Nũ Ũtongoragia Andũ a Ngai Ũmũthĩ?

1, 2. Kwahoteka atũmwo a Jesu meyũragia atĩa thutha wake kwambata igũrũ?

ATŨMWO a Jesu maarũgamĩte Kĩrĩma-inĩ kĩa Mĩtamaiyũ marorete igũrũ. Maakoretwo mona mwathi na mũrata wao, Jesu, oywo agĩtwarũo igũrũ na agĩthiĩkwo nĩ itu. (Atũm. 1:9, 10) Kwa ihinda rĩa mĩaka ĩĩrĩ, Jesu nĩ aamarutĩte, akamekĩra ngoro, na akamatongoria. No rĩu ndaarĩ hamwe nao rĩngĩ. Mangĩekire atĩa?

² Jesu nĩ aaheete arũmĩrĩri ake wĩra. Aameerĩte ũũ: “Nĩ mũgaatuĩka aira akwa thĩinĩ wa Jerusalemu, Judea guothe, Samaria, o nginya ituri ciothe cia thĩ.” (Atũm. 1:8) Mangĩahotire atĩa kũhingia wĩra ũcio? Jesu nĩ aameerĩte atĩ thutha wa kahinda kanini nĩ mangĩamũkĩrire roho mũtheru. (Atũm. 1:5) O na kũrĩ ũguo, nĩguo kũhunjio thĩinĩ wa thĩ yothe nĩ kwabataranagia ũtongoria na mũbango. Jehova aahũthagĩra andũ maroneka kũbanga na gũtongoria andũ ake mahinda-inĩ ma tene. Nĩ ũndũ ũcio, kwahoteka atũmwo nĩ meyũragia ũũ, ‘Hihi Jehova rĩu nĩ egũthuura mũtongoria ũngĩ?’

3. (a) Thutha wa Jesu kwambata igũrũ-rĩ, nĩ itua rĩrĩkũ rĩa bata atũmwo ake ehokeku maatuire? (b) Tũkwarĩrĩria kĩĩ gĩcunjĩ-inĩ gĩkĩ?

³ Ciumia igĩrĩ itanathira thutha wa Jesu kwambata igũrũ, arutwo ake nĩ maathuthuririe Maandĩko, makĩhoya ũtongoria wa Jehova, na magĩthuura Mathia nĩguo acoke ithenya rĩa Judasi Mũisikariota arĩ mũtũmwo wa ikũmi na kerĩ. (Atũm. 1:15-26) Gũthuurũo kwa Mathia kwarĩ kwa bata mũno harĩ atũmwo na harĩ Jehova nĩkĩ? Mathia aahingagia itemi rĩa bata mũno thĩinĩ wa ithondeka.a Jesu ndaathuurĩte atũmwo ake nĩguo tu makoragwo hamwe nake ũtungata-inĩ wake, no aamathuurĩte nĩ getha mahingie itemi rĩa bata harĩ andũ a Ngai. Itemi rĩu rĩarĩ rĩrĩkũ, na Jehova kũgerera Jesu aamateithĩrĩirie atĩa kũrĩhingia? Nĩ mũbango ũrĩkũ ũhaana ta ũcio ũkoragwo gatagatĩ-inĩ ka andũ a Ngai mahinda-inĩ maya? Na nĩ na njĩra ĩrĩkũ tũngĩririkanaga “arĩa matongoragia” gatagatĩ-inĩ gaitũ, na makĩria arĩa a “ngombo ĩrĩa njĩhokeku na njũgĩ”?​—Ahib. 13:7; Mat. 24:45.

GĨKUNDI KĨA ANDŨ MARONEKA RUNGU RWA MŨTONGORIA ŨTARONEKA

4. Nĩ itemi rĩrĩkũ atũmwo na athuri angĩ arĩa maarĩ Jerusalemu karine-inĩ ya mbere maahingagia?

⁴ Hĩndĩ ya Pentekoste ya mwaka wa 33 Thutha wa Kristo, atũmwo nĩ maambĩrĩirie gũtongoria kĩũngano gĩa Gĩkristiano. Hĩndĩ ĩyo, “Petero akĩrũgama hamwe na arĩa Ikũmi na Ũmwe” na akĩheana ndũmĩrĩri ya kũhonokia muoyo kũrĩ gĩkundi kĩnene kĩa Ayahudi na arĩa maagarũrĩte wĩtĩkio magatuĩka Ayahudi. (Atũm. 2:14, 15) Aingĩ ao nĩ maatuĩkire etĩkia. Thutha ũcio, Akristiano acio erũ “magĩthiĩ na mbere kũrũmĩrĩra na kĩyo ũrutani wa atũmwo.” (Atũm. 2:42) Atũmwo nĩo maaramataga maũndũ megiĩ mbeca ma kĩũngano. (Atũm. 4:34, 35) Nĩ maarũmbũyagia maũndũ ma kĩĩroho ma andũ a Ngai. Moigire ũũ: “Tũkwĩrutanĩria mũno harĩ mahoya na ũtungata wĩgiĩ kiugo.” (Atũm. 6:4) Ningĩ nĩ maatũmaga Akristiano arĩa maarĩ na ũmenyeru makahunjie icigo-inĩ njerũ. (Atũm. 8:14, 15) Thutha wa ihinda, athuri angĩ aitĩrĩrie maguta nĩ maanyitanagĩra na atũmwo harĩ kũbanga maũndũ ma ciũngano. Marĩ ta kĩama kĩrĩa gĩatongoragia, maaheaga ciũngano ciothe ũtongoria.​—Atũm. 15:2.

5, 6. (a) Roho mũtheru waheaga hinya atĩa kĩama kĩrĩa gĩatongoragia? (Rora mbica kĩambĩrĩria-inĩ gĩa gĩcunjĩ gĩkĩ.) (b) Araika maateithagĩrĩria atĩa kĩama kĩrĩa gĩatongoragia? (c) Kiugo kĩa Ngai gĩateithagia kĩama kĩrĩa gĩatongoragia atĩa?

⁵ Akristiano karine-inĩ ya mbere nĩ maamenyaga atĩ kĩama kĩrĩa gĩatongoragia gĩatongoragio nĩ Jehova Ngai kũgerera Mũtongoria wao, Jesu. Nĩ kĩĩ kĩngĩatũmire makorũo na ma ũndũ-inĩ ũcio? Ũndũ wa mbere nĩ atĩ, kĩama kĩrĩa gĩatongoragia kĩaheagwo hinya nĩ roho mũtheru. (Joh. 16:13) Roho mũtheru waitĩrĩirio Akristiano othe aitĩrĩrie maguta, no makĩria wateithagia atũmwo na athuri angĩ arĩa maarĩ Jerusalemu kũhingia wĩra wao marĩ arori. Kwa ngerekano, mwaka-inĩ wa 49 Thutha wa Kristo, roho mũtheru nĩ watongoririe kĩama kĩrĩa gĩatongoragia gũtua itua ũhoro-inĩ wĩgiĩ kũrua. Ciũngano nĩ ciarũmĩrĩire ũtongoria ũcio na “igĩthiĩ na mbere kũgĩa na hinya ũhoro-inĩ wa wĩtĩkio na kuongerereka mũthenya o mũthenya.” (Atũm. 16:4, 5) Marũa marĩa maandĩkĩtwo itua rĩu ningĩ nĩ monanagia atĩ kĩama kĩrĩa gĩatongoragia nĩ kĩonanagia maciaro ma roho mũtheru wa Ngai ta wendo na wĩtĩkio.​—Atũm. 15:11, 25-29; Gal. 5:22, 23.

⁶ Ũndũ wa kerĩ, araika nĩ maateithagĩrĩria kĩama kĩrĩa gĩatongoragia. Mbere ya Korinelio abatithĩtio arĩ we Mũkristiano wa mbere kuuma ndũrĩrĩ-inĩ iria itaaruaga, mũraika nĩ aamũtongoririe atũmanĩre mũtũmwo Petero. Thutha wa Petero kũmahunjĩria, Korinelio na andũ ao nĩ maitĩrĩirio roho mũtheru o na gũtuĩka matiaruĩte. Ũndũ ũcio watũmire atũmwo na ariũ a Ithe witũ angĩ menyihie na metĩkĩre wendi wa Ngai, metĩkĩre andũ a ndũrĩrĩ arĩa mataaruĩte moke kĩũngano-inĩ gĩa Gĩkristiano. (Atũm. 11:13-18) Makĩria ma ũguo, araika nĩ maateithagĩrĩria na magatwarithia na ihenya wĩra wa kũhunjia ũrĩa warũgamagĩrĩrũo nĩ kĩama kĩrĩa gĩatongoragia. (Atũm. 5:19, 20) Ũndũ wa gatatũ, Kiugo kĩa Ngai nĩ gĩatongoragia kĩama kĩrĩa gĩatongoragia. Athuri acio aitĩrĩrie maguta maatongoragio nĩ Maandĩko makĩrũmbũiya maũndũ mothe, megiĩ ũrutani kana makĩheana ũtongoria.​—Atũm. 1:20-22; 15:15-20.

7. Nĩ kĩĩ kĩngĩtũma tuuge atĩ Jesu nĩwe watongoragia Akristiano a karine ya mbere?

⁷ O na gũtuĩka kĩama kĩrĩa gĩatongoragia nĩ kĩarĩ na ũnene igũrũ rĩa kĩũngano, nĩ kĩamenyaga atĩ Mũtongoria wao aarĩ Jesu. Mũtũmwo Paulo aandĩkire ũũ: ‘Kristo aaheanire amwe marĩ atũmwo.’ Agĩcoka akĩongerera ũũ: “Nĩ ũndũ wa wendo-rĩ, . . . nĩ tũkũrei maũndũ-inĩ mothe kwerekera Kristo, o we mũtwe witũ.” (Ef. 4:11, 15) Handũ ha kwĩĩtania na mũtũmwo ũrĩ na igweta, “arutwo maaheirũo rĩĩtwa Akristiano kũgerera ũtongoria wa Ngai.” (Atũm. 11:26) Nĩ ma, Paulo nĩ onaga bata wa “[kũrũmia] biũ morutani” kana maũndũ marĩa mehocetie Maandĩko-inĩ, marĩa maaheanagwo nĩ atũmwo na arũme angĩ arĩa maatongoragia. O na kũrĩ ũguo, ongereire ũũ: “No ngwenda mũmenye atĩ mũtwe wa mũndũrũme o wothe [hamwe na arĩa othe a kĩama kĩrĩa gĩatongoragia] nĩ Kristo; . . . na mũtwe wa Kristo nĩ Ngai.” (1 Kor. 11:2, 3) Hatiarĩ nganja atĩ Kristo Jesu ũrĩa ũtũũgĩrĩtio, nĩwe watongoragia kĩũngano arĩ rungu rwa Mũtwe wake, Jehova Ngai.

“ŨYŨ TI WĨRA WA MŨNDŨ”

8, 9. Kwambĩrĩria Mũthia-inĩ wa karine ya 19, nĩ itemi rĩrĩkũ rĩa bata Mũrũ wa Ithe Witũ Russell aarĩ narĩo?

⁸ Mũthia-inĩ wa karine ya 19, Charles Taze Russell na andũ angĩ maanyitanagĩra nake nĩ merutanĩirie gũcokia ũthathaiya wa ma. Nĩguo mahote gũtheremia ma cia Bibilia na thiomi itiganĩte, rũhonge rwa Zion’s Watch Tower Tract Society nĩ rwandĩkithirio kĩĩwatho mwaka-inĩ wa 1884, na Mũrũ wa Ithe Witũ Russell nĩwe warĩ mũtongoria waruo.b Aarĩ mũrutwo wa Bibilia warĩ kĩyo, na ndetigĩraga kũguũria morutani ma maheeni, ta marĩa megiĩ Ũtatũ na atĩ muoyo ndũkuaga. Nĩ aataũkĩirũo atĩ Kristo angĩgaacoka atekuoneka na atĩ “mahinda marĩa matuĩtwo ma ndũrĩrĩ” mangĩathirire mwaka-inĩ wa 1914. (Luk. 21:24) Mũrũ wa Ithe Witũ Russell aahũthĩrire mahinda, hinya, na mbeca ciake nĩguo amenyithie andũ angĩ ma icio cia Bibilia. Hatarĩ nganja, ihinda-inĩ rĩu rĩa bata, Mũrũ wa Ithe Witũ Russell aahũthagĩrũo nĩ Jehova na Jesu, mũtwe wa kĩũngano.

⁹ Mũrũ wa Ithe Witũ Russell ndeyethagĩra ngumo kuuma kũrĩ andũ. Mwaka-inĩ wa 1896, aandĩkire ũũ: “Tũtikwenda gũtũũgĩrio kana o na kũheo gĩtĩo kĩa mwanya nĩ ũndũ wa maũndũ marĩa tũrandĩka; na tũtikwenda gwĩtagwo Anene kana Rabbi. Na tũtingĩenda mũndũ etanio na marĩĩtwa maitũ.” Aacokire akiuga ũũ: “Ũyũ ti wĩra wa mũndũ.”

10. (a) Jesu aathuurire “ngombo ĩrĩa njĩhokeku na njũgĩ” rĩ? (b) Taarĩria ũrĩa Kĩama Kĩrĩa Gĩtongoragia gĩthiĩte gĩtigithũkanĩtio na rũhonge rwa kĩĩwatho rwa Watch Tower Society.

¹⁰ Mwaka-inĩ wa 1919, mĩaka ĩtatũ thutha wa Mũrũ wa Ithe Witũ Russell gũkua, Jesu nĩ aamũrire “ngombo ĩrĩa njĩhokeku na njũgĩ.” Aamũrire ngombo ĩyo nĩkĩ? Nĩguo ĩheage andũ a nyũmba yake “irio ihinda rĩrĩa rĩagĩrĩire.” (Mat. 24:45) O na mĩaka-inĩ ĩyo ya tene, gakundi kanini ka ariũ a Ithe witũ aitĩrĩrie maguta arĩa maatungataga wabici-inĩ nene thĩinĩ wa Brooklyn, New York, nĩ maaharagĩria na makahe arũmĩrĩri a Jesu irio cia kĩĩroho. Ciugo “kĩama kĩrĩa gĩtongoragia” ciambĩrĩirie kuoneka mabuku-inĩ maitũ mĩaka-inĩ ya 1940 rĩrĩa gweciragĩrio atĩ nĩ ciahutanĩtie na Watch Tower Bible and Tract Society. O na kũrĩ ũguo, mwaka-inĩ wa 1971, Kĩama Kĩrĩa Gĩtongoragia nĩ gĩatigithũkanirio na Watch Tower Society hamwe na arĩa maarũgamagĩrĩra rũhonge rũu, tondũ rwarĩ rũhonge rwa kĩĩwatho no ti rwa Kĩĩmaandĩko. Kuuma hĩndĩ ĩyo, Kĩama Kĩrĩa Gĩtongoragia gĩkoragwo na ariũ a Ithe witũ aitĩrĩrie maguta, no tio marũgamagĩrĩra rũhonge rũu. Mĩaka-inĩ ya ica ikuhĩ, ariũ a Ithe witũ arĩa magĩrĩire a “ngʼondu ingĩ,” nĩ matungatĩte marĩ arũgamĩrĩri a rũhonge rũu na honge ingĩ cia kĩĩwatho iria ihũthagĩrũo nĩ andũ a Ngai, na ũndũ ũcio nĩ ũhotithĩtie Kĩama Kĩrĩa Gĩtongoragia kũiga meciria mao harĩ kũheana irio cia kĩĩroho na ũtongoria. (Joh. 10:16; Atũm. 6:4) Ngathĩti ya Mũrangĩri ya Julaĩ 15, 2013 yatarĩirie atĩ “ngombo ĩrĩa njĩhokeku na njũgĩ” nĩ gakundi kanini ka ariũ a Ithe witũ aitĩrĩrie maguta na nĩo Kĩama Kĩrĩa Gĩtongoragia.

11. Kĩama Kĩrĩa Gĩtongoragia kĩrutaga wĩra atĩa?

¹¹ Kĩama Kĩrĩa Gĩtongoragia gĩtuaga matua kĩrĩ hamwe. Na njĩra ĩrĩkũ? Arĩa makoragwo kĩama-inĩ kĩu macemanagia o kiumia, na ũndũ ũcio nĩ ũmateithagia kwaranĩria na gũkorũo na ũrũmwe. (Thim. 20:18) O mwaka nĩ macenjanagia wĩra wa mũikarĩri gĩtĩ mĩcemanio-inĩ ĩyo tondũ gũtirĩ mũndũ o na ũmwe wa Kĩama Kĩrĩa Gĩtongoragia wonagwo arĩ wa bata gũkĩra arĩa angĩ marĩ kĩama-inĩ kĩu. (1 Pet. 5:1) O nacio kamĩtĩ iria ithathatũ cia Kĩama Kĩrĩa Gĩtongoragia noguo icenjanagia wĩra wa mũikarĩri gĩtĩ. Gũtirĩ o na ũmwe wa Kĩama Kĩrĩa Gĩtongoragia wĩyonaga arĩ mũtongoria wa arĩa angĩ no eyonaga arĩ ũmwe wa “andũ a nyũmba,” na aheagwo irio nĩ ngombo ĩrĩa njĩhokeku na akarũmĩrĩra ũtongoria wayo.

“NŨ KŨNA NGOMBO ĨRĨA NJĨHOKEKU NA NJŨGĨ?”

12. Tondũ Kĩama Kĩrĩa Gĩtongoragia rĩmwe nĩ kĩhĩtagia na gĩtionagio cioneki-rĩ, nĩ ciũria irĩkũ ciumĩraga?

¹² Kĩama Kĩrĩa Gĩtongoragia gĩtionagio cioneki kana gĩkarĩrio nĩ roho mũtheru na ti kuuga atĩ gĩtihĩtagia. Nĩ ũndũ ũcio, no kĩhĩtie ũhoro-inĩ wĩgiĩ ũrutani kana ũtongoria mũna. O na ibuku rĩa Ũteithio wa Ũthuthuria Harĩ Aira a Jehova rungu rwa kĩongo kĩnini “Gũtaarĩria Wĩtĩkio Witũ,” nĩ rĩtaaragĩria mogarũrũku marĩa makoretwo kuo megiĩ ũtaũku witũ wa Maandĩko. Ũrĩa kũrĩ nĩ atĩ, Jesu ndaatwĩrire atĩ ngombo yake ĩrĩa njĩhokeku ĩrĩtũheaga irio nginyanĩru biũ cia kĩĩroho. Nĩ ũndũ ũcio-rĩ, tũngĩcokia atĩa kĩũria gĩkĩ kĩa Jesu: “Nũ kũna ngombo ĩrĩa njĩhokeku na njũgĩ?” (Mat. 24:45) Nĩ ũira ũrĩkũ wonanagia atĩ Kĩama Kĩrĩa Gĩtongoragia nĩ kĩrahingia itemi rĩu? Rekei twarĩrĩrie maũndũ o marĩa matatũ maatongoragia kĩama kĩrĩa gĩatongoragia karine-inĩ ya mbere.

13. Roho mũtheru ũteithĩtie atĩa Kĩama Kĩrĩa Gĩtongoragia?

¹³ Ũira wa roho mũtheru. Roho mũtheru nĩ ũteithĩtie Kĩama Kĩrĩa Gĩtongoragia gũtaũkĩrũo nĩ ma cia Maandĩko iria hau kabere itataũkĩkaga wega. Kwa ngerekano, ta wĩcirie ũhoro wa mogarũrũku macio magwetwo kĩbungo-inĩ kĩu kĩrĩ mbere megiĩ wĩtĩkio witũ. Gũtirĩ mũndũ ũngĩtaũkĩrũo na ahote gũtaarĩria “maũndũ marĩa marikĩru ma Ngai” atarĩ na ũteithio wa Ngai. (Thoma 1 Akorintho 2:10.) Kĩama Kĩrĩa Gĩtongoragia gĩkoragwo na muonere ta wa mũtũmwo Paulo ũrĩa wandĩkire ũũ: “Ningĩ twaragia maũndũ macio, ti na ciugo iria tũrutĩtwo nĩ ũũgĩ wa andũ, ĩndĩ nĩ na ciugo iria tũrutĩtwo nĩ roho.” (1 Kor. 2:13) Thutha wa mĩaka magana maingĩ ya ũregenyũki na andũ gũkorũo nduma-inĩ ya kĩĩroho-rĩ, hihi nĩ kũrĩ kĩndũ kĩngĩ tiga roho mũtheru kĩngĩhotithia wongerereku mũingĩ wa gũtaũkĩrũo nĩ maũndũ ma kĩĩroho ũrĩa ũkoretwo kuo kuuma mwaka wa 1919?

14. Kũringana na Kũguũrĩrio 14:6, 7, araika mateithagia andũ a Ngai atĩa mahinda-inĩ maya?

¹⁴ Ũira ũrĩa ũronania ũtongoria wa araika. Mahinda-inĩ maya, Kĩama Kĩrĩa Gĩtongoragia kĩrĩ na itemi inene mũno rĩa kũrũgamĩrĩra wĩra wa kũhunjia thĩinĩ wa thĩ yothe ũrĩa ũrarutwo nĩ makĩria ma ahunjia milioni inyanya. Nĩ kĩĩ gĩtũmĩte wĩra ũcio ũgaacĩre? Ũndũ ũmwe nĩ atĩ, araika nĩ mateithagĩrĩria. (Thoma Kũguũrĩrio 14:6, 7.) Maita maingĩ, ahunjia manaceerera andũ makoretwo makĩhoya Ngai ũteithio.c Gũkũra na gĩkĩro kĩnene kwa wĩra wa kũhunjia na gũtua andũ arutwo o na kũrĩ na ũkararia mũũru mabũrũri-inĩ mamwe, kũhotekete tu nĩ ũndũ wa ũteithio wa araika.

15. Hakoragwo na ngũrani ĩrĩkũ gatagatĩ ga Kĩama Kĩrĩa Gĩtongoragia na atongoria a ndini cia Gĩkristiano? Heana ngerekano.

¹⁵ Kũrũmĩrĩra Kiugo kĩa Ngai. (Thoma Johana 17:17.) Ta wĩcirie ũrĩa kwahanĩkire mwaka-inĩ wa 1973. Ngathĩti ya The Watchtower ya Juni 1 yarĩ na kĩũria gĩkĩ: “Hihi . . . andũ arĩa matatigĩte kũhũthĩra mbakĩ kana thigara no magĩrĩre kũbatithio?” Macokio maarĩ: “Ũira ũrĩa ũrĩ thĩinĩ wa Maandĩko ũronania atĩ matiagĩrĩire kũbatithio.” Thutha wa kuonania maandĩko marĩa marĩrĩirie ũndũ ũcio, ngathĩti ĩyo yatarĩirie atĩ mũndũ ũtaratigana na mũtugo wa kũhũthĩra thigara agĩrĩire kweherio kĩũngano-inĩ. (1 Kor. 5:7; 2 Kor. 7:1) Ngathĩti ĩyo yongereire atĩ: “Ũndũ ũyũ ndũroimana na watho ũtarĩ na mũthingi, kana wa kũhatĩrĩria andũ. Mũrũgamo ũcio mũrũmu uumĩte kũrĩ Ngai, ũrĩa wonanagia wendi wake kũgerera Kiugo gĩake.” Hihi nĩ kũrĩ ithondeka rĩngĩ rĩa kĩndini rĩkoretwo rĩkĩrũmĩrĩra Kiugo kĩa Ngai o na rĩrĩa gwĩka ũguo gũkoragwo kũrĩ ũndũ mũritũ nginya harĩ andũ amwe gatagatĩ-inĩ kao? Ibuku rĩmwe rĩa ica ikuhĩ rĩgiĩ maũndũ ma ndini thĩinĩ wa Amerika (US) riugĩte ũũ: “Atongoria a Gĩkristiano kaingĩ nĩ macenjetie na makagarũra morutani mao nĩguo matwarane na wĩtĩkio na mawoni ma andũ aingĩ arĩa manyitanagĩra nao ũthathaiya-inĩ o hamwe na ma andũ arĩa angĩ.” Angĩkorũo arĩa makoragwo thĩinĩ wa Kĩama Kĩrĩa Gĩtongoragia metĩkagĩria Kiugo kĩa Ngai kĩmatongorie magĩtua matua handũ ha mawoni ma andũ aingĩ-rĩ, nũ kũna ũgĩtongoragia andũ a Ngai ũmũthĩ?

“RIRIKANAGAI ARĨA MATONGORAGIA”

16. Njĩra ĩmwe ya kũririkanaga Kĩama Kĩrĩa Gĩtongoragia nĩ ĩrĩkũ?

¹⁶ Thoma Ahibirania 13:7. Kiugo kĩrĩa gĩtaũrĩtwo ‘ririkanaga’ ningĩ no gĩtaũrũo “gwetaga.” Kwoguo njĩra ĩmwe ya kũririkanaga “arĩa matongoragia,” nĩ kũgwetaga athuri a Kĩama Kĩrĩa Gĩtongoragia mahoya-inĩ. (Ef. 6:18) Wĩcũranie wĩra ũrĩa makoragwo naguo wa kũheana irio cia kĩĩroho, kũrũgamĩrĩra wĩra wa kũhunjia thĩinĩ wa thĩ yothe, na kũramata mĩhothi ĩrĩa ĩrutagwo. Hatarĩ nganja nĩ twagĩrĩirũo kũmahoyagĩra kaingĩ!

17, 18. (a) Tũnyitanagĩra atĩa na Kĩama Kĩrĩa Gĩtongoragia? (b) Wĩra witũ wa kũhunjia ũnyitaga mbaru atĩa Ngombo ĩrĩa njĩhokeku o hamwe na Jesu?

¹⁷ Kũririkanaga Kĩama Kĩrĩa Gĩtongoragia, gũtihutĩtie o ciugo tu, no nĩ hamwe na kũnyita mbaru ũtongoria ũrĩa kĩheanaga. Kĩama Kĩrĩa Gĩtongoragia nĩkĩo kĩrutaga ũtongoria ũrĩa tũheagwo mabuku-inĩ maitũ, mĩcemanio-inĩ, na igomano-inĩ citũ. Ningĩ nĩ kĩo kĩamũraga arori a mũthiũrũrũko, arĩa nao mamũraga athuri a ciũngano. Arori a mũthiũrũrũko hamwe na athuri a ciũngano maririkanaga Kĩama Kĩrĩa Gĩtongoragia na njĩra ya kũrũmĩrĩra biũ mĩtaratara ĩrĩa maheagwo nĩ kĩo. Ithuothe tuonanagia gĩtĩo harĩ Mũtongoria witũ, Jesu, na njĩra ya gũkorũo tũrĩ athĩki na tũkenyihĩria athuri arĩa arahũthĩra gũtũtongoria.​—Ahib. 13:17.

¹⁸ Njĩra ĩngĩ ya kũririkana Kĩama Kĩrĩa Gĩtongoragia nĩ kũgerera kwĩrutanĩria biũ wĩra-inĩ wa kũhunjia. Mũtũmwo Paulo ekĩrire Akristiano othe ngoro megerekanagie na wĩtĩkio wa arĩa matongoragia gatagatĩ-inĩ kao. Ngombo ĩrĩa njĩhokeku nĩ yonanĩtie wĩtĩkio mũrũmu na njĩra ya gwĩkĩrĩra mũno na gũtheremia ũhoro mwega wa Ũthamaki. Hihi wee ũrĩ ũmwe wa arĩa a ngʼondu ingĩ arĩa manyitaga mbaru arĩa aitĩrĩrie maguta wĩra-inĩ ũcio wa bata? Gĩgakorũo kĩrĩ gĩkeno kĩigana atĩa rĩrĩa Mũtongoria waku, Jesu, agakwĩra ũũ: ‘O ta ũrĩa wekire ũmwe wa ariũ aya anyinyi a Awa, nĩ niĩ wekire ũguo!’​—Mat. 25:34-40.

19. Ũtuĩte itua rĩa kũrũmagĩrĩra Jesu, Mũtongoria witũ, nĩkĩ?

¹⁹ Jesu ndaatiganĩirie arũmĩrĩri ake rĩrĩa acokire igũrũ. (Mat. 28:20) Nĩ eeyoneire ũrĩa aateithirio nĩ araika, roho mũtheru, na Kiugo kĩa Ngai wĩra-inĩ wake wa gũtongoria andũ a Ngai rĩrĩa aarĩ gũkũ thĩ. Nĩ ũndũ ũcio, mahinda-inĩ maya, nĩ ateithĩtie ngombo ĩrĩa njĩhokeku na njĩra o icio. Akristiano acio aitĩrĩrie maguta a ngombo ĩrĩa njĩhokeku “marũmagĩrĩra Gatũrũme o kũrĩa guothe athiaga.” (Kũg. 14:4) Kwoguo rĩrĩa twarũmĩrĩra ũtongoria wao, tũkoragwo tũkĩrũmĩrĩra Jesu, Mũtongoria witũ. Ica ikuhĩ nĩ egũtũtongoria muoyo-inĩ wa tene na tene. (Kũg. 7:14-17) Gũtirĩ mũtongoria wa gũkũ thĩ ũngĩtwĩrĩra ũndũ ta ũcio!