Ndũkegirĩrĩrie —Ũrĩa Ũngĩka o na Wĩna Mawĩra Maingĩ
1. Nĩ kĩĩ gĩtũmaga andũ amwe metigĩre kwambĩrĩria kwĩruta Bibilia na mũndũ?
1 Andũ amwe nĩ metigagĩra kwambĩrĩria kwĩruta na andũ Bibilia nĩ ũndũ wa gũkorũo na mawĩra maingĩ. Kũrũmbũiya mũrutwo wa Bibilia nĩ kũbataraga mahinda. Ningĩ mahinda nĩ mabataranagia mũndũ akĩhaarĩria wĩruti, gũthomithia, na gũteithia mũrutwo gũtooria mĩhĩnga yake mwene. Mũtũmwo Paulo oigire atĩ aaheanire muoyo wake kũrĩ Athesalonike nĩguo amateithie mamenye Jehova. (1 Thes. 2:7, 8) Tũngĩka atĩa nĩguo tũhote kũruta mũndũ Bibilia o na tũrĩ na mawĩra maingĩ?
2. Wendo witũ harĩ Jehova ũhutagia atĩa ũrĩa tũhũthagĩra mahinda maitũ?
2 Ũthathaiya nĩ Ũbataraga Mahinda: Ũrĩa kũrĩ nĩ atĩ ũthathaiya nĩ ũbataraga mahinda. Kwa ngerekano, kaingĩ nĩ tũhũthagĩra mahinda gũthiĩ mĩcemanio, kũhunjia, gũthoma Bibilia, na kũhoya. Mũndũ ũrĩ thĩinĩ wa kĩhiko na ũrĩ na mawĩra maingĩ nĩ akenagĩra gũcaria mahinda ma gũkorũo hamwe na ũrĩa mahikanĩtie. Githĩ tũtikĩagĩrĩirũo gũkenera o na makĩria ‘kũgũra ihinda’ rĩa gũthathaiya Jehova tondũ nĩ tũmwendete. (Ef. 5:15-17, NW; 1 Joh. 5:3) Kũringana na Jesu, ũndũ ũmwe wa bata mũno harĩ ũthathaiya witũ nĩ wĩra wa gũtua andũ arutwo. (Mat. 28:19, 20) Gwĩcũrania ũndũ ũcio nĩ kũrĩtũteithagia kwaga gwĩtigĩra kũruta wĩra ũyũ wa kũruta andũ Bibilia.
3. Tũngĩteithia mũrutwo wa Bibilia atĩa o na maũndũ mangĩthũkia mĩbango itũ ya ũtungata?
3 Ĩ mũbango witũ ũngĩthũkio nĩ wĩra ũrĩa twandĩkĩtwo, mũrimũ ũtarahona, kana mawĩra mangĩ ma gĩtheokrasi? Ahunjia amwe arĩa rĩmwe na rĩmwe arĩ o mũhaka makorũo kũraya merutaga na arutwo ao a Bibilia kũgerera thimũ kana Intaneti. Arĩa mĩbango yao ĩthũkagio nĩ mũrimũ nĩ mabangaga mũrutwo okage kwao mũciĩ nĩguo merute. Angĩ nao nĩ mabangaga mũhunjia ũngĩhota amateithie kwĩruta na mũrutwo rĩrĩa matangĩoneka.
4. Nĩ irathimo irĩkũ ciumanaga na kũgĩa na itemi wĩra-inĩ wa kũruta andũ Bibilia?
4 Paulo nĩ aagĩaga na gĩkeno kĩnene nĩ ũndũ wa kũhũthĩra hinya na mahinda make gũteithia andũ kwĩruta ũhoro wa ma. (Atũm. 20:35) Rĩrĩa eecũranirie igũrũ rĩgiĩ maciaro ma wĩra wake gĩcigo-inĩ gĩa Thesalonike, nĩ aakinyĩrĩire gũcokeria Jehova ngatho. (1 Thes. 1:2) Gĩkeno na kũiganĩra gwitũ ũtungata-inĩ no kuongerereke tũngĩaga gwĩtĩkĩria mawĩra maingĩ marĩa tũrĩ namo magirie tũgĩe na itemi wĩra-inĩ wa kũruta andũ Bibilia.