Icunjĩ Irĩtũteithagia Ũtungata-inĩ
1. Gĩcunjĩ kĩa “Ndeereti Hamwe na Mũira wa Jehova” gĩkoragwo na mĩoroto ĩrĩkũ?
1 Rĩmwe na rĩmwe ngathĩti ya Mũrangĩri ya andũ othe nĩ ĩkoragwo na gĩcunjĩ kĩa “Ndeereti Hamwe na Mũira wa Jehova.” Gĩcunjĩ kĩu gĩkoragwo na mĩoroto ĩĩrĩ, gũtaarĩria morutani ma Bibilia na njĩra ĩragucĩrĩria, na kuonania ũrĩa tũngĩaranĩria na andũ igũrũ rĩgiĩ ũrutani mũna na njĩra ya ũũgĩ. (1 Pet. 3:15) Tũngĩhũthĩra gĩcunjĩ kĩu atĩa na njĩra ĩrĩ na ũguni?
2. Tũngĩhũthĩra icunjĩ icio atĩa ũtungata-inĩ?
2 Hũthagĩra Icunjĩ Icio Ũtungata-inĩ: No ũige ngathĩti cigana ũna cia Mũrangĩri iria irĩ na icunjĩ icio. Mwene nyũmba, mũndũ ũrakenio nĩ ũhoro, kana mũrutwo wa Bibilia angĩũria kĩũria kana agwete ũndũ mũna warĩrĩirio thĩinĩ wa gĩcunjĩ kĩmwe gĩa icio, no ũmũhe ngathĩti ĩrĩ na gĩcunjĩ kĩu na ũmũrie kana no mwarĩrĩrie nake. Ũngĩkorũo ũtarĩ na ngathĩti ĩrĩ na gĩcunjĩ kĩu, no ũmĩrute Rĩarĩro-inĩ rĩa jw.org/ki.
3. Tũngĩarĩrĩria gĩcunjĩ ta kĩu atĩa na mwene nyũmba?
3 Hihi mũngĩarĩrĩria na mũndũ gĩcunjĩ ta kĩu atĩa? Ahunjia amwe moragia mũndũ athome anĩrĩire gacunjĩ ka mwene nyũmba, nao magathoma gacunjĩ ka Mũira wa Jehova. Kũhũthĩra njĩra ĩyo no gũkorũo na moimĩrĩro mega tondũ, nĩ kũheaga mwene nyũmba mweke wa gũthuthuria wĩtĩkio witũ na njĩra ĩtarĩ ya ĩmwe kwa ĩmwe.—Gũcok. 32:2.
4. Tũngĩhũthĩra atĩa icunjĩ icio kwĩmenyeria?
4 Wĩmenyerie na Ũmenyerie Arĩa Angĩ: Ũgĩthoma icunjĩ icio, rora ũrĩa maandĩko na ngerekano ihũthĩrĩtwo, o hamwe na njĩra ya mũhunjia ya kũruta ihooto. Wĩrute na ũrĩa mũhunjia araranĩria na mwene nyũmba. Ũcoke ũgerie kũhũthĩra njĩra o ta ĩyo ũtungata-inĩ. (Thim. 1:5; 9:9) Mwarĩ wa Ithe witũ ũmwe oigire ũũ: “Gũthoma icunjĩ icio, no ta kwĩruta na painia ũrĩ na ũmenyeru mũingĩ, ũrĩa hingo ciothe amenyaga ũndũ ũrĩa agĩrĩirũo nĩ kuuga!”
5. Tũngĩteithia atĩa arutwo aitũ a Bibilia kwĩmenyeria kũhunjia?
5 Ningĩ no ũhũthĩre icunjĩ icio gũteithia arutwo aku a Bibilia kwĩmenyeria kũhunjia. Thomai gĩcunjĩ kĩu mũrĩ hamwe, na ũreke mũrutwo wa Bibilia athome gacunjĩ ka Mũira wa Jehova. Mweka ũguo, arutwo a Bibilia nĩ mekwĩmenyeria njĩra ĩrĩa njega ya kwaranĩria na andũ. (Kol. 4:6) Ma nĩ atĩ, icunjĩ icio nĩ njĩra ĩmwe Jehova arahũthĩra gũtũteithia tũhote ‘kũhingia ũtungata witũ wothe.’—2 Tim. 4:5.