KUUMA NGOTHI-INĨ | ŨRĨA GŨTHOMA BIBILIA KŨNGĨKŨGUNA
Wagĩrĩirũo Gũthoma Bibilia Nĩkĩ?
“Ndeciragia atĩ Bibilia nĩ nditũ mũno ũndũ mũndũ atangĩtaũkĩrũo nĩyo.”—Jovy
“Ndeciragia atĩ mũndũ ndangĩkenera gũthoma Bibilia.”—Queennie
“Rĩrĩa ndonire ũrĩa Bibilia ĩna maratathi maingĩ, no kũrĩkania ndarĩkanirie nayo.”—Ezekiel
Nĩ ũrĩ weciria gũthoma Bibilia no ũgacoka ũkericũkwo nĩ ũndũ wa itũmi ta cia andũ acio maagwetwo hau igũrũ? Andũ aingĩ nĩ metigagĩra gũthoma Bibilia. Ĩ ũngĩmenya atĩ Bibilia no ĩgũteithie gũkorũo na mũtũũrĩre mwega ũrĩ na gĩkeno? Kana hihi ũmenye atĩ nĩ harĩ njĩra ũngĩhũthĩra nĩguo ũkenere kũmĩthoma? Hihi no wende kũmenya ũrĩa Bibilia ĩngĩgũteithia?
Ta wĩcirie maũndũ maya magwetetwo nĩ andũ maagunĩkire mambĩrĩria gũthoma Bibilia.
Ezekiel ũrĩa ũrĩ na mĩaka mĩrongo ĩĩrĩ na kĩndũ oigire ũũ: “Mbere-inĩ ndaahanaga ta mũndũ ũratwarithia ngari atekũmenya kũrĩa arathiĩ. No gũthoma Bibilia nĩ kũndeithĩtie kũgĩa na ũtũũro ũrĩ na muoroto. Ĩkoragwo na ũtaaro ingĩhũthĩra o mũthenya.”
Frieda ũrĩa o nake ũrĩ na mĩaka mĩrongo ĩĩrĩ na kĩndũ, aataarĩirie ũũ: “Kũrĩ hĩndĩ ndeekaga maũndũ itambĩte gwĩciria. No nĩ ũndũ wa gũthoma Bibilia, nĩ ndĩrutĩte kwambaga gwĩciria mbere ya gwĩka ũndũ. Gwĩka ũguo nĩ gũtũmĩte hote gũikarania na andũ na njĩra njega, na ũndũ ũcio ũgatũma ngĩe na arata aingĩ rĩu.”
Mũtumia ũrĩ na mĩaka mĩrongo ĩtano na kĩndũ wĩtagwo Eunice, oigire ũũ: “Bibilia nĩ ĩndeithagia kwagagĩria ũmũndũ wakwa, ngatigana na tũmĩtugo tũtangĩrũo nĩ twega.”
O ta ũrĩa andũ acio na angĩ aingĩ mamenyete, gũthoma Bibilia no gũgũteithie ũkorũo na mũtũũrĩre wĩ na gĩkeno. (Isaia 48:17, 18) No ĩgũteithie maũndũ-inĩ ta (1) gũtua matua mega, (2) kũgĩa arata ega, (3) kũhiũrania na mĩtangĩko, na (4) kũmenya ũhoro wa ma wĩgiĩ Ngai, na ũcio nĩguo ũndũ ũrĩa wa bata makĩria. Ũtaaro wa Bibilia uumĩte kũrĩ Ngai, na kwoguo ũngĩũrũmĩrĩra ndũngĩgũte. Gũtirĩ hĩndĩ Ngai angĩheana ũtaaro ũtagĩrĩire.
Ũndũ ũrĩa wa bata nĩ kwambĩrĩria gũthoma Bibilia. Nĩ maũndũ marĩkũ ũngĩka nĩguo ũhote kwambĩrĩria gũthoma Bibilia na ũkenere kũmĩthoma?