Njĩra Ithatũ cia Kwagĩria Mũrutanĩre Waku
1. Twagĩrĩirũo kwĩrutanĩria kwagĩria mũrutanĩre witũ nĩkĩ?
1 Aira a Jehova othe nĩ arutani. O na angĩkorũo nĩ kũhunjia tũrahunjia, gũcokera andũ arĩa twahunjĩirie kana kũruta mũndũ Bibilia, muoroto witũ nĩ gũkinyia ndũmĩrĩri. Na ndũmĩrĩri ĩrĩa tũkinyagĩria andũ nĩ ya mwanya. Tũmatwaragĩra ũtheri wa “Maandĩko marĩa matheru,” marĩa ‘mangĩmohĩgia nĩguo mahonokio.’ (2 Tim. 3:15) Kaĩ ũcio nĩ mweke wa mwanya-ĩ! Tũkwarĩrĩria njĩra ithatũ cia kwagĩria mũrutanĩre witũ.
2. Tũngĩrutana na njĩra hũthũ atĩa?
2 Hũthia Ũhoro: Tũngĩkorũo na ũtaũku mwega wĩgiĩ ũndũ mũna, no ũkorũo ũrĩ ũndũ mũhũthũ kũriganĩrũo atĩ ũndũ ũcio no ũritũhĩre mũndũ ũngĩ ũtarĩ na ũtaũku waguo. Kwoguo rĩrĩa ũraruta mũndũ Bibilia, ndũkaiyũrie ũrutani waku na maũndũ matarĩ ma o mũhaka. Ithenya rĩa ũguo, arĩrĩria maũndũ marĩa ma bata makĩria. Kwaria mũno ti njĩra njega ya kũrutana. (Thim. 10:19) Harĩ bata gũthoma o maandĩko marĩa ma mũthingi. Thutha wa gũthoma rĩandĩko, arĩrĩria tu gĩcunjĩ kĩa rĩo kĩrĩa gĩkonainie na ũndũ ũrĩa ũrarutana. Mĩario ĩrĩa ya Kĩrĩma-inĩ ĩrĩ thĩinĩ wa Mathayo mũrango wa 5 nginya wa 7, ĩkoragwo na ma ndikĩru mũno, o na kũrĩ ũguo Jesu aacirutanire na njĩra hũthũ na akĩhũthĩra ciugo nyinyi.
3. Bata wa ngerekano nĩ ũrĩkũ, na kaingĩ nĩ irĩkũ njega makĩria?
3 Ngerekano: Ngerekano ciarahũraga meciria, cikahutia ngoro, na igateithia mũndũ kũririkana. To mũhaka ũkorũo ũrĩ mũgani ngʼano nĩguo ũhũthĩre ngerekano njega. Kaingĩ Jesu aahũthagĩra ngerekano nguhĩ na hũthũ. (Mat. 7:3-5; 18:2-4) Mbica hũthũ icoretwo karatathi-inĩ o nacio no ikorũo na ũteithio mũno. Ũngĩĩhaarĩria mbere, no ũhũthĩre ngerekano irĩ na moimĩrĩro mega.
4. Tũngĩhũthĩra ciũria atĩa na njĩra njega?
4 Ciũria: Ciũria citeithagia mũrutwo waku ecirie. Kwoguo thutha wa kũũria kĩũria, gĩa na wetereri. Ũngĩhiũha kũmwĩra macokio, ndũngĩmenya kũna ũrĩa mũrutwo waku arataũkĩrũo. Angĩcokia ũrĩa gũtarĩ, handũ ha kũmũrũnga, no ũkorũo ũrĩ ũndũ mwega kũhũthĩra ciũria ingĩ kũmũtongoria harĩ macokio marĩa magĩrĩire. (Mat. 17:24-27) Ma nĩ atĩ thĩinĩ witũ, gũtirĩ o na ũmwe mũrutani mũkinyanĩru. Nĩkĩo, Bibilia ĩtwĩkagĩra ngoro tũmenyagĩrĩre mũrutanĩre witũ. Gwĩka ũguo, kũrĩtũmaga ithuĩ hamwe na arĩa matũthikagĩrĩria tũgĩe na irathimo cia tene na tene.—1 Tim. 4:16.