Mĩgũnda Nĩyerũhĩte Kũgethwo
1. Nĩ wĩra ũrĩkũ wa bata ũrathiĩ na mbere?
1 Thutha wa kũhunjĩria mũtumia Mũsamaria, Jesu eerire arutwo ake ũũ: “Tiirai maitho, mũbare mĩgũnda, muone atĩ o na rĩu nĩyerũhĩte, kũgethwo.” (Johana 4:35, 36) Kwarĩ na magetha ma kĩĩroho maathiaga na mbere, na Jesu nĩoonaga atĩ wĩra ũcio nĩ ũngĩgatherema thĩ yothe. Jesu arĩ kũrĩa igũrũ, no akoragwo akĩrũmbũyania na wĩra ũcio wa magetha. (Mat. 28:19, 20) Nĩ maũndũ marĩkũ maronania atĩ wĩra ũcio ũrathiĩ na mbere ũkĩongererekaga o ũrĩa ũrakuhĩrĩria kũrĩka?
2. Nĩ maũndũ marĩkũ maronania atĩ magetha ma thĩ yothe nĩ marongerereka?
2 Magetha ma Thĩ Yothe: Mwaka wa ũtungata wa 2009, mũigana wa ahunjia thĩinĩ wa thĩ yothe nĩ wongererekire na gĩcunjĩ kĩa 3.2 harĩ igana. Thĩinĩ wa mabũrũri marĩa wĩra wa kũhunjia ũtetĩkĩrĩtio nĩ kwarĩ na wongerereku wa gĩcunjĩ gĩa 14 harĩ igana. Wĩruti wa Bibilia ũrĩa waribotagwo o mweri nĩ wakĩrire 7,619,000—nĩ makĩria ma ahunjia othe, na nĩ hakuhĩ nuthu milioni makĩria ma andũ arĩa meerutaga Bibilia wa mwaka wa 2008. O ũrĩa wĩra ũcio ũratherema na ihenya kũndũ kũingĩ-rĩ, noguo kũrahoywo amishonarĩ makĩria arĩa mathiĩte Cukuru ya Gileadi. Thĩinĩ wa mabũrũri maingĩ kũhunjia na thiomi ngʼeni nĩ kũrarehe moimĩrĩro mega mũno. Hatarĩ nganja, Jehova nĩ aratũma wĩra ũcio ũrutwo narua mũthia-inĩ wa magetha. (Isa. 60:22) Hihi ũrĩ na mawoni mega megiĩ “mĩgũnda” ya kwanyu?
3. Nĩ itua rĩrĩkũ andũ amwe mangĩtua rĩgiĩ magetha ma kwao?
3 Magetha ma Kwanyu: Angĩ no moige ũũ: “Kũrĩa hunjagia gũtikoragwo na moimĩrĩro mega.” Nĩ ũhoro wa ma atĩ icunjĩ imwe itikoragwo na moimĩrĩro mega ta iria ingĩ kana ta ũrĩa ciarĩ hau kabere. Ahunjia amwe kwoguo no moige atĩ andũ aingĩ arĩa mangĩtĩkĩra ũhoro wa ma thĩinĩ wa icigo icio nĩ meekire ũguo, na rĩu wĩra ũrĩa ũtigarĩte no wa kũhaara anini arĩa matigarĩte. Hihi ũguo nĩguo kũrĩ?
4. Nĩ mwerekera ũrĩkũ mwega twagĩrĩirũo nĩ gũkũria wĩgiĩ ũtungata witũ, na nĩkĩ?
4 Ihinda rĩa magetha rĩkoragwo rĩrĩ rĩa wĩra mũingĩ kuuma kĩambĩrĩria nginya mũthia. Rora wone mĩtũkĩ ciugo-inĩ ici cia Jesu: “Magetha nĩ maingĩ, no aruti wĩra nĩ anyinyi. Nĩ ũndũ ũcio thaithai Mwathani mwene magetha atĩ arekie aruti wĩra mathiĩ magetha-inĩ make.” (Mat. 9:37, 38) Jehova, Mwathani mwene magetha, nĩwe ũmenyaga nĩ rĩ na nĩ kũ magetha mekuoneka. (Joh. 6:44; 1 Kor. 3:6-8) Itemi riitũ nĩ rĩrĩkũ? Bibilia ĩcokagia ũũ: “Rũcinĩ roka kũhanda mbeũ ciaku, o na ningĩ hwaĩ-inĩ ndũkahurũkie guoko gwaku.” (Koh. 11:4-6) Nĩ ma, rĩrĩa magetha marakuhĩrĩria gũthira-rĩ, rĩu ti rĩo ihinda rĩa kũregeria moko maitũ!
5. Twagĩrĩirũo nĩkĩ gũthiĩ na mbere kũhunjia tũrĩ na kĩyo o na kũrĩa kuonekaga ta gũtarĩ na moimĩrĩro mega?
5 Thiĩ na Mbere Kũgetha: O na angĩkorũo kũrĩa tũhunjagia nĩ gũcokagĩrũo maita maingĩ na kũroneka ta gũtarĩ na moimĩrĩro mega-rĩ, harĩ na gĩtũmi kĩega gĩa kũruta wĩra ũcio na kĩyo kĩingĩ na tũrĩ na mĩtũkĩ. (2 Tim. 4:2) Maũndũ ma kũgegania marĩa marekĩka gũkũ thĩ nĩ matũmaga andũ maagarũrĩre mwerekera wao na mecirie mũno ũhoro wa mahinda marĩa mokĩte. O ũrĩa andũ ethĩ marakũra-rĩ, no mone bata wa gwetha ũgitĩri na thayũ wa meciria. Gũtindĩrĩra gwitũ no kũgucĩrĩrie andũ amwe. Arĩa matarĩ maatũthikĩrĩria mahota gũgaatũthĩkĩrĩria. O na arĩa maregaga ndũmĩrĩri iitũ makĩendaga nĩ marabatara kũheo mũkaana.—Ezek. 2:4, 5; 3:19.
6. Angĩkorũo kũrĩa tũhunjagia andũ matitũthikagĩrĩria-rĩ, nĩ kĩĩ kĩngĩtũteithia tũtũũrie kĩyo giitũ?
6 Angĩkorũo kũrĩa tũhunjagia andũ matitũthikagĩrĩria-rĩ, nĩkĩ kĩngĩtũteithia tũtũũrie kĩyo giitũ? Handũ ha kũhunjia o mĩciĩ kwa mĩciĩ tu-rĩ, no tũhunjie ndũnyũ na matuka-inĩ, kana tũhunjie na njĩra ya thimũ. Kana tũgarũrĩre ũrĩa tũhunjagia nĩguo ndũmĩrĩri iitũ ĩgucĩrĩrie makĩria. No tũgarũrĩre mĩbango iitũ na tũhunjie hwaĩ-inĩ kana mahinda mangĩ marĩa andũ mangĩoneka mĩciĩ kwao. Kana kũngĩhoteka no twĩrute rũthiomi rũngĩ nĩgetha tũhunjĩrie andũ aingĩ makĩria. O na no twandandũre ũtungata witũ na njĩra ya gũtuĩka painia wa mahinda mothe. Kana tũthaamĩre kũrĩa gũtarĩ na agethi aingĩ. Tũngĩkorũo na mwerekera ũrĩa wagĩrĩire wĩgiĩ magetha-rĩ, nĩ tũgwĩka o ũrĩa wothe tũngĩhota nĩguo tũrute wĩra ũcio wa bata.
7. Tũgũthiĩ na mbere na wĩra wa magetha nginya rĩ?
7 Arĩmi makoragwo na kahinda o kanini ga kũgetha, kwoguo matigondagĩrĩra kana kũregeria moko nginya wĩra ũcio ũthire. Magetha ma kĩĩroho o namo marabatara tũkorũo na mwerekera ta ũcio wa mĩtũkĩ. Tũgũthiĩ na mbere na wĩra ũcio nginya rĩ? Tũgũthiĩ na mbere hĩndĩ yothe ya “ithirĩro rĩa mahinda maya” o nginya “ithirĩro rĩgakinya.” (Mat. 24:14; 28:20) Wendi witũ nĩ kũruta wĩra ũrĩa twĩhokeirũo nginya tũũrĩkie, o ta Mũruti wĩra ũrĩa mũnene wa Jehova. (Joh. 4:34; 17:4) Kwoguo-rĩ, rekei tũthiĩ na mbere na ũtungata witũ tũrĩ na kĩyo, gĩkeno, na mwerekera mwega nginya mũthia. (Mat. 24:13) Magetha ti mathiru!
[Karatathi ga 2]
Kuuma kĩambĩrĩria nginya mũthia, ihinda rĩa magetha rĩkoragwo rĩrĩ na wĩra mũingĩ mũno