Kũhaarĩria Ciugo Njega cia Kwambĩrĩria
1. Nĩkĩ nĩ wega kũhũthĩra ciugo njega cia kwambĩrĩria?
1 O ta ũrĩa indo cia kuongerera irio cama itũmaga mũndũ erirĩrie kũrĩa irio icio, noguo ciugo njega cia kwambĩrĩria itũmaga mũhunjia agĩe na ndeereti njega ya Bibilia na mũndũ. Hingo ciothe ciugo njega ibataraga gwĩcirio na kũhaarĩrio kabere o ta ũrĩa mũndũ abataraga gwĩciria kabere akĩhaarĩria irio irĩ cama. Gĩtũmi nĩ tondũ ciugo icio no ikorũo irĩ na ũraihu na maũndũ matiganĩte. (Thim. 15:28) Tũngĩhaarĩria ciugo njega cia kwambĩrĩria atĩa?
2. Tũngĩhaarĩria atĩa ciugo njega cia kwambĩrĩria?
2 Hũthĩra Ũhoro Ũragucĩrĩria: No mũhaka ciugo citũ cia kwambĩrĩria igucĩrĩrie mwene nyũmba, kwaga ũguo nĩ ekũrega gũtũthikĩrĩria. Nĩ ũndũ ũcio, wĩcirie kabere ũhoro wa maũndũ marĩa marathĩnia andũ a kwanyu. Hihi andũ acio marerirĩria kũgĩa na thirikari njega, famĩlĩ irĩ na gĩkeno, kana kũninĩrũo mbaara? Tondũ andũ nĩ meendete kwĩyaaria, haarĩria kĩũria gĩgũtũma mende kũruta mawoni mao. Hihi no ũrute ũhoro mũna wa kwambĩrĩria kuuma thĩinĩ wa Ũtungata Witũ wa Ũthamaki na ũũhũthagĩre gĩcigo-inĩ kĩanyu? Githĩ rĩmwe na rĩmwe to mwĩmenyerie njĩra cigana ũna cia kwambĩrĩria ndeereti hĩndĩ ya hwaĩ-inĩ wanyu wa Ũthathaiya wa Famĩlĩ?
3. Tũngĩgarũrĩra ciugo citũ cia kwambĩrĩria atĩa nĩguo ciagĩrĩre andũ a itũũra ritũ?
3 Wĩcirie Ũndũire na Mĩikarĩre ya Andũ: Nĩ kũrĩ kũndũ twĩrĩgagĩrĩrũo tuge o na ihenya kĩrĩa gĩatũma tũceere. Kũngĩ nakuo mũgeni angĩaga kwamba kũũrĩrĩria mwene nyũmba maũndũ make, oonagwo atarĩ na gĩtĩo. Matũũra-inĩ mamwe nĩ tũkoragũo na wĩyathi wa kũhũthĩra Bibilia tũkĩambĩrĩria ndeereti tondũ aikari a kuo nĩ a ndini cia Gĩkristiano. (Atũm. 2:14-17) O na kũrĩ ũguo, handũ ha gũthoma Bibilia hĩndĩ ya iceera rĩa mbere tũkĩhunjĩria arĩa matarĩ a ndini cia Gĩkristiano kana arĩa matarĩ a ndini o na ĩrĩkũ, nĩ wega kũmĩthoma rĩrĩa tũramacokera.—Atũm. 17:22-31.
4. Twagĩrĩirũo kũririkana ũndũ ũrĩkũ wĩgiĩ ciugo citũ cia kwambĩrĩria?
4 Ciugo cia Kwambĩrĩria: Haarĩria wega ciugo ciaku cia kwambĩrĩria. Ciugo nguhĩ na irataũkĩka wega nĩ cio njega makĩria. Njĩra ya kwambĩrĩria ĩrĩa tũkũhũthĩra o nayo nĩ ya bata. Aria kuuma ngoro ũcanjamũkĩte nĩguo mwene nyũmba one atĩ nĩ ũrakenio nĩwe. Kũrũmĩrĩra maũndũ macio nĩ gũgũtũteithia kũhaarĩria ciugo njega cia kwambĩrĩria iria ikũgucĩrĩria andũ gĩcigo-inĩ gitũ moke ‘metha-inĩ ya Mwathani.’—1 Kor. 10:21.