Gitagĩra Thamiri Yaku

1. Kĩongo gĩa kĩgomano kĩa mũthenya ũmwe kĩa mwaka wa ũtungata wa 2013 nĩ kĩrĩkũ, na muoroto wa programu ĩyo nĩ ũrĩkũ?

¹ O mũthenya nĩ tũcemanagia na maũndũ mangĩtũma thamiri citũ ithũke. Nĩkĩo kĩgomano gitũ kĩa mũthenya ũmwe kĩa mwaka wa ũtungata wa 2013, ũrĩa ũkaambĩrĩria Septemba 1, 2012, kĩrĩ na kĩongo “Gitagĩra Thamiri Yaku.” (1 Tim. 1:19) Programu ĩyo ĩhaarĩrĩirio ĩteithie o ũmwe witũ gũthuthuria na kinyi ũrĩa arahũthĩra kĩheo kĩu kĩa bata kuuma kũrĩ Mũũmbi witũ.

2. Nĩ ciũria irĩkũ cia bata igaacokio hĩndĩ ya programu?

² Ũgaacaria Maũndũ Maya: Programu ĩyo nĩ ĩgaacokia ciũria mũgwanja cia bata ciĩgiĩ thamiri:

• Nĩ maũndũ marĩkũ mangĩthũkia thamiri?

• Tũngĩmenyeria thamiri citũ atĩa?

• Tũngĩĩthema atĩa gũcokererũo nĩ thakame ya mũndũ o wothe?

• Gwĩciria na gwĩka kũringana na ũtaaro wa Bibilia kũguũragia maũndũ marĩkũ matwĩgiĩ?

• Tũngĩĩthema atĩa kũguraria andũ arĩa angĩ maũndũ-inĩ makoniĩ thamiri?

• Inyuĩ andũ ethĩ, mũngĩkirĩrĩria atĩa rĩrĩa mwahatĩkwo mwĩhie?

• Andũ arĩa marũmagĩrĩra thamiri ciao iria itongoragio nĩ roho magĩaga na irathimo irĩkũ?

3. Tũngĩka atĩa nĩguo tũkaagunĩka nĩ programu ĩyo?

³ Nĩ ũndũ wa ũteithio wa Jehova, nĩ tũhotaga gwĩtiiria njĩra iria Shaitani ahũthagĩra nĩguo athũkie thamiri citũ. Kũgerera Kiugo kĩa Ngai na ithondeka rĩake, Ithe witũ wa igũrũ mwendani atwĩraga ũũ: “Ĩno nĩyo njĩra, gera yo.” (Isa. 30:21) Kĩgomano gĩkĩ nĩ njĩra ĩmwe Jehova arahũthĩra gũtũhe ũtongoria ũcio. Nĩ ũndũ ũcio, banga gũgaakorũo kuo ihinda rĩothe rĩa programu. Ũgaathikĩrĩria na kinyi, na wĩcũranie ũrĩa ũngĩhũthĩra wee mwene ũhoro ũrĩa ũkaaheanwo. Arĩrĩriai programu ĩyo mũrĩ famĩlĩ. Kũhũthĩra motaaro marĩa tũkaaheo nĩ gũgũtwĩkĩra hinya wa gũthiĩ na mbere ‘gũikaraga tũrĩ na thamiri ĩtarĩ na ũcuke’ na gũtũteithie gwĩthema kũhenererio nĩ mĩago ya kahinda ya thĩ ya Shaitani.—1 Pet. 3:16.