa; (2) gũũkĩrĩrũo nĩ ateti na atongoria a ndini arĩa maageragia kũmĩniina; na (3) kũgeria gũcenjio kwa ndũmĩrĩri yayo.—wp16.4, kar. 4-7.

Nĩ na njĩra irĩkũ Mũkristiano angĩhũthahũthia mũtũũrĩre wake?

Menya mabataro maku ma o mũhaka na weherie indo iria itarĩ cia o mũhaka. Banga mbanjeti. Heana kana ũte indo iria ũtahũthagĩra na ũrĩhe mathirĩ marĩa ũrĩ namo. Nyihanyihia mathaa marĩa ũhũthagĩra wĩra-inĩ na ũbange ũrĩa ũkwandandũra ũtungata waku.—w16.07, kar. 10.

Bibilia yonanagia nĩ kĩĩ kĩa bata makĩria gũkĩra thahabu kana betha?

Rĩandĩko rĩa Ayubu 28:12, 15 rĩonanagia atĩ ũũgĩ kuuma kũrĩ Ngai nĩ wa bata makĩria gũkĩra thahabu kana betha. Ũkĩũcaria, wĩrutanĩrie gũkorũo ũrĩ na wĩnyihia na ũrĩ na wĩtĩkio mũrũmu.—w16.08, kar. 18-19.

Hihi nĩ wega mũrũ wa Ithe witũ kũrera nderu?

Ũndũire-inĩ ũmwe, nderu cigĩtwo wega no ikorũo igĩtĩkĩrĩka na ikĩonania gĩtĩo, na itingĩgirĩrĩria ndũmĩrĩri ya Ũthamaki ĩthikĩrĩrio. O na kũrĩ ũguo, ariũ a Ithe witũ amwe nĩ mathuuraga gũcienja. (1 Kor. 8:9) Naguo ũndũire-inĩ ũngĩ, kũrera nderu kuonekaga gũtagĩrĩire na gũtarĩ gwĩtĩkĩrĩku harĩ Aira a Jehova.—w16.09, kar. 21.

Nĩkĩ no twĩtĩkie rũgano rwa Daudi na Goliathu?

Mũndũ ũrĩa wanakorũo arĩ mũraihu mũno thĩinĩ wa thĩ ũmũthĩ anyihĩire Goliathu na o inji ithathatũ tu. Daudi aarĩ mũndũ wa biũ tondũ maũndũ marĩa mandĩkĩtwo mahiga-inĩ ma tene nĩ magwetaga nyũmba ya Daudi na ningĩ Jesu nĩ aaririe ũhoro wake. Maũndũ marĩa magwetetwo rũgano-inĩ rũu mekĩkĩire kũndũ kwa biũ.—wp16.5, kar. 13.

Ũmenyo, ũtaũku, na ũũgĩ ikoragwo irĩ ngũrani na njĩra ĩrĩkũ?

Mũndũ ũrĩ na ũmenyo, akoragwo oĩ o maũndũ tu. Nake mũndũ ũrĩ na ũtaũku no ahote kuona ũrĩa ũndũ ũmwe ũkonainie na ũrĩa ũngĩ. No mũndũ ũrĩ na ũũgĩ, nĩ ahotaga kũhũthĩra ũmenyo na ũtaũku.—w16.10, kar. 18.