Kĩheo kĩa Mwanya Mũno

MACINI ya gũicũhia benjũ ĩrĩa Jordan anyitĩte ĩhaana gatarũ na no yoneke ĩtarĩ thaka ũguo. O na kũrĩ ũguo, nĩ ĩmwe ya indo iria onaga irĩ cia bata mũno. Jordan oigire: “Ndaheirũo macini ĩyo ndĩ kamwana kanini nĩ mũthuri ũmwe mũkũrũ wetagwo Russell, ũrĩa warĩ mũrata wa famĩlĩ itũ.” Thutha wa gĩkuũ kĩa Russell, Jordan nĩ aamenyire atĩ mũthuri ũcio nĩ aateithĩtie aciari ake mũno o hamwe na gũkawe hĩndĩ ya moritũ. Jordan oigaga ũũ: “Rĩu tondũ nĩ menyete maũndũ maingĩ megiĩ Russell, kĩheo gĩkĩ kĩnini aaheire nĩ kĩa bata mũno gũkĩra ũrĩa ndĩrakĩonaga.”

O ta ũrĩa ngerekano ya Jordan ĩronania, kĩheo no gĩkorũo gĩkĩoneka gĩtarĩ kĩa bata mũno kana gĩtarĩ kĩa bata o na hanini maitho-inĩ ma andũ amwe. O na kũrĩ ũguo, no gĩkorũo kĩrĩ kĩa goro mũno harĩ ũrĩa wakĩamũkĩra akenete. Bibilia nĩ ĩtaaragĩria ũhoro wa kĩheo kĩmwe kĩa goro mũno na ciugo ici: “Nĩ gũkorũo Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.”—Johana 3:16.

Kĩu nĩ kĩheo kĩngĩtũma mũndũ akona muoyo wa tene na tene! Hihi no gũkorũo na kĩheo kĩngĩ kĩa goro gũkĩra kĩu? O na gũtuĩka no gũkorũo na andũ amwe matangĩmenya bata wa kĩheo kĩu, Akristiano a ma nĩ makĩonaga kĩrĩ kĩa “goro.” (Thaburi 49:8; 1 Petero 1:18, 19) No nĩ kĩĩ gĩatũmire Ngai arute Mũrũ wake arĩ kĩheo harĩ andũ?

Mũtũmwo Paulo nĩ ataaragĩria gĩtũmi kĩa ũndũ ũcio na ciugo ici: “Kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe.” (Aroma 5:12) Adamu nĩ aagire gwathĩkĩra Ngai akĩendaga na ũndũ ũcio ũgĩtũma akue, nakĩo gĩkuũ gĩgĩtherema kũrĩ andũ othe thĩinĩ wa thĩ nĩ ũndũ wake.

“Mũcara wa mehia nĩ gĩkuũ, no kĩheo kĩrĩa Ngai aheanaga nĩ muoyo wa tene na tene kũgerera Kristo Jesu Mwathani witũ.” (Aroma 6:23) Nĩguo Ngai eehererie andũ gĩkuũ, aatũmire Mũrũ wake Jesu Kristo gũkũ thĩ nĩguo arute mwĩrĩ wake mũkinyanĩru ũrĩ igongona rĩa gũkũũra andũ. Kũgerera harĩ igongona rĩu, andũ othe arĩa monanagia wĩtĩkio harĩ Jesu nĩ makaaheo muoyo wa tene na tene.—Aroma 3:24.

Paulo akĩaria ũhoro wa irathimo iria ciothe Ngai akahe athathaiya ake kũgerera Jesu Kristo, oigire: “Ngai arocokerio ngatho nĩ ũndũ wa kĩheo gĩake kĩrĩa gũtarĩ ciugo ingĩtaarĩria ũrĩa gĩtariĩ.” (2 Akorintho 9:15) Igongona rĩa Jesu nĩ rĩa goro mũno ũndũ mũndũ atangĩhota gũtaarĩria biũ. No o na gũtuĩka iheo ciothe iria Ngai aheete andũ nĩ cia bata-rĩ, nĩkĩ kĩheo kĩa igongona rĩa Jesu nĩ kĩa goro mũno? Nĩ na njĩra ĩrĩkũ gĩkoragwo kĩrĩ ngũrani mũno na iheo iria ingĩ Ngai aheanĩte?a Na twagĩrĩire gwĩka atĩa nĩ ũndũ wa kĩheo kĩu? Tũgũkũũria ũthome macokio ma Bibilia megiĩ ciũria icio thĩinĩ wa icunjĩ igĩrĩ iria irũmĩrĩire.