Nĩ Maũndũ Marĩkũ Ngai Aneka?

Ũngĩenda kũmenya mũndũ wega, no ũkorũo ũrĩ ũndũ wa bata kũmenya maũndũ marĩa anahingia na moritũ marĩa anacemania namo akĩmahingia. Na njĩra o ta ĩyo, ũngĩenda kũmenya Ngai wega, nĩ ũrabatara kwĩruta maũndũ marĩa anahingia. Ũngĩka ũguo, no ũmake kuona ũrĩa aneka maũndũ maingĩ ma gũtũguna na ũrĩa maũndũ macio mahutĩtie ũtũũro witũ wa ihinda rĩrĩa rĩroka.

NGAI OOMBIRE INDO CIOTHE NĨGUO TŨCIKENAGĨRE

Jehova Ngai nĩwe Mũũmbi Ũrĩa Mũnene, na “ngumo ciake iria itonekaga na maitho nĩ cionekaga wega kuuma o hĩndĩ ĩrĩa thĩ yombirũo, nĩ ũndũ nĩ cionekaga kũgerera indo iria ciũmbĩtwo.” (Aroma 1:20) ‘Nĩwe wombire thĩ na hinya wake, ningĩ nĩ ũũgĩ wake ũtũmaga ĩikare ĩrũmĩte; ningĩ nĩwe watambũrũkirie matu-mairũ na ũtaũku ũrĩa ataũkĩirũo nĩguo.’ (Jeremia 10:12) Indo cia magegania iria Ngai ombĩte ningĩ nĩ cionanagia atĩ nĩ atwendete.

Ta wĩcirie ũrĩa Jehova aatũmire ũtũũro witũ ũkorũo ũrĩ wa mwanya nĩ ũndũ wa gũtũũmba na “mũhianĩre wake.” (Kĩambĩrĩria 1:27) Ũguo nĩ kuuga aatũmbire ũndũ tũngĩhota kuonania ngumo ta ciake cia magegania na gĩkĩro kĩna. Nĩ aatũheire ũhoti wa kĩĩroho, kana ũhoti wa gũtaũkĩrũo nĩ ithimi ciake na ũrĩa onaga maũndũ. Twerutanĩria gũtũũra kũringana na ithimi icio cia mĩtugo, ũtũũro witũ nĩ ũgĩaga na gĩkeno kĩnene na muoroto. Makĩria ma ũguo, nĩ aatũhotithirie gũkorũo na ũrata hamwe nake.

Twarora indo iria Ngai ombĩte thĩinĩ wa thĩ nĩ tũmenyaga ũrĩa aiguaga nĩ ũndũ witũ. Mũtũmwo Paulo aandĩkire ciugo ici ciĩgiĩ Ngai: “Nĩ eerutagĩra ũira kũgerera maũndũ mega marĩa eekaga, [agatũhe] mbura kuuma igũrũ na imera irĩ na maciaro, [agatũhũnia] na irio na akaiyũria ngoro [citũ] gĩkeno.” (Atũmwo 14:17) Ngai atũhete indo nyingĩ o na gũkĩra iria tũbataraga nĩguo tũthiĩ na mbere gũtũũra. Oombire indo nyingĩ na cia mĩthemba ĩtiganĩte nĩguo tũkenagĩre ũtũũro. Macio no maũndũ manini tu maronania muoroto ũrĩa Ngai aarĩ naguo harĩ ithuĩ.

Jehova oombire thĩ nĩgetha andũ matũũre kuo tene na tene. Bibilia yugaga ũũ: “Thĩ nĩ kũhe aheete ciana cia kĩrĩndĩ,” na “ndaamĩũmbire hatarĩ ũrĩa yatariĩ, no kũũmba aamĩũmbire ĩtũũragwo nĩ andũ.” (Thaburi 115:16; Isaia 45:18) Ĩngĩatũũrirũo nĩ a, na mangĩatũũrire ihinda rĩigana atĩa? Bibilia yugaga: “Arĩa athingu nĩo makagaya thĩ, na gũtũũra mamĩtũũre o nginya tene.”​—Thaburi 37:29.

Jehova oombire mũthuri na mũtumia wa mbere, nĩo Adamu na Hawa na akĩmaiga thĩinĩ wa mũgũnda warĩ mũthaka nĩguo ‘maũrutage wĩra, na maũikaragie.’ (Kĩambĩrĩria 2:8, 15) Ngai nĩ aamaheire wĩra ũngĩahingirie maũndũ merĩ akĩmeera: “Ciarai mũno, mũthegee, mũiyũre thĩ, na mũmĩtorie.” (Kĩambĩrĩria 1:28) Kwoguo Adamu na Hawa maarĩ na kĩĩrĩgĩrĩro gĩa gũtũũra tene na tene thĩinĩ wa thĩ. Ũndũ wa kĩeha nĩ atĩ maathurire kwaga gwathĩkĩra Ngai na kwoguo makĩũrũo nĩ mweke wa gũkorũo gatagatĩ-inĩ ka andũ “athingu” arĩa “makagaya thĩ.” No o ta ũrĩa tũkuona, ũndũ ũcio meekire ndwacenjirie muoroto wa Ngai harĩ andũ na harĩ thĩ. No rekei twambe twarĩrĩrie ũndũ ũngĩ Ngai aneka.

NGAI NĨ AATŨHEIRE KIUGO GĨAKE

Bibilia ĩtagwo Kiugo kĩa Ngai. Nĩ kĩĩ gĩatũmire Jehova atũhe Bibilia? Aatũheire nĩgetha twĩrute ũhoro wake. (Thimo 2:1-5) Ũhoro wa ma nĩ atĩ, Bibilia ndĩcoketie ciũria ciothe iria tũngĩkorũo nacio ciĩgiĩ Ngai, na gũtirĩ ibuku rĩngĩhota gwĩka ũguo. (Kohelethu 3:11) No maũndũ mothe marĩa marĩ thĩinĩ wa Bibilia nĩ matũteithagia kũmenya Ngai. Maũndũ marĩa ekagĩra andũ nĩ matũteithagia kũmenya ũrĩa atariĩ. Bibilia nĩ ĩtũrutaga nĩ andũ a mũthemba ũrĩkũ makenagia Ngai na nĩ arĩkũ matamũkenagia. (Thaburi 15:1-5) Nĩ ĩtũteithagia kũmenya mawoni make megiĩ ũthathaiya, mĩtugo, na indo cia thĩ ĩno. Ningĩ Bibilia nĩ ĩtuonagia wega biũ ũrĩa Jehova atariĩ kũgerera ciugo na ciĩko cia Mũrũwe Jesu Kristo.​—Johana 14:9.

Ningĩ Jehova aatũheire Kiugo gĩake Bibilia, nĩguo ĩtũrute ũrĩa tũngĩtũũra ũtũũro ũrĩ na gĩkeno na muoroto. Kũgerera Bibilia, Jehova nĩ atuonagia ũrĩa tũngĩgĩa na famĩlĩ ĩrĩ na gĩkeno, ũrĩa tũngĩiganĩra na kĩrĩa tũrĩ nakĩo, na ũrĩa tũngĩhiũrania na mĩtangĩko. Ningĩ o ta ũrĩa kabuku gaka gegũcoka gataarĩrie, Bibilia nĩ ĩcokagia ciũria nditũ iria andũ meyũragia ũtũũro-inĩ, ta: Nĩ kĩĩ gĩtũmaga gũkorũo na mathĩna maingĩ ũguo? Mahinda marĩa maroka magaakorũo mahaana atĩa? Ningĩ nĩ ĩtaarĩirie maũndũ marĩa Ngai aneka nĩguo atigĩrĩre atĩ muoroto wake nĩ wahinga.

Nĩ harĩ maũndũ mangĩ maingĩ monanagia atĩ Bibilia nĩ ibuku riumĩte harĩ Ngai. O na gũtuĩka yandĩkirũo nĩ andũ ta 40 kwa ihinda rĩa mĩaka makĩria ma 1,600, ĩkoragwo yarĩrĩirie kĩongo kĩmwe tondũ Ngai nĩwe wamĩtungire. (2 Timotheo 3:16) Ngũrani na mabuku maingĩ marĩa maandĩkirũo tene, ndũmĩrĩri ya Bibilia ndĩrĩ yacenjia, na ikũnjo nyingĩ cia tene cia Bibilia nĩ cionanagia ũndũ ũcio. Makĩria ma ũguo, Bibilia nĩ ĩtiirĩtie o na andũ makĩgeragia kũgiria ĩtaũrũo, ĩkinyĩrio andũ, na ĩthomwo. Bibilia nĩrĩo ibuku rĩrĩa rĩtheremaga mũno na rĩgataũrũo mũno mahinda-inĩ maya. Ũguo Bibilia ĩtiirĩtie nĩ ũira atĩ “kiugo kĩa Ngai witũ [gĩgũtũũra] tene na tene.”​—Isaia 40:8.

NGAI GŨTIGĨRĨRA MUOROTO WAKE NĨ WAHINGA

Ũndũ ũngĩ Ngai aneka nĩ gũthondeka mũbango wa gũtigĩrĩra atĩ muoroto wake harĩ ithuĩ nĩ wahinga. O ta ũrĩa tũkũgwetete, muoroto wa Ngai warĩ andũ matũũre tene na tene thĩinĩ wa thĩ. O na kũrĩ ũguo, rĩrĩa Adamu aaregire gwathĩkĩra Ngai na akĩhia, nĩ aateire kĩĩrĩgĩrĩro gĩa gũtũũra tene na tene o hamwe na njiarũa ciake. Bibilia yugaga: “O ta ũrĩa kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe tondũ nĩ meehĩtie othe.” (Aroma 5:12) Ũremi ũcio wa Adamu nĩ watũmire kuoneke ta muoroto wa Ngai ũtakaahinga. Hihi Jehova eekire atĩa?

Itua rĩrĩa aatuire nĩ rĩringaine wega na ũrĩa atariĩ. Nĩ oonanirie na njĩra ya kĩhooto atĩ Adamu na Hawa nĩ maahĩtĩtie, no akĩbanga mũbango wa wendo nĩ ũndũ wa njiarũa ciao. Tondũ Jehova nĩ arĩ ũũgĩ mũingĩ, nĩ aamenyire ũrĩa ekũhiũrania na thĩna ũcio, na nginya akĩonania kĩhonia kĩaguo. (Kĩambĩrĩria 3:15) Angĩahũthĩrire Mũrũwe Jesu Kristo gũkũũra andũ kuuma harĩ mehia na gĩkuũ. Ũndũ ũcio wahutĩtie maũndũ marĩkũ?

Nĩguo akũũre andũ kuumana na moimĩrĩro moru ma ũremi wa Adamu, Jehova aatũmire Jesu gũkũ thĩ nĩgetha arute andũ ũhoro wĩgiĩ njĩra ya muoyo na “arute muoyo wake ũtuĩke wa gũkũũra andũ aingĩ.”a (Mathayo 20:28; Johana 14:6) Jesu nĩ angĩahotire kũruta ũkũũri ũcio, tondũ aarĩ mũndũ mũkinyanĩru o ta Adamu. Ĩndĩ Jesu aatũũrire arĩ mwathĩki biũ nginya rĩrĩa aakuire, ngũrani na Adamu. Tondũ Jesu ndaabatiĩ gũkua, Jehova nĩ aamũriũkirie agĩcoka kũrĩa igũrũ. Rĩrĩa Jesu eekire ũguo, nĩ aaheire andũ arĩa athĩki kĩĩrĩgĩrĩro gĩa gũgaatũũra tene na tene ũndũ ũrĩa Adamu aaremirũo. Bibilia yugaga: “Nĩ gũkorũo o ta ũrĩa kwaga gwathĩka kwa mũndũ ũcio ũmwe gwatũmire andũ aingĩ matuwo ehia, no taguo gwathĩka kwa mũndũ ũcio ũmwe gũgaatũma andũ aingĩ matuwo athingu.” (Aroma 5:19) Kũgerera igongona rĩu rĩa ũkũũri Jesu aarutire, Ngai nĩ akaahingia kĩĩranĩro gĩake kĩa andũ gũtũũra tene na tene thĩinĩ wa thĩ.

Nĩ twĩrutaga maũndũ maingĩ megiĩ Jehova kuumana na ũrĩa aahiũranirie na moritũ marĩa moimanire na ũremi wa Adamu. Ũndũ ũcio ũratuonia atĩ gũtirĩ kĩndũ kĩngĩgiria Jehova arĩkie ũndũ ũrĩa ambĩrĩirie tondũ kiugo gĩake no mũhaka ‘kĩhinge.’ (Isaia 55:11) Ningĩ nĩ ũtũteithagia kuona atĩ Jehova nĩ atwendete mũno. Bibilia yugaga: “Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe gũkũ thĩ nĩguo tũgĩe na muoyo kũgerera harĩ we. Wendo ũcio ũtariĩ ũũ, ti atĩ nĩ ithuĩ tweendire Ngai, no nĩwe watwendire na agĩtũma Mũrũ wake arĩ igongona rĩa ũiguano nĩ ũndũ wa mehia maitũ.”​—1 Johana 4:9, 10.

Ngai o na “ndaagirĩrĩirie nginya Mũrũ wake mwene anyamarĩke, no aamũneanire nĩ ũndũ witũ ithuothe” nĩgetha tũkoragwo na ma atĩ nĩ ‘arĩtũtugaga na indo icio ingĩ ciothe’ iria atwĩrĩire. (Aroma 8:32) Nĩ maũndũ marĩkũ Ngai eranĩire atĩ nĩ ageeka nĩ ũndũ witũ? Thoma gĩcunjĩ kĩrĩa kĩrũmĩrĩire.