‘Rĩĩtwa rĩa Ngai nĩ Rĩtherio’
1. Kĩongo gĩa kĩgomano kĩa mũthiũrũrũko kĩa mwaka wa ũtungata wa 2012 nĩ kĩrĩkũ, na mũthingi wakĩo nĩ ũrĩkũ?
1 Na githĩ ti gĩtĩo kĩnene gũkorũo twĩtanĩtio na rĩĩtwa rĩa Mũnene wa Thĩ na Igũrũ, Jehova! Nĩ Ngai we mwene watũheire rĩĩtwa rĩake twĩtanagio na rĩo, na makĩria kuuma mwaka wa 1931, tũrĩ Aira a Jehova, nĩ tũkoretwo tũĩkaine na rĩĩtwa rĩa mwanya rĩa Jehova. (Isa. 43:10) Jesu, Mũrũ wa Ngai wa mũmwe, nĩ aatũgĩririe rĩĩtwa rĩa Ngai mũno, na thĩinĩ wa ihoya rĩrĩa aarutire arũmĩrĩri ake mahoyage, akĩrĩhe mweke wa mbere. (Mat. 6:9) Ciugo cia Jesu nĩcio igaakorũo irĩ mũthingi wa kĩongo gĩa kĩgomano giitũ kĩa mũthiũrũrũko kĩa mwaka wa ũtungata wa 2012. Kĩongo gĩakĩo nĩ: “Rĩĩtwa rĩa Ngai nĩ Rĩtherio.”
2. Nĩ ũhoro ũrĩkũ tũrerĩgĩrĩra gũkaigua?
2 Nĩ Maũndũ Marĩkũ Tũkaigua: Mũthenya wa Njuuma mĩario ĩrĩ na kĩongo: “Reke Tũmenyithanie Rĩĩtwa rĩa Ngai Tũrĩ Ndungata cia Mahinda Mothe” nĩ ĩkaarĩrĩria kĩrĩa gĩtũmaga ũtungata wa mahinda mothe ũkorũo arĩguo njĩra ĩrĩa njega mũno ya ũtũũro. O na ningĩ nĩ tũkaigua kĩrũmanĩrĩrio kĩrĩ na kĩongo: “Wĩmenyerere Gũcambithia Rĩĩtwa rĩa Jehova” kĩrĩa gĩgaatũteithia twĩtheme kũnyitwo nĩ mĩtego ĩna. Ciũria, Nĩ kĩĩ gĩgũtũteithia tũhunjie tũrĩ na kĩyo rĩrĩa andũ monania gũkenio nĩ ndũmĩrĩri iitũ hanini tu? na Nĩ kĩĩ gĩgũtũteithia tũkorũo tũrĩ na moimĩrĩro mega ũtungata-inĩ? nĩ igaacokio mĩario-inĩ ĩrĩ na kĩongo: “Nĩkĩ arĩ o Mũhaka Rĩĩtwa rĩa Ngai Rĩtherio?” Mũthenya wa Kiumia nĩ tũgaakenera icunjĩ inya cia kĩrũmanĩrĩrio ciĩgiĩ ũrĩa tũngĩtheria rĩĩtwa rĩa Ngai kũgerera mĩario, meciria, matua, na mĩthiĩre iitũ. Arĩa erũ nĩ magaakenera makĩria mĩario ya andũ othe, ĩrĩa ĩgaakorũo na kĩongo: “Jehova nĩ Agaatheria Rĩĩtwa Rĩake Inene Hĩndĩ ya Hari–Magedoni.”
3. Nĩ gĩtĩo kĩrĩkũ tũrĩ nakĩo, na mũtaratara ũcio ũgaatũteithia atĩa?
3 Ica ikuhĩ Jehova nĩ egũtheria rĩĩtwa rĩake. (Ezek. 36:23) Kwa ihinda rĩrĩ, tũrĩ na mweke wa mwanya wa kũnyita mbaru maũndũ mothe makonainie na rĩĩtwa itheru rĩa Jehova. Tũrĩ na ũũma atĩ mũtaratara wa kĩgomano kĩu kĩa mũthiũrũrũko nĩ ũgaateithia o mũndũ ahingie wĩra witũ ũrĩa uumanĩte na gwĩtanio na rĩĩtwa rĩa Ngai.