Hihi Ngai nĩ Ataũkagĩrũo Nĩwe?

ŨŨMBI ŨTŨRUTAGA ŨNDŨ ŨRĨKŨ?

Gatagatĩ ka andũ othe, andũ arĩa makoragwo makuhanĩrĩirie mũno nĩ mahatha arĩa makoragwo mahaanaine biũ. Makoragwo na ũndũ ũmanyitithanagia na njĩra ya mwanya. Mũtumia ũmwe ũrĩa we mwene nĩ wa mahatha wĩtagwo Nancy Segal, ũrĩa ũkoragwo arĩ mũrũgamĩrĩri wa Twin Studies Center ooigire atĩ mahatha amwe o na “nĩ mataũkagĩrũo biũ ũrĩa ũcio ũngĩ arenda kuuga o na atarĩ arataarĩria.” Mũtumia ũmwe wa mahatha aataarĩirie ũũ igũrũ rĩgiĩ ũrĩa makoragwo makuhanĩrĩirie: “Nĩ tũmenyaga maũndũ mothe megiĩ ũcio ũngĩ.”

Nĩ kĩĩ gĩtũmaga mahatha mahote gũtaũkĩrũo nĩ ũcio ũngĩ na njĩra ta ĩyo ya magegania? Ũthuthuria wonanagia atĩ o na gũtuĩka kũrĩa marereirũo na ũrĩa mareretwo nĩ kũmateithagia, mũũmbĩre wao ũkoragwo na itemi rĩrĩa rĩa bata mũno harĩ ũndũ ũcio.

TA WĨCIRIE: Mũũmbi wa maũndũ macio mothe ma magegania hatarĩ nganja nĩ oĩ wega mũũmbĩre wa o ũmwe witũ. Nĩkĩo mwandĩki wa thaburi Daudi, ooigire ũũ: “Wee nĩwe wandathĩkanirie [wanyitithanirie] ndĩ nda ya maitũ. Mahĩndĩ makwa kũhithara matiakũhitharĩire rĩrĩa ndakũmbĩirũo hitho-inĩ. . . . Maitho maku no maanyonaga hĩndĩ ĩo ndarĩ o kĩongero [ndĩ nda ya maitũ], na matukũ mothe nĩmaandĩkĩtwo thĩinĩ wa mbuku yaku.” (Thaburi 139:13, 15, 16) Ngai nowe tu ũngĩmenya na ataũkĩrũo biũ nĩ mũũmbĩre witũ na nginya maũndũ marĩa twanacemania namo ũtũũro-inĩ magatũma tũkorũo tũhaana ũguo tũhaana. Njĩra ya mwanya ĩrĩa Ngai atũĩ nayo na ũrĩa oĩ mũũmbĩre witũ nĩ itũmaga tũkorũo na ma atĩ nĩ ataũkagĩrũo nĩ maũndũ mothe matwĩgiĩ.

ŨRĨA BIBILIA ĨTŨRUTAGA IGŨRŨ RĨGIĨ ŨMENYO WA NGAI

Daudi aahoire ũũ: “Jehova, gũ’thuuthuuria nĩũ’thuuthuurĩtie, ũgakĩ’menya. Wee nĩũmenyaga ũhoro wakwa, gũikara thĩ o na gũũkĩra; ũkoragwo ũkũũraine itaranio ciakwa ũrĩ o kũraya. Amu gũtirĩ kiugo kĩngĩkinya rũrĩmĩ-inĩ rũakwa, gĩtamenyekete nĩwe kĩrĩ gĩothe, wee Jehova.” (Thaburi 139:1, 2, 4) Makĩria ma ũguo, Jehova nĩ amenyaga ũrĩa tũraigua na kũu thĩinĩ ngoro-inĩ na “akamenya metarania mothe ma meciria [maitũ].” (1 Maũndũ ma Matukũ ma Tene 28:9; 1 Samueli 16:6, 7) Maandĩko macio maratũruta atĩa igũrũ rĩgiĩ Ngai?

O na gũtuĩka tũkĩhoya no twage kuuga maũndũ mothe marĩa tũreciria na ũrĩa tũraigua, Mũũmbi witũ to kuona onaga maũndũ marĩa twĩkaga no nĩ ataũkagĩrũo nginya nĩ kĩrĩa gĩatũma twĩke ũndũ mũna. Makĩria ma ũguo, nĩ ataũkagĩrũo nĩ maũndũ mega marĩa tũngĩenda gwĩka, o na angĩkorũo nĩ harĩ maũndũ maratũma tũremwo kũhingia wendi wa ngoro citũ. Hatarĩ nganja, tondũ Ngai nĩwe wekĩrire wendi ũcio ngoro-inĩ citũ, nĩ endaga na akerirĩria kuona na gũtaũkĩrũo meciria mega na mĩoroto ĩrĩa tũngĩkorũo nayo.—1 Johana 4:7-10.

Maandĩko matũmagĩrĩria atĩ

• “Maitho ma Jehova nĩ maroraga arĩa athingu, namo matũ make nĩ mathikagĩrĩria mathaithana mao.”—1 PETERO 3:12.

• Ngai eranĩire ũũ: “Nĩngũkũũhĩgia, nguonererie njĩra ĩrĩa ũrĩgeraga; ndĩĩgũtaaraga o ngĩkũbaraga na riitho rĩakwa.”—THABURI 32:8.

NGAI NĨ MŨCAYANĨRI

Hihi kũmenya atĩ Ngai nĩ ataũkagĩrũo nĩ maũndũ marĩa tũragerera na ũrĩa tũraigua no gũtũteithie gũkirĩrĩria moritũ? Ta wĩcirie ũrĩa gwathire harĩ Anna kuuma Nigeria. Aataarĩirie ũũ: “Ndionaga bata wa gũthiĩ na mbere gũtũũra nĩ ũndũ wa maũndũ maritũ marĩa ndacemanĩtie namo. Rĩrĩa ndonekire atĩ ndĩ na kansa ya nyondo na ngĩrũo atĩ nĩ ngũthĩnjwo na thiĩ na mbere kũrigitwo, ndaarĩ mũtumia wa ndigwa na nĩ ndarũmbũyagia kairĩtu gakwa gaakomete thibitarĩ karĩ na mũrimũ wĩtagwo hydrocephalus, wa gũkorũo na maĩ maingĩ mũno tombo-inĩ. Rĩarĩ ihinda iritũ mũno harĩ niĩ tondũ twakomete thibitarĩ na kairĩtu gakwa ihinda-inĩ rĩmwe.”

Nĩ kĩĩ gĩateithirie Anna gũkirĩrĩria? Ooigire ũũ: “Ndecũranagia Maandĩko ta Afilipi 4:6, 7 ĩrĩa yugaga atĩ ‘thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu na ũhoti wanyu wa gwĩciria.’ O ndeciria ũhoro wa rĩandĩko rĩu, ndaiguaga ndakuhĩrĩria Jehova mũno nĩ ũndũ wa kũmenya atĩ nĩ ataũkagĩrũo nĩ niĩ wega o na gũkĩra ũrĩa niĩ ndaũkagĩrũo. Ningĩ nĩ ndomĩrĩirio mũno nĩ aarĩ na ariũ a Ithe witũ kĩũngano-inĩ gĩa Gĩkristiano.

“O na gũtuĩka no ngoragwo ndĩ mũrũaru, maũndũ makwa na ma kairĩtu gakwa nĩ magagĩrĩte. Tondũ Jehova arĩ mwena witũ, nĩ twĩrutĩte gũkorũo na mwĩcirĩrie ũrĩa wagĩrĩire o na rĩrĩa tũracemania na maũndũ maritũ. Jakubu 5:11 ĩtwĩraga ũũ: ‘Andũ arĩa maakirĩrĩirie-rĩ, tuugaga nĩ arathime. Nĩ mũiguĩte ũhoro wa ũkirĩrĩria wa Ayubu na ũrĩa Jehova aamũrathimire, atĩ Jehova arĩ wendo mũnene na tha.’” Jehova nĩ aataũkagĩrũo biũ nĩ maũndũ marĩa Ayubu aageragĩra, na o na ithuĩ no tũkorũo na ma atĩ nĩ ataũkagĩrũo nĩ ũndũ o wothe mũritũ tũcemanagia naguo.