Wĩgerekanie na Anabii—Hosea
1. Nĩ kĩũria kĩrĩkũ hihi waneyũria?
1 ‘Nĩ maũndũ marĩkũ ndĩhaarĩirie kwĩima nĩguo ndungatĩre Jehova?’ No kũhoteke waneyũria kĩũria ta kĩu thutha wa gwĩcũrania ũhoro wĩgiĩ tha na wega wa Jehova. (Thab. 103:2-4; 116:12) Hosea nĩ eekire eyendeire ũrĩa Jehova aamwathĩte eke, o na gũtuĩka nĩ aabataraga kwĩima mũno. Tũngĩĩgerekania atĩa na Hosea?
2. Tũngĩĩgerekania atĩa na kĩonereria kĩega kĩa Hosea gĩa kũhunjia tũkirĩrĩirie?
2 Hunjagia o na Hĩndĩ Ĩtarĩ Njagĩrĩru: Ndũmĩrĩri ya Hosea yaarongoreirio mĩhĩrĩga ĩrĩa ikũmi ya Isiraeli, hĩndĩ ĩrĩa ũthathaiya wa ma warorete gũthira. Mũthamaki Jeroboamu wa 2 eekire maũndũ moru mũno maitho-inĩ ma Jehova, na agĩtwarithia na mbere ũthathaiya wa ngai cia maheeni ũrĩa waambĩrĩirio nĩ Jeroboamu wa 1. (2 Ath. 14:23, 24) Athamaki arĩa mookire thutha ũcio, maathire o na mbere na ũthathaiya wa maheeni, nginya rĩrĩa ũthamaki wa mĩhĩrĩga ĩyo ikũmi waaniniirũo mwaka wa 740 M.M.M. O na kũrĩ na ũthathaiya mũingĩ ũguo wa maheeni, Hosea aatungatire arĩ mũnabii mwĩhokeku kwa ihinda rĩa mĩaka 59. Hihi ithuĩ nĩ twĩrutĩire kũhunjia na kĩyo tũtegũtigithĩria o na tũgĩkararagio?—2 Tim. 4:2.
3. Mũtũũrĩre wa Hosea wonanirie atĩa tha cia Jehova?
3 Wĩcũranie Ũhoro wa Tha cia Jehova: Jehova eerire Hosea ahikie “mũtumia wa maraya.” (Hos. 1:2) O na gũtuĩka Gomeri mũtumia wake nĩ aamũciarĩire kahĩĩ, aacokire kũmũciarĩra ciana ingĩ igĩrĩ nja ya kĩhiko. Hosea gũkorũo eyendeire kuohera mũtumia wake, kuonanirie tha cia Jehova harĩ Aisiraeli acio aremi rĩrĩa meeririre. (Hos. 3:1; Rom. 9:22-26) Hihi nĩ twĩhaarĩirie kwĩima nĩguo tũhunjĩrie andũ a mĩthemba yothe ũhoro wĩgiĩ tha cia Jehova?—1 Kor. 9:19-23.
4. Andũ amwe meimĩte maũndũ marĩkũ nĩguo matungatĩre Jehova?
4 Ndungata imwe cia Jehova nĩ itigĩte mawĩra mega nĩguo ihũthagĩre mahinda maingĩ ũtungata-inĩ. Angĩ nao meimĩte kũingĩra kĩhiko-inĩ kana kũgĩa ciana nĩguo maige maũndũ ma Ũthamaki mbere. Ũngĩĩcũrania ũhoro wa Hosea, wahota kuuga, ‘Ndingĩhota gwĩka ũrĩa eekire.’ O na kũrĩ ũguo, tũngĩĩciria ũhoro wĩgiĩ tha cia Jehova na twĩhoke roho wake mũtheru, no atũhũthĩre na njĩra nene gũkĩra ũrĩa tũngĩĩrĩgĩrĩra, o ta ũrĩa aahũthĩrire Hosea.—Mat. 19:26; Afil. 2:13.