“Iguanagĩrai Tha”
1. Nĩ ũndũ ũrĩkũ andũ marabatara mũno ũmũthĩ?
1 Thĩinĩ wa historĩ gũtirĩ kwagĩa ihinda rĩngĩ rĩrĩa andũ aingĩ marĩ makorũo makĩbatara gũteithio na njĩra ya tha ta ũmũthĩ. Maũndũ ma thĩ marĩa marathiĩ na mbere o gũthũka nĩ matũmĩte kwaga gĩkeno, gũkua ngoro na kwaga mwĩhoko gũtheereme mũno. Andũ milioni nyingĩ nĩ marabatara ũteithio, na ithuĩ tũrĩ Akristiano no tuonanie atĩ nĩ tũrarũmbũiya andũ arĩa angĩ kũna. (Mat. 22:39; Gal. 6:10) Tũngĩmarũmbũiya na njĩra ĩyo atĩa?
2. Nĩ njĩra ĩrĩkũ njega makĩria ĩrĩa tũngĩonania tha?
2 Wĩra Wonanagia Tha: Ngai nĩwe kĩhumo kĩa ma kĩa ũmĩrĩria. (2 Kor. 1:3, 4) Tondũ Jehova nĩ mũcayanĩri, atwĩraga ‘tũiguanagĩre tha’ na nĩ atũheete wĩra wa kũhunjĩria andũ arĩa angĩ ũhoro ũrĩa mwega wa Ũthamaki. (1 Pet. 3:8) Gwĩka ũrĩa wothe tũngĩhota wĩra-inĩ ũcio nĩyo njĩra ĩrĩa njega mũno ya kũũmĩrĩria arĩa “athuthĩku ngoro,” tondũ mwĩhoko wa andũ nĩ Ũthamaki wa Ngai ũrĩa ũkaaniina mĩnyamaro. (Isa. 61:1) Ica ikuhĩ, Jehova nĩ ũndũ wa tha ciake kwerekera andũ ake, nĩ akeheria maũndũ mothe moru na ahande thĩ njerũ ĩrĩ na ũthingu.—2 Pet. 3:13.
3. Tũngĩĩgerekania atĩa na muonere wa Jesu kwerekera andũ?
3 Ona Andũ o ta Ũrĩa Jesu Aamonaga: O na rĩrĩa aahunjagĩria kĩrĩndĩ kĩa andũ, Jesu ndaamonaga tu marĩ ta gĩkundi. Aameciragia marĩ mũndũ ũmwe ũmwe, arĩa maabataraga ũteithio nĩguo makũrie ũkuruhanu mwega na Ngai. Maatariĩ ta ngʼondu itarĩ na mũrĩithi wa gũcitongoria. Jesu akĩhutio ngoro nĩ ũndũ ũcio onire, na agĩitĩka kũmaruta arĩ na ũkirĩrĩria. (Mar. 6:34) Tũngĩona andũ o ta ũrĩa Jesu aamonaga, nĩ tũgwĩkĩrũo ngoro tuonanie tha cia ma kũrĩ andũ marĩ o mũndũ kĩũmbe. Ũndũ ũcio nĩ ũkuonekana wega kũgerera njĩra iitũ ya kwaria hamwe na ũthiũ witũ. Kũhunjia kũrĩkoragwo kũrĩ ũndũ ũrĩa wa bata makĩria mũtũũrĩre-inĩ witũ, na tũrĩgarũragĩra ciugo ciitũ nĩguo tũhingĩrie o mũndũ bata wake.—1 Kor. 9:19-23.
4. Nĩkĩ twagĩrĩirũo nĩ gũkorũo na mwĩhumbĩre wa ngoro wa kũiguanĩra tha?
4 Kĩrĩndĩ kĩnene kĩa andũ kuuma ndũrĩrĩ ciothe nĩ kĩretĩkĩra wega ndũmĩrĩri ya Ũthamaki na wendo mũnene ũrĩa maronio. O ũrĩa tũgũthiĩ na mbere na mwĩhumbĩre wa ngoro wa kũiguanĩra tha, tũrĩheaga gĩtĩo na tũgakenia Ngai witũ Jehova, ũrĩa ũiguanagĩra tha.—Kol. 3:12.