Wĩgerekanie na Anabii —Joeli
1. Tũngĩgĩa na wĩnyihia ta wa Joeli atĩa rĩrĩa tũrahunjia?
1 Mũnabii Joeli aarĩ ũ? Ũndũ ũrĩa oigĩte nĩ atĩ we aarĩ “Joeli wa Pethueli.” (Joel 1:1) Mũnabii ũcio mwĩnyihia ndeciragia ũhoro wake we mwene arĩ mũtwari wa ndũmĩrĩri no eekĩrĩire ndũmĩrĩri ya Jehova. O na ithuĩ handũ ha gwĩciria ũrĩa tũngĩĩgĩra ngumo tũrĩ ũtungata-inĩ, twĩkagĩrĩra ndũmĩrĩri ya Jehova na Bibilia. (1 Kor. 9:16; 2 Kor. 3:5) Makĩria ma ũguo, ndũmĩrĩri ĩrĩa tũhunjagia nĩ ĩkĩraga wĩtĩkio witũ hinya. Nĩ maũndũ marĩkũ ma ũrathi wa Joeli mangĩtũteithia tuongerere kĩyo na kĩĩrĩgĩrĩro?
2. Twagĩrĩirũo gwĩka atĩa twecũrania ũrĩa mũthenya wa Jehova ũkuhĩrĩirie?
2 “Mũthenya Ũrĩa Ũtuĩtwo nĩ Jehova Ũrĩ Hakuhĩ.” (Joel 1:15): O na gũtuĩka ũrathi ũcio waandĩkirũo mĩaka mĩingĩ mĩhĩtũku, nĩ ũrahinga mahinda-inĩ maya. Maũndũ gũthiĩ mathũkĩte thĩinĩ wa thĩ na ũrĩa andũ matũnyũrũragia na makaga gũtũthikĩrĩria nĩ kuonanagia atĩ tũrĩ matukũ-inĩ ma kũrigĩrĩria ma thĩ ĩno njũru. (2 Tim. 3:1-5; 2 Pet. 3:3, 4) Tũrĩ na gĩtũmi kĩega gĩa kũiga ũtungata mbere ũtũũro-inĩ witũ twecũrania ũrĩa mũthia ũkuhĩrĩirie.—2 Pet. 3:11, 12.
3. Nĩkĩ kũhunjia nĩ kwa bata makĩria hĩndĩ ĩno tũkuhĩrĩirie mĩnyamaro ĩrĩa mĩnene?
3 “Jehova Nĩwe Ũgatuĩka Mũrahĩro wa Andũ Ake.” (Joel 3:16): Gũthingitha kũrĩa kũgwetetwo nĩ mũhari ũyũ kuonanĩtie ũrĩa Jehova akaahingia ituĩro rĩake hĩndĩ ya mĩnyamaro ĩrĩa mĩnene. Nĩ tũhoragĩrio ngoro kũmenya atĩ Jehova hĩndĩ ĩyo nĩ akahonokia ndungata ciake njĩhokeku. (Kũg. 7:9, 14) Rĩrĩa tũrahunjia na tũkeyonera ũrĩa Jehova atũteithagia na agatwĩkĩra hinya, nĩ tũkũragia wĩtĩkio na ũkirĩrĩria ũrĩa ũgatũteithia hĩndĩ ya mĩnyamaro ĩrĩa mĩnene.
4. Nĩkĩ kĩngĩtũma tũkene na tweterere ihinda rĩrĩa rĩũkĩte tũtegũthangania?
4 O na gũtuĩka andũ amwe moigaga atĩ Joeli aarathire o maũndũ moru, ũrathi wake nĩ ũheaga andũ a Ngai kĩĩrĩgĩrĩro gĩa gũkahonokio. (Joel 2:32) Nĩ ũndũ ũcio, rekei tweterere ihinda rĩrĩa rĩũkĩte tũtegũthangania na tũhunjie na kĩyo ũhoro ũrĩa mwega wa Ũthamaki wa Ngai o tũgĩkaga kũringana na ciugo ici cia Joeli 2:23: “Gĩkenei, . . . mũkũngũĩre Jehova Ngai wanyu.”