Ithandũkũ rĩa Kĩũria

◼ Tũngĩteithia atĩa arĩa twĩrutaga nao Bibilia, matuĩke arutwo a Jesu Kristo nĩguo magĩrĩre kũbatithio?

Njĩra ĩrĩa njega makĩria nĩ (1) gũthomaga na mũrutwo waku wa Bibilia mũtegũtĩrĩria, na kũmũteithagia athiĩ na mbere, (2) kũmwĩkĩra ngoro athiage mĩcemanio yothe ĩtano, na gũkoragwo na itemi mĩcemanio-inĩ, o hamwe na, (3) kũmũteithagia na kũmũmenyeria ũtungata-inĩ angĩagĩrĩra Kĩĩmandĩko gũtuĩka mũhunjia ũtarĩ mũbatithie.

Jesu Kristo aathire arutwo ake, matue andũ arutwo, mamabatithie, na mamarute kũmenyagĩrĩra maathani make. Watho ũcio no ũtũhutagia nginya ũmũthĩ, o ta ũrĩa ciugo ici ironania: “Na atĩrĩrĩ, niĩ ndĩ hamwe na inyuĩ mĩthenya yothe, o nginya ithirĩro rĩa mahinda maya.”—Mat. 28:19, 20.

Mũrutwo wa Jesu nĩ mũndũ ũrĩa wamũkagĩra ũrutani wake, na akaũthingata. Kwoguo mũndũ ũrĩa wagĩrĩre kũbatithio, no mũhaka akorũo na ũmenyo wa mũthingi wa ma cia Bibilia, no makĩria ma ũguo, mũtũũrĩre wake wagĩrĩire kuonania atĩ nĩ oĩ, na nĩ arũmagĩrĩra ithimi cia Jehova cia ũthingu. Ningĩ, mũrutwo wa Jesu Kristo, agĩrĩirũo gũkũũrana gĩcunjĩ gĩa gũkũ thĩ kĩa ithondeka rĩa Jehova, na ũtongoria wa Jesu Kristo kũgerera “ngombo ĩrĩa ĩĩhokekete na njũgĩ.” (Mat. 24:45-47; Atũm. 1:8) Agĩrĩirũo kũmenya atĩ wĩra wa kũhunjia nĩ wa mĩtũkĩ, na no mũhaka egwatanie na andũ a Jehova nĩguo arute wĩra ũcio Jesu aambĩrĩirie, na agĩtigĩra arutwo ake. (Luk. 8:1; Mat. 24:14) Kwoguo, kũbatithio gwake nĩ ũira wa atĩ, nĩ atuĩkĩte ndungata ĩyamũrĩire Jehova Ngai na ngoro yothe.—Ringithania Thaburi 40:8.

Nĩ wega tũririkane atĩ tũteithagia andũ gũtuĩka arutwo a Jesu Kristo, no ti arutwo aitũ. Angĩkorũo hihi ndũrahota gũteithia mũrutwo waku wa Bibilia gũthiĩ na mbere kĩĩroho nĩ ũndũ wa maũndũ maku kĩũmbe, nĩ wega ũhoe ũteithio kũrĩ athuri a kĩũngano. No makũhe ũtaaro ũngĩhũthĩra gũteithia mũrutwo ũcio waku wa Bibilia athiĩ na mbere kĩĩroho, kũringana na ciugo cia Paulo thĩinĩ wa 1 Akorintho 3:5-9.

Mũhunjia agĩrĩire gũthiĩ na mbere kwĩruta na mũrutwo wa Bibilia nginya arĩkie ibuku rĩa Bibilia Ĩrutanaga Atĩa Kũna? na rĩa ‘Mwĩigei Wendo-inĩ wa Ngai,’ o na angĩkorũo nĩ agĩrĩire kũbatithio kana thutha wa kũbatithio. Mabuku macio merĩ mangĩkorũo matironeka na rũthiomi rwa mũrutwo ũcio, mabuku mangĩ marĩa marutanaga ma cia mũthingi cia Bibilia, na mataaragĩria ithimi cia ũthingu cia Jehova, no mahũthĩrũo.