Bibilia nĩ Yagĩrĩire Gũtũtongoria Matukũ-inĩ Maya?

ANDŨ AMWE MOIGAGA ACA. Ndagĩtarĩ ũmwe aaringithanirie ũtaaro wa Bibilia na kũhũthĩra ibuku rĩa mĩaka-inĩ ya 1920 gũthomithia sayansi. Mũndũ ũtetĩkĩtie Bibilia o na no akũrie kana no ũhũthĩre ibuku rĩgiĩ kũhũthĩra kompiuta cia tene ũkĩenda kũmenya ũrĩa ũngĩhũthĩra kompiuta cia kĩĩrĩu. Na njĩra nguhĩ, andũ amwe monaga Bibilia ĩrĩ hĩtũke nĩ mahinda.

Nĩ kĩĩ kĩngĩtũma mũndũ ahũthĩre ibuku rĩu rĩa tene thĩinĩ wa thĩ ĩthiĩte na mbere ũguo? Ningĩ-rĩ website nyingĩ na njĩra cia kwaranĩria intaneti-inĩ nĩ iheanaga ũtaaro na ũtongoria mũingĩ wa ica ikuhĩ. Programu cia TV nĩ iheanaga ũtaaro mũingĩ kuuma kũrĩ athuthuria a mĩtugo ya andũ, ataarani a mĩikarĩre ya andũ, na andĩki a mabuku. Nduka cia mabuku nĩ ciendagia mabuku maingĩ mangĩhe mũndũ ũtaaro, marĩa marehaga mbeca nyingĩ mũno.

O na tũrĩ na ũhoro mũingĩ ũguo-rĩ, twagĩrĩirũo gũthoma Bibilia nĩkĩ, ibuku rĩandĩkirũo mĩaka 2,000 mĩhĩtũku? Githĩ andũ arĩa matetĩkĩtie Bibilia to magĩkorũo na ma makiuga atĩ kũhũthĩra ũtaaro wa ibuku ta rĩu rĩandĩkirũo tene ũguo nĩ ta kũhũthĩra ibuku rĩtahũthĩkaga rĩa sayansi kana kũhũthĩra kabuku ga tene ga gũteithia mũndũ amenye kũhũthĩra kompiuta. Hatarĩ nganja, mwĩcirĩrie ta ũcio ti mwagĩrĩru. Sayansi na tekinolonjĩ nĩ icenjagia na ihenya mũno, no hihi mabataro ma mũthingi ma andũ nĩ macenjetie? Andũ no mabataraga kũmenya bata wa ũtũũro nĩ ũrĩkũ, ũrĩa mangĩgĩa na gĩkeno na ũgitĩri, magĩe famĩlĩ njega, o hamwe na ũrata mwega.

O na gũtuĩka Bibilia nĩ ya tene, nĩ yaarĩrĩirie maũndũ macio na mangĩ maingĩ. Ningĩ nĩ yugaga atĩ, yaandĩkithirio nĩ Mũũmbi witũ. No ĩtũtongorie maũndũ-inĩ mothe ma ũtũũro, na ĩtũteithie kũhiũrania na moritũ o mothe. (2 Timotheo 3:16, 17) Makĩria ma ũguo, no ĩtũhe ũtaaro ũtangĩhĩtũkwo nĩ mahinda na wa ihinda rĩrĩa rĩagĩrĩire. Bibilia yugĩte ũũ: “Kiugo kĩa Ngai kĩrĩ muoyo.”—Ahibirania 4:12.

Hihi maũndũ macio Bibilia yugĩte nĩ ma ma? Hihi nĩ hĩtũke nĩ mahinda, kana nĩyo ibuku rĩrĩa rĩa kwĩhokeka biũ na rĩrĩ na ũtaaro ũhũthĩkaga? Muoroto wa ngathĩti ĩno ya Mũrangĩri, ĩrĩa nĩyo ya mbere harĩ kĩrũmanĩrĩrio kĩa mwanya, nĩ gũgũteithia ũmenye macokio ma ciũria icio.